Luk 9
9
A Iesu itap'er m'ertuan arnal lman iru (12)
(Matiu 10:5-15; Mak 6:7-13)
1Laha, iv'ara anr m'ertuan inal lman iru (12) avrama kavp'lt, katu nut hua anr a ti apavrndu ti apavsran m'im'iln stu udlani kavmhmah a m'etiena natei. 2Katap'er a ti apavvrp'ep'a v'anuan Atua kavmhmah a m'ertu avm'at. 3Kavr anr kavr ti a, “Mavua si kinkin arna navanel, mavua napilakt, v'aha naten, v'aha p'ret, v'aha nav'et. Mavnen klusam'i uraur ml.
4Ipavr ti pavrav'a al nmah kinkin, pavlak atlera dav'a ti pavln nut lera. 5#Parei 13:51.#Luk 10:4-11.V'eti ipavr ti m'ertu kinkin ahavrn ti apavlev' kam'i, pavninuan neiev' na tlm'i naran pavln nut lera, a ti ipav'iv'en si stuar.”
6Sarei, avv'el kavrav'a arna v'anu kinkin kavvrp'ep'a v'nen p'as kavmhmah a m'ertu avm'at arna nut udlani.
Mlin a Erut irn ti ipalei a Iesu
(Matiu 14:1-12; Mak 6:14-29)
7 #
Mat 16:14; Mak 8:28; Luk 9:19. Dav'a, a Erut, iv'i mlin na nut iv'a, irn v'nen ivrur si udlani a Iesu iani, kardus nln ani, sena ti m'ertu kinkin avvr ti iv'i a Sun Paptais itthal ml arna m'ien. 8M'ertu kinkin uraur ml avvr ti iv'i a Iiaitsa la itv'iv'en sera hin ha, hir uraur ml avvr ti pruvet tituei itthal ml arna m'ien. 9Laha, a Erut ivr ti a, “?Kana nttrus sera ptn a Sun, v'eti Aulera, la nrn ti ien pari lilil ra, iv'i a hin ak?” Laha, irn ti ipalei.
A Iesu imsnen m'ertu avv'i tausen ilm' (5,000)
(Matiu 14:13-21; Mak 6:30-44; Sun 6:1-13)
10Dav'a, naran apusel avrama ml avvrp'ep'a an a Iesu si udlani avani. Laha, ilev'lar asnr nelnal kavrav'a arna nut kaka iter mima asn v'anu iamk, nahan iv'i a P'etsaita. 11V'eti naran nelnal avrndu si lera, avsapei ml. Laha, a Iesu ilav'r kavrp'ep'a v'nen p'as na v'anuan Atua anr, kamhmah a nki si ianr. 12Dav'a, ihih ti nut ipam't, m'ertuan arnal lman iru (12) avrama asnn, kavvr ani kavvr ti a, “Patap'er nelnal udlani apavrav'a arna v'anu kinkin m'a nut itertalu atlaha a ti apavm'atr kavlev' tim'ah, sena ti hilaha nvlak a nut kaka.”
13V'eti ivr anr kavr ti a, “Kam'i pavtu tim'ah anr.” V'eti avvr ani kavvr ti a, “P'ret ilm' m'a tilau iru uaki iter asnd, ipavr ti nkavrav'a kavul tim'ah ipaviviln a nelnal udlani laha.” 14Sena ti ardu nen avihih tausen ilm' (5,000).
Laha, ivr anr arm'ertuan kavr ti a, “Pavani ti apavlakpipiani unanut, nki inellm' a nut ipamk.” 15Laha, avani inap'i lera dav'a ti hir udlani avlak.
16Sarei, ilev' p'ret ilm' m'a tilau iru lahara, kap'a nut eia, kavr ip'as sanan, kakausi katau anr m'ertuan a ti apavvsvsen a nelnal. 17Laha, hir avhatat kavrapd, sarei avnenpien tk tim'ah iter uam, ilin naten inal lman iru.
A P'ita ivrp'ep'a ti a Iesu iv'i a Kristu
(Matiu 16:13-19; Mak 8:27-29)
18Arna napn iamk, a Iesu ilak mamk katu tamat, arm'ertuan avlak m'ei. Laha, imiman anr kavr ti a, “?M'ertu avvr ti Kana nv'i ak?”
19 #
Mat 14:1,2; Mak 6:14,15; Luk 9:7,8. Laha, avvrprani kavvr ti a, “A Sun Paptais, v'eti m'ertu kinkin avvr ti kv'i a Ilaitsa, m'ertu uraur avvr ti kv'i pruvet iamk itthal ml arna m'ien.”
20 #
Sun 6:68,69. Ivr anr kavr ti a, “?V'eti kam'i kvvr ti Kana nv'i ak?” A P'ita ivrprani, kavr ti a, “Nakm kv'i a Kristuan Atua.”
A Iesu ivrp'ep'a ti ipam'a kathal ml
(Matiu 16:21-23; Mak 8:31-33)
21Sarei, ivrkarr ihua a ti amavvrp'ep'a si lera a m'ertu kinkin kavr ti a, 22“Aputakm a Kana, nv'i Net M'ertu, ipastudau. Hir elta m'er armlinar arpris lil, m'er dui na v'nen hua apavmlen Kana kavkap'n Kana, v'eti p'ethal ml arna nitla napn.”
M'ertuan a Iesu ikua su lamu nen pr kasapei
(Matiu 16:24-28; Mak 8:34-38; 9:1)
23 #
Mat 10:38; Luk 14:27. Laha, ivr anr udlani, “Ipavr ti m'ertu kinkin irn ti ipasapa Kana, v'eti ikav'ahur hin ml. Ikua su lamu nen pr arna napn udlani, kasapa Kana. 24#Mat 10:39; Luk 17:33; Sun 12:25.Sena ti m'ertu irn ti ipauada silv'ienan, silv'ienan ipasel, v'eti m'ertu silv'ienan ipasel sanak, hin ipapaslei ml. 25?Sena ti m'ertu ipalev' v'ata, ipavr ti ipalev' nadep' udlani, v'eti silv'ienan ipasel, v'aha Atua ipasrani? 26Sena ti m'ertu ipap'ep'n Kana v'aha v'nenak, Kana, nv'i Net M'ertu, p'ep'ep'ni naran p'ama arna si p'sp'asak m'a si p'sp'asan a Tetiak m'er ensel p'as udlani. 27V'eti nvrdaui nvr a kam'i, M'ertu kinkin avp'tir atlaha hilaha akavram'a, ipaier naran apavla ti v'anuan Atua itama sarei.”
P'akn a Iesu ima kuraur
(Matiu 17:1-9; Mak 9:2-10)
28Ivr v'nen lera, sarei ihih ti napn isatl iv'siau, a Iesu ilav'r a P'ita, a Sun m'ei a Sim'is, kavrav'a eia arna ptha iamk a ti ipatu tamat. 29Naran itu tamat, nahn ima kuraur, klusan ima katva ker istudau. 30Laha, pavrni, dui arru arv'ana m'ei, arv'i a Musis m'ei a Ilaitsa. 31Arma arna si p'sp'asar karvrur sei a Iesu ipani arna nut a Serusalem naran ipaln nadep' ka. 32V'eti a P'ita m'er ardu uraur arru la arlak m'ei hara, m'atar idv a m'etrien, v'eti naran avrasp' avla si p'sp'asan m'er ardu arru arp'tir m'ei. 33Dav'a, naran arlndinei, a P'ita ivr an a Iesu kavr ti a, “Tisa, ip'as a ti nvlak atlaha. Ip'as a ti p'vhl tep'atep' ipatl, Nkam ipamk, nkan a Musis ipamk, nkan a Ilaitsa ipamk.” Sena ti iarndu sei ivri.
34Naran idv'ana uam, p'knaran iamk ima kauakarr. Laha, avdedrn naran avrav'a al p'knaran. 35#Aisaia 42:1; Mat 3:17; 12:18; Mak 1:11; Luk 3:22.#2 P'ita 1:17,18.Laha, nadl iamk idan al p'knaran lahara kavr ti a, “Aulaha iv'i a Natk la nlap'as ani ha. Pavv'rn ani.” 36Naran nadl lahara ihiris, avla ti a Iesu ilak mamk uaki. V'eti avp'n hir arna naran nen, ahavvrp'ep'a si kinkin avlei.
A Iesu imhmah dui pa m'im'iln stu iuei
(Matiu 17:14-18; Mak 9:14-27)
37M'ih nen, naran atvandan sarei arna ptha, m'ertu istudau avrama asnn. 38Laha, pavrni, dui iamk asnr nelnal iv'ara kavr ti a, “Tisa, nmiman anh ihua, palei aupak, sena ti hin iv'i a natk iamk dudau. 39Parn, m'im'iln stu iani, iv'amk m'a ti iv'ara eia kani ti im'em'a, ui dav'n irarev' istudau. Naran ilni, ihuat kutakm a p'akn istudau. 40Kana ntmiman sarei anr m'ertuam a ti apavsrani, v'eti ahavrndu ti apavani.”
41Laha, a Iesu ivrprani, kavr ti a, “U, kam'i kvsilv' hilaha, kaavv'ah Atua, v'ahienam'i iaviviln, ?Kana p'elak asnm'i karn istu sanam'i dav'a ipaier v'aran? Pauirma aupam atlaha.” 42Laha, naran hin idama uam, m'im'iln stu lahara israni a nadep' kani ti im'em'a. Laha, a Iesu iv'ana m'a m'im'iln stu lahara, kamhmah a mardel lera ip'as ml, sarei katum'alet an a tetian ml.
A Iesu ivri ml ti ipam'a
(Matiu 17:22,23; Mak 9:30-32)
43Laha, hir udlani avtah istudau naran avla nut hua lilan Atua. V'eti naran hir udlani avv'ahur si udlani a Iesu iten sarei, hin ivr anr arm'ertuan kavr ti a, 44“Pavv'rn mamh a v'nen p'evr a kam'i hilaha, sena ti apatu Kana, nv'i Net M'ertu, al lm'ar m'ertu.” 45V'eti hir ahavrndu v'nen la ivri ra. Iv'i v'nen tutuah asnr a ti akavrndaui, v'eti avdedrn a ti apavmiman v'nen lera ml ani.
?Hin ak ilil mau?
(Matiu 18:1-5; Mak 9:33-37)
46 #
Luk 22:24. Laha, avvrvr a hir kavvr ti hin ak asnr ilil kasiv'r udlani. 47V'eti a Iesu irndu v'ahienar kalev' mardel pa iamk katau asnn, kavr anr kavr ti a, 48#Mat 10:40; Luk 10:16; Sun 13:20.“M'ertu la ipalev' mardel laha arna nahak ha, ipalev' Kana, v'aha m'ertu ipalev' Kana, ipalev' Hin la ittep'a sera Kana ha, sena ti hin la isusupa kasiv' kam'i udlani ha, hin ipalil.”
49Laha, a Sun ivr ani, kavr ti a, “Tisa, kam'em' nvla m'ertu iamk isran m'im'iln stu arna naham, v'eti nvvrkari sena ti iasapa nakd.”
50V'eti a Iesu ivr ani, kavr ti a, “Mavvrkari, sena ti m'ertu iamlen nakd, isapa nakd.”
M'ertu arna v'anu iamk a Sameria ahav'rn a Iesu
51Dav'a ihih naran na ti apalev'm'alet ani ml ipav'a arna nut eia, hin v'ahienan ihua kav'ahur ti ipav'a a Serusalem. 52Katep'a m'ertu kinkin a ti apavtauamu ani kavua v'nenan. Laha, avv'el kavrav'a arna v'anu iamk a Sameria a ti apavandedp' m'lnen. 53V'eti ahavlav'i, sena ti avla ti hin irn ti ipav'a a Serusalem. 54#2 Armlin 1:9-16.Naran m'ertuan iru, a Sim'is m'ei a Sun, arla si lera, arvr ti a, “?Mlin, Nakm krn ti kam'em' p'erv'ara nap' ipadan eia kalr, inep'a nut a Ilaitsa iten sarei inap'ei tituei?”
55V'eti ivav hin kav'ana hua m'er kavr ti a, “Kam'i kaarrndu nut nlm'i inap'ei. 56Sena ti Kana, nv'i Net M'ertu, nahma a ti p'utakm a silv'iena m'ertu v'eti nma a ti p'elev'lar. Laha, avrav'a arna v'anu uraur.”
Apasapei a Iesu iv'i si hua
(Matiu 8:19-22)
57Dav'a, naran avsapa navanel, dui iamk ivr ani, kavr ti a, “Mlin, kana p'esapah arna nut udlani pav'a.”
58V'eti a Iesu ivr ani, kavr ti a, “Lip'ah didi m'lnar iak a ti apavm'atr, m'anh na p'knaran ninhr iak, v'eti Kana, nv'i Net M'ertu, m'lnak ihei a ti p'ululn.”
59Ivr a m'ertu uraur ml kavr ti a, “Pasapa Kana.” V'eti ivr ti a, “Mlin, pam'ahu a ti p'etin sera lei a tetiak kasapah.”
60A Iesu ivr ani, kavr ti a, “Ip'as a ti m'ertu avram'a apavtin m'ertuar avram'a, v'eti nakm pav'a kavrp'ep'a v'anuan Atua.”
61 #
1 Armlin 19:20. M'ertu uraur ml ivri kavr ti a, “Mlin, kana p'esapah, v'eti pam'ahu a ti p'av'a kavr ip'as anr tv'alk ipatauamu.”.
62V'eti a Iesu ivr ani, kavr ti a, “M'ertu la iua stia na sei itr nadep' kaklup'la ml ha, hin iaviviln a v'anuan Atua.”
Одоогоор Сонгогдсон:
Luk 9: nmb
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2023 Presbyterian Reformed Church of Australia
