AGER KVDVNG 20
20
Makedonia:pclang Akaia:pc
1Cdc jcngka:mvnsunamdc gvbatnammc, Poulbv agom tadjvgla gvmvnnc kvdv:dok lcgangc mclvgto odokkc bulum luyirge:la bulum mcto odokkc Makedonia:pc gvkang. 2Odo mo:takdo:pc bv cdvlo gvtonc odokkc bulum airu:pc lusv:lvgnamcm lutonc, bv Girikpc gvto, 3Odo bv po:lo pvwumko du:to, odokkc Jiwukvdv:d bvk birudi:pc ru:suko ru:tonc bv Makedonia:dok gvlatla gvkupc cmna mc:scgto. 4Biroia:dok Sopaterbv, Pirhuskc awodc, bvm gvjonto; odokkc Tissaloniang kvdv:dok, Aristarku:bv odokkc Sekundu:bv; odokkc Derbi:dok Gaiu:bv, odokkc Timoti:bv; odokkc Asiang kvdv:dc, Tikiku:bv odokkc Tropimu:bv.
5Troa:do cdcbulu cdcmpc ibomkang odokkc. 6Cmpige:la ngolu Pilippi:do:pc konggcto Komirang Ilvgma:pc monam Pitang dododok lcdudo, odokkc longo lcdulo ngolu bulukkodo:pc Troa:do:p gvto, okolo ngolu longc kvnvdkopc du:tedtoji.
Poulkc Troa:dop Lcddarkc Gvnam
7Longc kvnvddok a:pongarnc longcdo, cdvlo ngolu lckopc pita:dcm penporkapc gvkumsuto, Poulbv bulum luposuto, longkondo gvpakkupc cmna mc:la; odokkc yumc kvdvsudodo:pc bvk agomdcm lutvto. 8Taycngkc soyar dungkodo okolo ngolu gvkumsula dungaji bojcrungko saki:yc dungai: 9Odokkc ya:me: ko:ako Iutiku cmna amin minnamko kiriki:do tedla dungai. Poulbv odosin agom lutvla lubarla du:dodcm bv kvnggv:pc yubla yubngaksukang; odokkc yubla yubmotsula:yam, bv awumko tola mosa:nam tayc:dokkc kcdledkang odokkc sidopc la:sa:toku. 10Ckvdaggom Poulbv gvikang odokkc bvk tayc:do ogcmto odokkc bv gongabge:la luto, “Nolu kabyok, kapila:nc bv turra dung.” 11Odokkc cdvlo Poulbv gvsangkangkuji odokkc pitangcm penporge:la dotonc, bv buluk lcdulo bojc ayirkopc luposuto, pvang pvkuma:sisscm, odokkc cdcmpc gvkangku. 12Odokkc bulu cdc ko:dcm turpc gvbokangku, odokkc kvnggv:pc mc:pomcngankang.
Troa:dokkc Miletu:do:pc
13Cmpige:la siycng ollu:do:pc gvlenna gvla ngolu Asso:do:pc ko:la gvto, Poulmc olo gva:mopc cmna mc:la; kapila:nc bv cdcmv:pc mosv:sutagai, avdc amo:dok gvpc cmna. 14Odokkc cdvlo bv Asso:do ngolum rvgsutonc, ngolu bvm a:moto odokkc Mitilene:pc gvto. 15Odokkc odokkc ko:la gvla ngolu longkondo Kio:dok kekondo:pc pv:to; longkondo ngolu Samo:do:pc konggapto; odokkc odok longkondo ngolu Miletu:pc gvto. 16Kapila:nc Poulbv Ipesu:dcm mcge:la ko:la gvpc cmna mc:to, odomvloyam Asia:do ayircm gvdopc dungge:mang cmna; kapila:nc Jerusalemdo dungkupc lomdvlomra:la idungai, gvla:mvlo, yingo longc dopun-dojardo.
Poulkc Ipesu:dok Abv:nc Kvdv:dcm Lutcr-lunam Agom
17Odokkc Miletu:dokkc Ipesu:do:pc tani:ycm mclvgla mondoli:dok abv:nc kvdv:dcm goglvgto. 18Odokkc cdvlo bv bvkkolo:pc gva:toji, bv bulum luto:
“Nolu avkvdv:dc kindag jc Asia:so:pc allcm tua:do longcdokkc kapc du:to-dagtoji, 19Ru:tumkc agercm asin ansvngo:la gerla odokkc migsi dvla odokkc Jiwu kvdv:dok ru:la ru:sula inam ager kvdv:dokki ngokkolo pa:la; 20kapc ngo ainc av kanc agomko lugo:bipc nolukkolokkc ngedsuksutoma:ji, odokkc appvngkc kangkolo odokkc noluk okum okumlo gvgo:la luyirtonc, 21Jiwucmnang Girik kvdvng anyipaklo Ru:ncpvnc kolo:pc asinc mc:dvrra mc:latsukunammcm nang Ru:tum Jisu Kristokolo mc:jvgnammcm. 22Odokkc su:pak ka:toka, ngo Jerusalempc gvdag, Yalodok gvbokammcmpc gvla, ngokkc kapci iycsong olo cdcm kinma:pc; 23Angunnc Yalodc ngom nogor appv:lo makana:lo tumnamcmlang ipusire:yc toya:la dung cmna lubinamdcmma:mvlo. 24Cmpige:la ngok turnamscm ngo atv arckanckopc kvsumang cdcmanggom ngokkcpc kvnggv:pc aincko cmna, ngo gerpcnamdcm gerra:mvloi odokkc Ru:tum Jisukolok pa:nam inam-sa:nam agerdcm, Ru:ncpvnckc ayang abodok tadpon lutaddcm lukanbipc. 25Odokkc su:pck, ka:toka ngo kindag jc migom doko mo:pvdok agomdcm sc:ko noluk ara:lo lutadgo:bitonc ngok migmom lckoda ka:begkuma:ycbong. 26Cdcmpidag ngo silo longcso nolum lukanbidung jc ngo noluk appvngkc i:lokkc narc:nc, 27kapila:nc ngo Ru:ncpvnckc appvng ru:su-pa:sunammcm nolum lubinamdcm ngedkud sutomang. Nolu avkvdv:dc avkvdv:dok lcgangc ansulangka odokkc noluk appvng kcrc:dok lcgangc, 28okodo Angunnc Yalodcm nolum kanggabya:ncpc itu:ji, Ru:ncpvnckc mondoli:dcm ka:sv:mosv:dopc okodcm bv Avkc Awodok i:kokki pa:tokuji.” 29Ngo kindag jc ngok gvpakdoku lcdulo aima:nc ra:ng ikiyc noluk ara:lo duga:ycpc, kcrc:dcm aima:ru:pc iycpc; 30odokkc nolukkolok avyvngkolokkc tani:kvdvngc lenna tu:ladnc agomcm luyc, buluk lcdulo:pc mc:jvgnc gvmvnnc tani:kvdv:dcm gvpakdopc cmna. 31Cdcmpidag ansu-ka:sutoka, ngo:jc dv:tak tagumkopc yummcm longgcm appvngcm migsidvla ainc agomcm luyirka cmnam mc:pa:tvla.
32Odokkc Bvk ayang abonamdok agomdo:pc tolvgdung, okodc nolum mosa:pc mosa:ladagji odokkc nolum sc:kobulum narc:pc mopu:tonc buluk du:tcngcm du:bomdopc imola:dagji. 33Ngo sc:kkai murkongcmba: avncmba: ainc gcnam attarcm ka:bo-mc:bomang. 34Nolu avdc av avkvdv:dc kinsudag jc sc ngok alagsc ngoluk manam kvdv:dcm la:lenamto, odokkc cdcm ngok lcdulo du:mvnnc kvdv:dok lcgangc. 35Cdc appvng agerdo ngo nolum lcngkanto jc cdcm ager gertu:la akonc opanncdcm ka:dumsupa:ru:do, Ru:tum Jisukc agomkvdv:dcm mc:pa:la, kapc Bv lutoji, “Torvgsunamdcmyam binamdc ayang pa:ya:nammc.”
36Odokkc cdvlo bv cdcmpc lutoji, bv lcbvng tuma:to odokkc buluk appvngdok lcdulo kumto. 37Odokkc bulu appv:dc kapto odokkc Poulmc gongabto odokkc dosukto bvm, 38appv:dc:i mc:dvrra bvk agom lunamkvdv:dok lcgangc jc bulu lckoda cdvlosin bvk migmom ka:begkuma:bong cmna. Odokkc bulu bvm ja:j ollu:do:pc gvlennvgto.
सध्या निवडलेले:
AGER KVDVNG 20: MISIBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
