Lucas 2
2
Iyo pa Jesús ti k'iejli yiji'n
(Mt 1.18-25)
1Puwak siupuwa jlomas ti Augusto, siupa anechiyas Roma jlele, takajlunie ka tetinak'i wikie'eyi papo i'nio'. 2Pakat'iyijpe ti siupa i'nio' jle' iyo'ate Cirenio yi'i ti iyo anechiyasa' yi'i jlaja Siria, ti 'nelanjie'e iyoyeyi papo i'nio' ti tetitinak'i. 3Ijiatjliyi wikie'eyi papo i'nio' yapilieyi pet siupa ajnat yijijyi'n, ti ini'netisi'i.
4Jak je iyoyiji'ni pa José ti ya'am ti taj'le jlajak ajnat Nazaret, siujlieja yi'i jlaja Galilea, ti ijio Belenne, siujlieja yiji jlaja ajnat Judea, siujlieja yit'i'yijimpe pa anechiyas David. Papoka'ne papo ti José tajla'm, papo David. 5José yam'ne ti ya'asi jlaja María, ti sek janinenisiji ti jani'neti'ik'i pet, siujlieja ti pajk'i ti initeme ti janeyi. 'Yina isiu'ujnien'ne japak jlosie María. 6Ti yiyet'iyispe Belenne, sekyi'i ti iyoyeyi ka nejyi'n pa kia'le. 7'Yina ti laj ji'weta' ts'e yi'i siojopa askiujnietas jlajapa 'wet. Sekyi'i tokiet'iyijipi japa a'lentas ji'wuk, sek yi'ijin'ne pak jlas ti iniajnat. 'Yakapajlatat'iyijk'ipe pa lotakiniewa, sekyi'i ti ijiajnijyi'n japa a'lentas jlak jiwe.
Injlojwajnas poli jlele iyo jika'niyejayi papo sontas jiwos
8Pak siupa ajnaj po' papo i'nio' siupapo i'yena puwa sontas ojwe, 'yakama'a jlaja Belén. 9Yisi'lietk'i papo i'nio' sontas jiwos siupa Sinia' jijliujwanik poli jlele ti yiyet'iyipi, sekyi'i Saka'niona jijweye jla'al itijw ape'e, wuj ti jnots'ijnits'i. 10'Yina siupa injlojwanik poli jlele iyone'ne 'ate:
—Jweyitiek'i'm, ya'am anama'ase 'ni inka'niye ti 'es, jant'emina napo i'nio' ti jinikanitieyi poye. 11Siu'nie jloma yijints'e yi'i jana isi', David jika isi', ni Asjwajietiye, ti Saka'niona. 12'Yejne'n, ja 'nakayeyijna'a ka je akakiunieyi, ja'wena siunie kia'le ti tanajajyi'n jla'a a'lentas jlak jiwe, ti takapajlatajak'i na lotakiniewa.
13Sekyi'i ti 'yakajat'ijyi siupapo injlojwajnas poli jlele ijia ti 'loj. Jnots'inayijits'i'ni papo sontas jiwos ti i'winayisi papok injlojwajnas poli jlele, ti takasitis ape'e pi jikiecha, ti iyunitis pa Sinia', ti iyo'ate:
14“¡Ijnonitieye tena'a pa Sinia' yi' poliyi,
'yakamaja napo i'nio' yi' ape'e 'ni ajnat,
siunapo ti jla'am pa Sinia' ti ijniejiet'e ni jikap'ijliuskiye ti yi'ne!”
15Yam'ni jiwekie'e papo injlojwajnas poli jlele, ti yapi poliyi, iyo'ne 'ate papo sontas jiwos:
—Naja'ni ti jajiok Belenne, jlam 'esiji ka i'wina siukia iyo kia Saka'niona ijwilts'e na iyo.
16T'osiyeyijits'i'ni ti yamat'i'nijpe, 'nes'ni sekyi'i i'winis'ne jlaja María, siu'neje pa José, siu'neje pa kia'le ti tanajajyi'n siojopa a'lentas jlak jiwe.
17Yamtiyisieyi pet k'iye papo, siupa iyo pa injlojwanik poli jlele ti takajwejlane, 18'yina siupapo ipi'ya jnots'inayijits'i'ni. 19María jlam yinjliyi jikiowe'e, ti ilisa'n naka, iyo jitienkiujnieyeja'. 20Siupapo sontas jiwos yapi'ni'ne, jla'am iyunitjliyis pa Sinia', ti iyunitis siupa iyo pa i'winis, jla'yi ti ipi'yayis, kajeyepa ti ijiatk'i siupa iyo pa injlojwanik poli jlele ti ijwi'il.
Tiwok jleye pa kia'le
21Jlomas ijwienjli sikio' itij'we najape tom'niji puwa itijw isia'm, ti tiwokieyi ka t'isie'n jiwa jlas tejwak'i pa kia'le,#Lev 12 siu'neje ti tiwokie jleye, tiwonaja'ne 'ate Jesús, siupa ine' injlojwanik poli jlele pajk'i ti ijwijla'm jlaja María ka kiak jleye pa jlas, ti je isiu'ujnienjli'ijyi.
María jla'yi pa José yamisi pa Jesús ti ijioyisi japa 'najla'wet, ti yikiajlisi pa Sinia'
22-24Jlampa yiyek'i siupuwa jlomas ininenisi, ti ini'notatisiji jitieyi'i pa Sinia', iyot'iyipi jla'am pa inka'neyasajnaye ka woyi napo asejnia, ti kia'iyo ti tijwayetaja puwa jlomas cuarenta, japa asejnia jlas yiyetaja'n. María jla'yi pa José yamat'i'nijpe ti ijioyis Jerusalenne, ti yamisi pa kia'le. 'Yina yamisi siupuwa janekiajlisi pa Sinia', iyo jla'am niwa inamtis ti iyo'ate, “Times puwa sipopis jilisa', ni'ne ka ojwos jilisa.” Isimayisi pa kia'le ti ijwilisi pa Sinia', lapakawo ti kiak iyo kiwa jlamtis pa Sinia' ti iyo'ate, “Kia'lepe pa janejyi'n, siuti ja ayinieja', siunie jlas inia'an jla'a asejnia, nak ti'wenakitije pet pa Sinia'.”#Ex 13.2,12
Simeón itiant'ieje pa kia'le ti pak Jesús
25Puwak siupuwa jlomas pojompe pa i'nio' jle' iyo'ate Simeón, ji'wet jlaja Jerusalén. I'nio' ti 'es, yamjliyi'iji ti its'iujwe'n k'iye ka Sinia' imp'elisi'n papo Israel jika kia'lis, jla'yi ti iyunit jlam jiwekie'e pa Sinia'. Siojopa Sinia' jikimet ti 'es pajk'i ti yijap ta'a pa Simeón, 26ti iyone'ate ti ijwijla'm:
—Siuti atate je i'winjli'ijyi siunie Injwajietiye ti Sinia' janjlo', ja ke i'nal kiu', jla'm ijiatena'a ka'wenta, jiwekie'ajana'a ka inetia'n pet.
27Lapakawo ti japaka jla'am siojopa Sinia' jikimet ti 'es ti yame pa Simeón, ti ijioyiji jlaja Sinia' ji'wuk. Jlampa yamayisi pet papo José siu'neje jlaja María pa jlasis Jesús, ti ijioyisiji japa Sinia' ji'wuk, ti yamisi siupa inka'neyasajnaye iyo ka tiwoki. 28Ti Simeón i'wina pa kia'le, sekyi'i isimat'iyipi ti yin jikiojyi ti iyo'ate, ti iyunit pa Sinia':
29“'Yaka'niona, 'nakayi yiyi siujlie'e jloma
siunie jlejni siukia jiwopi ti jijwelk'i'm, ti akawok'i'm,
jla'm ijiate 'ne 'nakayi, sen'nejna'ate ti akawok'i'm ti jayik ti janinop'it.
30'Esiji, a'we'en 'ni Injwajieti ti k'iejli yiji'n,
31ti jlen jitieyi'i wikie'eyi napo i'nio',
32kates ti janata'n ape'e siunapo i'nio' je Judíojos,#Is 42.6; 49.6
janakaye jiwunitieyeja' napo aka kia'lis ti tajla'm ni Israel.”
33Siupapo jiniewot pa Jesús, ti ipi'yaye pa Simeón ti tamti, jlam jnots'inijits'i'ni. 34Sekyi'i Simeón jikio' yink'i'ne ape'e, ti iwijna'm pa 'es, sekyi'i iyone'ne 'ate jlaja María:
—'Yejne'n, siu'nie kia'le jant'emina napo Israel jlele ti ja 'lojwa napo janetia'n, ni'ne ka injwa'a. Jla'am ti ts'ijiye ka pajata ti ja 'lojwa napo i'nio' ja ke inki'm ilia'm, 35sekjane'yi ka 'nakajak'ina'a ape'e ki iyo niwa jlosikis. 'Yiniyijna'a siunie sijnat jitiok ti jana'me na asak'al.
Ana kia'iyo po' pet pa yiyi ti ijwi'il pa kia'le Jesús
36Sekt'ipa yiyepe'eje japa i'nioki jle' iyo'ate Ana, Fanuel jlase' tajla'm pet papo Aser jika kia'lis t'ipi. Injwejlanik jiwoki japak i'nioki. Mawat jlosie ti tijwa'yiyet'ipi, jika najkapis ijwienjli sikio' itij'we times tom'niji ti yijap pa siupa yiyi, sekyi'i ti 'yalat'ipi. Pakayi ti kijilayeyi t'ipi. 37Jlampa ochenta y cuátroja puwa jika najakapis ti iyo ask'iliekiye. Je yi'i japa ka jlomaye ka inleyi jlaja Sinia' ji'wuk, jlomas ti iyunit pa Saka'niona. Jlomas itijwe siu'neje puwa ajnajas ti ininel'liajanit'ni ti iyoyi pa t'ajlaye. 38Pakat'iyijpe ti 'nesat'ipi pet ti jawo jinikanitieyeja' pa Sinia', jla'yi ti ijwijlam'ni papo i'nio' siupa kia'le Jesús wikie'eyi siupapo je iliyi ti inijijwijyi'n k'iye pak Jerusalén jijwajietiye.
Yapi Nazarette papo María jla'yi pa José
39Jlamk'e'm t'ipi ti itimisi papo José siupa iyot'iyipi ka tiwoki puwa Saka'niona jlamtis ka tiwoki, ti i'nio 'yijijie'ne, yapiliet'iyispe Nazarette, siojopa ji'wetis, yiji jlaja ajnat Galilea. 40Jlam ijliasjli'ni pijia'm pa kia'le, jijweye t'oniek'i, jla'yi ti 'yijena jlosiki. Sinia' wuj ti iniuyeje ti yijap.
Jesús 'wanjle ts'e yi'i japa 'najla'wet, jlampa jika najkapis itijwa'm niwa sikioye times tom'niji
41Najkap pejpa, ti yiyetaja siojopa Judíojos jiliakijnieye jle' iyo'ate Pascua, siupapo jiniewot pa Jesús yam'ni ti ijioyis'ni Jerusalenne. 42Jlampa itijwa'm niwa sikioye times tom'niji puwa jika najkapis pa Jesús, 'yina pajlat'ni'ne papo ti yam'ni, jike' iyont'iyisiji'nijpe ti kia'iyo. 43Yiyisi' japa inlakijnieye pakayi, 'yina ti nojwa isia'm ti iyoyeyisi ka inapi'ni. 'Yina siupapo jiniewot je isitianis pi Jesús, jlam'ne 'wanjle Jerusalenne. 44Itijnistiejesi ka inejyi papo i'nio' ti yama'ni, jlampa itijwat'iyik'ipe pa jloma ijwienjli ti t'iskiunk'iji'n. 'Yina ti je i'winis ka nejyi papo i'nio', sekyi'i ti ijioyetajats'i papo ijia, siu'neje papo itiant'iejesi, ti iyoyisijyi'ni. 45'Yina je i'winis jikiowe'e papo, iyoyeyisi ka inapits'i isia'm, ka napilis Jerusalenne, ti iyoyisijyin'ni.
46Jika jlomas najape ti iyoyisijyin'ni ti jiwekie'aja t'ipi ti i'winis, ti yits'e 'najla'wet japa yi'i, yijin'ni seka'a jikiowe'e siupapo i'nio' iniwojwa'n jiwosa' pa Moisés jika'neyasajnaye. Jlam its'iuye'ni papo siupa iyo pa ijwilis, jlam taka'yasanjli'ni. 47Siupapo ipi'ya jlam jnots'inijits'i, kajeyepa ti i'winis ti 'yije'en pa kia'le, jla'yi ti kiak je iyo paka inkiujlie papo. 48Kia' iyojliyi pet papo jiniewot, ti i'winayis, María sekyi'i iyonisi'ne 'ate pa jlas:
—Yas, ¿yot'iyi'ni ti kiak jiwonts'e? Ana' jla'yi ti ya'am je kasjweyeyijits'i'ni ti awoktajajyin'ni.
49Jesús isiujlie ti iyo'ate:
—¿Yot'iyi'ni ti siwoyejyin'ni? ¿Je 'najanayi ti je 'esiji ka je iyi kiajwe jla'a Inia' 'wuk?
50Ka jikatejnisieyeja' pa papo jiniewot, siupa iyo pa Jesús.
51'Yina yamk'i'ne papo jiniewot ti yapilis Nazarette. Sekyi'i ti its'iuyeyiji papo jiniewot, siupa iyo ka woyi. María wuj ti iyoyi jitienkiujnieyeja' ti kia'iyo. 52Ijliasjli'ni pijia'm pa Jesús, kia'iyojliyi ti 'yije'en, jla'yi ti ikanit'ni pa Sinia' siu'neje papo i'nio'.
Одоогоор Сонгогдсон:
Lucas 2: CRT97
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Nuevo Testamento en Chorote © Sociedades Biblicas Unidas, 1997.
