Yohana 4
4
1Mumu pala akapatiti kumanya Bambo kukita waFarisayo wayufwini kukita Yesu ayii mu kukita ni kubatisa wanafunsi wa mahele kulutila Yohana 2(haka Yesu mwene akabatisi lepa, koma wanafunsi wake), 3akaulekiti Yudaya, nakabiti kawili ku Galilaya. 4Ni akalonditi kubita pagati pa Samaria. 5Mumu ahicha ku likaya lya Samaria, lya kukemaleka Sukar, papipi ni pandu pala Yakobo akampili Yosefu mwana mundu: 6leka kisima kya Yakobo kikayili kuku. Mumu Yesu, apa atonditi pa mwanja wake, akatemi pasi apa pa kisima. Yikayili ngati saa ya ntanda. 7Ahicha ndala wa Samaria kuteka machi: Yesu anjowela, Unipele ninywe. 8Pakuya wanafunsi wake wakabiti mu likaya wahemele kyakulya. 9Mumu ndala mSamaria anjowela yombe, Wuli wenga, pakuya mYehudi, uluwa machi kwa nenga, ndala wa Samaria? (Pakuya waYehudi nakusyowengana lepa nawo waSamaria.) 10Yesu akahigiti nakajowiti kwa yombe, Wona umanyaye kya waka kya Mulungu, na nani ayii mu kukujowela, Unipele ninywe; ngauluwiti kwake, na ngakupili wenga machi ga kulama. 11Ndala anjowela, Bambo, uyilepe ni kya kutekela, ni liwumba linyoliki pasi: mumu kuhumila kuliku uyii na machi gala ga kulama? 12Wila wenga wa nkulungu kulutila dadi witu Yakobo, uyu akatipili liwumba ili, nuyombe mwene anyweye baha, na wana mundu, ni fidimo fyake? 13Yesu akahigiti nakajowiti kwa yombe, Ayi yoha yuanywa machi aga yawone kawili nywita: 14leka ayi yoha yuanywa machi aga yanimpele nenga nakuwona kawili lepa nywita mpaka miaka ni miaka; koma machi aga yanimpele nenga yagaye mugati mwake kisima kya machi ga kuchweka kwa kulama kwa miaka. 15Ndala anjowela, Bambo, unipele machi aga, nausi nisiwona nywita, nisihicha nenga kuni kuteka. 16Yesu anjowela, Bitaye, unkemele ngwanawo, ni uhiche kuni. 17Ndala akahigiti nakajowiti kwa yombe, Niyilepe nu ngosi. 18Yesu anjowela, Ujowiti wicho, Nangali ngosi: pakuya ukayili nawo wangwanawo mhano; nu uyu uyii nako hino nakuya ngwanawo: ili ujowiti lya chakaka. 19Ndala anjowela, Bambo, nilolalela kukita wenga uyii wakulweta. 20Wakadadi witu wagwileye kimbo pa kidunda iki; nu mwenga mujowa, kukita pa Yerusalem pandu baho wandu walinganila kugwilakimbo. 21Yesu anjowela yombe, Ndala unikele nenga, pakukita saa yiyii mu kuhicha, pala haka pa kidunda iki, haka pa Yerusalem, yamungwile kimbo lepa Dadi. 22Mwenga mugwilakimbo iki mukimanya lepa: tenga tigwilakimbo iki tikimanya: ndawa uyokosi uyii wa waYehudi. 23Koma saa yiyicha, na hino yiyii, pala wakugwilakimbo wa chakaka yawagwile Dadi kimbo pa roho na pa fya chakaka: pakuya Dadi alondalonda wandu wa ntundu uwu wa kugwilakimbo wake. 24Mulungu ayii Roho: na iwalinganila wakugwilakimbo wake kungwilakimbo pa roho na pa fya chakaka. 25Ndala anjowela yombe, Nimanya kukita Masiya ahicha (uyu akemaleka Kristo): wona ayicha, yuyulayula yatikokosele fyoha. 26Yesu anjowela, Nenga wakulongela nu wenga na yuyu.
27Na bahala wakachiti wanafunsi wake; na wakakangichi ndawa akayili mu kulongela nu ndala; koma pawaka mundu akajowiti, Ulonda kiki? pangi, Ulongela nako kiki? 28Mumu ndala akilekiti kiwiga kyake, na akawukiti ku likaya, na awajowela wandu, 29Tiwuke, mukalole mundu, uyu akajowiti kwa nenga fyoha nikakiti: ati si uyu Kristo yula? 30Wakapititi mu likaya, na wakayili mu kunchila yombe. 31Pa lukumbi lula wanafunsi wake wakampembisi yombe, kujowa, Rabbi, ulyaye. 32Leka akajowiti kwa wombe, Niyii nakyo kyakulya kinilya iki mukimanya lepa. 33Mumu wanafunsi wake wakajowini wene na wene, Ati mundu akandetili kyakulya? 34Yesu awajowela wombe, Kyakulya kyangu kiyii kukita kilondo kya uyu anitumiti, ni kumalakisa lihengo lyake. 35Si mujowa, Yakona miesi ncheche, nu kubena kuyii mu kuhicha? Lola, niwajowela mwenga, Munyanyamuse miho ginu, mulolalesyaye migunda, kukita yiyii miwalafu hino kwa kubena. 36Wa kubena ayupa njombe, na awunganisa fipambiko kwa kulama kwa miaka; nausi wakupanda na wa kubena wahekelele pamonga. 37Ndawa baho lilowe ili liyii lya chakaka, kujowa, Yumonga apanda, na yungi abena. 38Nenga niwatumiti mwenga kubena fila mufwahili nafyo lepa: wangi wafwahili, nu mwenga muyingili mu fila wafwahili nafyo wangi.
39Leka wa likaya lililalila wa mahele wa waSamaria wakankeliti yombe ndawa ya lilowe lya ndala, uyu akalungamakili kujowa, akanitawili fyoha fila nikakiti. 40Mumu waSamaria apa wakachiti kwa yombe, wakampembisi ahwele nawo: nakahweliti bahalapala magono gawili. 41Na wangi wangi wakankeliti kulutila ndawa ya lilowe lyake; 42na wakanjowili ndala yula, Hino tikela, nakuya ndawa ya kulongela kwako: pakuya tayufwini tenga tawete, na timanya kukita uyu chakaka ayii Njokosi wa ndima.
43Leka panyuma pa magono gawili akawukiti, nakabiti kukulakula ku Galilaya. 44Pakuya Yesu mwene akalasiti ulungamakiso, kukita wakulweta nakuginikika lepa pa ndima wake mwene. 45Mumu pala akafiki pa Galilaya, waGalilaya wakanjupiti yombe, pakukita wafiweni fyoha fila akakiti pa Yerusalem pa ligono likulungu: pakuya wala nawombe wakabiti ku ligono likulungu.
46Mumu akachiti kawili pa Kana wa Galilaya, pala akakiti machi mvinyo. Na pakayili mundu wa mutwa, mwana mundu akayili mu kuhiluka pa Kapernaum. 47Uyu, pakayufwini kukita Yesu achiti pa Galilaya kuhumila Yudaya, akabiti kwake, nakampembisi aselele, ni kundamisa mwana mundu; ndawa alondaga kufwa. 48Mumu Yesu akajowiti kwa yombe, Wona mulemiti kuwona fiwalalilo ni finyantiti, ngamukeliti lepa. 49Mundu wa mutwa anjowela, Bambo, uselelaye akona kufwa mwanangu. 50Yesu anjowela, Ubitaye, mwanawo alama. Mundu yula akakeliti lilowe lila akatawili Yesu kwa yombe, ni akabiti mwanja wake. 51Leka pala akayili mu kuselela, wawanda mundu wakawonangini nuyombe, kujowa, Mwanawo alamiti. 52Mumu akawakotiti wombe lukumbi lula akatumbwili kuyimukila. Mumu wakajowiti kwa yombe, Golo saa saba kupyupa kukakotwiki. 53Wiwila dadi yula akawalalili saa yiyilayila pala Yesu akajowiti kwa yombe, Mwanao alama: na akakeliti mwene, na wa pa nyumba yake woha. 54Kawili iki ni kiwalalilo kya kawili kila akakiti Yesu, apa akachiti mu Galilaya kuhumila pa Yudaya.
Одоогоор Сонгогдсон:
Yohana 4: MGS1937
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
First published by the British and Foreign Bible Society in 1937.