Matthew 6
6
Hoꞌi aꞌe alakama
1“Lolosi hamakonu. Okou isehaiꞌahi ma okou ekonu imua namaisu keonohenua ihamaha lia lakou. Aoki Kamana okou i kevaelani ameseau aku nakuhana okou.
2“Kena kulana okou ehoꞌi aꞌe namea i nakama haaloha, okou isekaukali nakipukipu nakama eahu la. Nakama la ehaiꞌahi ma lakou nikama kaualeꞌa. Kela hea nakama la eili kepuu keualoko lakou eau aꞌe nahoꞌi lakou, pela keonohenua la mehamaha lakou iloko hale loku, ia ihamaha lakou hoi valoko keala. Anau eme aku kehamaoni. Nakama eahu la nako avale nakuhana lakou. 3Ia kulana okou ehoꞌi aꞌe nakama haaloha, okou isehuli aꞌe nikama iꞌike nia okou ehoꞌi aꞌe la. 4Kena sehikama memakino pela okou ehoꞌi aꞌe namea la. Emeia Keakua soia meꞌike nia okou ehoꞌi hasemuu la, kena meiau aku nakuhana okou.
Kipukipu keloku
(Luk 11.2-4)
5“Kulana okou meiloku, okou isekaukali nakipukipu nakama eahu. Nakama la hihai ikuu iloko nahale loku ia ma naꞌina eꞌapi kekama noloku hamaloa. Pela keonohenua la meiꞌike lakou eloku. Anau eme aku okou kehamaoni. Nakama la nako avale nakuhana lakou. 6Ia kulana okou meiloku, kaꞌa iloko puikana iloko hale nahale okou la. Pui nakokoꞌa la, kena loku aꞌe Kamana okou i kevaelani kela okou seꞌike la. Kama la soia eꞌike hea okou eloku, kena meiau aku nakuhana okou.
7“Kulana okou eloku, okou isekakala vale poi nikama kela semakino Keakua. Nakama la ehakaꞌoko pela Keakua melono nalokuloku lakou, maikinimea naloku la eloloa. 8Okou isekaukali nakipukipu nakama la. Kamana okou ialuna namakino avale hea okou hihai, imua okou eainoa aꞌe aia. 9Ia kena kulana okou eloku, loku aꞌe Keakua penei,
‘Kamana makou i kevaelani,
Makou hakoa ihamalu kemale aꞌoe ekapu.
10Hamai nohamakua naonohenua hakoa.
Pela nakama kemaalama nei meihalono i aꞌoe
Ihau poi nakama i kevaelani la ehalono i aꞌoe.
11Au mai niꞌai ma makou keaho nei.
12Haialoha mai makou nia makou esala,
Ihau poi makou ehaialoha nakama kela ehaisaꞌino mai makou.
13Sehakaꞌi makou ikaoleole hia namakeala saꞌino,
Ia konaꞌi mai makou ikaha ma namea saꞌino la.’
14“Poi okou ehaialoha nakama kela ehaisaꞌino okou, kena Kamana okou i kevaelani mehaialoha aku okou nia okou esala. 15Ia poi okou sehaialoha nakama kela ehaisaꞌino okou, kena Kamana okou i kevaelani mesehaialoha aku okou nia okou esala.
Hasese hiꞌai
16“Kulana okou meihasese hiꞌai, okou seiꞌila haaloha naꞌalemaka okou, poi nakama eahu. Nakama la eꞌilaꞌila haaloha naꞌalemaka lakou iꞌike alakama pela lakou ehasese hiꞌai. Anau eme aku kehamaoni. Nakama la nako avale nakuhana lakou. 17Ia kulana okou meihasese hiꞌai, okou iauꞌau imakahua, amusi, kena usoe naloulu okou poi naaho hakoa. 18Kena alakama mesemakino pela okou ehasese hiꞌai. Kamana okou ialuna memakino soia pela okou ehasese hiꞌai, kena meau aku nakuhana okou.
Namea kaualeꞌa i kevaelani
(Luk 12.33-36)
19“Okou sehakau namea kaualeꞌa i kemaalama nei, maikinimea namela meio nooki. Namalo iloko napapa mekonia nalolona, ia naheaꞌu akana la mepili kaekana, ia nakama kahao saꞌino meihaa nahale la noailalao. 20Emeia okou ihakau namea kaualeꞌa i kevaelani. Name la meselavaa kekonia, ia meselavaa kepili kaekana. Selavaa nakama kahao saꞌino kehaa nahale la noailalao. 21Okou mehakaꞌoko kahi keꞌina kela okou mehakau namea kaualeꞌa okou.
22“Naꞌalemaka aꞌoe ehuli aꞌe nakipukipu keola aꞌoe. Poi naꞌalemaka aꞌoe la ekaualeꞌa, keola aꞌoe memalama hakoa. 23Ia poi naꞌalemaka aꞌoe esaꞌino, keola aꞌoe mepouli kakano. Ame kemasina aꞌoe la ehanopouli, kena keola aꞌoe la mepouli haeꞌo.
Sehakekele
(Luk 16.13; 12.22-31)
24“Selavaa hekama iheheaꞌu ma sakama hamakua. Kama la melaoi kelaa kama, ia meililoko kelaa kama. Kama la mehalono kelaa kama, ia mehanaꞌino kelaa kama. Poi okou emanaꞌo namoni, kena okou meselavaa keheheaꞌu ma Keakua.
25“Kena anau eme aku okou isehakaꞌoko maha naola okou. Okou isehakekele naꞌai okou meꞌai, ia ma namea okou meunu la. Maikinimea keola elaꞌa iluna naꞌai. Ia okou isehakekele napamalo okou eleleu na hoi, maikinimea kinokama elaꞌa iluna napamalo. 26Okou iꞌila aꞌe namanu kela lelele valuna. Namanu la sekoli naꞌai lakou, ia sehaꞌuku naꞌai iloko naohana lakou. Emeia Kamana okou ialuna ehanai lakou. Ia okou emakino pela okou elaꞌa iluna namanu la. 27Niaina hekama ehakekele mahi keola aia, kama la meselavaa kehanuu keola aia la iloloa, ia selavaa kehapaa aꞌe keaho hokahi.
28“Aiea okou hakekele napamalo naea? Ila aꞌe naꞌauke kela esomo vamalae. Naꞌauke la seheheaꞌu nopena nipamalo ma lakou. 29Ia anau eme aku okou pela napamalo kaualeꞌa kekuꞌu Solomon la sehamanaꞌo poi naꞌauke la. 30Keakua ehalalaꞌei naꞌauke iloko malae la. Keaho nei naveve eola, ia kaiao umake, kena meilaku iluna keahi ivela. Ia okou elaꞌa iluna naꞌauke la. Niaina ma okou sehakina, Keakua mekauhano kekonaꞌi okou.
31“Okou isehakekele pela, hea okou meiꞌai, ma hea okou meiunu, ma hea okou meileleu. 32Nakama enoho pouli ehakekele maha namea la. Ia Kamana okou i kevaelani namakino avale pela okou hihai namela. 33Emeia okou ihakekele maha pela Keakua mehamakua iloko naola okou, ia hakea naola okou ikonu i namaisu aia. Ia kena Keakua meihoꞌi aku namea la hakoa. 34Okou isehakekele hea meapihi aku kaiao. Hakali kaiao, kena okou amehakekele namea na. Namea saꞌino keaho nei ukau ma keaho nei. Kaiao kena kelaa aho.
Одоогоор Сонгогдсон:
Matthew 6: ojv
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 1999, Wycliffe Bible Translators, Inc. All rights reserved.