Ranehlö 13
13
Hakösngenre Ang Lòt Tö Aprāham
1Kiröönngöre ngaich Aprām nö ṙā-ang Aikup, angā-aṅ tök pīhö ò, ṙòkhöre inrē nup aṅ in ò, hol ò inrē Lòt nö chuh lā lòhngö.
2Ngaich Aprām nö kôlò tö nuā, rupīö, humlum inrē. 3Ngaich iṙūöhöröön anga-aṅ nö im kinröönngöre nö löktö lā lòhngö nö chuh Pētĕl, ik chūökö ichūök ök inrūkui ò sin misī ik raneh, ihôi Pētĕl tö Ai; 4Ik chūök ök tahāklö, ök vahī tö ò nö umuh ik lā urĕh: ngaich in e Aprām nö havëkö minë-eny ngam Mā Tēv. 5Ngaich Lòt inrē, ök holröön Aprām, nö pōyen nuā, pököre, inrūkui inrē. 6Ngaich ötkô-òre ngam panam nö chūök u, hòṅ cha öre nö hēngrechūök nö iyöng: pòn pōyen nuk inlānen cha, lökten cha nö ötkô nö holtöṙahre nö iyöng. 7Ngaich yik yōm nuā Aprām töyik yōm nuā Lòt nö harāinyngen höö: iyöng im panam nö ngaich yik aṅ kanā-an töyik Perisāit inrē.
8Ngaich ngöṙô Aprām tö Lòt, Vë-ekūö meh chin; tā-a un inrāinynguvö yēḵ ihôi hā tömeh töchu inrē, ihôi vē yōm nuā chu tövē yōm nuā meh; tön hanöngkisānöre an. 9Röh öng ngam panam nö keuheūtlöre nö ikūö meh? Vë-ekūö meh chin, haköhngenre man yēḵ tö chu: yē meh hòṅ kēḵ ngam lā tavē, ngaich kū-ö tö lā hāmö chū-ö kiröönngöre; hēk yē meh kēḵ ngam lā hāmö, ngaich kū-ö tö lā tavē chū-ö kiröönngöre. 10Hachônglö matre ngaich Lòt, ngaich meuk ngam töṙā-akūö panam i Yôtön, nö ṙòkhöre, tö e nö tömāku keuheūtngöre chūök, urēhĕkūö tī ngam Mā Tēv nö piyāingen Sòtöm, Kômòra inrē, sā ngam panô-òṅ ngam Mā Tēv, sā ngam panam Aikup, yē meh kū-ö tö Sōār. 11Lökten Lòt nö atöllenre töm töṙā-akūö panam Yôtön nö ṙòkhöre; ngaich chuh lā chuhöt Lòt: ngaich chā-a nö kö haköhngenre tö höö. 12Iyöng im panam Kanā-an ang Aprām, ngaich ang Lòt nö iyöng i nup el panam ngam töṙā-akūö, halaingö inrūkuire ngaich nö tölngö Sòtöm. 13Ngaich pöri yik tarik aṅ Sòtöm nö tötlöök, tösaṙaklöng nö tököölöfālen nö lā-al ngam Mā Tēv.
Kū-ö Tö Hepròn Ang Aprāham
14Ngaich ngöṙô ngam Mā Tēv tö Aprām, unôichrit Lòt nö haköhngenre tö ò, Hachônglömatre man, löktökūö im chūökre ngëicha, kū-ö tö kapā, kū-ö tö lòhngö, kū-ö tö chuhöt, kū-ö tö sūng inrē: 15Tön ṙòkhöre an ngam panam ngam tömeūkö tömeh, kēḵtö e Chin min in meh, ip kūön meh inrē nö tö-örheūheu. 16Ngaich Chū-ö min vīlö öp kūön meh nö sā pinṙōngö ngam tumlat: hòṅ e yē öp tarik nökô nö kaheūk pinṙōngö ngam tumlat, ngaich min inrē nö kaheūkö nö kūön meh. 17Chōholre, tufunngö ngam panam kirööngöre irôta e iṙôktāk e inrē; tön in meh tī Chin min kēḵtö e. 18Halaingö inrūkuire ngaich Aprām, yih ngaich, ngaich iyöng inuk tarpin chōn i Mamrī, ök i Hepròn, ngaich umuh nö vīlö tahāklö ngam Mā Tēv.
सध्या निवडलेले:
Ranehlö 13: CANIBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.