Lucas 4
4
Imosik ijyijlit pa Jesús
(Mt 4.1-11; Mc 1.12-13)
1Jesús, Sinia' jikimet ti 'es tipoyiji, ti 'nesat'ipi ti tajle ja tewuk Jordán. Jlam jla'am japa Sinia' jikimet ti 'es ti yame ti ijioyi siupa ajnat laj i'nioye'e. 2Paj ti cuaréntaja puwa jlomas ti sekyi'i, imosik ijyijlitat'ipi. Puwak jlomas ti je ti'yekiu'n, ts'ijiye ti jiwekie'ejat'ipi ti iliate ti inil'lia'n. 3Pakayi'ne ti imosik iyone'ne 'ate:
—Siuka ijiatatajana'a ka jlasa'a'm pa Ina', amti'yi siojose sisaj, amti'yi ka iniwojwa'n woyeja'.
4Jesús isiujlie ti iyo'ate:
—Siuniwa Sinia' jlamtis yi'i ni ji'wet iyo'ate,
“Je ijwienjli jana woye ka i'manit na i'nio'.”#Deut 8.3
5Sekyi'i pa imosik yinat'ipi ape'e siupa toj pijia'm, ti i'winkijna'm wikie'eyi puwa isi'il wus, ti yi' ape'e 'ni ajnat, 6sekyi'i iyone'ne 'ate:
—Japijlanit'ia siu'nie anechijiayas, siu'neje na iyo ti tonitie. Ya'am ti tiwenak'impe, 'yina jawijna'm siupa jayo ka iwijna'm. 7Siuti ja akosjlete'l jateyiji'n isiajwe, ti ja siwunit, ja akimita wikie'eyi 'niwaka.
8'Yina Jesús isiujlie ti iyo'ate:
—Siuniwa Sinia' jlamtis yi'i na ji'wet iyo'ate,
“Wunit jla'am ni Saka'niona ti Ana',
'yina jwankit ka awunit, jla'yi ka já aka'm ape'e ti jla'am.”#Deut 6.13
9Paj ti imosik yamat'iyi'iji ti ijioyiji puwa isi'il, yi'i jlaja Jerusalén. Ijioyi ape'e siupa toj pijia'm yi'i jlaja 'najla'wet, sekyi'i ijliuye'ne ti iyo'ate:
—Siuka ijiatatajana'a jlasa'a'm pa Ina', 'yejne'n, sojmajyi'n ka 'nak ataj'le. 10Niwa inamtis iyo'ate,
“Sinia' janjlo'wa napo jijliujwajnas poli jlele, ka in'ye'na'm siu'neje ka inoye'a'm.
11Ka ayejenie'e niwa jikioye, ti janki'm ajelia'm,
ja 'nakayeyijna'a ti ja ke inoyiji'n siuti ja 'as kiajwe japa sisaj.”#Sal 91.11-12
12Jesús isiujlie ti iyo'ate:
—Siuniwa Sinia' jlamtis yi'i ni ji'wet iyo'ate,
“Ke ejejlit siunie Inka'niona ti Ana'.”#Deut 6.16
13Imosik i'win'ne ti je ikal ti ijyijlitta pa Jesús, itionitiejape'n kiu wata'a.
Jesús tajlap Galiléaja ti k'iejli iyoyeyi ka inkijme'n
(Mt 4.12-17; Mc 1.14-15)
14Jesús Sinia' jikimet ti 'es jijweye tipoyiji, ti yapiliet'ipi Galiléaja. Wikie'eyi papo i'nio' yijits'i puwa ajnatis 'yijene pi iyone. 15'Yiyasajne'n papo i'nio' yijits'i puwa 'najla'wetis, wuj ti tonitie.
Jesús ti yiye Nazarette
(Mt 13.53-58; Mc 6.1-6)
16Jesús yapiliet'ipi Nazarette, siujlieja ajnat ji'wett'iyijpe. Siojopa jloma i'nio 'wanjlijyi'n siupi jike' iyont'iyi'nijpe, ijioyet'ipi kiajwe japa 'najla'wet. Takasitiet'ipi ti yamtijie'n puwa Sinia' jlamtis yi'i pa ji'wet. 17Tiwenajam'ne pa imp'esinik injwejlanik jiwo Isaías jlamtis yi'i. 'Yina ti ilienaja'm, i'win'ne siunie iyo'ate, ti i'yena:
18“Saka'niona jikimet yi' itipe'e.
Jlam ti ts'otatiji,
ti iyo ka ijwile siunapo p'ijliusis ni inka'niye ti 'es.
Jla'am ti sijliuyi siunapo inkipijnas
ka ijwile ni injwajieti ti po'.
Siupet napo talojo' iyo ka 'wijnajne'n.
Siu'neje napo i'nio' inilayiti ti tisiejek'i'yi,
ka ijwiejiete'n.
19Siu'neje ti sijliuyi napo i'nio' ka ijwile siunie ti ja'nes
jana jloma ti Saka'niona jajnoyi,
ti janekiajle ni 'es.”#Is 61.1-2
20Itime ti i'ye'en, sekyi'i ti 'yakapajlatak'i pa imp'esinik, iwijna'm siupa jiwot'i'nijpe pet, sekyi'i ti yiyet'ijyimpe. Wikie'eyi siupapo sekyi'i 'wuk kiajwe i'yenis'ni wekie'e. 21Iniane'ne jla'am ti tamti, ti iyo'ate:
—Yiyi siunie ink'ie' ni Saka'niona jlamtis, 'naka 'ni siu'nie jipe'yaye'ijyi.
22Je jlase' pi iyo papo i'nio', ti ipi'yayeyis puwa jlamtis ti iyo, jnots'inayijits'i'ni, ti iyoyits'i 'ate:
—¿Je 'nak José jlas?
23Jesús isiujlie'ne papo ti iyo'ate:
—Ja ayeyijipi'ni ti ja sijwela' siunie inke' ti iyo'ate, “'Ni inkakiewo wuj, nijwajiet.” Siu'neje ni jawonak'i ti jawoye'yi 'ate, “Siunie ajieye'a 'ni'neye ti jiwoyi ti jle' Capernaumme, kiak jawo'ojyi jalesane'eje ti ja ene'e 'naka'a yi'i jla'a aka ajnat.”
24Jesús jla'm iyojli 'ate:
—Ijiatk'i siunie ti awo'ate, tiwet'ianaja ka injwanjli wata'a napo injwejlanawos ka 'esie ka ti'yenaja ilia'm ti yi'i ni jika ajnat. 25'Yejne'n, tankiuniek'i siupa injwejlanik jiwo Elías t'ipi siupuwa jlomas ti je tomet, paj ti 'najapeja ijwienjli pa yisitaja'm puwa najkapis, pakayi ti 'loj papo ask'ilieki yi'i japa Israel. 26'Yina Elías, Sinia' je papoka ka injloyi, 'wenajliyi jla'am siojopa ask'ilieki yi' Saréptaja, je tojwape'n japa isi' jle' iyo'ate Sidón.#1 R 17.1,8-16 27Kia'iyojliyi siupuwa jlomast'ipi siupa Eliseo ti injwejlanik jiwo t'ipi pet, 'loj papo inkiso'ol jitio' yi'i, 'yina je tijwajyi pi jiwet'ia iyo, pakatajat'ipi jla'am pa Naamán siupa Siria jlele ti tijwa'.#2 R 5.1-14
28I'nio' siupapo yi kiajwe japa 'najla'wet, ti ipi'yayeyi ti kia'iyo, sekyi'i jwesis'ne. 29Takasitiet'ik'ipe, yamat'iyisijpe kisie'e japa isi' pa Jesús, yi'i siojopa tikijnaki toj pijia'm, isi' yi' ape'e, ti iyotajasiji ka 'nomajask'i isia'm. 30'Yina iniuyet'ipi jikiowek'i papo, ti yama ti tajla'm papo i'nio'.
I'nio' siupa jitiej je 'es
(Mc 1.21-28)
31Jesús ijioyi jlaja Capernaum, isi' siujlieja yiji pet jlaja ajnat Galilea. Siojopa jloma ti i'nio 'wanjlijyi'n 'yiyasajne'n papo i'nio'. 32Kawojliyi papo i'nio' t'ipi ti ipi'yayeyis siupa iyo ti taka'neyasa'n, kajeyepa ti jijweye po' ti tamti.
33Yi'i japa 'najla'wet po' pa i'nio' jitiej je 'es yiji papo i'nio'. Paka'ne siupa ti iyo'ate ti tanat'ipi ti 'yakets'ijiap:
34—¡Kasse'nate! ¿Yot'iyi'ni ti jit'iuts'e, Jesús Nazaret jlele? ¿Jot'imi ka kastej'we ti jlots'e? ¡Sitiant'ie'a ti a'am ti Ina' i'notat!
35'Yina Jesús iyo'ne 'ate siupa yiji, ti ijliuye:
—¡K'iu'wate, tajli siu'nie i'nio'!
Sekyi'i itiete'ne pa i'nio' seka'a ajnat'e jikiowe'e papo i'nio' ti tajlat'iyipi pak imosik. Lajk'i wekie'e ka k'iejliyeyi paka inwone pa i'nio' ti tajlaja'm. 36Je jlase' pi iyo papo i'nio' kajeyepa ti i'winisieje, iyoyet'iyispe 'ate:
—¿Tent'i 'niwa inamtis? ¡Siu'nie i'nio', jla'yi ti jijweye po' ti tamti'yi, ti ijliuye niwa imose'l ka inok'i kisie'e, siuniwa imose'l its'iuye sekyi'i iniuyek'i kisie'e!
37Jesús jle' po' pakayi yi'i jlajak ajnat.
Jesús ijwiejiet japa Simón jikant'e
(Mt 8.14-15; Mc 1.29-31)
38Jesús, ti iniuyet'ipi kisie'e ti tajle japa 'najla'wet, ijio'ne Simón ji'wete. Siojopa jikant'e ja Simón inlaye yi'i, Jesús tikiniejeje'ni ka inoyeje japaka. 39'Yuyeyijap isia'm ti i'yejne'n, sekyi'i ti ijliuyeyi pa inlayetiok ti yi'i japa i'nioki. 'Yina 'es tijwa'ne. Je yiyi puwa ka jlomasa' ti iniyet'ipi pijia'm, wuj ti i'yena papo ti ilisane k'iye pa jlak.
'Loj papo je isis Jesús ijwiejiete'n
(Mt 8.16-17; Mc 1.32-34)
40Ti kilie' 'yuyeta, wikie'eyi siupapo i'nio' je isis, ti jiliaye je ijwienjlik'i, tikiniejat'iyijipi pa Jesús. Ijwienjlik'i'ni papo ti jikioye yink'i ape'e, sekyi'i ijwiejiete'n. 41Je pini' siupapo je isis ti imose'l tajlits'i, ti iyo'ate ti tajwits'iji'n:
—¡A'am ti Ina' jlajts'a'm!
Jesús isilaja puwa imose'l ti ijliuk'i kisie'e, je yine 'ate ka intamtits'iji'n, kajeyepa ti 'yijene pi iyonisi ti paka ti Injwajieti ti Sinia' jijliujwanik.
Jesús iyo jlamtikie' kiajwe puwa 'najla'wetis
(Mc 1.35-39)
42Ti jloma 'yakajat'ijyimpe, Jesús ya'am ti tajlaja'm pa isi' ti ijioyi siupa ajnat laj i'nioye'e. Siupapo i'nio' ijianis'ne, 'yina ti i'winis sekyi'i ti jet'ipa iwinisiet'itiepe ka nek. 43'Yina Jesús iyone'ne 'ate papo:
—'Esiji ka ijioyi siunapo yijits'i siuniwa isi'il ijia, ka iyo jika'niyejayiji siunie jika anechijiayas ni Inia', kajeyepa ti nak tijliukk'i ka iyoyi.
44Kiak iyoyi pa Jesús ti ijwilata pa inka'niye ti 'es, ti ijioyits'i puwa 'najla'wetis ape'e puwa ajnatis.
Одоогоор Сонгогдсон:
Lucas 4: CRT97
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Nuevo Testamento en Chorote © Sociedades Biblicas Unidas, 1997.
