Gn 18
18
Max yak' Dios is ti' yak'on junok is c'ajol Abraham
1Lajwi tu' max tx'oxon aj ba Jehová bay cham Abraham bay cawilal juntzan matx'ji yul makbej cham Mamre. Chuman mi wal c'u, chotan eltek cham Abraham tu' bay tentail is mantiado, cax max jayoc Jehová bay. 2Axa max yilon Abraham, lecan oc oxwan winak satak. A yet max yilon tu', ayman max toj lemnaj chaon eb, cax yay nojnaj sat tx'otx' satak eb. 3Cax max yalon cham bay junok eb axca ti':
—Ach mamin, yuj wal dios, manchakto ex toji. 4Echbanejek, ti' chi toj wala', tol chi ilaytek jabok aej, cax ok e tx'ajon e yakan. Xewanek yich te te' ti' bel. 5Yak'ban wal e yec' in c'atan ti', ti' chi toj wi' jabok tzet ok e lo', yet watx' chi oc e yip, cax ok ex tok paxok, ẍi cham Abraham tu'.
—Asi' xin, ẍi eb bay.
6Axa yoctok lemnaj Abraham yul is mantiado tu' cax max yalon bay Sara axca ti':
—¡Lim! itek oxebok echbal ixim harina caw wal watx', cax cha watx'nen jayebok yichk'ak'il pan, ẍi bay.
7Cax max toj lemnaj Abraham bay ay no' is wacax, max bet yiontek jun no ach'ej wacax caw wal watx', cax max yak'on no' bay jun nak is chekbej yuj watx'nelay el no' yin aymanil yet chi chilay no'. 8Cax max yiontek mantequilla, c'al leche, yetok no chibej max watx'nelay el tu', cax chi maymon ec' yilon low eb bay yich te te' tu'.
9Cax max k'anlen eb bay Abraham:
—¿Baytal ay xal etbi Sara? ẍi eb bay.
—Ayoctok xal yul co mantiado on ti', ẍi cham bay eb.
10Axa yalon Jehová axca ti':
—Yab axca ti' yet jun ab, ok in jay junelxa ach ul wulaneni; a yet tu' ok jay junok yune' etbi tu', winak unin ok aljok, ẍi bay.
Yak'ban xal Sara xin, toc'al chi abxalwi xal yin tzet chi al-layi. A yintak Abraham tu', lecan oc xal yul is mantiado eb tu'. 11A Abraham yetok xal Sara tu' caw wal ichamtak animaxa eb, axa xal payxatax c'alta' c'amxa yechel unin chi yila', 12xan toc'al max tzewi xal yul is c'ul, yet max yaben yal-lay tu', cax max naon axca ti': ¿Tzetto wal ok yun wochen jun ti', ilab tol ixnam inxa c'al icham winakxa wetbi? ẍi xal.
13Axa yalon Jehová bay Abraham tu' axca ti':
—¿Tzet yuj xan chi tzewi etbi ti'? ¿Chi mi na' tol yuj ixnamxa c'amxa chi je' yilon yin junok unin? 14¿Xin ta ay tzet c'am chi je' wuj e naoni? Yab wal axca ti' yet jun ab, ok in jay yet jun tiempoal ijanxacanok junelxa ach ul wulaneni. A yet tu', ok jay junok yune' Sara ti', winak unin ok aljok, ẍi Cham.
15A yet max yaben xal Sara axca tu', cax max xiw xal, max yalon xal axca ti':
—Tokwal ayin chin tzewi, ẍi xal.
Axa tak'wi Cham Yajaw tu' bay xal axca ti':
—Wojtak tol max ach tzewi, ẍi Cham bay xal.
Chi tewi Abraham yuj conob Sodoma
16Max xew tu' cax max toj eb nak ula'wom tu' bay beal Sodoma. Max toj cham Abraham yetok eb janic' yuj tak'elencan ba eb. 17Cax max yalon Jehová axca ti': Moj chi wal bay Abraham ti' tzet toxa ok wunej; 18ilab tol a' ok oc yichmamok jun miman conob tec'an waayi. Mayal wak' in ti' bay tol yujc'al, ok chaon masanil nacionlak yulyibank'inal in watx'c'ulal. 19Ayin max in siq'uilok yet watx' chi yal masanil in chekbanil bay masanil is yuninal c'al is yinatil, yet watx' chi yikej eb, c'al beybalnen eb masanil tzet yetal watx', c'al tojolal, yet watx' chi wak' c'apax yun bay tzet max wak' in ti' bay, ẍi Cham. 20Lajwi tu', max yalon Jehová bay Abraham tu' axca ti':
—A masanil eb anima bay Sodoma c'al bay Gomorra, caw wal yob yel k'umal eb, yelxac'al max aj can yobtakil eb. 21A tinani', ti chin toj bay tu', wilbalok ta caw yel chi aj can eb yin yobtakil axca chi yun yal-lay ayin tu', axca tu xin, ok wojtaknej el sic'libil, ẍi Cham.
22A cawan eb max ec' k'anjab tu', palanxac'al tojcan eb bay Sodoma, axa pax Jehová tu xin, max cancan k'anjab yetok Abraham. 23Max jitztok ba Abraham c'atan Cham janic' xa, cax max k'anlen bay Cham axca ti': ¿Tom ok a c'ayil eb anima c'am is mul yetok eb ay is mul? 24K'inalok ta ay 50 anima watx' yul conobal tu', ¿xin ta cha c'ayil jun conob tu'? ¿c'am mi chak' mimanc'ulal yin eb yuj eb 50 c'am is mul tu'? 25Maj je' ok ot axca tu'. Ta cha c'ayil eb c'am is mul yetok eb ay is mul axcaxac'al mi tol lajan is mul eb masanil chi yal tu'; manchak ot axca tu'. Miman juez ach yulyibank'inal, ¿tokwal ok on tzet yetal man tojolok? ẍi Abraham tu' bay Cham.
26Axa max tak'wi Cham, max yalon bay axca ti':
—Ta ay 50 anima watx' yul conob Sodoma tu', yuj eb 50 tu' chi wak' mimanc'ulal yin masanil anima cajan bay tu', ẍi Cham.
27Max yalon pax Abraham bay Cham axca ti':
—Ak' mimanc'ulal win, tol oktoc'al in k'anjab ayach, a' ach ti' Yajaw ach, xal in xin, anima in. 28Ta c'uxan ayto owanokxa c'am chi tz'aknaj yin 50 eb anima watx', ¿tom yuj wal c'am owanxa tu', cax cha' c'ayon el jun conob tu'? ẍi Abraham.
Max tak'wi Cham bay:
—Ta ay 45 anima tol caw wal watx', c'am chin c'ayil jun conob tu', ẍi Cham.
29Max yalon pax Abraham:
—Talaj asan 40 anima watx' ay bay tu', ẍi cham.
—Yuj eb 40 tu' man ok in c'ayil jun conob tu', ẍi Dios.
30Max yalon pax Abraham bay:
—Ach Wajawil, chin tewi ayach, cax c'amokab chi tit owal win, yuj chach in teyej. Talaj c'uxan asan 30 anima watx', chi ilchaj oj, ẍi bay Cham.
Max tak'wi Cham, max yaloni:
—A yuj 30 anima c'am is mul tu', ok wak' mimanc'ulal yin jun conob tu', ẍi Cham.
31Axa Abraham max occ'al tean yin, max yaloni:
—Mamin Wajawil, ti' wal ok ach in teyejc'al, ¿tzet wal chotej ta asannej 20 anima c'am is mul? ẍi.
Max tak'wi Cham, max yaloni:
—A yuj 20 anima watx' tu', c'am chin c'ayil jun conob tu', ẍi Cham.
32Max yalon pax Abraham junelxa:
—Ak'wal mimanc'ulal win Mamin Wajawil, c'amokab chi tit owal win, axac'al jun el ti' chin oc tean en, c'amxa tzet ok wal ayach: ¿Tzet chotej ta asannej lajonwan anima watx' is beybal chi ilchaj oj? ẍi bay Cham.
Max yalon pax Cham:
—Ta ay lajonwan anima watx' is beybal, c'am chin c'ayil jun conob tu', ẍi Cham.
33Axa yet max lajwi k'anjab eb tu', max toj Jehová, axa meltzojcan cham Abraham tu' bay is mantiado tu'.
Одоогоор Сонгогдсон:
Gn 18: ATBYK89
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Kanjobal (Q’anjob’al) © Sociedad Bíblica de Guatemala 1989
