Mateu 17
17
Kutsandujwa kwa Jesu
(Marku 9:2-13; Ruka 9:28-36)
1Ngosure kwo mazuva matandhatu Jesu wakatora Pedru, na Jakobe, na Johani munukuna wake, akakwira navo panyezuru po dundhu rakareba, vari vega. 2Naye wakatsandujwa pamberi pavo, no hope yake yakajeka kudari ngo zuva, no zvokufuka zvake zvakachena kudari ngo kujeka. 3Ndipo kwakavoneka kwaari Mosi na Erija, vechivereketa naye. 4Na Pedru wakati kuna Jesu: “Mambo, kwakanaka kwetiri kuti tive pano. Kudari wechida, ndinozovaka pano zvitumba zvitatu, chimwe chako, chimweni cha Mosi, no chimweni cha Erija.” 5Apo achavereketa, vonanyi gore rinon'anikira rakavafukijira, ndizvo izwi rakabva mu gore, rechiti: “Uwu uri Mwana wangu, wo ndinoda, wo ndinonasa kudakara ndiye; Muzwenyi.” 6Naapo vajiji vazwa vakawa ngo hope javo, vakatya kukuru. 7Na Jesu wakaviya, akavapshasa, akati: “Mukanyi, musatya.” 8Naapo vamusa majiso avo, avazivi kuvona mundhu, kwega Jesu. 9Vachabzuka kubva panyezuru po dundhu, Jesu wakavapanga, echiti: “Musazobvunja mundhu naumwe ngo ndava yo chivoniso mbhera Mwana wo Mundhu amuke kwo vakafa.” 10No vajiji vake vakamubvunjisa, vechiti: “Ndizvo, ngenyi vatari vanoti kuti, kunosisira kuti Erija atange kuviya?” 11Naye wakapingura, echiti: “Ngo gwinyiso Erija unoviya amusijire zvese. 12Asi ndinoti kwomuri, Erija wakatoviya hake, navo avazivi kumuziva, asi vakayita kwaari zvese izvo zvovakada. Ngokudaro Mwana wo Mundhu naye unozotambujwa ndivo.” 13Naapo vajiji vakazwisisa kuti wakavereketa kwavari ndi Johani Mubhapatisi.
Jesu unorapa umwe unonjwiti
(Marku 9:14-29; Ruka 9:37-43)
14Vaguma kuno mbungano kwakaviya kwaari mundhu, akamugwadamira pasi, echiti: 15“Mambo, muitirenyi nyasha mwana wangu. Ngokuti unonjwiti, unotambujika kukurutu; ngokuti kazhinji unowa pa muriro no kazhinjizve mu kumwa. 16Neni ndakamuzisa kuno vajiji vako, navo vakonehwa kumurapa.” 17Jesu wakapingura, akati: “A! Mubarihwana usikatendi no unopauka, ndinozogara nemwi mukuvo wakadini? Muziseyi pano kwendiri.” 18Na Jesu wakambirimbija iro bzoka; naro rakabuda kubva kwaari; no murumbwana wakarapwa kubvira nguva iyo. 19Naapo vajiji vakaviya kuna Jesu, ari ega, navo vakati: “Ngenyi isisu takonehwa kurimbirimbija?” 20#Vonayi kuna: Mat. 21:21; Mar. 11:23.Naye wakati kwavari: “Ngo ndava yo kugononda kwenyu, ngokuti ngozvirokwazvo ndinoti kwomuri, kuti, kudari munokutenda kudari ngo mbhumba yo mustadhi, mungazoti kuno iri dundhu, Ibva pano, uende apo; naro rinozobva apo; akuchina, chiro chisikazoitwi ndimwi. 21#17:21 Tshamba jimweni jokare ajina vhesi 21.Iyi mbewu ayibudi kwega asi ngo kukumbira na ngokuera kuha.”
Jesu unovereketazve ngo kufa no kumuka kwake
(Marku 9:30-32; Ruka 9:43b-45)
22Navo vaungana pamwepo mu Garire, Jesu wakati kwavari: “Mwana wo Mundhu unozopihwa mu nyara jo vandhu. 23Navo vanozomuuraya, na ngo zuva rechitatu unozomukazve.” Navo vakatambujika kukuru.
Shangu yo Themperi
24 # Vonayi kuna:
Eki. 30:13; 38:26. Naapo vaguma mu Kaperanaume avo vayiashira shangu vakaviya kuna Pedru, vakati: “Mujijisi wenyu aashabi shangu here yo mare inozwi didrakama?” 25Wakati, “Eya.” Kwakati wanghwina mu nyumba Jesu wakatanga kuvereketa kwaari, echiti: “Unorangarijenyi Simoni? Majimambo onyika vanoashira kunani murimwa, nokuti shangu? Kuno vana vavo, nokuti kuvonyikanja?” 26Pedru wakati kwaari, “Kuvonyikanja.” Naapo Jesu wakati kwaari: “Ngokudaro vana vavo vari vakasununguhwa. 27Asi kuti tisazovapsheruja, endayi iwewe ku jombe, ukandire chivejo, utore hove iyo inotanga kubatwa; naapo wazaura muromo wayo, unozowana chigurwa cho mare chinozwi statera; icho unozochitora uchipe kwavari ngo ndava yangu no yako.”
Одоогоор Сонгогдсон:
Mateu 17: CINDAU NT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Novo Testamento Cindau © Bible Society of Mozambique, 2023.