Uruti 1
1
Elimelɛki wɔ kaniŋ ki ɲaanfɛkwulu bi kiri
1Ŋununtiŋ kiri waari ki ru, bɛɛ ki wuru Isirayɛli kɛniŋ ki ru sɛbɛ. Bɛtilɛhɛmutɔnŋ bɛɛ fa awɔ mari fa a danshuru fuuli i jɔrɔkɔ, kí i po Yuda sɔɔta ki ru, kí i na sɔɔmaŋ ceeli Mowabu sɔɔta ki ru. 2Shuru ki tɔ wuru tu Elimelɛki, ntiŋ wɔ mari ki tɔ ki i ji tu Nawomi#1.2 Nawomi kɔri ki i tu fɛrɛmaan Iburuwulu ki ru., ntiŋ danshuru fuuli kiri tɔ kiri ji tu Malɔn fa Kilijɔn. Kí wuru Efarata nupo ri i, kí i po-ri Bɛtilɛhɛmu, Yuda kɛniŋ ki ru. Kí ta-i so Mowabu kɛniŋ ki ru, kí i sɔɔ niŋ mani nu.
3Nawomi wɔ shuru Elimelɛki i na beeni, ntiŋ i nmari fa a danshuru fuuli ki tu nmaŋ. 4Danshuru kiri i na Mowabu nupo mari kiri bɛɛ ri cɛn. Niŋ mari ki bɛɛ tɔ wuru tu Oripa, tenŋ tɔ i ji tu Uruti. Kí i jiri byinŋ bishi ma niŋ mani nu. 5Niŋ kɔɔtɛ, Malɔn fa Kilijɔn i na beeni sɛbɛ. Nawomi i tu shuru bali fa daŋ bali.
Uruti fa Nawomi tiri bi ki arìmaŋ fan
6Ŋì i Nawomi tu Mowabu kɛniŋ ki ru, nmari i ǹʼnama tu Ŋuntiŋ Kirinŋ ye afɔɔn konanbi ki tɛ, ŋì i kɔ́ɔ́ bilaŋ kiri shɔ. Niŋ na, nmari fa a samari fuuli ki i jɔrɔkɔ po san Mowabu, tu arì ra ta Yuda kɛniŋ ki ru. 7Kí po san-i arì sɔɔmaŋ ki ru, nmari fa a samari kiri i arì bo saa ki sun, kí i arì pwulu tiri-ri Yuda kɛniŋ ki ru. 8Ŋì i kí tu saa ki fan, Nawomi i ǹʼbi a samari fuuli ki tɛ, tu kí arì pwulu tiri arì nɛɛn kulu kiri ru. Nmari tu kíbɛɛ shɔɔrinŋ wɔ̀ ma afinŋ fa koŋ kɔmaan kari tɛ, tu Ŋuntiŋ Kirinŋ niŋ bishi ma kí tɛ sɛbɛ. 9Tu Ŋuntiŋ Kirinŋ ncusun kí fɔn i shuru kila niŋ fa kí i ɲaanfɛfili kila niŋ shurukulu kiri ru. Niŋ kɔɔtɛ, nmari i a kɔlɔkɔli kí wu, nmari i coolinŋ wɔri kí tɛ, kí i ŋuntan kusɛbɛ. 10Niŋ kɔɔtɛ, kí i ǹʼbi Nawomi tɛ : « Aayi! Yibɛɛ ra ta ábɛɛ fan áwɔ koŋ kiri wɔ kɛniŋ ki ru. »
11Nawomi i kí rupwulu tu : « Ńʼdanmari ri, á á pwulu. Ábɛɛ i na-a míŋ fan nfɛnŋ na? Míŋ a so daŋ ji-i kili, ábɛɛ ra na so nwɔ̀ri ji-i áwɔ shuru ri kili wa? 12Á á pwulu, ńʼdanmari ri. Á tiri, sabu míŋ bwuubi so-i kɔ. Shuru ra so míŋ cɛn-i, ŋí i daŋ ni kila kili kì. Hali míŋ ǹʼbi ábɛɛ tɛ, ńʼtu míŋ faa-ra so daŋ ni kila-i, shuru i ńʼshi mìŋ jiŋ, ŋí i danshuru ri kila, 13ábɛɛ a so nini gbɛ ki sunsuu wa? Ábɛɛ ra á kaan á furu sun shuru tɔri sun, fɔ niŋ daŋ kiri i na gbɛ wa? Aayi, ńʼdanmari ri! Niŋ yɛlinŋ ki a gbɛ ábɛɛ sun. A ǹʼtɔ tu Ŋuntiŋ Kirinŋ i ka ɲaniŋ ka bataa sɔɔ-ra mínki sun. »
14Niŋ na, kí i yaalinŋ tɔri po kusɛbɛ. Niŋ kɔɔtɛ, Oripa i a kɔlɔkɔli a shinŋ ɲiŋ Nawomi wu, nmari i saa ki mwu nmari wu, nmari i tiri. Nka Uruti i a da tu Nawomi ra nmaŋ. 15Nawomi i ǹʼbi nmari tɛ : « Ǹʼshɛɛli Oripa a pwulu tiri-i awɔ koŋ kiri fa arɔɔ tanfinŋ kiri tɛ, nʼyɛrima ki nʼpwulu. »
16Uruti i ǹʼbi Nawomi tɛ tu : « Fa míŋ kalikali san nʼcɛfan kì, ŋi i ǹʼbi tu ŋí i ńʼpwulu ńʼwɔ kpeeri tɛ kì.
Miŋ a tiri mani wɔ̀ ru, míŋ a ta niŋ mani ki ru.
Miŋ ta sɔɔ mani wɔ̀ ru, míŋ a ta sɔɔ mìŋ mani ki ru.
Mɔɔn konanbi ki a ji mɔ́ɔ́n konanbi i.
Nʼwɔ Kirinŋ ki i ji ńʼwɔ Kirinŋ i.
17Miŋ a beeni mani wɔ̀ ru, míŋ a beeni mìŋ mani ki ru, ńʼkwuu ki i ye nmaŋ.
A míŋ ńʼsan miŋ na ŋuŋ tɔri ra, nwɔ̀ beŋ i kì,
Ŋuntiŋ Kirinŋ ɲaniŋ sinaŋ sɔɔ míŋ sun niŋ na. »
18Nawomi ǹʼja-i tu Uruti a sɔbɛ ra, nmari nmari rasuu kili kì.
19Kí koŋ fuuli ki i tiri arìmaŋ fan, kí i ta so Bɛtilɛhɛmu. Kí ta-i so waarinŋ wɔ̀ ru, niŋ i bo niŋ kili ki ra tɔnŋ kiri bataa tɔnŋ sun. Mari kiri i arìmaŋ nanɔri-ri : « Taa, Nawomi i ji-i kili wa? » 20Nka nmari i ǹʼbi :
« Á fa míŋ dɔri tu Nawomi#1.20 Nawomi kɔri ki i tu fɛrɛmaan Iburuwulu ki ru. kili kì, á ǹʼdɔri-ri tu Mara#1.20 Mara kɔri ki i Iburuwulu ki ru tu saamaan., sabu Sobataatiŋ ki bi saamaan ma-i míŋ wu.
21Míŋ gbɛ faamaan tiri-i,
Ŋuntiŋ ki i míŋ gbɛwɔ pwulu na.
Nfɛnŋ na, ábɛɛ míŋ dɔri-ri tu Nawomi,
Ŋuntiŋ Kirinŋ dumiŋ ji bijɛ ma míŋ wu,
niŋ fa Sobataatiŋ ki i ji míŋ ji makwulufinŋ i? »
22Nawomi fa a samari Mowabu nupo Uruti so-i ka ɲaan ka tɛ Bɛtilɛhɛmu, kí i po Mowabu kɛniŋ ki ru. Kí so waari ki i kɛɲɛ bilaŋ kiri tɛri ki tɔnpa ki wu.
Одоогоор Сонгогдсон:
Uruti 1: JOB
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Wycliffe Bible Translators, Inc.