San Mateo 2
2
Mo̧ro̧jä̧ jäwä wo̧juä̧tü̧
1Herode Rey ru̧wa̧ weü pä̧nä̧, Jesú-mä̧ Berȩ́#2.1 Berȩ́mä̧ Berȩ́ ütawiyämä̧ Jerusarȩ́-ttü̧mä̧ kkä̧wa̧ ma̧ä̧cha̧'a̧ku̧ tü'künä̧nü̧ wi̧na̧'a̧ (1 S 16.1). Cf. Lc 2.4-7. ütawiyä, Judea rȩjȩttü̧ uwäpächomȩnä̧, mo̧ro̧jä̧ jäwä wo̧juä̧tü̧, kkä̧wa̧ räopa'akuttü Jerusarȩ́ ütawiyära̧'a̧ rȩbȩä̧kuä̧wi̧nä̧tü̧, 2Juätümä̧, jä'epü ä̧ju̧kui̧nä̧tü̧:
—¿Tȩnȩ́ ü̧ja̧'a̧jä̧ttü̧, judío ttu̧ru̧wa̧ Rey uwäpächäjimä̧? Jua̧u̧ uwäpächü siri'ko kkä̧wa̧ räopa'akuttü i̧jȩkua̧'a̧ topäjä'kotü, jua̧u̧ru̧ eseu ichäjätüjä̧. 3Pi̧yȩ ä̧ju̧ku̧, Ru̧wa̧ Rey Herode-mä̧ rü̧ȩnä̧ ye'ekue'i'inü̧ ja̧'wa̧ta̧nü̧ Jerusarȩ́ ttü̧ja̧'i̧nä̧ o'katoi'ünä̧ ye'inä̧tü̧. 4Ja̧'wa̧nü̧ ji̧yä̧ku̧, Ru̧wa̧ Rey-mä̧, sacerdote wotü tturuwotü o'katoi'ünä̧rü̧ wopo'ü kkä̧nü̧, ttü̧ja̧rü̧ weäwä wȩnȩ wo̧juȩtä̧'i̧jä̧tü̧rü̧'i̧nä̧ wopo'ü, Crito-mä̧#2.4 Jesucrito Mt 1.17nä̧ topi. torü uwäpächäkua'a jä̧'i̧ja̧'a̧ ja̧ pä'ü, jä'epü ä̧ju̧kui̧nä̧u̧. 5Ja̧'wa̧nü̧ jä̧ȩpä̧u̧mä̧, ttädätinä̧ku̧:
—Berȩ́ ütawiyä, Judea rȩjȩttü̧ pä'ija'a; profeta i̧wȩyu̧ti̧nü̧mä̧ pa̧'a̧nü̧ pä'attü̧:
6«Uku Berȩ́mä̧ rü̧ȩnä̧ ukuo isomȩjä̧
Judá isotü ttidepiyuttumä̧,
Ukuttümä̧ u̧wä̧pä̧chä̧kua̧ ttü̧ja̧ ttu̧ru̧wa̧ príncipe pättäku,
chumüwäyotü Irae ttü̧ja̧rü̧ juȩpä̧rä̧kua̧.»#2.6 Irae ttü̧ja̧mä̧ oweja-tü̧rü̧ tta̧'a̧rü̧ aditinä̧tü̧. Juätürü tta̧wä̧rä̧kuä̧wä̧ isotümä̧ pató-tü̧ pä'ü ottinä̧u̧, ja̧'wa̧nü̧ ja̧'a̧ttü̧ juätürü juȩpä̧rä̧kua̧rü̧ päwächina̧'a̧ (Jn 10.11).
7Ja̧'wa̧nü̧ ä̧ju̧ku̧, Herode-mä̧ mo̧ro̧jä̧ jäwä wo̧juä̧tü̧rü̧ yä̧wä̧i̧nä̧ wopo'ü, jä'epü ä̧ju̧kui̧nä̧u̧, siri'komä̧ ti̧yȩnü̧ räopina̧ já̧ pä'ü. 8Jua̧u̧ o'ka'a, Berȩ́ ütawiyära̧'a̧ we'ü iku päinä̧u̧:
—Jua'atä tätukui, ji̧'chi̧cha̧wa̧ ütü'kü jä̧'ȩpä̧rü̧ kuä̧ju̧kuä̧tu̧kua̧; ku̧'o̧kui̧'ä̧tu̧mȩnä̧mä̧, ttürü'i̧nä̧ jikuäwätukuattü, ttü'i̧nä̧ chiwe'kiyunä̧ kkä̧mä̧dü̧ chesewäjarü.
9Pä̧u̧, Ru̧wa̧ Rey ukuokua'a ä̧ju̧kui̧'i̧pü̧, rä'opächü 'chi̧nä̧tü̧; tti̧'cho̧mȩnä̧, kkä̧wa̧ räopa'akuttü tottäjäku siri'ko päjimä̧ ttä'kanä̧ i̧'cha̧'a̧ topinä̧tü̧, ja̧'wa̧nü̧ jä̧ja̧'a̧ttü̧mä̧ ji̧'chi̧cha̧wa̧ ü̧jo̧mȩ wä̧mȩ jo̧mȩ wirochi'ü rä̧mä̧di̧nü̧. 10Mo̧ro̧jä̧ jäwä wo̧juä̧tü̧mä̧ siri'korü topü rü̧ȩnä̧ eseäkuäwinä̧tü̧. 11Isodenä̧ dottächi'omȩnä̧, ji̧'chi̧cha̧wa̧ ja̧ju̧ María-ku ü̧ja̧'a̧ topinä̧tü̧; topümä̧ ttiwe'kiyunä̧ pä̧mä̧dü̧ ttu̧ru̧wa̧ jü̧nä̧ ttesewinä̧ku̧; esewäjä'kotümä̧, ttiäre Pärätä ȩko̧ka̧, ba'epo'ü mippoünä̧ ttiyinä̧ku̧ oro'i̧nä̧, incienso'i̧nä̧, mirra'i̧nä̧ jü̧nä̧. 12Ja̧'wa̧nü̧ jä̧ji̧ o'ka'a, Dio-mä̧ ttu̧'kuo̧ti̧nä̧ Herode ü̧ja̧'a̧ ppa̧ttä̧chü̧ juiyünä̧ päjä̧u̧, kko̧ro̧mä̧nä̧tä̧ ppa̧'ä̧chü̧ i̧wi̧nä̧tü̧ tti̧rȩjä̧ra̧'a̧mä̧.
Egito-ra̧'a̧ ji̧'chi̧cha̧wa̧rü̧ o'ipächinä̧tü̧
13Juätü tti̧wi̧'i̧'ä̧ji̧ o'ka'a, Tu̧ru̧wa̧ u̧mü̧wä̧ya̧ á̧gȩ, José-rü u̧'kuo̧ti̧nä̧ i̧jȩku̧ pä'inü̧: Ä̧rä̧mi̧'ü̧, ji̧'chi̧cha̧wa̧rü̧ ja̧ju̧tä̧ku̧ ȩmi̧pü̧ Egito-ra̧'a̧ tü'ipächi; Herode-mä̧ ji̧'chi̧cha̧wa̧rü̧ kuä'ü ikua pä'ü u̧sä̧kua̧, jua'atä ku̧ja̧jä̧ jidäwomȩbü päi'ünä̧.
14Ja̧'wa̧nü̧ weäjäku ä̧rä̧mi̧'ü̧, José-mä̧ ji̧'chi̧cha̧wa̧rü̧ ja̧ju̧tä̧ku̧ yodó ȩmi̧pü̧ rä'opächinü̧ Egito-ra̧'a̧, 15Jua'atätä kku̧nä̧ri̧nü̧ Herode 'korupäi'omȩbü päi'ünä̧. Ja̧'wa̧nü̧ jo̧mȩnä̧, Tu̧ru̧wa̧ profeta-nä̧ ukuokuinü̧ta'anü̧ 'kuäopina̧'a̧, jua̧u̧mä̧ pa̧'a̧nü̧ pä'inü̧: «Egito-ttü chi̧tti̧rü̧mä̧ wopinü̧sä̧.»
Herode ji̧'ki̧cha̧wa̧rü̧ kuä'ü ikua pä'inü̧
16Herode-mä̧, mo̧ro̧jä̧ jäwä wo̧juä̧tü̧ ttüyaparewäku wo̧jui̧'ü̧ rü̧ȩnä̧ a̧mi̧ surächi'äku, ppo̧'ä̧tü̧ todäre a̧'ȩ dȩ'a̧'a̧ku̧ wotürümä̧, Berȩ́ ütawiyänä̧ kka̧kuä̧tü̧rü̧'i̧nä̧, jäyänä̧ kka̧kuä̧tü̧rü̧'i̧nä̧ o'katoi'ünä̧rü̧ kuä'äu ttikua pä'ü we'inü̧, mo̧ro̧jä̧ jäwä wo̧juä̧tü̧ jittäwäjittü amükuädü topü. 17Ja̧'wa̧nü̧ 'kuäopina̧'a̧ Dio Profeta Jeremía-nä̧ ukuokuinü̧mä̧, jua̧u̧mä̧ pa̧'a̧nü̧ pä'inü̧:
18Ramá-ttü̧, rü̧ȩnä̧ rettü ttajuäkuäu rä̧mi̧pi̧na̧'a̧.
Juäju ajuäwäjumä̧, Raquel ji̧na̧'a̧, kki̧tti̧mü̧rü̧ rettü,
totte'ächäjiyäkua ro̧ȩkuä̧ juiyünä̧tä̧ kkajuäwa'a.
José-mä̧ i̧tti̧ ja̧ju̧ku̧, i̧tti̧ku̧ Nazare-nä̧ kkä̧mä̧di̧nü̧
19Herode wa'ü ikuäji o'ka'a, Egito-ra̧'a̧ttü̧ José-rü u̧'kuo̧ti̧nä̧, Tu̧ru̧wa̧ wȩ'ä̧wa̧ á̧gȩ-mä̧ i̧jȩku̧ pä'inü̧: 20Ä̧rä̧mi̧'ü̧, ji̧'chi̧cha̧wa̧rü̧ ja̧ju̧tä̧ku̧ ȩmi̧pü̧ Irae rȩjȩra̧'a̧ ppa̧'ä̧chi̧, täkü ji̧'chi̧cha̧wa̧rü̧ kuä'ü ttikua pä'inä̧tü̧mä̧ to'e'ächäjätü.
21Ja̧'wa̧nü̧ ji'äwäjäku, José-mä̧ ä̧rä̧mi̧'ü̧ ji̧'chi̧cha̧wa̧rü̧ ja̧ju̧tä̧ku̧ ȩmi̧pü̧ Irae rȩjȩra̧'a̧ ppa̧'ä̧chi̧nü̧. 22Ja̧'wa̧nü̧ ja̧'a̧nä̧, José-mä̧ judea rȩjȩra̧'a̧mä̧ ye'eku i̧'cha̧ pä'okü pinü̧, Herode i̧tti̧ o̧'ka̧ Arquerao#2.22 Arquerao: Pide ru̧wa̧mä̧ gobernador jü̧nä̧ we'inü̧ Judea-nä̧'i̧nä̧, samaria-nä̧'i̧nä̧ ja̧'wa̧ta̧nü̧ Idumeanä̧ jü̧nä̧. Crito uwäpächäkua'a ä'kanä̧'i̧nä̧; uwäpächinü̧ o'ka'anä̧'i̧nä̧ we'inü̧ (Lc 19.12). ru̧wa̧ pü̧do pätta'a ä̧ju̧kuä̧ji̧'ka̧; ja̧'wa̧nü̧ ji̧yä̧ku̧, Dio wȩ'ä̧wa̧ á̧gȩ-mä̧ Galirea rȩjȩra̧'a̧tä̧ i̧'cha̧ päinä̧ku̧. 23Juä̧jä̧ rȩjȩnä̧ 'chä̧wi̧'ü̧mä̧, Nazare ütawiyänä̧#2.23 Nazare-mä̧ ji̧yȩnü̧ mo̧ro̧mä̧ jua̧u̧ ütawiyämä̧ adiunä̧mä̧ ukuo juiyinomȩ. Galirea mü̧ä̧'kanä̧ wi̧na̧'a̧ (Lc 2.39,51; Jn 1.45). idepiyu päi'ünä̧ kkä̧mä̧di̧nü̧. Jua'amä̧ profetas pättinü̧ta̧'a̧nü̧ 'kuäopa'attü, pa̧'a̧nü̧ pä'inä̧tü̧: «Jesú-mä̧ nazare ütawiyä ttü̧ja̧sa̧ pä'ü i̧mi̧kuä̧kua̧.»
Одоогоор Сонгогдсон:
San Mateo 2: PNT13
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Sociedades Biblicas Unidas en Venezuela