LUK 22
22
Jisu Jühen Showpü
(Mt. 26:1–5; Mk. 14:1–2; Jn. 11:45–53)
1Shaang Daw Neshihpü Aan Mo mepa kü Hompü Mo shei nyük, ha yopailei nyu. 2Ngongpathü hatü shahkung nyuhbüthüi Jisu jühen lem yemei nyu; mehenangkü jomi nanglak kü nyemei nyu.
3Hahepak kü Judas, üpa kü Iskariot shei nyük, büpa anpünyi khongkü hük, büpa kü kahshih shüteke. 4Büpa daiyei ngongpathü hatü phopshem leipü veshan lakchongpathü mü mekei etü büpai jomphong kü büpa luhahhen shah shetteke. 5Jomphong longi mongongei büpa kü lop shuohhen etei. 6Hanangkü büpai ha kü mongei khongnyü neshiüpü hepak kü jom kü büpa yepei yuhen hepak meipü veiyei pangteke.
Hompü Mo Tempülempü
(Mt. 26:17–25; Mk. 14:12–21; Jn. 13:21–30)
7Hahepak kü Hompü mi jakpü moila shuohhen Daw Neshihpü Aan Mo ngoiteke. 8Hanangkü Jisui Peter hi Johan nyi kü, “Daituh, jen shingvaishi Hompü Mo hahhen temtuh” shei etü shom. 9Jiji-i büpa kü, “Henji-i hayü melei nyemtemkei shei deihpa?” shei phe.
10Büpai jiji kü, “Bangtuh, mechem anji chingnyülei peihenshang, shennyak hük yungdük chantü anji-i heühen; büpa shüpü shemei müei shütuh, 11hatü shem shembü kü, ‘Ngei ngelei nanglomthü mü Hompü Mo hahhen yen ngoiteipü dung melei nyüpa? shei nyuhbüi phenyüke?’ shei etuh” shei eteke. 12“Büpai anji kü jaandokei dung hük meishi temtüktü huphahen. Jen shing halei mo temtuh” shei e. 13Hanangkü jiji daishingkü büpai jiji kü epükei lemphü dangteke hatü halei Hompü Mo tem.
Shembüpa Mo
(Mt. 26:26–30; Mk. 14:22–26; 1 Kor. 11:23–25)
14Mechem hepak ngoipa, Jisui büpalei nanglomthü mü nükdülei uo. 15Büpai jomphong kü, “Ngei shangponghen shekü amphong mü hapa Hompü Mo hahhen naei nyupeih. 16Mehenangkü ngei am kü enyeih, Kahvang ongching kü ha mangdhaüm thahshi ngei neyei ha nehahhen” shei e.
17Büpai yungshong yah, hatü menvih shuohpheikü büpai e, “Ha yahtuh, hatü amphongi hanteituh; 18mehenangkü ngei am kü enyeih, shaang mü leitü Kahvang ongching mangpei thahshi ngei nyalingngupai yiü neyinghen.”
19Hapheikü büpai aan hük yah, hatü büpai menvih shuohpheikü büpai ha bhaok, hatü jomphong kü ha shuoh-ei e, “Hapayü am shingvaishi shuohpü ngelei büm. Ngei deih-ei dangei hahtuh.”
20Hapa hahpheikü aihük mü büpai yungshong yah-ei e, “Hapa yungshongü amphong shingvaishi yenpü ngelei iy kü vangteishuwteipü ja hük. 21Shejao veituh, üpai ngei luhahhen, büpa ngei mü nükdülei hahnyüke. 22Mehenangkü Shennyak Hayü temei nyupükei daihen, shejao üpai büpa luhahhen büpa onyükei!” 23Hapa dükhenü jomphong khongkü üpaang shei jomphongi pheteiyei pang.
Longpü Vaihen Dokteipü
24Jomphong khongkü üpapa peü mü longpü vaihen shei jom jom shah dakteiyei nyu. 25Shejao büpai jomphong kü, “Kung amei ongthüi nanglak shak kü shembü vainyeih, hatü jom shak kü vanglem lempüthü kü, ‘Sheühbü’ shei nyüknyeih. 26Shejao amphong keyü hapakei nevai; amphong khongkü peü mü longpübayü peü mü naü-eepa leihen, hatü mübüyü chongphobü kei leihen vongbong. 27Nükdülei uopü shennyak hi nevaijü nemnopü shennyak üpapa longpüang? Nükdülei uopüba nevaipü je? Shejao ngeiyü amphong mü nemnobü hük kei nyüpeih” shei e.
28Ngei shanghahpü yangkü ngei mü nyupeyü amphong; 29Opa-i ngei kü ongching hük shuohpü keiha ngeiyao amphong kü ha shuohnyeih; 30shejüang ammi ngelei ongching kü ngelei nükdülei hahhen yinghen aokhen, hatü ammi Israel jat anpünyi kü shahphenei uohen.
Peteri Jisu Nelahhen Jung Tetnyüke
(Mt. 26:31–35; Mk. 14:27–31; Jn. 13:36–38)
31“Simon, Simon, bangtuh! Kahling ami hahbhang shaaptükpükei amphong kü dokhen Kahshih-i mongpü yahlangtih, 32shejao nüng vaipü kübü nevüdaihen shingvaishi ngei phoptepih, hatü mechem nüng ngei touei lepei leihenshang nüngi jeihinaüthü wong kohhütuh.”
33Büpai büpa kü, “Shembüpa, ngei nüng mü khoklat hatü dipü thahshi daihen temei nyüpeih” shei e. 34Jisui büpa kü, “Ngei nüng kü enyeih, nüngi ngei nenying shei jempa manglah thahshi sheya ou nekapih” shei e.
Loptuw, Khoung hatü Yanlu
35Hahepak kü Jisui nanglomthü kü, “Mechem ngei amphong loptuw, khoung hatü yanlu neshiüi shompa, amphong mepaiyao taoei nyula?” shei phe. Jomphongi “Meheyao taoei nenyu” shei e. 36Büpai jomphong kü e, “Shejao shaangü üpai loptuw ang, büpai ha yahtuh hatü khoungao kotuh, hatü üpai yanlu ne-ang büpai laophülei ashak yutao hük shaktuh. 37Mehenangkü ngei am kü enyeih, ‘Büpayü shahkung mangpüthü mü chemi ieteke’ shei laihingi epü hayü ngei kü dhaümhen, hatü ngei jung mehe nyangei nyu, ha dhaümteke.” 38Jomphongi, “Shembüpa, hatouei yanlu nyi nyüke” shei e. Büpai, “Hapai changteke” shei e.
Jisui Olive Kahshangei Phoppü
(Mt. 26:36–46; Mk. 14:32–42)
39Büpalei vanglem keiha büpai ching tuhtü daiyei Olive Kahshangei aong, hatü büpalei nanglomthü büpa phei mü. 40Mechem büpai shing ngoipa, büpai jomphong kü, “Dohpü hepak kü nevühen shingvaishi amphongi phoptuh” shei e. 41Yaong shükjü daipüshük büpa jomphong toueipü yanei daiyei aümei shatü phopei, 42“Opa, nüngi mongjema hapa yungshong ngei kübü chailangshih; shejao ngei mongpü nevai, nüngi mongpü düktuh” shei e. 43Hahepak kü vangsho leipü vangsho phongshan hük büpa touei vamei büpa kü wong shouh. 44Büpa mongshangpai nyeinya lanei shuoh-ei phop, hatü büpalei lem-ow kahdokei iy shühpükei leiteke.
45Mechem büpa phoppü kübü yaongei nanglomthü touei leijapa, mongshangpai jom peü shidaitü nyu, 46hatü büpai jomphong kü, “Amphong mehekei shinya? Paotuh, hatü amphong dokpü hepak kü nevühen shingvaishi phoptuh” shei e.
Jisu Yeppü
(Mt. 26:47–56; Mk. 14:43–50; Jn. 18:3–11)
47Mechem büpa shah eyei nyupa, khongnyü longpü hük pei, hatü anpünyi khong kü hük, Judas shei menpü shennyaki jomphong müei pei. Büpai Jisu touei heih-ei büpa kü ju kü jüp, 48shejao Jisui büpa kü, “Judas, ju kü jüptü nüngi Shennyak Ha yuhahnyu je?” shei e.
49Mechem büpa phei müpüthüi mehe vamhen ha eepa, jomi büpa kü, “Shembüpa, hami yani bapshahnyu?” shei phe. 50Hahepak kü jomphong khongkü hüki ngongchongei aalei lakdahphi dhaong yani lüktük. 51Shejao Jisui, “Hajük kü tah!” shei e, hatü büpai büpalei dhaong kü düktü meihü.
52Hahepak kü Jisui ngongpathü, phopshem leipü veshan lakchongbüthü hatü büpa touei peipü behethü kü, “Ngeiyü gühpa hük keiha amphongü yanlu hatü miyaung notü peikünyu je? 53Mechem ngei nyihjeih am mü phopshemei nyupa, ammi ngei kü lak neshih. Shejao hayü ammi dou dükhen hepak hatü shangmangei wong” shei eteke.
Peteri Jisu Nelahpü
(Mt. 26:57–58, 69–75; Mk. 14:53–54, 66–72; Jn. 18:12–18, 25–27)
54Hapheikü jomphongi büpa yepei ngongchongei shemei müei dei. Shejao Peter payü khaatshi müei dai. 55Mechem jomi chingkon jiamei aw jaktü chemi uopa, Peter-ao jomphong mü nyu. 56Hahepak kü chongphopü nela hüki awha kü büpa uoshi eeyei pinnyüi büpa kü hüngei veitü, “Hapa shennyakao Jisu mü nyuhampeih” shei e.
57Shejao Peteri, “Nyüha, ngei büpa nenyingnyih” shei nelahaoki e.
58Kansho hük angpheikü hanei ami Peter nyingei, “Nüngao jomphong khong kü hük hih” shei e. Shejao Peteri, “Shennyak, ngeiyü nevaipih” shei e.
59Hapheikü ghonda hükshing angpheikü shao-üng lebü hüki nedoh-i, “Hingmei, hapa shennyakao jomphong khong kü hük hih; mehenangkü büpayü Galil am khih” shei e.
60Shejao Peteri, “Shennyak, nüngi mehe jung enya, ngei ha jung nenying!” shei e. Hahepak kü büpai ha shah eyei nyushingkü ou gateke. 61Shembüpai yaakei Peter kü hüngei vei. Hahepak kü Shembüpai büpa kü, “Ou gashekü nüngi jempa thahshi ngei nelah-aokpih” shei eshuohpü shah deih-ei dang. 62Peter vamei daiyei shahyaki thep.
Jisu kü Eelapü hatü Üppü
(Mt. 26:67–68; Mk. 14:65)
63Shaang üamphong Jisu yomei nyu, hathüi büpa kü eela hatü üpteke; 64Jomi büpalei mük shümtüktü, “Nüng kü üppü üpashang nyingtuh” shei eteke. 65Jomi büpa kü lebü yaüshah longi e.
Jisu Shahtapei Yaongpü
(Mt. 26:59–66; Mk. 14:55–64; Jn. 18:19–24)
66Mechem vangngaipa, behethü, ngongpathü hatü shahkung nyuhbüthü chemi thai, hatü jomi büpa shahtapei müei dei. 67Jomi büpa kü, “Nüngü Messiah vaijema ham kü eshih” shei e. Büpai, “Ngei ephüjao ammi ha kü hingnelemhen; 68hatü ngei am kü phejao ammi ngei kü shahnyok neleihen. 69Shejao shaang mü leitü Shennyak Ha Kahvangei ngan kü lakdah philei uohen” shei e.
70Jom peüi büpa kü, “Shejema, nüngü Kahvang Ha je?” shei phe. Büpai jomphong kü, “Ngeiyü ha khih shei ammi enyüke” shei e. 71Hahepak kü jomi, “Ha mü lenei mehe denpü nahen? Büpalei ju kübü epü jeni danteke” shei eteke.
सध्या निवडलेले:
LUK 22: PHOMBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
