मत्ती 14
14
बपतीस्मा आपणे वाळा युहन्ना काजे हेरोदेस माराड़ देय
(मरकुस 6:14-29; लुका 9:7-9)
1तीनी टेमे गलील जीलान राज करन्यु हेरोदेस राजु ईसुन बारामां सामळ्यु, 2ने हेरा पावर्या काजे कह्यु, “गुयु युहन्ना बपतीस्मा आपणे वाळु छे! चु मर्या-सर्याम सी जीवतु हय ज्य, तेरेमां बेसका मटा ताकुतेन काम देखाड़ने बाजी रयु।”
3काहाकी हेरोदेस राजु हेरा भायस फीलीप्युसेन बायरी हेरोदीयासेन वजे, सी युहन्ना काजे धरीन बांदीन जेल मां नाख देदा। 4काहाकी युहन्ना तीना काजे कह्लु की भायसेन बायरी काजे राखणु तारे वाटे वारु नी हय। 5तेरेमां चु युहन्ना काजे माराने हींडी रवलु, बाकुन गड़दी वाळा माणसे सी बीहतेलु काहाकी चे युहन्ना काजे भगवानेन अघी सी आवणे वाळी वात देखाड़न्यु मानतेला।
6बाकुन जत्यार हेरोदेस राजु पयदा हवलु चु दाहड़ु आयु, ती हेरोदीयासेन पुरे#14:6 बेटी हेरोदेस राजु तेरा मेजवान्यान ईचमां नाचीन देखाड़ी ने हेरोदेस राजु देखीन खुस हय गुयु। 7तेरेसी ज देखीन हेरोदेस राजु सगुन खाय्न वायदु कर्यु, “जो काय तु मांगसी, च मे तुसेक आप दीस।”
8हेरी माय हीनीक पेहलुत सीकाड़ देदली, “बपतीस्मा आपण्या युहन्नान मुणको तळी मां हींताळुत मांगाड़ीन आप दे।”
9हेरोदेस राजु दुखी हयु, बाकुन हेरी सगुन, ने मेजवान्यान वजे सी, तीनी पुरेन वात नी काट्यु। 10हेरोदेस राजु जेल मां युहन्नान मुणको काटीन लावु करीन माणसे काजे मकल्यु। 11ने युहन्नान मुणको तळी मां लाया, ने तीनी पुरे काजे आप देदा, मुणको ची पुरे हेरी माय काजे आप देदी। 12तत्यार युहन्नान चेला आया, जी वात सामळीन जेल मां गुया ने तेरा डील काजे ली जाय्न गाड़ देदा, ने अळतेन जाय्न ईसु काजे खबर कर्या।
ईसु पांच हजार सी अदु माणसेक खाणो खावाड़े
(मरकुस 6:30-44; लुका 9:10-17; युहन्ना 6:1-14)
13जत्यार ईसु युहन्नान मरनेन खबर सामळ्यु, ती ईसु ढंड्या पर चहड़ीन चां सी काहनीक सुनसान जागा मां, एखलुत#14:13 एकांत जाती रयु। माणसे ज सामळीन सहर-सहर सी नीकळीन ईसु पछळ चाल पड़्या। 14ईसु ढंड्याम सी उतर्यु ती एक बेसकु मटु माणसेन टुळु देख्यु, ने तीनाक तीनु माणसे पर दया आय, ने तींद्रा मांदला काजे वारु कर्यु।
15जत्यार सांती वेळाय तेरा चेला ईसु धड़े आवीन कह्या, “जी सुन्ली जागा छे, ने दाहड़ु ढळ गुयु; तेरेमां हय हीनु माणसे काजे जाणी दे, की जे गांव मां जाय्न आपणे-आपणे वाटे रुटा मुल ली लेय।”
16ईसु चेला काजे कह्यु, “हीनुक मकलनु जरुड़ी नी हय! तुहुंत हीनु काजे काहीस खाणे आपु।”
17चेला ईसुक कह्या, “जां हामरे धड़े पांच रुटा ने दुय माछा छे अळी दीसरो काय बी नी हय।”
18ईसु कह्यु, “चे रुटा ने माछा काजे मारे धड़े लावु।” 19तत्यार ईसु माणसे काजे चारा पर बठणे करीन कह्यु, ने तीनु पांच रुटा ने दुय माछा काजे लेदु; ने सरगे भीणी भाळीन भगवान काजे कह्यु तु बेसकु वारु छे करीन कह्यु, माछा ने पांच रुटा तुड़ी-तुड़ीन चेला काजे आप्यु, ने चेला माणसे काजे आप्या। 20जत्यार आखा माणसे खाय्न आफरी#14:20 तुप्त गुया, ती चेला बचला रुटान टुकड़ा सी बारे चार्या भराय गुया। 21ने खाणे वाळा बायरा ने पुर्या काजे छुड़ीन, पांचेक हजार अदमीत हतला।
ईसु पाणी पर चाले
(मरकुस 6:45-52; युहन्ना 6:15-21)
22तत्यार हयु तत्काल हेरा चेला काजे ढंड्या पर चहड़ने करीन कह्यु, मे माणसे काजे मकलो चां लग पली धड़े जाती रवु। 23चु माणसे काजे मकलीन, दुवा करने करीन बयड़ा पर जाती र्यु; ने सांतु लग ईसु चां एखलुत हतलु। 24तीनी टेमे#14:24 समय ढंड्यो दरीयान ईचमां सहर सी बेसके छेटे हतलो ने लहर सी अथोन-अथो हालतेलो, काहाकी आहळो सांबो सी आवतेलो।
25ने ईसु कुकड़ा वासणीक पाणी पर चालीन तींद्रे भीणी आयु। 26चेला ईसु काजे पाणी पर चालीन आवतेलु देखीन घाबराय गुया। ने आयड़ीन कह्या, “जु ते भुतड़ु छे करीन!” ने बीही गुया जुर सी आयड़ने बाजी गुया।
27तत्यार ईसु तीनुक कह्यु, “हिम्मत राखु! मेत छे, बीहु मां।”
28पतरस ईसु काजे कह्यु, “ए मालीक, कदी तुत छे, ती मेसे तारे धड़े पाणी पर चालीन आवणेन हुकुम आप।”
29ईसु हुकुम कह्यु, “आव!” तत्यार पतरस ढंड्या पर सी उतरीन ईसु भीणी पाणी पर चालीन जाणे बाजी गुयु। 30बाकुन आहळी काजे देखीन बीही गुयु, ने जत्यार डुबणे बाजी गुयु ती आयड़ीन कह्यु, “ए मालीक मेसे बचाड़!”
31ईसु तत्यारुत हात अगु करीन तीना काजे धर लेदु, “ने कह्यु, ए कम भुरसु करन्या, तु काहा संक्या कर्यु?” 32जत्यार ईसु पतरस भेळु ढंड्या मां चड़ गुयु, ती आहळी हुगी रय गुय। 33तेरेमां जे ढंड्या बठी रवला चेला ईसुन पाये पड़ीन आंध्या ने कह्या, “छाचलीन, तु भगवानेन पुर्यु छे।”
ईसु गन्नेसरत मां मांदला काजे वारु करे
(मरकुस 6:53-56)
34अळतेन चे पली धड़ गन्नेसरत सहर मां आया। 35ती चां वाळा माणसे ईसु काजे उळखी लेदु ने आड़े-धड़ेन आखा देस मां खबर मकल्या ने आखा मांदला काजे ईसु धड़े लाया, 36ने ईसु सी लीलघाय्न कह्णे लाग्या, की चु तीनुक तारा पुथल्यान कुर अतरुत छीमणी दे; ने जतरा तीना काजे धर्या ने चे वारु हय गुया।
Одоогоор Сонгогдсон:
मत्ती 14: NTBSP23
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.