Luk 8
8
Tei kini ki na kera lae bia tha Jisas
1Ma buira si doo 'eki sui, tha Jisas ka lae 'i laa toaa susu ki ma 'i laa ma'etoaa fa'ekwa ki la'u bo'o, ma nia ka fa'arongo 'ana si Fa'arongoa le'a sulia na 'inotoa tha God. Ma taafulu disaepol ma roo disaepol nia ki kera lae la'u bo'o bi nia, 2bia tei kini ki la'u bo'o na tha Jisas 'e arasia ano'edo ta'a ma mata'ia ki fasida. Ma'alutada na ni: Mere, na kera 'alangia 'ana Magdalen, na tha Jisas 'e arasia na fiu ano'edo ta'a ki fasia, 3ni Joana, kuke'e tha Kusa na wane ba'ita 'ana wane ni raa ki 'i laa na bi'u tha Herod, ma ni Susana, bia tei kini 'oro ki la'u. Kini 'eki kera ili doo ki 'ana riki'i doo kera 'i tala'ada ki, ura betalaa sula tha Jisas bia disaepol nia ki.
U'unua sulia wane 'e fasia mige'e doo ki
(Matiu 13:1-9; Mak 4:1-9)
4Ma si manga na imole 'oro fasia kula 'ee'eta 'oro kwailiu ki kera ofu mai sana tha Jisas, tha Jisas ka u'unu sulia te'e tarifula 'i sada, ka 'una 'eri, 5“Te'e wane 'e lae kai afutaa 'ana mige'e doo ki 'i laa na raa nia. Ma 'ana si manga na 'e afutaa mige'e doo 'eki, tei mige'e doo ki keka 'asia sula tala, ma keka uria, ma tha'aro ki keka 'ania la'u bo'o. 6Aia, tei mige'e doo ki, keka 'asia laa na tha'egano na 'e faula. Ma 'ana si manga na kera bulao mai, keka kuku 'eli'eli la'u bada, sulia na tha'egano 'eri 'e raarange'a. 7Ma tei mige'e doo ki, keka 'asia la'u bo'o 'i ma'alutana na kwalotootora ki. Ma kwalotootora 'eki keka bulao la'u bo'o mai bia mige'e doo le'a 'eki, ma keka su'usida. 8Ma tei mige'e doo ki, keka 'asia la'u bo'o 'i laa na tha'egano le'a, ma keka bulao, ma keka fungu 'ana fo'edoo na 'e 'oro 'asia na'a.”
Ma si manga na tha Jisas ba'e 'una 'eri ka sui, nia ka 'ai ka 'una 'eri, “Mada sa ta imole ka too 'ana alinga ura rongolaa, 'oki rongo mai.”
Ura taa Jisas ka 'aruto'ona si tarifula ki
(Matiu 13:10-17; Mak 4:10-12)
9Sui na disaepol nia ki keka soeto'ona uria na ma'alutana si tarifula 'eri, 10ma nia ka lu'uda, “Kamalu'a mulu todaa na'a na lioto'oa ura ma'aluta'ilana doo tha'ufuni ki 'ana 'inotoa tha God, sui fana tei imole ki la'u, nau kwai ba'e 'ana si tarifula ki, fasi,
“ ‘Keka lio mena, kesi rikia bo'o
Keka fafurongo mena, kesi thaito'omana bo'o.’ ”
'Inifitalana si u'unua baa sulia wane ne fasia mige'e doo
(Matiu 13:18-23; Mak 4:13-20)
11Sui tha Jisas ka ba'e la'u 'una 'eri, “Na 'inifitalana na u'unua 'eri ne'e: Na mige'e doo 'eki na ba'elana tha God. 12Na mige'e doo ki ne 'asia sulia tala, 'e 'uria imole ki na kera rongoa ba'elana tha God, sui tha Saetana 'e lae mai ka lafua la'u bana si ba'ea 'eri fasi mangoda, fasia kesi fa'amamanea 'ana ka fa'amaruki kera. 13Ma mige'e doo ki ne 'asia 'i fafona tha'egano na 'e faula, 'e 'uria imole ki na kera rongoa ba'elana tha God, ma keka todaa 'ana se'ethathalalaa, sui taa 'e a'i 'ada tei lali'idoo. Kera fa'amamanea bada sulia kasi manga bo'o. Sui si manga ilito'oa 'e fula si fa'amamanelaa baa ka a'i la'u bana. 14Mige'e doo ki ne 'asia 'i ma'alutana kwalotootora ki, 'e 'uria imole ki na kera rongoa, sui 'e a'i si tau bo'o, isifuufulilaa sulia na tootodaa, ma se'ethathalalaa bia le'alana fanu nai iano ka su'usida, ma ka adea 'ai 'eri si lukata'i ma a'i si fungu 'ana ta fo'e doo. 15Ma mige'e doo ki ne 'asia 'i laa na tha'egano na 'e le'a, 'e 'uria imole ki na ruuru'uda 'e kokota ma ka le'a, si manga na kera rongoa ba'elana tha God keka taingania, ma 'ana suusu'ulaa keka fungu 'ana fo'e doo.”
Muki rongoa ma muka ro'osulia na ba'elana tha God
(Mak 4:21-25)
16Tha Jisas ka sore'a la'u, “'e a'i ta wane si fa'atharua ta la'afa, ma ka alua bana 'i faara ta kwade'e doo mada 'e a'i faara ta taatafe. Nia kai alua bona'a 'i fuila, fasia imole na kera kotho mai 'i luma keka rikia. 17Sulia ta si doo na 'e too agwa, tootoo kai toolaala'a. Ma si doo na 'e tha'ufuni, tootoo kai too faata'i mai ma ka too laala'a.
18“Adelana bo'o muki manata fiifii 'ana fafurongolaa kamalu'a. Tei na kera too 'ana tei doo ki, keki fale la'u fada. Sui tei kera na a'i kesi too 'ana ta si doo, si doo kera sosa 'ada kera too mena 'ania, keki ngalia fasida.”
Inalaa mamana tha Jisas na imole ki na kera adesuli nia
(Matiu 12:46-50; Mak 3:31-35)
19Sui thainana tha Jisas bia thaasina ki keka lae mai ura rikilanalaa, sui ta 'e 'afeta'i ura keki 'idu karangi nia, sulia figua 'eri kera 'oro kali nia. 20Ma si ba'ea ka fula sana tha Jisas 'una 'eri, “Thainamu ma thaasimu ki, kera nii mai maa, kera thathamia keki riki 'oe.”
21Tha Jisas ka lu'uda ka 'una 'eri, “Thainaku ma do'oraku ki na tei na kera rongoa ba'elana tha God ma keka adesulia.”
Tha Jisas 'e fa'aenoa kuburu
(Matiu 8:23-27; Mak 4:35-41)
22Te'e fa bongi, tha Jisas bia na disaepol nia ki, kera ta'e 'i laa te'e baru, sui nia ka ba'e 'una 'eri 'i sada, “Kulu lae fasi ura bali 'amali lakoo.” Ma keka abula keka lae. 23Ma si manga kera lae na'a, tha Jisas ka biinga 'ana. Ma kuburu ba'ita ka to'o, ma luulua ki keka kwa'e na mai laa na baru 'eri, maka adea baru 'eri karangia kai thuthu bona'a. 24Ma disaepol nia ki keka tharasi nia keka 'una 'eri, “Wane 'inoto 'ae! Kulu kuki mae!”
Ma Jisas 'e tata'e ka ngatafia thauthau 'eri ma luulua 'eki, ma keka adeasuli nia, ma amali 'eri ka eneno'a bona'a. 25Sui tha Jisas ka ngatafia disaepol nia ki ka 'una 'eri, “Fiito'oa kamalu'a ni fei?”
Ma keka kwele, ma keka ma'u, ma keka soeto'oda kwailiu keka 'una 'eri, “Kwa'i wane 'ufita na'a ne'e? 'E ngata bana, ma thauthau ba'ita bia luulua ba'ita ki, keka ro'o suli nia.”
Tha Jisas 'e fa'a'akwaa te'e wane na too 'ana ano'edo ta'a
(Matiu 8:28-34; Mak 5:1-20)
26Sui tha Jisas bia disaepol nia ki, keka lae na'a laa amali 'eri laalae keka fula 'ana balifanua 'i Gerasa, 'ana bali amali na too otofana balifanua 'i Galili. 27Si manga tha Jisas 'e sifo kau 'i thara fasia baru 'eri, nia ka fulato'ona te'e wane fasi kula 'eri. Wane 'eri, na ano'edoo ta'a ki kera 'aruto'ona, ma nia ka talu bana sulia si manga 'e tau mai, ma 'e a'i si too la'u bo'o 'i laa na ta luma, 'e too bana 'i laa na nga maa'ofi ura alulana wane mae ki. 28-29Si manga 'oro ki ne sui na mai, kera kani faafia roo 'aena ma roo 'abana, ma keka alua wane ura liolaa suli nia. Sui taa, nia ka muusia bana naili'i thalo#8:28-29 Na seni 'eki, ma ano'edoo ta'a 'eki keka tari nia ura laa na fanua kwasi.
Ma si manga 'e rikia bo'o tha Jisas, nia ka 'ai ba'ita, ma ka boururu na'a 'i maana 'aena tha Jisas. Tha Jisas ka ba'e 'una 'eri fana, “Ano'edo ta'a, 'o kotho mai 'i maa fasia tha wele'e.”
Ma wane 'eri 'e 'ai ka 'una 'eri, “Jisas 'ae, 'oe wela tha God ne 'inoto ka Tatha! Taa na 'o thathamia 'oki ilia 'ani nau? Na ku gani 'oe, 'osi falea ta kwaakwa'ea faku.”
30Tha Jisas 'e soeto'ona ka 'una 'eri, “Thatamu ni tei?”
Ma nia 'e lu'ua ka 'una 'eri, “Thataku tha Oomea ba'ita#8:30 Legion, 4000-6000 to'a ni firu .” Nia 'e ba'e 'una 'eri sulia na ano'edo ta'a 'oro ki 'asia na'a na kera 'aruto'ona. 31Na ano'edo ta'a 'eki keka ngata kwaitakoi fasia tha Jisas ka a'i si arasida uria laa na kilu kwasi ura kwaakwa'ea.
32Ma botho 'oro ki, keki fanga 'ada sula talitoli karangia la'u bo'o kula 'eri. Ma ano'edoo ta'a 'eki, keka ngata kwaitakoi fasia tha Jisas kai alamatanida ura keki kothofia botho 'eki. Ma nia ka alamatanida. 33Ma keka thaka mai maa fasia wane baa, ma keka kothofia na'a kare'e botho 'eki te'efau. Ma botho 'eki te'efau keka fita na'a sulia ilifau 'eri ma keka igiliu te'efau ura laa na amali, ma keka lola, ma keka mae te'efau.
34'Ana si manga na wane ki na kera lio sulia kare'e botho 'eki kera rikia si doo 'eki, keka thaka, ma keka fa'arongoa 'i laa na ma'e toaa susu 'eri bia ma'etoaa kakali ki la'u bo'o. 35Ma imole ki na kera rongoa, keka lae mai ura rikilana doo na 'e fuli. Ma 'ana si manga kera fula mai sana tha Jisas, keka rikia wane 'eri na ano'edo ta'a 'e lae na'a fasia, ma ka 'ono na'a sana 'aena tha Jisas, ma nia 'e 'afi na'a, ma manatana ka kokota na'a. Ma kera sui keka ma'u. 36Ma imole ki na kera rikia si manga na tha Jisas 'e taria na ano'edoo ta'a 'eki fasia wane 'eri, keka ngata na'a sulia sana imole ki na kera ofu mai neri. 37Sui imole ki sui na kera too 'ana balifanua 'eri, keka fa'arongoa tha Jisas kai lae fasida, sulia ma'ulaa 'e kwa'e kera. Sui tha Jisas ka ta'e 'i laa baru ba, ma keka lae bona'a. 38Ma wane baa na ano'edo ta'a 'e lae fasia, 'e kwaitakoi sana tha Jisas ka 'una 'eri, “'o alamata'i nau kwai lae 'aku bii 'oe.”
Ma tha Jisas 'e arasi nia kau, ka 'una 'eri 'i sana, 39“'o oli 'amu'a ma'afera 'oe, ma 'oko fa'arongo 'ana doo ki sui na God 'e ilia 'i femu.” Ma wane 'eri ka oli, ma ka u'unu sulia doo ki sui na tha Jisas 'e ilia 'i fana.
Tha Jisas 'e fa'a'akwaa roo kini ki
(Matiu 9:18-26; Mak 5:21-43)
40Si manga tha Jisas 'e oli la'u mai uria bali amali 'eri, imole 'oro ki na kera ma'akwali nia. Ma si manga kera riki nia keka se'ethaathala 'asia na'a. 41Ma te'e wane thatana tha Jaeras ka fula mai. Nia ta wane naana'o 'i laa na bi'u ni fo'alaa kula 'eri. Nia 'e lae mai ka boururu 'i 'aena tha Jisas, ma ka ngata kwaitakoi 'i sana tha Jisas fasi kai lae biia 'i luma nia. 42Sulia te'efa thaari muuta'ia nia 'e mata'i, ma 'e karangia kai mae bona'a. Thaari 'eri te'e taafulu fa ngali ma roo fa ngali bo'o.
Ma si manga tha Jisas 'e lae na kau biia, konia 'eri ka ofu kali nia ma keka beresi nia. 43Ma te'e kini, na 'e nana'i angaru'u 'e too la'u bo'o kula 'eri. Na mata'ia ta'a 'eri 'e thaungi nia mai sulia te'e taafulu fa ngali ma roo fa ngali. Ma nia ka 'aruto'ona te'efau na'a na tootodaa nia ki fana wane kwaigurai ki, sui ka a'i si 'akwaa bo'o. 44Ma kini 'eri ka lae eneno mai 'i buira tha Jisas, ma ka sua na tagwarungana maku tha Jisas, ma 'ana si manga 'eri 'ubo'o mata'ia 'eri ka sui bona'a fasi nia.
45Tha Jisas 'e soeto'oda ka 'una 'eri, “Tei na sua nau kau?”
Ma konia 'eri laula'u keka tofe.
Tha Pita ka ba'e 'una 'eri, “Wane 'inoto 'ae, imole 'oro ki na kera beresi 'oe ne'e.”
46Ma tha Jisas 'e lu'ua ka 'una 'eri, “Te'e imole 'e sua nau, sulia ku thaito'omana suukwa'ia 'e lae fasi nau.” 47Ma kini baa 'e thaito'omana nia 'e a'i si tala'ana kai agwa na'a, ma ka lae ni lelebalaa mai, ma ka boururu 'i na'ofana tha Jisas. Ma maana figua 'eri te'e fau, nia ka fa'arongo 'ana tha Jisas ura taa na nia ka suana tagwarungana maku nia, ma si doo ne ilia neri 'e ade nia ka 'akwaa bona'a. 48Tha Jisas ka ba'e 'una 'eri uri nia, “thaari nau, fiito'oa 'oe na 'e adea na 'oko 'akwaa. 'O lae na'a bia enenoa tha God.”
49Si manga tha Jisas kai ba'e 'uu bana, te'e wane ka fula mai fasia luma tha Jaeras, ma ka fa'arongoa tha Jaeras ka 'una 'eri, “Thaari 'oe baa, 'e mae na'a. 'Osi 'aberotania la'u wane to'odoo 'ena.”
50Ma tha Jisas 'e rongoa, ka ba'e 'una 'eri uria tha Jaeras, “A'i 'osi ma'u, 'oki fa'amamane nau, na thaari 'oe kai 'akwaa.”
51Si manga kera fula kau 'i luma, tha Jisas ka lufia ta imole la'u si kotho kau biida 'i luma, talito'ona bana tha Pita, tha Jon ma tha Demesi bia maka ma thainana wela 'eri. 52Ma na konia 'eri te'efau keka liodila, ma keka angisia wela 'eri. Sui tha Jisas ka ba'e 'una 'eri, “Musi angi la'u. Wela ne'e si mae bo'o ne'e, 'e biinga bana.”
53Ma keka waela 'ana tha Jisas, sulia kera thaito'omana na wela 'eri 'e mae mamana na'a. 54Sui tha Jisas ka ra'u 'i 'abana thaari 'eri, ma 'e 'ai ka 'una 'eri, “Kali wela, 'o tata'e!” 55Ma mangona ka oli la'u mai, ma ka tata'e si manga 'eri 'uu bo'o. Ma tha Jisas ka fa'arongo kera ura keki falea ta si fanga fana. 56Ma maka wela 'eri bia thainana keka kwele 'asiana'a, sui tha Jisas ka lufia kesi u'unutania si doo 'eki na 'e fuli sana ta imole.
Одоогоор Сонгогдсон:
Luk 8: MLU
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
