लुका 1
1
लुकान लिखली वारलु वात
लुकान लिखली वारलु वात मां ईस्रायेल देस मां पाप सी छुड़ावणे वाळु आवणेन ने आखा माणसे जातीन पाप सी छुड़ावणे वाळु दुय भातीन बारामां बताड़े। लुकु लिखे की ईसु काजे “पाप मां पड़ला माणसे काजे सामळावणे वाटे” मालीकेन आत्मा बुलाय। हेरे वजे सी जी वारलु वात काही भातीन परेसानी मां पड़ी रवला ने माणसे फीकुर मां पड़ला छे। लुकान वारलु वात मां मनेन खुसी पेहली वात छे खासकरीन पेहला पाठ मां, तेरे मां ईसुन आवणेन वात हवली, ने आकरी मां ईसुन सरगे पछु जाणेन वात लिखली छे। ईसुन सरगे पछु जाणेन पछेन मसी भुरसाम बड़नु ने बेसकी वात ईनात लिखणे वाळान साहरे सेवा करने वाळा कामेन नावेन किताप मां देदलो छे। लिखणे वाळु लुकु छे, ज्य एक डाक्टर हतलु। बुली काजे लिखणे ने काम मां लावणेन हेरा तरीका सी पतु चाले की चु एक भंडलु माणुस हतलु। लुकु ईसुन जीवणेन सयन बारामां लिखणे चाहतेलु, घटना काजे हेरे तरीका सी बताड़े काहाकी दीसरा काजे ईनाक भन्ने सी।
उळखाण
1बेसका माणसे:
ईनी वीतली वात काजे लिखीन भेळा करनेन काम कर्या ची वात हामरे ईचमां वीतली हतली। 2जे सबुत हामुक तींद्रे सी जड़लो छे जे सुरु सी ईनी वातेक देखणेवाळा ने जे भगवानेन पावर्या हतला। 3हेरेसी, ए अंजाण्या थीयुफीलुस मे तार वाटे तीनी आखी वीतली वातेन बारामां एक चोव सी उजेंतु चतराये लिखणे बाजी रयु। 4तु ज पाक्को जाण लेय की, जी सीकापण तुसेक जड़ली छे, ची खरली छे।
युहन्ना बपतीस्मा आपणे वाळान पयदा हवणेन बारामां
5हेरोदेस यहुदीया जीलान राजु हतलु, तीनी टेमे अबीय्याह दळ मां जकर्या नावेन एक याजक हतलु, ने तेरी बायरी हारुनेन पुजारान जातेन हतली, तेरो नाव एलीसीबा हतलो। 6ने चे दुय जणा भगवानेन नींगा मां धरमी हतला, ने चे मालीक भगवानेन आखा हुकुम ने नेम पाळने मां नी चुकतेला। 7एलीसीबा आंझी हतली, ने दुयु जणा डाहला हय गुयला, तेरेमां तींद्री एक बी अवल्यात नी हयी।
8एक कावा जकर्यु पुजारु टाकला दाहड़ान अनसारे आपसा टुळा भेळु भगवान अगळ पुजारान काम करने बाजी रवलु। 9ती एक दाहड़ु पुजारान रीतीन अनसारे मालीक-भगवानेन मंदीर मां भरायन धुणी दीन भगवानेन पुजा-पाट करने करीन जकर्यान नावेन चिट्ठी नीकळी।#नीरगमन 3:7 10ने जकर्यु धुणी देणे बाजी रवलु, तीनी टेमे मां आखा माणसेन टुळु बाहर उबु रय्न भगवान धड़े दुवा करने बाजी रवलु। 11तीनी टेमे जकर्यु वेदी पर धुणी देणे बाजी रवलु, ने मालीक भगवानेन एक सरग वाळु काहवाळ्यु तीनाक वेदीन जेवड़्ये आंग्ये देखाव पड़्यु। 12ने तीना भगवानेन सरग वाळा काहवाळ्या काजे देखीन जकर्यु बेसकु बीहीन सीयारी ली लेदु; 13बाकुन सरग वाळु काहवाळ्यु जकर्या काजे कह्यु, “ए जकर्या बीहे मां, तारी दुवा भगवान सामळी लेदु, ने तारी घरवाळी एलीसीबान एक पुर्यु हवसे, तु तेरो नाव युहन्ना पाड़जी। 14तु खुस हवसी ने पुर्यु हयु करीन बेसका माणसे खुसी हवसे। 15चु युहन्नु, मालीक-भगवानेन नींगा मां बेसकु मटु कहवायसे, ने अंगुरेन दारु ने काहनी बी नस्यान चीज नी पीये; ने चु आपसी मायन कुखेम सीत चुखली-आत्मा सी भरायलु रवसे। 16ने ईस्रायेली जातीन बेसका माणसेन मन मालीक-भगवान भीणी पछु आळसे। 17मालीक भगवान वाटे एक भुरसु करे असा असामी तीयार करने करीन चु युहन्नु मालीक-भगवान अगळ-अगळ चालसे। ने एलीया धड़े जु भगवानेन चुखली-आत्मा ने जुर हतलु, तेरेत साहरे युहन्नु ज काम करसे बासे-बासेन मन आपसा पुर्या-पारी भीणी आळसे; ने हुकुम नी माने तीनु काजे खरला धरम पर चालाड़नेन समज आपसे।#मलाकी 4:5,6”
18जी वात सामळीन जकर्यु सरग वाळा काहवाळ्या काजे पुछ्यु, “मे जो कसु जाणो की असो हवणे वाळो छे? काहाकी मे ते डाहलु हय गुयु; ने मारी घरवाळी बी डाहली हय गुय।”
19सरग वाळु काहवाळ्यु तीनाक जपाप आप्यु, “मे जीब्रायल छे, मे भगवान अगळ हजुर रवु। ने भगवान मेसेक तार पुठ्ये वात करने, ने तुसेक जी खुस-खबर सामळावणे मकेल्लु छे। 20ने देख, तु मारी कह्ली तीनी वात पर भुरसु नी कर्यु, जी वात टेम आवसे ती पुरी हवसे। ने तीने दाहड़े लग जी वात पुरी नी हवे, तीने दाहड़े लग, तु गुंगु रवसी, ने बुली नी सके।”
21असामी ते बाहर रय्न जकर्यान वाट देख रवला, बाकुन चु हय मंदीर मां अतरी वार काहा लागाड़ र्यु करीन चे सुच मां पड़ गुया। 22जत्यार जकर्यु बाहर आयु, ती चु तींद्रे अगळ बुली नी सक्यु, हेरेसी चे जाण गुया की, हीना जकर्याक भगवानेन मंदीर मां काय ने काय भगवान भीणी सी देखाव पड़लो छे, ने चु गुंगुत रयु, ने तीनुक ईसारु करतुत रयु।
23आपसा भगवानेन चाकरीन दाहड़ा पुरा हय गुया, ती चु जकर्यु आपसान घर जात रयु। 24जी वात वीत गुय ने थुड़ाक दाहड़ाम पछेन जकर्यान घरवाळी एलीसीबा भारीस हय गुय; करीन ची पांच महना लग आपसा मन मां ज कह्ती जाय्न घर मां साताय रय। 25की “माणसे मारी हासी उडाड़तेला, बाकुन हय मालीक भगवान मार पर दया करलु छे।”
मालीक ईसुन पयदा हवणेन बारामां
26एलीसीबा भारीस हवली तेरो छटवो महनो चाल रह्लो, ती भगवान, सरग वाळा काहवाळ्या जीब्रायल काजे गलील जीलान नासरत नावेन एक सहर मां एक कुवारली पुरे भीणी मकल्यु। 27तीनी कुवारली पुरेन नाव मरीयम हतलो, ने तेरी मांगणी युसुफ नावेन एक जुवान पुर्या साते हय रवली। चु युसुफ राजा दावुदेन अवल्यात मायन हतलु। 28सरग वाळु काहवाळ्यु मरीयम धड़े आवीन कह्यु, “तु खुस हय जां, भगवानेन गीण-दया तार पर छे, ने मालीक-भगवान तार पुठ्ये छे।”
29सरग वाळा काहवाळ्यान साहरे जी सामळीन मरीयम बेसकी बीही गुय, ने असी वीच्यार करने बाजी गुय, की ईना बुलेन मतलब काय हसे ने काय नी। 30ती सरग वाळु काहवाळ्यु तीनीक कह्यु, “मरीयम, बीहे मां, काहाकी भगवानेन गीण-दया तारे पर छे। 31देख, तु भारीस हवसी ने तारु एक पुर्यु हवसे ने तु तेरो नाव ईसु पाड़जी।#यसाया 7:14 32चु बेसकु मटु कहवायसे, ने चु आखान डाहला भगवानेन पुर्यु कह्वायसे। मालीक भगवान तीनाक आड़ा-बुड़ा राजा दावुदेन राजगादी आपसे। 33ने चु याकुपेन आखी अवल्यात पर जलम लग राज करसे, ने तेरो राज कदी नी सरे।”
34मरीयम सरग वाळा काहवाळ्या काजे कह्यी, “मारो ते अदमी साते सोवसार नी हयो, ती तार साहरे कह्ली वात कसी पुरी हवसे?” 35सरग वाळु काहवाळ्यु जपाप आप्यु, “तारे पर चुखली-आत्मा उतरसे, ने तार पर आखा सी डाहला भगवानेन जुरभर्यु साहळु पड़से। तेरेमां चु पयदा हवणे वाळु चुखलु पुर्यु, भगवानेन पुर्यु कह्वायसे। 36तारीत भाय-बेटी एलीसीबान बारामां सामळ, ची आंझी हतली, ने हय डाहवाराम भारीस हवसे, ने तेरो छटवो महनो चाल रयो। ने तेरो पुर्यो हवणे वाळो छे। 37काहाकी भगवानेक नी बणे, असो काय बी, नी हय।”
38मरीयम कह्यी, “सामळ! मे मालीक-भगवानेन चाकरी करने वाळी छे। तु हय कह्यु, तसोत मार साते हवणे दे।” ने तत्यार सरग वाळु काहवाळ्यु तेरेन्चां सी जात र्यु।
मरीयम एलीसीबा सी मीलने जाय
39तीनु दाहड़ाम मरीयम तीयार हय्न यहुदीया जीलान बयड़ाम वसण्या, एक सहर भीणी मामार गुय, 40ने ची जकर्यान घर मां जाय्न एलीसीबा काजे “वारु छे की?” कह्यी। 41ने ज सामळतेत एलीसीबान पेट मायन पुर्यो खुस हय्न उछळी पड़्यो, ने एलीसीबान चुखला-आत्मा सी भरायली हतली। 42ने एलीसीबा मरीयम काजे जुर सी आयड़ीन कह्यी, “तु आखा बायराम सी बेसकी वारु छे ने तारा पेटे मायन फळ बी बरकतवाळो छे। 43हय तु मारा मालीकेन माय बण गुय, ने भगवान, तुसे काजे मारेन्चां लावीन, मार पर अतरी दया काहा कर्यु हसे? 44सामळ! जत्यार तु ‘वारु छे की?’ असी करीन पुछी अतरीत, ने मारा पेटे मायन पुर्यो खुस हय्न उछळी पड़्यो। 45तु वारु छे, काहाकी तु जु भुरसु करी की मालीक भगवान जसों कह्लु, तसोत आखो हवसे!”
मरीयम भगवानेन गुण गावे
46तत्यार मरीयम कह्यी,
“मारु जीव, मालीक-भगवानेन गुण गावे,
47ने मारी चुखली-आत्मा, मेसेक बचाड़न्या भगवान मां खुस हवे;#1 समुवेल 2:1
48काहाकी चु आपसी नीचळी गुलाम पावरनी पर दया कर्यु;
हेरेसी सामळु! हय सी आखी पीड़ीन माणसे मेसेक बरकतवाळी कह्से;#1 समुवेल 1:11; मलाकी 3:12
49काहाकी आखाम ताकतवाळु भगवान मार वाटे बेसको मटो-मटो काम कर्यु,
ने तेरो नाव ‘चुखलो’ छे;
50जे भगवानेन बीहाणो मानीन जीवे, तींद्रे पर तेरी दया बन्ली रवे;
हय तेरी दया, तींद्री पीड़ीडीट, तींद्रे पर बणी रवे।#भजन सहीता 103:17
51चु आपसा हातेन जुर देखाड़लु छे;
चु मटाय करन्या काजे रावण्या-तीवण्या कर देदलु।#2 समुवेल 22:28; भजन सहीता 89:10
52चु ताकतवाळा राजा काजे तींद्री राजगादी पर सी हीट पाड़्यु;
बाकुन नीचळा माणसेक उचा बणावलु छे।#1 समुवेल 2:7; अय्युब 5:11; भजन सहीता 113:7,8
53चु भुकला माणसेक खाणु आपीन आफराड़ देदु,
ने लकपती काजे ठारलात वळाय देदु।#1 समुवेल 2:5; भजन सहीता 107:9
54चु तेरा पावर्या ईस्रायेली जातीन माणसेक मदत कर्यु,
तीनुक हेर करीन दया कर्यु।#भजन सहीता 98:3; यसाया 41:8,9
55चु हामरा आड़ा-बुड़ा साते वायदु करलु, तेरेत अनसारे तेरी दया,
अब्राहम ने तेरी अवल्यात पर जलम बन्ली रवसे।”
56मरीयम तीनेक महना लग एलीसीबा पुठ्ये रवी, ने अळी आपसे घर जात गुय।
युहन्ना बपतीस्मा आपणे वाळु पयदा हवे
57ने एलीसीबान फवरी हवणेन टेम आवी, ने तेरु पुर्यु पयदा हयु। 58तेरे आड़े-धड़े रहण्या, ने सगासाइ वाळा सामळ्या की मालीक भगवान एलीसीबा पर बेसकु दया करलु छे, ने चे तेरे पुठ्ये भेसकायन खुस हया।
59ने पुर्यो हवलो सात दाहड़ा पुरा हय गुया। ने अळी आठवे दाहड़े मुसान साहरे ईस्रायेली जातीन माणसेक आपला भगवानेन कायदान अनसारे पुर्याक चुखो करने आया तीनी टेमे, चे आखा तीना पुर्यान नाव जकर्यु पाड़ने बाजी गुया, चो नाव तीना पुर्यान बासेक मालुम हतलो।#वेवस्थावीवरन 12:3 60बाकुन पुर्यान माय एलीसीबा कह्यी जकर्यु नाव मां पाड़ु, बाकुन युहन्नु नाव पाड़ु।
61तत्यार चां आवला आखा माणसे तीनीक कह्या, “तारा सगासाइ मां बी, ज नाव काहनान नी हय।” 62तत्यार आकरी मां चे आखा तीना पुर्यान बास जकर्यात काजे ईसारु करीन पुछ्या “तु तारा पुर्यान, काय नाव पाड़ने हींड र्यु?” 63चु लिखणेन पट्टी ने सीलुक मांगाड़ीन लिख्यु, “हेरो नाव युहन्ना छे।” ने ज देखीन चां भेळा हवला आखा माणसे वीच्यार मां पड़ गुया। 64तत्यारुत जकर्यान मुंहडो ने जीप खुल गुय, ने चु बुलने बाजी गुयु, ने भगवानेन गुण गावणे बाजी गुयु। 65आड़े-धड़े रवण्या आखा माणसे चकराय्न बीही गुया ने यहुदीया जीलान बयड़ाम ने आखा कामेन, बी जी वात चारेमेर जाती रय। 66ने आखा सामळन्या, पुर्यान बारामां आपसा-आपसा मनोम वीच्यारीन कह्या, “ज पुर्यो कसों हसे?” काहाकी मालीक-भगवान हेरे पुठ्ये हतलु।
जकर्यान-गीत
67तेरु बास जकर्यु चुखली-आत्मा सी भराय गुयु, ने चु ज कह्तु जाय्न भगवानेन अघी सी आवणे वाळी वात कह्णे बाजी गुयु:
68ईस्रायेली जातीन मालीक भगवानेन बड़ाय हवती रहणु चाहजे,
काहाकी चु आपसा माणसे पर दया करीन तीनुक हेर कर्यु ने तीनुक छुटकारु आप्यु।#भजन सहीता 111:9; भजन सहीता 41:13
69चु आपसा पावर्या दावुदेन अवल्यात मां सी,
आपणे धड़े एक ताकतवाळु बचाड़ने वाळाक मकेल्लु छे।#भजन सहीता 132:17; यीरम्या 30:9
70ईनी वातेन बारामां भगवान आपसा वाटे चुखला माणसेन साहरे तेरे बारामां ज कह्तु आय रवलु,
71की हामरा वेरीन हातेम सी ने हामुक भुंडा कह्णे
वाळान हातेम सी हामरु छुटकारु हय जाणु चाहजे।#भजन सहीता 106:10
72चु हामरा आड़ा-बुड़ा पर दया करीस करीन कह्लु,
ने आपसु चुखला वायदान हेर करीस करीन कह्लु,
73जी सगुन चु हामरा बास अब्राहम अगळ खादलु ची जी छे,#भजन सहीता 105:8,9
74आपणु आपणा वेरीन हातेम सी हामरु छुटकारु करजे,
ने हामु हिम्मत करीन भगवान मालीकेन सेवा करता रवसु।
75जीवे ती लग तेरी नींगाम चुखला रय्न,
ने तेरा धरम पर चालीन तेरी सेवा करता रवजे।
76ने ए मारा पुर्या! तु आखान डाहला भगवानेन अघी सी आवणे वाळी वात देखाड़ने वाळु कवायसी;
काहाकी तु मालीक-भगवान वाटे वाट तीयार करसी,
ने तेरे अगळ-अगळ चाल्या करसी।#मलाकी 3:1; यसाया 40:3
77तु भगवानेन माणसेक ज कवजी,
की तुहुं भगवान धड़े पापेन माफी हात करीन कसा छुटकारु हात करसु।
78जसु तु कवसी तसुत भगवान पाप माफ करसे काहाकी चु बेसकु दयाळु छे। जसु दाहड़ु उगतेत नवलु दाहड़ु सुरु हये,
तसुत भगवानेन्चां सी बचाड़न्यु हामरेन्चां आवसे।
79तत्यार चु पापेन आंदारला मां ने जलेमकी मोतन साहळा मां बस रया, तींद्रे उपर वीजाळो बी हवसे,
ने तीनुक एक सांतीन जीवाय्न वाटे चालने करीन अगळ-अगळ चालीन अगवाय करसे।#यसाया 58:8; 7:1; 9:2
80ने चो पुर्यो मटो हवतो गुयो ने जीव-आत्मा मां ताकतवाळु हवतु गुयु, ने ईस्रायेली जातीन माणसे अगळ उजेंतो हवणे लग बयड़ा मां रयो।
Одоогоор Сонгогдсон:
लुका 1: NTBSP23
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.
