Marcos 15
15
Jesús tokiji pa Pilato (Mt 27.1-2,11-14; Lc 23.1-5; Jn 18.28-38)
1Siukia ti k'iejli mot, initotiek'i wita'm japo pa'yijis jika anechiyasas, siu'neje japo kijilas ti kia'iyo jleyis po', japoka 'neje siojopo taka'neyasane pet ni Moisés jika'neyasajnaye, siu'neje japo ijnosikis jiwos. Siuti yikiajlayisi ja Pilato kan'ye'en siupa jitis iyo. 'Yina jikioyi tilie'nitie ti tikinieje. 2Pilato i'yase'n ti iyone 'ate:
—¿Mi a'am ti Judíojos jika anechiyasts'a'm?
Jesús isiujlie ti iyo'ate:
—Je kajme'n ni siunie jiwoyi.
3'Yina ti je jlase' siukiwa ijiutkinisi ape'e ja Jesús kanwoyi japoka jiwos ni Moisés jika'neyasajnaye, 4it'imina ti Pilato kiak iyonayi'ijyi 'ate ti i'yas'ni:
—¿Mi lajk'iyi pet pa ka a'lej jlasa' ka kiujlie napo? Jlam'ne je jlase' siunie tiwona'a ti injwela kawoyi.
5Ijiatjliyi, Jesús je isiujlie pa ti'yasajtaja'ni. Jak je iyoyi ja Pilato kawojlit'iyipi pa ti i'wi'in ti kia'iyo.
Pilato ipiniyi'i pet ka tiliana pa Jesús (Mt 27.15-26; Lc 23.13-25; Jn 18.38—19.1,4-16)
6-11Kiajatak'i'ni ti yiyetaja siojona inlakijnieye Pascua, Pilato jikio' ilie'ne'ni ni ijwienjli inkipinik, yi'i siupa iyo jla'am napo i'nio' ka inojwanis kisie'e. Ijiatjliyi, japo i'nio' yama'nijpe ti ijioyi ja Pilato ka jla'm iwoni'ni 'ate ka woyi siupa iniwoni'ni. Sekyi'i Pilato i'yasa'm peyit ti iyo'ate:
—¿Ma 'nak isio' jalie'ne 'ni aska anechiyas ti asa'am ti Judíojosts'ase'm?
Lapakawo ti 'yijene pi iyone ti siojopo pa'yijis jika anechiyasas ti nak it'imina ti yikial ja Jesús, ni t'a'ti ti yinits'i ti 'yakawoyisie. 'Yina 'yijijienits'i japo i'nio' ka ijwejla'm ja Pilato ka jak jikio' inla'ne siojo i'nio' jle' iyo'ate Barrabás, ti jiliaye iniuyi wita'm siojopo jla'yis jla'am ti yi' insat jiweje. Kajeyepa ti pak titiajlataja siupa ti inilanajen'ni papo i'nio' siu'neje ti takalankijyi'n.
12Siuti Pilato i'wi'in ti jak Barrabás ti iyo ka inkio' tiliena'a, sekyi'i iyo'ne 'ate ti i'yajts'ape'e japo:
—Ijiatp'ane. ¿Tepa jawonayi siu'nie ti jiwonayi'ni “Judíojos jika anechiyasa'”?
13Sekyi'i iyoyis'ne 'ate ti tanisi ape'e:
—¡K'iejwata'yi japa cruz!
14Pilato iyo'ne 'ate:
—'Yina, ¿ten jiat'e siupa iyoyi ti je 'esk'i?
Sekyi'i jlam yinjliyisi ape'e ti kiak iyoyisi 'ate:
—¡K'iejwata'yi japa cruz!
15'Yina Pilato ti iyojonk'iye ka 'esieyi wita'm japo i'nio' it'imina'ne ti jikio' ilie'ne ja Barrabás. Jlampa titimajayi ti tak'ajak'ni ja Jesús ti tokis ik'a'ni. Sekyi'i ti yikiajlayipi japo i'nio' ka ink'iejwatits'i japa cruz.
Tokis iliakiyis pi Jesús (Mt 27.27-31; Jn 19.2-3)
16Tokis yamayisi ja Jesús ti ijioyisi siojo aj'leje'n yi'i ja anechiyas ji'wet, 'yina siojopo tokis 'loj 'neje ikapajlayisi. 17'Yujienayisk'i ni lotakinie ti isiat, sekyi'i ti isimayisi niwa k'itienis ti isimisik'i ti iyonisi jletik t'aka. 18Sekyi'i ti ijwilayis ka ijnonitis, ti iyonisi 'ate:
—¡Amp'an, Judíojos jika anechiyasts'a'm!
19'Yina yejayisiam'ni jlaja jletik ti a'la' isienisi, siu'neje ti ijwiets'iunisk'i'ni. Sekyi'i ti t'akosjlete'l itiyeyisijin kiajwe ti ijwilis ka ijnonitis, 'yina jlam'ne ki iyo ti iliakiyis. 20Itimisiji siukia iyonisi, sekyi'i ilienayis ape'e siukia 'yujienisk'i lotakinie ti isiat, yikiajlayis ape'e siukia ji'wu' jla'am, sekyi'i ti yamayisi ti jank'iejwatits'i jakia cruz.
Jesús tik'iejwata'a japa cruz (Mt 27.32-44; Lc 23.26-43; Jn 19.17-27)
21Yit'i'yipe siojo 'nayiji ti isiutieyisi siojo i'nio' jle' iyo'ate Simón, Cirene jlele, Alejandro siu'neje pa Rufo jiniayis, ti k'iejli yapitie tal 'lajna'm, 'yina tokis t'as'ne k'iye ti ijliuye ka ink'iuyeje jlaja jika cruz ja Jesús ka intejlia.
22Ijioyisiji siojo ajnat jle' iyo'ate Gólgota, ti iyo'ate, Ijnetik Jleli 'Wet. 23Sekyi'i ti i'yayinisietaje ni at'es ti tijlijnataja ni mirra, 'yina Jesús je isi'm ilia'm.
24Ijiatjliyi yinayits'i pijia'm jlaja cruz. 'Yina siojopo tokis ti iyo ka inik'isajasi kiwa ji'wuye#Sal 22.18 tiliakinis'ne ape'e jak je iyoyi ti siojopo ijyiwiteje japok inijwankitamk'i'ne.
25Kilie' tojk'i'nine jakayi ti ijwienjli sikiot'i itij'wepe ijniujlits'i tom'niji siojokia inetitinki yiyi jla'a kiliekie' ti k'iejli mot jakayi ti tenaja'a pijia'm jlaja cruz. 26'Yina ape'e jla'a jletik ti tena'a pijia'm jlaja jika cruz, sek tik'iejwataja'a pet ni a'la' t'aj 'nak k'iek'i, ti inamtis yi'i, ni siunie it'imina ti tiliana, ti iyo'ate, “JUDÍOJOS JIKA ANECHIYAS.”
27Times napo jiliaye iniuyi wita'm kajlajnatas, tom'niji jijweyeje ni ijwienjli, siojo jikiecha tome ni ji'lieme.#15.27 v. 28 je yiji siu'nie imp'esinik, 'yaka lajk'ipa ta'a ka nejyi siupuwa ti 'nelanjie'e ti jlamt'iyipe, siupa ti iyo'ate: Kiak iyo ti yiyet'iyipi japak jloma siupuwa Sinia' jlamtis ti yiji ni ji'wet ti iyo'ate, “Jiliaye iniu wita'm napo i'nio' kajlajnatas.” (15.27),#Jn Is 53.12
29Jlam'ne pet siojopo jikalakijnieye yi'ne, ti iniuyisi'ni siojo yi'i jletik pa i'wiatayisi'i'ni#Sal 22.7 ti iyonisi 'ate:
—¡Tek'iayi jijweljie'epe a'am ti janetiajnate'n jlajak 'najla'wet wuj, 'yina jlomas ja najapeja kiwa jlejni ka ekiajlata'aja pijia'm,#Mc 14.58; Jn 2.19 30jejlikieje kiu' pet ka nijwajiet, nijnalas ti jle'yi ape'e jana cruz, sojmajyi'n!
31'Yina siojopo pa'yijis jika anechiyasas, siu'neje japo taka'neyasane pet ni Moisés jika'neyasajnaye kia'iyojliyisi pit ti iliakiyis 'ate iyo japo ijia, iyonayisi pet 'ate:
—Jlam'ne ja iyone pi japo i'nio' ti ijwiejiete'n, 'yina ¿yot'iyi'ni ti kiak je iyo ka inijwajiet ti jla'am? 32¿Yot'iyi'ni ti je tisiojmajyi'n kanijwajiet, siusie Injwajieti ti inijwe'el Saka Anechiyas sa'am ti Israel jika kia'lits'e'm, 'nakayi ti sekjane'yi ka je 'yakakiukiena'a?
Siojopo jiliaye iniuyi wita'm ti tik'iejwata'a jlaja cruz, kia' iyojliyi i'nijmanjliyi ti iliakiyis.
Ti Jesús ti 'yala (Mt 27.46-56; Lc 23.44-49; Jn 19.28-30)
33'Najlikise ti poye ki ajnatiok ti itij'w ape'e 'ni ajnat, paj ti kilie' tomat'ipi 'nijiye ti kia'iyo.#Am 8.9 34Jakiaka'ne siojokia inetitinki yiyi jla'a kiliekie' ti Jesús tana'ni ti 'yakets'ijiap, ti iyo'ate:
—Eloi, Eloi, ¿lama sabaktani?
(Ti iyo'ate, Inia', Inia', ¿yot'iyi'ni ti jilik'i?)#Sal 22.1
35Siojopo sekyi'i, po' japo ti ipi'yayis, sekyi'i iyoyis'ne 'ate:
—¿Ma jipe'yayeyi pit? Tantajan'ni k'iye pa Elías siupa injwejlanik jiwo.
36Sekyi'i ijwienjli'ne ja t'osiyi ja inkats'ili, sekyi'i ti 'yutieja'm siojo at'es ti tosijyi 'yina ilie'nit'i 'ni sisej, sekyi'i ti ijieyeyi kants'ojwa'm, 'yina iyo'ne 'ate:
—Ka 'yenakiamkiunie'e pa jawoyi, ka'nesta siupa tajnin'ni k'iye Elías ti janla'ne ti yi'i jana cruz.
37Pakatajak'i ti ijiatayi ti 'yakets'ijiap ti tajwijyi'n, sekyi'i Jesús 'yal'ne. 38Siuti kia'iyo, sekyi'i siupa lotakinie ti tip'onajaja'm jik'ioyi jla'a 'najla'wet wuj kia'iyo its'isajank'ipe pet jakayi itiajlat pijia'm paj ti yiye ajnat'e ti its'isk'i.#Heb 10.19-20
39Jlam'ne siojo tokis jika anechiyas Roma jlele, ti je tojwape'n siojo yi'i, ti i'wi'in ti kia'iyo ti 'ya'al, sekyi'i iyo'ne 'ate:
—¡Ijiatp'aneje ti 'naka Jlas pa Sinia'!
40Kia'iyo po 'neje japo asejnia, sek k'iejlijijyi ja takasitits'ijin'ni ti i'yenisi'ni. Japokap'ampe japo María Magdala jleliki, siu'neje jlaja Salomé, siu'neje jlaja María 'neje Santiago, 'wenayi siojo isijli, siu'neje José japo jletis. 41Japoka siojopo yamjink'ijin'nipe jlam ja Jesús, jla'yi ti iniuyisieje'ni ti yi' Galiléaja.#Lc 8.2-3 Je japokata, 'yina 'loj 'neje siojopo asejnia ti jla'yis japoka ti yamisjink'ipe ja Jesús ti ijio Jerusalenne.
Jesús tip'onaja'a (Mt 27.57-61; Lc 23.50-56; Jn 19.38-42)
42-43Pope ja i'nio' jle' iyo'ate José, ji'wet jlaja isi' jle' iyo'ate Arimatea, jikijmaye siunie ti yiji papo Judíojos jlosikis jiwos, 'yina kia'iyo je iliyi ti inijijwijyink'iye siupa Sinia' jika anechijiayas. Jlampa k'iejli ajnalis wujwak'i'ni siojokia jloma ti siunapo i'nio' iniwakajlanitis k'iye janak jloma ti i'nio 'wanjlijyi'n, José yam'ne ti ijioyi ja Pilato, je iyo ka ijnots'ina ti ti'yasane ki t'ajwes masa ki Jesús, ka intejk'iye. 44Pilato jla'am jnots'iniji'ni ti 'yijene pi iyone ti Jesús je wata'a ti 'ya'al, sekyi'i tanayijyin'ni siupa tokis jika anechiyas, ti iyone 'ate:
—¿Mi ijiate ti 'ya'al?
45Tokis jika anechiyas isiujlie ti iyo'ate:
—Ji'yu, 'ya'al.
Sekyi'i Pilato iyone'ne 'ate ja José:
—Ijiatp'ane, mayi.
46Jak je iyoyi siuti José yama, itiu'un kia lotakinie siukia ti yame ti jla'am itiejietap. 'Yina kiak ijiuti'ne wita'm ti yinaja'n ti taj'l ape'e jlaja jika cruz. Ijioyiji siojo a'no' pajk'i ta'a ti wakal yi'i jlaja tikijnaki ti titijikia'm, sekyi'i ti ip'ionayija'm jla'a sisaj. 47'Yina María Magdala jleliki, jla'yiki jlaja María 'neje Santiago jaka 'neje ja José jletis, yam'ni pet ti i'yenisk'i siojo tena'a kia t'o'.
Одоогоор Сонгогдсон:
Marcos 15: CRT97
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Nuevo Testamento en Chorote © Sociedades Biblicas Unidas, 1997.