Luk 2
2
Futalana Jisas
(Matiu 1:18-25)
1'Ana fa thato 'eki, na wane'inoto faafia fanua ki na Rom 'e lio sulia, thatana na tha 'Ogastas. Nia 'e alua te'e si bae'a fiifii fana na imole ki sui 'ana fanua ki 'i laa 'inotoa nia, fasi keka lae 'ana fanua koko'o abu kera ki ura kedathatalaa. 2Nia etana bo'o kedathatalaa na kera ilia si manga tha Kirinias 'e wane'inoto faafia profens 'i Siria. 3Ma imole ki sui, keka lae ura kedalana thatada, teete'e imole ka oli uria ma'etoaa nia.
4Tha Josef 'e lae la'u bo'o mai fasia ma'etoaa nia 'i Nasaret, 'i laa balifanua 'i Galili, maka lae ura balifanua 'i Jiudia, ura ma'etoaa tha King Deved na kera 'alangia 'ana Betlehem, sulia tha Josef na wane fasia kwalafaa tha Deved. 5Tha Josef 'e lae ura kedalana thatana bia ni Mere, na kini ba kera fa'a'adoa 'i fana. Ma 'ana si manga 'eri, ni Mere 'e toofa 'oo'oga na'a. 6Ma si manga kero too 'i Betlehem, ni Mere ka se'efii na'a ura fa'afutalaa. 7Ma nia ka fa'afutaa wela tootona'o nia, maka kookofia 'ana si maku, maka alua ka teo 'i laa na si taatafe ni fangalaa buluka ki, sulia 'e a'i na'a ta kula 'i laa na ta bi'u ni toolaa.
'Ensolo ki kera fa'arongo 'ana futalana tha Jisas
8Nga to'a ni fonoto'i kalia sifisifi ki, kera too karangia la'u bo'o si kula 'eri, keki lio 'ada sulia sifisifi kera ki 'i laa rodo 'eri. 9Ma 'ensolo tha God ka faata'i 'i sada, ma laala'aa tha God ka rara faafida, ma keka ma'u 'asia na'a. 10Ma 'ensolo 'eri ka ba'e 'una 'eri fada, “'e a'i musi ma'u la'u, sulia nau ku ngalia mai si fa'arongoa le'a na kai falea se'ethathalalaa fana imole ki sui. 11'Itara'ena te'e wane na kai fa'amaruki kamalu'a 'e futa na'a 'i Betlehem, laa fanua tha Deved, ma nia na Kraest#2:11 Kraest na ma'aluta'ilana, na wane na tha God 'e filia uria kai king, na Mesaea. na Lord. 12Ma si maamalafoa famalu'a 'e 'una 'eri: Muki rikia te'e kali wela na kera 'afua 'ana si maku, ma keka teofania 'i laa na si taatafe ni fangalaa buluka ki.”
13Tona mena, mole'e 'ensolo ki fasia 'i thalo keka faata'i na mai bia 'ensolo ba, ma keka fa'aba'itaa tha God keka 'una 'eri,
14“Le'alaa fana tha God 'i thalo.
Ma enenoa fana imole ki sui 'i fanua na iano na tha God 'e ele sulida.”
15'I buira 'ensolo 'eki kera oli na'a 'i thalo, wane 'eki na kera lio sulia sifisifi ki keka ba'e 'una 'eri fada kwailiu, “Kulu lae fasi 'i Betlehem, fasi kuka rikia na doo na tha God 'e fa'arongo kulu 'ania neri.”
16Keka lae 'eli'eli, ma keka fulato'ona ni Mere bia tha Josef, ma keka rikia kali wela 'eri 'e teo 'ana laa na si taatafe ni fangalaa buluka ki. 17Ma si manga kera rikia na'a, keka ba'e sulia doo na 'ensolo 'eki kera fa'arongo kera 'ania sulia wela 'eri. 18Ma imole ki na kera rongoa, keka kwele 'asia na'a 'ana si taa na kera fa'arongo 'ania. 19Ma ni Mere ka manata sulia doo 'eki sui, maka taingania 'i liona. 20Ma to'a ni fonoto'i kalia sifisifi ki keka oli, ma keka tangoa tha God ura doo ki sui na kera rongoa ma keka rikia 'e mamana na'a mala ba'elana 'ensolo 'eri 'e sore'a 'i fada.
21Buira kwalu fa thato 'e fula na'a, 'ana si manga wela 'eri kai kwa'ikaakali, keka 'alangia na'a 'ana tha Jisas, si thata ba na 'ensolo 'e sore'a fana ni Mere si manga ni Mere si toofa 'oo'oga 'uu.
Kera ngalia tha Jisas 'i laa na Bi'u Abu
22'E fula na'a 'ana si manga fasi tha Josef ma ni Mere keki lae ura fa'afalulaa, sulia biibirangaa ba tha Mosisi 'e alua#2:22 Levitikas 12:6-8 'I buira kuke'e 'i Jiu 'e fa'afuta, na wane ki keka sore'a nia 'e sua. 'Una 'eri nia ka too 'i luma sulia ulu taafulu ma ulu fa thato 'i buira kwa'ikaakalilaa ka sui fata'i, nia kai bi'i falea afufulaa fana Aofia. keki ilia buira tharewelalaa, keka ngalia wela 'eri 'i laa na Bi'u Abu tha God 'i Jerusalem, fasi keka falea fana tha Lord, 23mala keekedalaa sulia biibirangaa tha Lord 'e 'una 'eri, “Wela wane uluna'o ki keki alu talimate 'i fana tha Lord.” 24Keka falea la'u bo'o afufulaa 'ana roo fa ruruu ki, mada sa 'e a'i, ta roo fa bola, sulia biibirangaa tha God 'e thathamia ura fa'afaalulaa buira tharewelalaa.
25Ma 'ana si manga 'eri, te'e wane thatana tha Simion 'e too 'i Jerusalem. Nia te'e wane 'e kokota, ma nia ka too 'ana ma'ulaa tha God, maka too ni kwaima'akwalilaa bana ma'asia si manga tha God kai fa'amarukia imole ki 'i Israel. Na Ano'edoo Abu 'e too 'ani nia, 26maka sore'a nia kai maruki laalae ka fula 'ana si manga nia kai rikia na Kraest na tha God 'e alangania kai fa'amarukia imole nia ki. 27Ano'edoo Abu ka talaia tha Simion ura laa na Bi'u Abu tha God, maka fulato'ona tha Josef bia ni Mere si manga na kero ngalia mai kaliwela 'eri na kera 'alangia 'ana tha Jisas fasi keka ilia si doo ki na biibirangaa 'e sore'a fasi keka ilia 'ana wela 'eri.
28Tha Simion ka 'olia wela 'eri, maka fa'aba'itaa tha God ka 'una 'eri,
29“God 'ae, na alanga'ia ba 'o alangania 'i saku 'e mamana na'a,
alamatania wane ni raa 'oe kai lae na'a 'ana enenoa 'oe.
30Sulia ku rikia na'a 'ana maaku na wane na 'o falea mai fasi kai fa'amarukia imole ki,
31nia na wane 'eri na 'o kwaima'akwali 'ani nia fasi imole ki sui keka rikia,
32nga la'afa fana faata'ilamulaa 'i sana Gentael ki,
ma fa'a'inotolana imole 'oe ki 'i Israel.”
33Ma maka ma thainana wela 'eri keka kwele 'asia na'a si manga keero'a kero rongoa doo 'eki tha Simion 'e sore'a sulia wela 'eri. 34Sui tha Simion ka 'arata'i le'a 'ani kera, maka ba'e 'una 'eri fana ni Mere, thainana wela 'eri, “Tha God 'e filia 'uu na mai wela ne'e, ma imole 'oro ki 'i Israel keki fulato'ona marukia suli nia, ma 'orolada la'u bo'o keki fulato'ona maea sulia kera kesi fa'amamanea. Nia nga maamalafoa fasia tha God, sui imole 'oro ki keki lalakwata'i nia, 35fasia doo agwa 'i laa manatada kai too laala'a. Mere 'ae, liodilalaa ba'ita kai fulato'omu, ma kai 'uria ta 'ila na 'e to'e 'oe, na kai fii 'i laa mangomu.”
36Ma te'e 'oru kini 'e too la'u bo'o si manga 'eri, thatana ni 'Ana, ma nia te'e profet la'u bo'o, maka kuke'e na'a. Nia thaari tha Penuel, 'ana kwalafaa tha Asa. Si manga 'e thaari'i 'uu, nia 'e to'owane maka too bia ara'i nia sulia fiu fa ngali bo'o, 37sui nia ka 'oru ka too mai ka fula 'ana kwalu taafulu ma fai fa ngali. Nia ka too ngado 'i laa Bi'u Abu tha God. Ma 'ana si manga ki sui bana nia ka abu fasi fangalaa, maka too 'ana fo'alaa, ma 'ana faarebaitalaa 'ana tha God 'ana fa thato ma farodo ki sui bana. 38'Ana si manga 'eri la'u bo'o, nia 'e fulato'ona tha Josef ma ni Mere, maka tangoa tha God, maka ba'e sulia wela 'eri fana imole ki sui na kera ma'asia si manga tha God kai fa'amarukia imole ki 'i Israel.
39Si manga tha Josef ma ni Mere kera fa'asuia ililana doo ki sui na biibirangaa tha God 'e gani uria, keka oli na'a ura ma'etoaa kera 'i Nasaret, 'i laa na balifanua 'i Galili. 40Ma wela 'eri ka ba'ita mai, maka suukwa'i, maka too 'ana lioto'oa. Ma mamanaa ki tha God ka too biia.
Jisas 'e ni laa na Bi'u Abu tha God
41'Ana fa ngali ki sui, maka ma thainana tha Jisas kera lae 'i Jerusalem uria na Faafangaa 'ana tathafaafilaa. 42Si manga tha Jisas 'e fula 'ana taafulu fa ngali ma roo fa ngali, keka lae la'u bo'o 'ana faafangaa 'eri sulia biibirangaa kera. 43'I buira faafangaa 'eri, maka nia ma thainana keka oli nadaro'a. Sui taa, keero'a kesi thaito'omana bo'o na tha Jisas 'e too 'uu bana 'i Jerusalem. 44Kero fiia 'adaro'a sa 'e lae na'a bia laea ba'ita 'eri, ma keero'a keka lae nadaro'a sulia fa thato laula'u sui fata'i keka bi'i thafali rofe 'i ma'alutana inalada, ma imole kwaimani keero'a ki. 45Ma si manga kera rofe ma kesi riki nia, keka oli ma keka rofe la'u mai 'i Jerusalem. 46Buira uula fa thato, keka bi'i fulato'ona 'i laa na Bi'u Abu tha God. Nia 'e too 'ana biia wane ni to'odoo ki 'i Jiu, kai fafurongo maka soeto'oda 'ana. 47Ma imole ki sui na kera rongoa ngatalana, keka kwele 'asia na'a 'ana tha'ito'ome'edoolaa nia ki, ma lu'ulaa nia ki. 48Ma si manga maka nia ma thainana kero riki nia, keka kwele 'asia na'a. Ma thainana ka sore'a 'i sana, “Kaluwane nau 'ae, ura taa na 'oko ade 'une'e 'ani kamare'a maka 'oe? Maka 'oe ma ni nau, mere rofe mai ura 'oe, ma manatamare'a ka isifuufuli 'asia na'a.”
49Ma nia 'e lu'uda ka 'una 'eri, “Ura taa na moko rofe mai uri nau? Kamaro'a a'i mosi thaito'omana bo'o nau kwai too 'i laa bi'u Maka nau?” 50Sui taa, kesi thaito'omana bo'o ma'aluta'ilana si ba'ea na 'e sore'a 'i sadaro'a.
51Sui, tha Jisas ka oli na'a bii keero'a uria 'i Nasaret, maka ade sulia ba'eladaro'a. Ma thainana ka taingania si doo 'eki sui laa liona. 52Tha Jisas ka ba'ita mai 'ana se'edoo ma 'ana lioto'oa, ma God bia imole ki keka se'ethaathala la'u bo'o suli nia.
Одоогоор Сонгогдсон:
Luk 2: MLU
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
