मरकुस 8
8
ईसु चार हजार माणसे काजे रुटा खावाड़्यु
(मत्ती 15:32-39)
1तीनु दाहड़ा मां अळी एक माणसेन मट्लु टुळु ईसु धड़े भेळु हयु। ने तीनु माणसे धड़े खाणेन काय नी हतलो। तत्यार ईसु तेरा चेला काजे धड़े बुलायन कह्यु, 2“मेसेक हीनु माणसेन टुळा पर तरस आवे, काहाकी जे तीन दाहड़ा सी मारे पुठ्ये छे ने हींद्रे धड़े खाणेन काय बी नी हय। 3हींद्रे मां सी काहनाक बेसके लांबे सी आवला छे। कदी हीनुक मे भुकलात घर मकलीस तत्यार वाटे झामा खाय्न पड़ जासे।”
4ईसुन चेला जपाप आप्या, “जां बयड़ा मां ईनु माणसेक आफरीन खावाड़ने करीन अतरा रुटा कां सी लावसुन?” 5ईसु चेला काजे पुछ्यु, तुंद्रे धड़े कतरा रुटा छे, “चे कह्या” सात रुटा।
6तत्यार ईसु माणसे काजे भुयमां बसी जावु करीन हुकुम आप्यु, ने चु सात रुटा हात मां लीन रुटा वाटे भगवान काजे कह्यु, तु बेसकु वारु छे, ने चु माणसे काजे वाट देवु, करीन रुटा भांजीन तेरा चेला काजे आपतु गुयु ने चेला माणसेक वाटता गुया। 7हींद्रे धड़े थुड़ाक नानला माछा बी हतला, माछा वाटे बी ईसु, भगवान तु बेसकु वारु छे करीन कह्यु। ने चे माछा बी माणसेक वाट देवु, करीन चु तेरा चेला काजे हुकुम आपी देदु। 8चे आखा माणसे खायलीन आफरी गुया, ने चेला, बचला रुटान कट्का भेळा कर्या, तत्यार सात चार्या भराय गुया। 9ने चां माणसे चार हजार हतला, ने तत्यार ईसु तीनु माणसे काजे अळाय देदु। 10ने चु मामार तेरा चेला पुठ्ये ढंड्या मां बठीन दलमनुता ईलाका मां जाती र्यु।
फरीसी माणसे सरग मायन सहलाणीन मांगे
(मत्ती 16:1-4)
11पछेन थुड़ाक फरीसी माणसे ईसु साते लड़ाय झगड़ु करने बाजी गुया। ने तीनाक पारखणे करीन कह्या की “ईसु हामुक एक असी वारु कामेन सहलाणी देखाड़।” 12ईसु तींद्रा ढंगड़ा देखीन हेरा जीव-आत्मा मां मटीत दम लीन कह्यु, “तुहुं ईनी पीड़ीन माणसे हय बी वारु कामेन सहलाणी काहा हेर र्या? बाकुन मे तुहुंक छाचलीन कहं की, तुहुंक काय बी सहलाणी नी जड़े।”
13ने ईसु फरीसी माणसे काजे छुड़ीन अळी पछु ढंड्या मां बठी गुयु, ने दरीयान पली धड़ जाणे बाजी गुयु।
ईसु चेला काजे सीकाड़े की फरीसी माणसे ने हेरोदेस राजा सी संभ्ळीन रवु
(मत्ती 16:5-12)
14ईसु ने तेरा चेला ढंड्या मां जाणे बाजी रवला ने चे चेला रुटा लावणे वीसरी गुयला, ने ढंड्या मां तींद्रे धड़े एकुत रुटु हतलु। 15ने ईसु तेरा चेला काजे दाखलु दीन असु कय्न संभ्ळीन रवजु कह्यु की, “फरीसी माणसेन खमीर ने राजा हेरोदेसेन खमीर सी संभ्ळीन रवु।”
16चेला आंबा-सांबा वीच्यार करीन कह्या, “आपणु रुटा नी लाया तेरेमां ईसु असो कय र्यु।”
17ने ईसु तींद्री जी वात जाणीन कह्यु तुहुं आंबा-सांबा हामरे धड़े रुटा नी हय करीन काहा वीच्यार करने बाजी र्या, हय बी तुंद्रो मन डेड़-अकल्या छे काय? तुहुंक हय बी जी वात समज मां नी आवती? 18तुंद्रा डुळा छे, तेबी देखायतो नी? ने कान्टा हय्न, बी सामळायतो नी? ने तुहुंक जी हवली वात हेर नी हय? 19जत्यार मे पांच हजार माणसेक पांच रुटा भांजीन आपलु, चां तुहुं रुटान कट्का ईछीन बेसका चार्या भरला? चे कह्या, “बारे चार्या।”
20“ने जत्यार चार हजार माणसे वाटे सात रुटा भांजीन आपलु चां तुहुं भांजला रुटान कट्का, कतरा चार्या भरला?” चे ईसु काजे कह्या, “सात चार्या।”
21अळी ईसु तीनुक कह्यु, “खाण्या-सुडान मतलब हय लग नी समज्या काय?”
ईसु बेतसेदा मां आंदळा माणुस काजे वारु कर्यु
22ने अळतेन ईसु ने तेरा चेला बेतसेदा गांव मां गुया; ने माणसे एक आंदळा काजे ईसु धड़े लाया ने ईसु सी लीलघाय्न कह्या की “आंदळा काजे छीमीन वारु कर दे।” 23ने ईसु आंदळान हात धरीन तीना काजे गांव मां सी बाहार लीज्यु ने तेरा डुळा मां थुपीन ने आपसान हात तेरा डुळा पर मेक्यु, ने तीनाक पुछ्यु “तुसेक काहींग देखाये काय?” 24चु उपर भाळीन कह्यु, “माणसे काजे देख र्यु, बाकुन चे मेसेक असा देखाये की झाड़का चालने बाजी र्या।”
25तत्यार ईसु अळी तेरा डुळा पर हात मेक्यु ने चु आंधळु तेरा डुळा उघाड़ीन देखणे बाजी गुयु। चु पछु आखो चुखो झण देखणे बाजी गुयु। 26ईसु तीनाक असु कहींन घर मकल्यु, “ईना गांव मां पाय बी घुण मेले।”
पतरस ईसु काजे मसी मान्यु
(मत्ती 16:13-20; लुका 9:18-21)
27ईसु ने तेरा चेला केसर्या फीलीप गांव मां जाती र्या; ने वाटे ईसु चेला काजे पुछ्यु की, “माणसे मेसे काय कहें?” 28चे कह्या “काहनाक कहें, हयु ते बपतीस्मा आपण्यु युहन्नु छे, बाकुन काहनाक कह्वे एलीया छे, काहनाक भगवानेन अघली वात बताड़ने वाळा माणसे मायन काहनुक एक छे कहें।”
29ईसु तीनुक पुछ्यु, “बाकुन तुहुं मेसेक काय कहुं, की मे कुण छे?” पतरस कह्यु, “छाचलीन तु भगवानेन मकेल्लु बचाड़ने वाळु मसी छे।”
30तत्यार ईसु तीनुक चेताड़ीन असु कह्यु, “मारे बारामां जी वात कुय काजे घुण कहुं।”
मरनु ने दुखेन बारामां ईसु पेहलुत कह्यु
(मत्ती 16:21-28; लुका 9:22-27)
31तत्यार चु चेलाक सीकाड़्यु की, मे माणसेन पुर्यु छे, ने मेसे काजे ठहरावलो छे, की चु बेसकु दुख हाकलसे ने मुख्या ने, डाहला पुजारा, ने यहुदी नीयमेन मास्तर्या तीनाक फालतु समजीन मार देसे, ने चु तीन दाहड़ाम पछु जीवतु हय जासे। 32चु जी वात संय-संय तेरा चेला काजे कय देदु। जी सहलाणी पतरस ईसु काजे अलग ली जाय्न लड़ने बाजी गुयु। 33बाकुन ईसु पछु अळीन दीसरा चेला भीणी भाळ्यु ने तींद्रे अगळ पतरस काजे लड़ीन कह्यु, “ए भुतड़ा मारे सी छेटु जाती रव; काहाकी तु भगवानेन वात पर नी, बाकुन माणसेन वात पर मन लागाड़ीन कह्णे बाजी र्यु।”
34ने ईसु माणसेन टुळाक ने चेला काजे धड़े बुलायन कह्यु, “जे कुय मारु चेलु बणीन मारे पुठ्ये आवणे हींडे, चु आपसान मरजी नी बाकुन मारी मरजी पुरी करनु चाहजे, ने आपसान कुरुस हाकलीन मारे पछळ चाले। 35काहाकी जु कुय आपसान जीव काजे बचाड़ने चाहे, चु तेरा जीव काजे खुवसे बाकुन जु कुय मारे वाटे ने खुस-खबर वाटे तेरु जीव खुवसे हयुत आपसान जीव काजे बचाड़ लेसे। 36कदी माणसे आखी कळी काजे हात करलेय, ने तेरा जीव खुय देय, ती तीनाक काय फायदु छे? 37ने चु तेरा जीव पछु हेरने करीन तेरा जीवनेन आवजी मां काय आपसे? 38जु कुय ईनी छीनाळा ने पापी दाहड़ा मां, माणसेन ईचमां मारे सी ने मारी वात सीकाड़ने सी लाजवाय्से, ती माणसेन पुर्यु बी, जत्यार चुखला सरग वाळा काहवाळ्या भेळु तेरा बासेन सेक-सींगार साते आवसे, तत्यार तीने दाहड़े तीना काजे लाजवाय्से।”
Одоогоор Сонгогдсон:
मरकुस 8: NTBSP23
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.