Chenesis 8
8
1Mihma Chitokaka yʋt Noah ya̱, micha nan okcha̱ya moma, micha nampoa moma api̱hʋt peni chito ya̱ a̱lhto tuk ash ithaiyana tok: mihma Chitokaka yʋt yakni paknaka ya̱ mahli hlopullichi ma, oka yʋt halata tok.
2Mihma oka hofobi chito oka akohcha puta, micha shutik okhissushi puta aiena kʋt ʋlhkʋma ma, umba chito ʋba minti kʋt oktʋpa tok.
3Mihma oka yʋt yakni paknaka ya̱ a falamʋt yana̱hanli na bilia tok: atuk osh nitak tahlepa achʋfa cha pokoli tahlapi kʋt ont taha ha ya̱ oka yʋt shipa tok.
4Mihma hʋshi isht untuklo, hʋshi yʋmmʋt nitak ont isht auah untuklo kak o̱, peni chito yʋt nʋnih chaha Alalat paknaka ya̱ ontʋla tok.
5Mihma oka yʋt tahʋt ma̱ha̱ya na hʋshi ont ishit pokoli tok: hʋshi ont ishit pokoli hʋshi yʋmmʋt nitak ʋmmona ma, nʋnih chaha puta paknaka yʋt haiaka tok.
6Atuk o̱ yakohmi tok, nitak pokoli ushta kʋt ont taha ma, Noah hʋt peni chito ikbi tok ash okhissushi ya̱ tiwi tok:
7Micha fʋla chito yo̱ kohchechi na, kohcha mʋt il afalama̱ho̱wa na, yakni paknaka ya̱ oka yʋt a shipʋt taha tok.
8Micha oka yʋt yakni paknaka ya̱ a shipʋt tahakmá, nana tukma akostinincha chi̱ hosh pʋchi yoshuba ak kia kohchechi tok.
9Yohmi tuk kia pʋchi yoshoba yʋt iyi yʋt ai o̱ hikiʋt foha hi ʋt ik ahayucho mʋt, falamʋt im ʋla cha, peni chito yash chukowa tok: oka yʋt yakni paknaka moma ka̱ onʋtoyula hatuk oka: yohmi ma ibbak a̱ pit weli cha, ishit peni chito et il iba fohki tok.
10Atuk osh anta na nitak untuklo akinli ma, anonti pʋchi yoshuba yash peni chito ya̱ kohchechi tok.
11Atuk o̱ opia ma pʋchi yoshuba ash osh falamʋt im ʋla mʋt, yakeh! itih ha̱ alif hishi okcha̱ki ʋt foyuka tok. Yohmi ho̱ yakni paknaka ya̱ oka yʋt a shipʋt taha tuk a̱ Noah hʋt akostininchi tok.
12Atuk osh anonti nitak untuklo ho̱ anta tuk osh, pʋchi yoshuba yash a kohchechi tok: mihma yʋmmak osh himakma falamʋt ik im alo tok.
13Atuk o̱ yakohmi tok, afʋmmi tahlepa hannali cha achʋfʋt aiena, hʋshi ʋmmona, micha hʋshi yʋmmʋt nitak ʋmmona ma, oka yʋt yakni paknaka ya̱ a shipʋt taha tok: mihma Noah hʋt peni chito isht ompoholmo ash kanʋllichi cha, hopo̱koyo ma, yakeh! yakni paknaka yʋt shila atok.
14Atuk osh hʋshi atukla, hʋshi yʋmmʋt nitak ont ishit pokoli tuklo akucha untuklo ma, yakni ʋt shilʋt taha tok.
15Mihma Chitokaka yʋt Noah a̱ im anumpulit,
16Chishno, micha chi tekchi, micha chiso ʋhleha, micha chiso ʋhleha tekchi puta aiena ka̱ pehliechit peni chito ya̱ ish a kohchashke.
17Nan okcha̱ya nipi il aiyukali puta moma chi apehʋt ma̱ya tuk, hushi, micha nan ʋlhpoa, micha nana balʋlli yakni paknaka om balʋlli aiena ka̱ pehliechit ish kohchashke; yohmi na yakni paknaka ya̱ alauachi fehnʋt chelashke, micha yakni paknaka ya̱ a wayʋt apaknashke, achi tok.
18Mihma Noah hʋt ushi ʋhleha, micha tekchi, micha ushi ʋhleha tekchi puta itʋpehʋt kohcha tok.
19Nan okcha̱ya puta, nana balʋlli puta, micha hushi puta, micha nana hosh yakni paknaka om balʋlli, ilap aiachʋfa aiyukali momʋt peni chito ya̱ kocha wiha tok.
20Mihma Noah hʋt Chihowah ya̱ alta im ikbi cha, nan ʋlhpoa kashofa puta, micha hushi kashofa puta ai ishi cha, alta yash onochit hukmit isht aiokpʋchi ya̱ im issa tok.
21Mihma Chihowah yʋt na balama achukma ka̱ hu̱wa tok; micha Chihowah yʋt ilap chu̱kʋsh akinli ka̱, Hatak atuk pulla mak o̱ himakma anonti yakni ya̱ kalakshichi la he keyu hoke; hatak chu̱kʋsh im anukfila hʋt ʋlla tomba makinli ho̱ ik achukmo hoka: micha yʋmihchi li tuk a̱ anonti himakma chohmichit nan okcha̱ya moma ka̱ issot kanchi la he keyu hoke.
22Yakni ʋt talaia moma ka̱, nahokchi nitak, micha nawaya ʋmo̱, micha kapʋssa, micha lʋshpa, micha toffa, micha hushtula, micha nitak, micha ninak aiena kʋt hokofa he keyu hoke, achi tok.
Одоогоор Сонгогдсон:
Chenesis 8: CHH
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Published by the American Bible Society 1848-1886, reprinted 1913
