Marku 3
3
Mundhu wayiva no nyara yakaoma
(Mateu 12:9-14; Ruka 6:6-11)
1Wakanghwinazve mu nyumba yo kudira; kwayivapo mundhu wayiva no nyara yakaoma. 2Navo vakamuringisisa kuvona kuti angazomurapa here ngo zuva ro sabatha, kuti vamuparise ndava. 3Naye wakati kuno mundhu uwo wayiva no nyara yakaoma: “Mukayi, uime pakati.” 4Wakati kwavari: “Ichinyi chinotendehwa ngo sabatha, kuyita zvakanaka nokuti kuyita zvakashata? Kuponesa nokuti kuuraya?” Asi vakanyarara. 5Naapo ayinga avaringisisa ngo ushungu, echihwajihwa ngo kuchunga kwo mwoyo yavo, wakati ku mundhuwo: “Tambanuja nyara yako.” Naye wakatambanuja, no nyara yake yakarapika. 6Vafarisi vakabuda, paripo vakapangana no vo kwa Herodhi kuti vangamuita maurairenyi.
Mbungano huru inoungana phedo no Jombe
7Na Jesu wakabvapo no vajiji vake, wakaenda ku jombe, no mbungano huru yakabva Garire no yo Judhiya yakamutevera; 8no yo Jerusarema, no yo Idhumiya, no yo mwombera mwo Jordhani, no vanotendeneja Tire no Sidhoni, mbungano huru yechizwa ngo zviro zvikuru zvaakaita, yakazara kwaari. 9Naye wakabvunja ku vajiji vake, kuti vamupshakire ngarava doko ngo ndava yo mbungano, kuti isazomutsikinija, 10#Vonayi kuna: Mar. 4:1; Ruk. 5:1-3.ngokuti wayinga wakarapa vazhinji; kwokuti vese avo vayiva no ndhenda vaindundana kuti vamupshase. 11No mweya ino svina apo yamuvona, yakawa pamberi pake, ikamima yechiti: “Iwewe uri Mwana wa Mwari.” 12Naye wakainyaraja kakurutu kuti isazoita kuti azivike.
Vapostori vari gumi na vaviri
(Marku 10:1-4; Ruka 6:12-16)
13Wakakwira pa dundhu, wakadanija kwaari avo vaakasana, navo vakaviya kwaari. 14Wakaemesa vari gumi na vaviri kuti vagare naye, nokuti, avatume kuenda koochumaira. 15Wakavapa simba ro kumbirimbija mabzoka. 16Wakaduja Simoni kuti Pedru; 17wakaduja Jakobe mwana wa Zebhedhi na Johani munukuna wa Jakobe kuti Boanergesi, zvinonanga kuti: Vana vo mbheni. 18Andreu, na Firipi, na Bhartoromeu, na Mateu, na Tomasi, na Jakobe mwana wa Arifeu, na Tadheu, na Simoni muKenani, 19na Judhasi Isikariyoti, uwo wakamupira.
Jesu na Sathani
(Mateu 12:22-32; Ruka 11:14-23; 12:10)
20Naye wakanghwina mu nyumba. No mbungano yakaunganazve kwokuti vakakonehwa no kuha zvimanda. 21Naapo hama jake jazwa jakabuda kuviya koomubata; ngokuti vakati: Unohahamuka. 22No vatari, avo vakabzuka kubva Jerusarema, vakati: “Uno #3:22 Bheezebhuri: ndi mambo wo mabzoka.Bheezebhuri, na ngo simba ro muzvare wo mabzoka unombirimbija mabzoka.” 23Naye wakavadanija, wakavereketa kwavari, ngo muezaniso wakati: “Sathani ungaita mambirimbijirenyi Sathani? 24No kudari umambo hwechijiparaja ngo kwahwo, uhwo umambo ahungakoni kuyima. 25No kudari ukama ukajiparaja ngokwawo, ukama uwo aungakoni kuyima. 26No kudari Sathani echijimukira, echijiparaja, aangakoni kuyima, asi unozopera. 27Asi apana mundhu angakona kunghwina mu nyumba yo uwo uno simba, no kuba mujiyo jake, kuti asikazivi kutanga kusunga uwo uno simba; naapo unozoparaja nyumba yake. 28Zvirokwazvo ndinoti kwomuri, kuti, zvishaishi zvese, no kutuka kwese kwovanozotuka ndikwo, zvinozoregerehwa ku vandhu. 29Asi pikija ndiyani unozotuka Mweya Wakachena, aazoregerehwi asi uno ndava yo chishaishi cho mbhera narini.” 30Ngokuti ivo vakati: “Uno mweya une svina.”
Ukama wa Jesu
(Mateu 12:46-50; Ruka 8:19-21)
31Kwakaviya mayi wake no hama jake, vakayima ngo kunja, vakatumira kwaari kumudanija. 32No mbungano yayinga yakagara naye, yakati kwaari: “Vonayi mayi wako no vanukuna vako no hanzvaji jako vari kunja vanokupshaka.” 33Naye wakapingura kwavari, akati: “Ndiyani mayi wangu, no hama jangu?” 34Echiringira kuno avo vayinga vakamutendeneja, wakati: “Vonanyi mayi wangu no vanukuna vangu. 35Ngokuti ndiyani unozoyita kuda kwa Mwari uwo ndiye munukuna wangu, no hanzvaji yangu, na mayi wangu.”
Одоогоор Сонгогдсон:
Marku 3: CINDAU NT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Novo Testamento Cindau © Bible Society of Mozambique, 2023.