THRÜNTAN 9
9
Noa kheak Thrünpuhnü Tangzüngkhi
1Jumonü Thrünpuhnü Noa tüsho atsührübo müngühjih, tüsho arü ki tha: “Aso asode wüh buang, tüsho alomi mide kamang. 2Tüsho alomi shiwüh, thüning wuhnu, alo kheak abübe tüsho keto ngüh alala kheak nüsa trekhi labah. Arübo nüsa khah ching jihdo. 3Aphapde rhangdung lakhi lüpdükhi nüsa thsungkheak tsühyungbe labah. Sangrung phüyakbo alala inü nüsa kilim jihdo. 4Tüshe nüsanü rhangdung-thiyih bede shih mütsühbeah. 5Tüsho nüsa rhangdung-thiyih thsungkheaknü tsükjide inü ju dün kheangbah. Shiwüh tüsho mihtsürü aban kheaknü akheangbah. Mihtsürü aban kheaknü nihbuh keoniorü rhangdung dün kheangbah. 6Shepünü mihtsürü thiyih bukbanü, mihtsürünü api thiyih bukshihbah; tümüde Thrünpuh kiphahkhi ching mihtsürü ju thrün. 7Tüsho nüsa thsungkheaknü, tsührü laang tüsho wüh buang; alomi ching hihde kamshang tüsho bushang.”
8Judüki Thrünpuhnü Noa tüsho atsührübo ki tha: 9“Kheakü inü nü tüsho nü dunglim nü tsühsoniusobo kheak I tangzüng thsüchoh, 10tüsho nü lung lakhi loriloko aban kheak: wuhnubo, akam-shiwüh tüsho nü lung sangkung chingnü wukhiukkhi alomi shiwüh alala. 11Hanangde nüsa kheak I tangzüng thsüchoh: kheaküa küyimkishe rhangdung alala kekingnü müdükheakshih; alomi dükheakshihpü kheaküa keking mülalo.”
12Tüsho Thrünpuhnü tha, “Ha I le nü, tüsho nü lung lakhi loriloko alala dükeak inü tangzüng thsükhi amütsan, arübe lünbo alala thsungkheak lah: 13Inü I yo mürechin amobo ching zolah, tüsho ha I le alomi dükeak tangzüng amütsan labah. 14Küyimki inü alomi kumung amobo hande arübah ju ching mürechin akhiukbanü, 15inü I le nü tüsho rhangdung labe loriloko mungji alala dükeak I tangzüng lümkhitbah. Rhangdung alala dükheakshihpü küyimkishe keking malodarü. 16Küyimki amobo ching mürechin akhiukbanü, inü ju kheahbah tüsho Thrünpuh le alomi kheak rhangdung lakhi loriloko mungji alala dükeak akheam müla I tangzüng lümkhitbah.”
17Jumonü Thrünpuhnü Noa ki tha, “Ha I tüsho alomi kheak rhangdung alala dükeak inü athsükhi tangzüng amütsan ah.”
Noa tüsho Atsührübo
18Sangkung chingnü awukhiukkhi Noa tsührübo ju Shem, Ham, tüsho Japheth. Tüsho Ham ju Kanan abuh lakheah. 19Harü mahsam ha Noa tsührübo lakheah, tüsho harü kheaknü alomi alala bude yü.
20Noa thulu thsürü thsüpü tankih, tüsho apinü kurungasolu thsü. 21Judüki api yukhu yungbah müshang, tüsho anihbuh khimyam ching bünkeang lakheah. 22Tüsho Kanan abuh Hamnü abuh bünkeang lakhi ngübah wungdo ching api keoniorü mahne ki tha. 23Tüshe Shem le Japheth bünenü ane ngam kheak khim züngkih-a lubah dunglimnü ashitde yünü arü abuh bünkeang lakhi phudojih. Ane miro anguhabah tüsho anenü arü abuh bünkeang lakhi müngü. 24Küyimki Noa amüshangkhi chingnü asürükhea, atsührü akheambuhnü api kheak tümü rhimokheanü mükheahde kam.
25Apinü tha, “Kanan muthrumünean thsang;
api keoniorübo ki akheamkhibe azhorü thsübah.”
26Kheaküshe apinü tha,
“Shem Thrünpuh, Atungpuh shiang!
Kanan a Shem azhorü thsüshang.
27Thrünpuhnü Japheth lomi mükahde kamshang;
Japheth a Shem khimyambo ching lashang,
tüsho Kanan ju api yo azhorü thsüshang.”
28Keking dunglim Noa kam 350 la. 29Noa kam alalanü 950 lakheah, tüsho api sheabah.
सध्या निवडलेले:
THRÜNTAN 9: YIMCBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.