ЛУК 20:41-47

Тэр тэдэнд —Христ бол Давидын Хүү мөн гэж тэд яагаад ярина вэ? Давид өөрөө Дуулал номд “Эзэн миний Эзэнд «Миний баруун гарт залрагтун. Ингэхдээ дайснуудыг чинь Би Чиний хөлийн гишгүүр болгох хүртэл болой» гэж айлдав” гэсэн. Давид Түүнийг “Эзэн” гэсэн юм бол, Тэр хэрхэн түүний хүү нь байж таарах билээ? гэв. Тийнхүү бүх ард олныг сонсож байх зуур Тэр шавь нартаа — Урт дээлтэй явах дуртай, зах зээл дээр хүндлүүлэн мэндлүүлэх, синагогт тэргүүн суудалд болоод найран дээр хойморт залрахыг дурлагч хуулийн багш нараас болгоомжлогтун. Тэд бэлэвсэн эмэгтэйчүүдийн гэр орныг цөлмөж, удаан залбирч буй дүр үзүүлдэг. Ийм хүмүүс үлэмжийн ял хүртэнэ гэв.