Éxodo 34
34
Nacoaauneein rai rauhi bachasinetiha Cana Coaunerane
(Dt 10.1-5)
1Niritiin jetaote:
“Nii jauriaanejeein nenaalu rijijieein, ii raajenihane coroatajaain ajeri caje nenaa tabara moloo. Aihane que teein, taolu tatutatuhin iicha joailu tabara que, jauriaanejeein laenanohineein nihalune rijitojoeein, que teein erenaa laenae. 2Chaaen chajaain eresi janone neruujueein neeute, janohetiin Sinaai bichatane ucuuno que iniin, caatiha neeotiha uhi. 3Niei chuni ii jiniichaain iniha unaa nainihei, chuni coaana jerinaaun, satiin nii ichatane ucuuno que. Chaenchu, nii chuni, carenero, baca, naaonjoainuri nii ichatane ucuuno que omane quiha unaa nainihei”, nae jetao, Moisesa rai Cana Coaunera.
4Nii jaun jetaote, nii jauriaanejeein nenaalu tabara rijijieein jetao, ajeri caje coroatajaain nenaa tabara molohe Moisesa. Nii cojoanoo janohetiin jetaote, nii coroatajai tabara amaain jetao, nii rai aitoha Cana Coaunerane rijijieein Sinaai bichatane ucuuno que jetao, iniha cue Moisesa. 5Inaen nitohaneein inihane jana jetaote, aiha dede sacarine rijijieein, nii ichatane ucuuno fauhin jetao, rai curuaa coitucuherate, ecu Moisesa aina neein Cana Coaunera.
6Nitohaneein jetaote, tonijiaain:
“Canune inara Curuaanaa inara Coaunera nichaaune, canu counujera lateneeun. Enaachane cairichaaojoaain cachaauru coaraaun, chatoanai ichaa cachane nihanatiin cojoaain, jataain cachaauru belaitoon nohanelanaala. 7Oharaanca saneein nichoala teeuruhane nihanatiine chariji bana satonohe lanaala cachaauru belaitohanune jaun coroatajanereeunni, baaso ichaain quere tonoraelanaala osaaonacaauru, naaonjoainuri quene casuujua acatereeunni. Nena laen, cha ujuaihoneein nenaa casetecareeuni. Jerichanejeeinachu acaauru inacaauru, acaauru calaohichuru, acaauru ichoalacuru, acaauru ichoala ichoalacuru, acaauru inamacooru, naaojoainuri baaso icharaauru casetecareeuni”, naain Moisesa acatiha situha cuha Cana Coaunerane rijieeoritiin jetaote, 8atane que couturi turuanacanejeein nenoracaain jetao:
9“Canu Curuaanaa, esinae rauhijiriin ii suujua rijijieein nihanune coitucuhine, canacaanu corihaneeun. Esinae rauhijiriinte chuisi erenaa tonoraelanaala, necha ansaineein neeure caa cachaauru. Nena laen ichei aitoon baaso ichaain osaaotiin nihacaanune jaun, ii cacha nichaanune que ii suujua acateeine coina”, naain jetao Cana Coaunera coroaje Moisesa.
Niicha ichanenu bachasinetiha Cana Coaunerane
(Dt 7.1-5)
10Niritohane jana jetaote:
“Caohachaain caa ena ichei aitocoaaunne aonaaun. Satiin ii cachaauru raine quiicha ichanenu que aitoreeuni ena. Chariji bana caa atane que nenacaauru leeocha cachaauruhacha coaraai cojoelanaacojoaihurine ichareeuni, satiin nii cachaauru neeichene jaacurute, canu inara Curuaanaa nichaaune cojoelanaacojoai ichacaaunne coaracururein. Jataain cojoelanaacojoai inara rai ichareeuni.
11Caa ena inara rai aitocoaaunne tonoraauche, inara roaichu cajene, amoreeocuru, cananeeocuru, ititiacuru, Fereseecuru, ebeocuru, Jeboseeocuru, naaonjoainuri sitareeuni. 12Jioanriha nii atane que ichaonacaauru aina chatoanai ichana coacuhin neeichene, baaso ichacuruhane aina cuaain, acaauru rijijieein neeichene coataa. 13Nitohaneein acaauru aina chatoanai ichana coacuelanaala, nii ajeri caje nenaa acaauru rorihuru itajeeuche, nii jataain acaaururai nelateineein nenaa, acaauru chosichuru rijijieein nenacaauru enuhacuru aina ajerichuru itajeeuche. 14Jioanriha leeocha chosichuru coroajeein neeichene, inara Coaunera nichaaune, leeocha cacha aina najasiiteein neeichene jerenihanune jaun. Rai curuaate nejelau cacha que najasiiteein niha cacha jerihei Cana Coaunera nae.
15Jiaonrihachu, nii atane que ichaonacaauru cachaauru aina chatoanai ichana coacuhin neeinchene. Nabana acaauru chosichuru coroajeein, lenonecuru teein neeuruhane, inara cotihacuruhane, nii lenonecuru acaauruacha teei quiiche acaauru ainane, acaauru rijijieein neeichene, 16acaauru cacunucuru que necoasaijiaain neeuruha inara calaohichurune, nii acaaururai chosichuru coroaecuruhane baasoneein nii enecurune, acaauru rijijieein coroajeein neeuruha inara calaohichurune coataa.
17Aihana jaun, jioanriha coata caje ecaantooru ichana coacuhin neeiche inarane”, nae jetao, Moisesa rai Cana Coaunera.
Ajaanaa naineein, jorerera colane faa quihuruhane jaa beseta
(Ex 23.14-19; Dt 16.1-17)
Niritiin jetaote:
18“Caa inara rai caitoonjoan rijijieein, jorerera colane ichanohin faan beseta bitoaain, caaunsi janoneein jorerera colane ichanohin faan quihuche. Abib batene cojoanonaa banate ne nitohanai, nii batene banate Egipto caje mituhichelu.
19Satiin jauriaanejeein nejanoanaa inara calaohi te, canu rai teriquicheein. Jerichanejeein techu, baca calaohi, carenero calaohi, carenero rijijieein nenaa cabara calaohi, naaonjoainuri satiin curuaanaa nihane teriquicheein. 20Cabario rijijieein nenaa asno bene calaohi, jauriaanejeein nenaa tenaa jereneeichene, leinjiin carenero calaohi teeuche. Jana carenero tenaa jereneeichene, cabario rijijieein nenaa asno coreenraniha leinjiin, carenero rijijieein nenaa cabara calaohi teeuche. Jana nitohaneein ichaeneeichene, nii cabario rijijieein nenaa asno sooche. Jerichanejeeinchu, inara calaohichuru ajicha tenaa jereneeichene, acaauru coreenraniha chaelai nijin teeuche. Nii chuni turuhin cacoaranaa nainihei cha uhaenihane.
21Itolere bana saota janonejeeincha amihaneein, caaunsi janone bana nebetacaauche, temule jaain, inara temule taojiaain naaonjoain ichaquichene nihanatiin.
22Jauriaanejeein, inara temule tirico taojiaachene nunuheneein beseta jaauche, jerichanejeein ajaanaa satono que temule taojiaaichene jianequicheneneein ichacuche.
23Satiin inara quichanequichene, le jaanaacuru cuhane, nichata saananaain canu inara Coaunera, inara Isaraeli nequichene Coaunera nichaaune acatiha turuuche. 24Canune, nii inara roha leeochaauru nenacaauru cachaauru itajereeunni, jelai amuritoheriin inararai niha atanene coina. Nitohaneein canu inara Coaunera nichaaune acatiha, le jaanaacuru cuhane, nichata saananaain turuhichene, nii chuni inararai atane eroraneein nenaa naine rinaain.
25Jiaonrihachu lenonecuru sohichene, coichana aina jiniiquiin iniho teein, nii jorerera aina jiniiquiin faan nihanatiin teeichene. Nii Fasocoa cojoanonaa rainu que, inaraacha sohi lenonecuru cautihane, jiaoria cojoanoo rainu que rucuhequichene.
26Jauriaanejeein inara temule caohacha nunuhe amaauche, canu inara Coaunera nichaaune jaa loreri tenforo asae.
Jiaonrihachu rai neba itaariicha que bacajaain carenero rijijieein nenaa cabara calaohi enoalaichene”, nae jetao, Moisesa rai Cana Coaunera.
Rai rauhi laenaratiha Cana Coaunerane jaun, laenaa Moisesane
27Niritiin jetaote: “Caa ichei caitoonjoan erenaa laenaaun, acate isaraelitaauru aina tonoraain ichaohichene coina, quiicha tei rauhi temurane”, nae jetao, Moisesa rai Cana Coaunera.
28Niritoha raine jaun jetaote, ecu Cana Coaunera aina nelu, jenachoonca janotiineein, jenachoonca jiichooneein, nii lenoneein acau cohin, naaonjoaelanaala Moisesa. Ecu jetaote, tonoraain ichaoha cachane coina, lechooncai rauhi Cana Coaunera naitoonjoan erenaa laenaelu, nii ajeri caje nenaa tabara que teein Moisesa. 29Nii baiha jetaote, nii Sinaai bichatane ecuuno caje fauha cue jetao, nii Cana Coaunera naitoonjoa rauhi siricha, coroatajai tabara amaain Moisesa. Ne jetaote, Cana Coaunera aina irihane caje, nii ichatane ucuuno caje fauha cuhane jaun, aiha atenene tocohaneein jiquihacoha nomerine que nainaene. 30Nitohaneein aiha atenene tocohaneein jiquihacoha Moisesa merine coaracuruha satiin isaraelitaauru aina jiniiquiin Aaroone jaun jetaote, coasiha rohan nichuutanaa jerecurene. 31Nejetaote, acaauru cotihaca Moisesane jaun, nii nihane jaun, rohan satiin nichuuntaauruha isaraelitaauru bichauhenaauru aina Aaroone jaun jetao, inaen acaauru aina ere Moisesa. 32Inaen Aaroon aina irihane baiha, satiin rohan nichuuntaauruha isaraelitaaurune jaun jetaote, Sinaai bichatane neein, tonoraain ichaoha cachane coina, rai Cana Coaunerane naitoonjoan bee acaauru rai Moisesa. 33Inae acaauru aina irihane jianihane baiha jetaote, cajioneque rai nomeri conajae.
34Nejetaote laen Cana Coaunera aina irihane coina, enoha cuhane, nii nomeri cona rioracaain enoha cue, jelaiha mituha uhanereetiaain. Nitohaneein, inae caje mituhane jetaote, isaraelitaauru rai, nii rai aitoha Cana Coaunerane rijitojoeein naitoonjoa bee acaauru rai Moisesa. 35Nitohaneein, atene tocohaneein jiquihacoha nomerine coaracuruha isaraelitaaurune que nainaane jaun jetaote, nacoaauneein nomeri conajae Moisesa, jelaiha nacoaauneein Cana Coaunera aina enohin iriha cuhane reentiaain.
Одоогоор Сонгогдсон:
Éxodo 34: URA
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2005, 2024, Wycliffe Bible Translators, Inc.
