Mateus 5
5
Oro wari' co param mi' wawa pain ca awi wa
Lucas 6.20-23
1Mija nana wari' co ja' ja' nonon Jeju ma'. Querec iri tata ne, piri' mao ac cain na pacun, xao pe ac cain na tamain. Hwet iri nonon co taxipa' ca ne, 2pijim' ac tococwa na. Ca' na ca tomi' cocon ma':
3Param mi' tata pain ca awi wa oro wari' co ximin nana ma', xi wari' ne ara tococwa pain ca taramaxicon pe ho' xun tococwa ma'#5.3 Tomi' mi' tata wari' co ximin nana pain ca om cocon oro carawa ma', tomi' mi' tata wari' co querec pin' xucucun pain ca om hohot cocon Iri' Jam quem. Tomi' mi' tata co coromicat ca' xucucun: Mo ta om xiram pa' capa' Iri' Jam, om ta hwet ac ton pain ca taramaxicon pe nucun ta, wiricoco nana co tomi' mi' wawa ma'. .
4Param mi' tata pain ca awi wa oro wari' co awaran nana pain xocori ca'. Wiricoco ara xi' nana co to' hwara' opa ca Iri' Jam pain ca tomi' xo' tococwa ma'. Ma' ta pi' pin ne ca tomi' xaxa' nucucun ta tata#5.4 Tomi' mi' tata wari' co tomi' xaxa' nana pain ca caracat nucucun. .
5Param mi' tata pain ca awi wa oro wari' co om xec xec nana ma'. Wiricoco ara xi' nana co mene mene pi' pin xin nanain oro xijein macan' ta.
6Param mi' tata pain ca awi wa oro wari' co ac ca pe' caca na pain ca jain jain cacain ca awi nucun Iri' Jam ma', je pain ca tama' hohot xuxun Iri' Jam na caca ma'. Wiricoco ara xi' nana co mi' pan xun wawa pain ca hohot cocon ta.
7Param mi' tata pain ca awi wa oro wari' co xiram pa' nonon oro win ma' caca ma'. Wiricoco ara xi' nana co xiram pa' wawa ta.
8Param mi' tata pain ca awi wa oro wari' co win xumu e' nonon Iri' Jam ma'. Wiricoco ara xi' nana co querec xun nonon ta.
9Param mi' tata pain ca awi wa oro wari' co quep xiho' nonon co mana' caracan xucucun ma'. Wiricoco ara xi' nana co mana panxica Iri' Jam xun tococwa ta.
10Param mi' tata pain ca awi wa oro wari' co ja' tequi' quep em' wawa pain ca ara cacain ca param nucun Iri' Jam ma'. Wiricoco ara xi' nana co wari' ne ca Iri' Jam pain ca taramaxicon pe ho' cocon ta.
11Wahu' pain ca tomi' xirac xihwe pain ca howa mahu' ma', je pain ca ja' tequi' quep em' xihwe ma', je pain ca tama' tomi' xina ximama' xihwe ma', ara ac i ma' iri xihwe pata' ne, param mi' ac xihwe tara pain ca awi wa ta. 12Tomi' querec te je pain ca to' i'ina ac i ma' xihwe. Tomi' querec te tamana je. Xi om ne ca awi tamana ara ne oro ca mi' xim cuhu' Iri' Jam pain pawin cain ta. Ac i ma' ara xi' na ca ja' tequi' quep em' qui' tococwa oro profeta co wara ma' nana pane.
Ca an xiho' xin sal je naran
13Wahu' pain ca howa mahu' ma', ac sal hwe cocon oro wari' pain macan' ca' ac tococwa na. Noro jein sal ma'. Mo ta wita wita om ne sal ma', mo ta camain' pin ne. Cain' xi wita mami' ne quem? Wita mami' tara ra? Om na, om ca wita mami' ne. Wixicao' pin e' ta, xom pin ac cacain na oro wari' co xuruxut in nana ma'#5.13 Ac i ca' na ca tomi' mao nein ca tomi' nucun pain sal: Pain ca ac sal hwe ma', ha' nuhu' pain ca to' awi huhun oro win ma' hwe ma'. Ha' nuhu' pain ca quep xiho' huhun, ma' ta om pan teretem pan teretem tiquin' caca ma'. Win ne sal ma'. To' wita nain carawa sal. Aramao iri irin carawa pain sal ne, om ac ne na ca cunu ne. Ac i ma' huhun oro wari' pain macan' ca' na ca tomi' tococwa ma'. .
14Ac naran hwe quem. Win ne cidade ca pe nain tamain pacun ma'. Tom pin iri na oro naran nein ne, om ca xaraxa mami' ac ne, querec querec xam' nanain oro wari'#5.14 Ac i ca' na ca tomi' mao nein ca tomi' nucun pain naran: Pain ca ac naran hwe ma', ac ca toha mi' huhun na oro wari' pain ca an hwet pe hwein ca xuruxut xo' nuhu'. Querec pin' ac cacain na ca iri'o' wa con Iri' Jam pahu'. Ac i ma' huhun oro wari' pain macan' ca na ca tomi' tococwa ma'. . 15Noro jun wari' co tom nain naran ma' quem. Om ca tatep pa' ca pain too. Tom an hwet pe na pain maxinain. Toha mi' ac tococwa na oro wari' co to nanain xirim. 16Je ca tomi' xuhu' ca'. Ac i ma' tara ca toha ne naran nuhu' ta. Toha mi' jujun oro wari'. Ma' ta querec pin' cacain ca ara hwe ma', pain ca ara hwein ca awi wa ma'. Ma' ta awi na xin Iri' Jam ta cocon Cotere' co pe pawin pahu'.
Capijacon Iri' Jam
17Cain' ca coromicat mi' mahu' quem ac tococwa na. Tomi' am pin tarain ca xirao' nucun Moisés ma' mahu' ra? Tomi' am pin tarain ca xirao' to nucucun oro profeta cara pane quem ma' mahu' ra? Je ca maqui' cain macan' ca', ac i ma' na ca coromicat mi' mahu' ra? Om na, om ca maqui' ta' pain ca tomi' am pin tain ca xirao' nucun Moisés ta'. Om ca maqui' ta' pain ca tomi' am pin tain ca xirao' to caca oro profeta ta' quem, om na. Maqui' ina, ma' ta hwet pin ne oro ca xirao' to caca pata' ina, je ca maqui' ta' ca'. 18Je ca tomi' xuhu' ca', tomi' iri'o' inuhu'. Oro ca xirao' pe ca Moisés pane, je oro ca xirao' to caca oro profeta pane, om ta pan' am camain' ne ta. Om ta pan' am camain' ne wijimain ca xirao' nucucun quem. Hwet hwet pi' pin tara. Pain ca ma' ma' wet ne nanawin pain macan' ca', om ta pan' am camain' ne wijimain ca xirao' to nein cocon. Hwet hwet pi' pin tara ta.
19Je ca tomi' xuhu' ca' ac tococwa na. Oro wari' co om tomi' ha' nanain oro ca tomi' nucun Iri' Jam ca tomi' ha' je capari', iri' wijimain ca xirao' nein paxi' tara ca om tomi' ha' caca ma'. Mo ta tomi' ca' tococwa oro win ma' ca quem: Ta tomi' ha' hwein me ta, mo ta tomi' ac i ma' cocon oro win ma' caca ma', ximin pan ac caca tara. Om ta hwara' opa camain' caca pain ca taramaxicon pe ca Iri' Jam, coco' e' tatara. Ane om ac i ma' ne cocon oro wari' co tomi' ha' nana ne. Mo ta tomi' ha' cacain oro ca tomi' nucun Iri' Jam ca tomi' ha' je capari'. Mo ta tomi' ha' jein ta cocon oro win ma' caca quem. Hwara' opa tatara caram ma', hwara' opa to tatarain ca taramaxicon pe ca Iri' Jam ta.
20Je ca tomi' xuhu' ca': Tomi' ha' jein oro ca tomi' nucun Iri' Jam. Coromicat ac i ca' paxi' hwe pain xocori ca': Tomi' ha' nana oro fariseu ma', tomi' ha' nana oro co ca' na taxipa' nanain ca xirao' nucun Moisés ma' quem, ac i ma' paxi' na ca coromicat nuhu' pain xocori ca'. Ane tomi' pan xuhu' pain i ca' ne: Mo ta om tomi' ha' tiquin' ca' huhun pain oro ca tomi' nucun Iri' Jam ma', om ta to ho' camain' huhun oro wari' co taramaxicon pe ho' ca Iri' Jam ta. Tomi' iri'o' inuhu' ta.
Ca mana' wa
21Tomi' ac tococwa na: Wara taraju hwein ca tomi' tococwa oro hwanana nexi' pane. Ta to' pa' mon wari' me ta tata. Wari' co to' pa' non win ma' ca ma', tomi' mi' ac tocwa tara pain ca wap wa pain ca wum co em' ta tocwa ta, ac i ma' paxi' na ca tomi' tococwa pane. 22Ane tomi' pan xuhu' pain i ca' ne: Wari' co mana' ximao non win ma' ca ma', tomi' mi' ac tocwa tara pain ca wap wa pain ca wum co em' ta tocwa. Wari' co tamanain ma ta non win ma' ca pain ca tomi' ximao con ma' quem, o mi' ac tocwa tara cocon oro juiz co tomi' mi' taxipa' nonon oro caracat pain ca wap wa ma'. Wari' co tomi' noro non win ma' ca pain ca iri' tamanain ma, om ca awi camain' ma ta con ma', ximin na co ma' ta. Hohot na pain ca xin mi' tocwa pain cote ne xe ta.
23Je ca tomi' xuhu' ca', tomi' inem pain ca tom tain' mi' ton mon pain winam Iri' Jam ma'. Mo ta hwet pin main cote ne xiricon Iri' Jam ma', pain ca tom tain' mi' ton pain wina ta ma ma', mo ta mam' pe wet mon win ma' ma pain ca mana' quem ma'. 24An pe ac main tara winam pain ca tom tain' pe xine ma'. Hwet hap ac mon tara, tomi' xo' ac mon tara, tomi' querec te mami' xijexi' ta xa' ac mon tara. In hwet ac main tara, tom tain' mi' ac mon tara pain winam Iri' Jam ta.
25Tomi' inem pain ca dever mon pain dinheiro wari' ma' quem. Mo ta dever mon pain, am tomi' ca' quem: Dever mapa' pain dinheiro ta, mo hwet xun juiz ma', tomi' hwet ton pum ac quem tara. Om na, tomi' xo' hap xijexi' ta ac mon tara pain ca xuruxut xuruxut wet hwein wana ma', pain ca om hwet querec hun juiz pain xiricon ma'. Mo ta om tomi' xo' hap xujuhu', am tomi' hwet con juiz pum. Am quep quem, am an mao ron co cwa' ta con co tao' pe ma' pum, am tao' pe quem quem. 26Je ca tomi' xim ca', tomi' iri'o' inem. Mo ta om pagar pi' pin main dinheiro ca pagar ron quem juiz ma', om ac ne tara ca hwet ca' ac main xirinain ca tao' to tao' to to wa ma'. Tomi' iri'o' inuhu' ta na ca tomi' tococwa ma'#5.26 Pain ca tomi' ac i ma' ca Jeju ma', tomi' mi' paxi' napari' pain ca om pagar ac xin ca caracat nexi' ca', xi mija ara ne ca caracat iri'. Dever tamana urun Iri' Jam. Na e' na pain ca tomi' hwet xun pain ca caracat nexi' pain ca om wap xuhu' ta querec capari' ca', xic am pin ac cain na, om pin ac capari' na ca caracat wa ta. .
Ca quep tacama xequem narima'
27Tomi' ac tococwa na: Wara taraju hwein ca tomi' tococwa oro hwanana nexi' pane ac tococwa na. Ta quep mam manacon win ma' ma me ta, ac i ma' paxi' na ca tomi' tococwa pane. 28Ane tomi' pan xuhu' pain i ca' ne: Wari' co querec param nam narima' ma', co quep xitam na cam ma', wara quep pin nam pain ximicon pain ca coromicat nucun ta. 29Tomi' inem pain ca caracat ma pain ca querec param ximao ma ma'. Mo ta to' caracat quem tucum ma', pain ca querec param ximao main ca om awi wa ma', noro maho' rain. Ac ca horohot pin main tara tucum ma', ac ca wixicao' pin main tara. Cain' cain' xira quem? Hohot xira pain ca ma' ma' wet ne tucum pain ca mao main cote ne xe ra? Om xi hohot ne ta. Hohot pan xira pain ca om pin ne tucum pain ca mao main pawin ta. 30Wum quem, pain ca caracat ma pain ca ara main ca om awi wa ma' quem. Mo ta to' caracat quem mum ma', pain ca ara main ca om awi wa ma', ara maho' rain e'. Ac ca ton tapit pin main tara mum ma', ac ca xin pin main tara quem. Cain' cain' xira quem? Hohot xira pain ca ma' ma' wet ne mum pain ca mao main cote ne xe ra? Om xi hohot ne ta. Hohot pan xira pain ca om pin ne mum pain ca mao main pawin ta.
Ca an pe pin tacama narima'
31Tomi' ca' tata oro hwanana nexi' pane ac tococwa na. Wari' co an pe pin tam nam manacon ma', na e' na pain ca xirao' mi' cam pain documento. An pe pin inem ta tara ca xirao' nein con, ac i ma' paxi' na ca tomi' tococwa pane. 32Ane tomi' pan xuhu' pain i ca' ne: Wari' co an pe pin nam manacon ma', pain ca om caracat cama ma', pain ca om quep cam xucun tarama' ma', mo ta an pe ximao cam, em' pan ac ca tara. Caracat mi' nam manacon, xi om ne ca tarama' nequem tarama' nequem wet ara ca ta non Iri' Jam. Mo ta an mami' con xucun tarama', caracat ac cama tara. Tarama' co an nam narima' co an pe pin ca tarama' nequem ma' quem, caracat ac ca tara quem. Ac i ma' na ca tomi' tococwa ma'.
Ca tomi' an hwet xin wixicon Iri' Jam pain oro ca ara xi' iri'
33Wara taraju hwein ca tomi' tococwa oro hwanana nexi' pane ac tococwa na. Ara tain iri rain oro ca ara ta' ma ne, mo ta tomi' hwet main wixicon Taramaxicon Iri' Jam pain ca tomi' an pe nem ma', mo ta tomi' ca' ma, taraju napa' Iri' Jam ta, mo ta om ara tain, wap ma' tarapa' ne, mo ta tomi' ac i ma' ma pain ca tomi' an pe nem ma'. Na e' na pain ca ara main. Om ca na camain' ne pain ca mixein ma ma', pain ca om ara main ca tomi' an pe nem ta. Ara ara pi' pin rain ca tomi' an pe nem ta, ac i ma' paxi' na ca tomi' tococwa pane. 34Ane tomi' pan xuhu' pain i ca' ne: Ta tomi' waraju camain' hwein oro wixinain carawa pain oro ca ara xi' hwe me ta. Ta tomi' waraju hwein wixinain pawin me ta, xi xao pe ara cain pawin Iri' Jam pain ca taramaxicon pe ho' capari' ta. 35Ta tomi' waraju hwein wixinain macan' quem me, xi ton pe ara cain caximacon pain macan' Iri' Jam pain ca taramaxicon pe ho' capari' ta. Ta tomi' waraju hwein wixinain Jerusalém quem me, xi cidade nucun Taramaxicon nexi' ara ne ta. 36Wum pain ca tomi' pe pin tain main ca ara ta' ma ma', ta tomi' waraju main wixinain winam pain cwerem ma' me. Xi ara towo' taxi' main tenenem ta. Om ca ara mixem taxi' main quem. 37Je ca tomi' xim ca': Mo ta ara tain main oro ca ara ta' ma ma', ara tain ta e' ra. Mo ta om ara tain main, om ta ara tain ta e' ra. Mo ta tomi' waraju ximao main oro wixinain carawa pain ca tomi' pe pin main ca tomi' nem ma', wirico Caxicon Jam co mi' nem pain ca tomi' waraju nem ma'.
Ca win mapa' ne wa
Lucas 6.29-30
38Wara taraju hwein ca tomi' tococwa hwanana nexi' pane ac tococwa na. Wari' co xucun' tot pin nain tocon win ma' ca ma', hohot na pain ca xucun' tot pin xine tocon quem. Wari' co to' cat pin nain xicon win ma' ca ma', hohot na pain ca to' cat pin xine xicon quem, ac i ma' paxi' na ca tomi' tococwa pane. 39Ane tomi' pan xuhu' pain i ca' ne: Ta win mapa' ne hun wari' co pan tem me. Wum pain ca mana' quem wari' ma', mo ta wap quem, pain xijein orocoxum ma', mo ta wap mami' xim quem quem, je i ma' ira, jami mi' ron pain xijein orocoxum ma', wap mami' ne pain me ac mon tara quem. 40Tomi' inem pain ca xina con juiz wari' ma' pum. Mo ta tomi' ca' con, ara cup napa' co ma' ta, pagar tarapa', mi' tarapa' con iri' curucun womicon ta tara pain ca xina con juiz pum. Je i ma' ira, ta mana' mon me ta, om ta mi' e' mon con iri' curucun womum ma'. Mi' ron con iri' curucun womum, mi' ron con to' om capin' nem ma' quem. 41Mo ta tomi' merem quem wari' ma', mo ta an tiquin' rain caramaju ca' quem, xica' pe tara quilômetro pain ca an tiquin' main ta terem, mo ta tomi' ac i ma' quem. Om ta xica' pe ne quilômetro ca an tiquin' main. Ma' 2 tara quilômetro pain ca an tiquin' main con. 42Mo ta mi' ne quem, pain caramajum wari' ma', mi' ac mon pain tara. Mo ta wajim' quem, pain, mo ta mi' in hwet xim pain quem. Ta miri'om mon me, mi' ron pain.
Ta noc huhun co noc nunuhu' ma' me ta tata
Lucas 6.27-28; Lucas 6.32-36
43Wara taraju hwein ca tomi' tococwa oro hwanana pane ac tococwa na. Ta noc mon win ma' nem me ta. Noc ron co noc nem ta, ac i ma' paxi' na ca tomi' tococwa pane. 44Ane tomi' pan xuhu' pain i ca' ne: Ta noc huhun co noc nunuhu' ma' me. Tomi' mi' jujun con Iri' Jam oro wari' co ja' tequi' quep em' nunuhu' ma' quem. 45Ma' ta querec pin' xihwe pain ca an xiho' hun Cotere' co pe pawin ma', pain ca om noc taxipa' cocon oro wari' co noc pan nonon ma'. Win ne ca ja' toha con xina ma'. Toha toha mi' xam' tata oro wari', toha mi' tata co pan teretem nana ma', toha mi' tata co awi nana ma' quem. Ac i ma' na pain ca tomi' pan' cain xowi' quem. Pan' pa' pan' pa' xam' tata oro wari', pan' pa' tata co xuruxut xo' nana ma', pan' pa' tata co om xuruxut xo' nana ma' quem.
46Je ca tomi' xuhu' ca': Mo ta om noc e' huhun oro wari' co om noc nunuhu' ma'. Cain' cain' xuruhu' Iri' Jam pain i ma' quem? Mi' turuhu' pain oro ca awi wa pain ca om noc e' huhun co om noc nunuhu' ma' ra? Om na. Ac i ma' ara xi' nana oro caxicon wari' co an xiho' nonon co cut in taxipa' nanain oro imposto ca pagar je tococwa oro wari' ma'#5.46 Imposto ma', je i ma' dinheiro ca pagar je caca oro taramaxicon pain governo. Ma' ta ha' caparut pain ca taramaja wa pain ca governo urut ca' nana. Je cwerein pain cara pane, je cwerein pain xocori ca' quem, pain ca pagar jein imposto ta cacapari' oro taramaxicon.. Om ca noc cocon co om noc pan nonon. 47Mo ta tomi' querec te e' huhun oro wari' co tomi' querec te nunuhu' ma' quem, hohot tara pain i ma' pahu' ra? Awi tiquin' ca' huhun oro wari' pain ca ara ac i ma' hwe ra? Om na quem. Ac i ma' ara xi' nana oro wari' co om howa nonon Iri' Jam ma', tomi' querec te e' nonon co tomi' querec te pan nonon ma'.
48Je ca tomi' xuhu' ca': Iri' wari' je. Win ca Cotere' co pe pawin cwain ta.
Одоогоор Сонгогдсон:
Mateus 5: TBPN
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Copyright 2023 Missão Novos Tribos do Brasil