Gn 8
8
Yet max tanay a' aej
1Lajwi tu' max nalaytek Noé yuj Dios, c'al yetok masanil no no' ayoctok yetok yul te barco, cax max yaontek Cham jun miman cak'ek' yiban aej tu', yet watx' chi tanay a'. 2Max makay nuk'lak aej, max ajol yulak tx'otx', c'al jantak mimek aej max aytek sequecok satcan, cax max oc wanaj yak'on nab. 3Oyebxa xajaw yayji ec' a', catatu' yin c'ojanc'ulalil max ay tananok a'. 4Uklajonebxa c'u waay yet is suk xajaw, cax max can batxan te barco bay chonlak witzal Ararat. 5Tananic'al yay a' aej tu'. A yet babel c'ual yet is lajoneb xajaw txequelxac'al chonlak witz can ayajok.
6Yinxa cawinak c'u max jakon cham Noé wentena watx'nebil yuj yin te barco tu', 7cax max bekon eltok cham jun no joj, max ec'c'al jenenok no' yiban a' yin yechbanen no' yet chi tanaj a' sat tx'otx'. 8Max bekon pax eltok Noé jun no paloma, yet chi yila' ta takinxa sat tx'otx'. 9Axa no' tu' max meltzoj bay te barco tu' junelxa, yujtol c'am bay chi je' yoc pakan no'. Caw wal nojnaktoc'al el sat tx'otx' yuj a' aej tu'. Max yaon eltek cham Noé is k'ab yet chi chaon octok cham no' yul barco tu'.
10Maxto yechbanej Noé ukebxa c'ual, max bekon pax eltok cham no paloma tu' junelxa. 11Numumixac'al k'ekbi yet max meltzoj no', cax nac'bilxa oc jun xak te olivo yaxto yuj no'. Axca tu' max yun nachaj el yuj cham Noé, tol ipanxa tak tx'otx' tx'otx'. 12Ukebto pax c'u max yechbanej cham, catatu' max bekon pax eltok cham no' junelxa, palta majxa meltzoj no'.
13601 abil is k'inal cham Noé, yet max can tx'otx' tx'otx' ti' yin takinal. Yet babel c'u yul babel xajaw, cax max yion el cham Noé tu' is patil yiban te barco tu', max yilon cham tol mayal tak tx'otx'. 14Axa yet 27xa c'u waay yet is cab xajaw, caw wal takinxa tx'otx' tx'otx' sic'libil. 15Axa yalon Dios bay Noé tu': 16Elantek yul barco yetok etbi, yetok eb a c'ajol c'al eb ix alib. 17Cax cheon c'apax eltek masanil pojanil no no' ayoctok etok: no tz'iquin, no jobbejal no', no xolakteal no', no' chi jutx c'ul. Uninwokokab no', cax chi yak'on nojil no' sat tx'otx', ẍi Cham.
18Lajwi tu xin, max eltek cham Noé yetok yetbi, yetokc'al eb is c'ajol c'al eb is yalib yul te barco tu'. 19Axa yel c'apaxtek no no' tu' masanil yin makquiltakil. 20Lajwi tu', max watx'nen aj cham Noé jun altar satak Jehová, cax max yiontek cham no no' tol watx' yul sat Jehová tu', c'al no tz'iquin, no' tol chi occ'alta' yin xajanbalil. Yin junjun makan no' tu', max yiel Noé no' max yak' tz'a yin xajanbalil, satak Dios. 21Chabejtak yoc jab no xajanbal tu', max yab Jehová. Axa naon Cham axca ti': Majxa in catabnej tx'otx' tx'otx' ti' yailok mul eb anima, yujtol yettaxc'al unin anima eb, asanc'al yobtakil chi yochej eb chi yunej; tamwal yuj tu' okto wak' cam masanil iquis, axca max wut yet junel ti'.
22Yak'ban ayto ec' yulyibank'inal ti', ok oc awoj, ok wajlay sat awoj; ay tiempoal k'ak', ay tiempoal sic; ay nabil k'inal, ay waresma, ay c'ualil, ay c'apax ak'balil, ẍi Jehová.
Одоогоор Сонгогдсон:
Gn 8: ATBYK89
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Kanjobal (Q’anjob’al) © Sociedad Bíblica de Guatemala 1989
