लुका 21
21
लाङ्लेप्माङाना भेटि
(मारकुस १२:४१-४४)
1येसु माङ्ठानाङि वासेट्टाना बेला भेटि याङ्ढाङ्ङि वागाठागाचिङा भेटि ओठेन्डुएट्टुना निसुए॥ 2हिट्नुङ् ठिबाङ् पाक्चा वाइना लाङ्लेप्माङा चा ताँबोङाना इप्पोक् राङ् ठेन्डुना निसुए॥ 3ना निसुङ् येसुङा माट्टुए, “छेम्बा डोक् आङा खानि लोनाँनि, ना पाक्चा वाइना लाङ्मेप्माङा आरु सोब्बे नुङ्ना जोम् भेटि ठेन्डुए॥ 4पोङ्भोने आरु नागा वागाठागाङा उन्चिगा जोम् माक्फेन्सुबेन्लाम्मा ओठेन्डुए, टरो ना पाक्चा वाइना लाङ्मेप्माङाउम्टे ओकामाइङाना सोब्बे डोक् आप्टुएसोए॥”
येसुङा माङ्ठाना जाखाम् लिना बारेङि माट्टुटु
(मात्ति २४:१-१४; मारकुस १३:१-१३)
5ठिक् खेप् आम्टेप्मा ओचेलाचिङा माङ्ठाना ओचेट्नुगा ओचेट्नुगा लुङ्गेॽवाङा ओचोगुना हिट्नुङ् याप्मिचिङा माङ्हाङ् लोङ्सा ओठाङ्सुगा थोक्लाम्मा चोग्बालाक् माङ्ठाना आड्डिक् खान्डुएसुए पिक्सा उमुन्डुप्टेटागा डागा॥ येसुङा हिट्नागा लोडुचे, 6“हाट्ले नाड्डेना बेला चा टायुक्, खानिङा नेहि आनिसुम्गा ठिक् लिङ्गेॽवाधारि लिनिना, नागा ख्वाप्पा ओहोडुटु॥”
7हिट्नागाँ येसु उसिलाप्टुए, “आन्याँ काहिसिक्बा, नागा सोब्बे खोना बेला लियुक्ना? हिट्नुङ् नागा रिङ् लिसा लाबे नुङ् खोड्डे पाराना चिन्ना लियुक्ना?”
8येसुङा लोडुचे, “खानि नुभेक् टाप् चोगानुम्, खानि खोनाँ चा माबान्डिन्चा, पोङ्भोने जोम् याप्मिचि आनिङ्ङि ‘खिरिस्ट आङा डोक्’ हिट्नुङ् ‘हाट्ले आन्तेङाना बेला नेहेट्टाङ् टाइसे’ पिक्सा ओटायुक्॥ टरो हिट्नागा बिस्वास चोक्नेनुम्चिम्॥ 9जब खानिङा खेमाबुङ्मा रिङ् हिट्नुङ् याप्मिचि चेप्गाजालाक् ओचोग्गा आखेम्सुम्टुम्, खानि किट्नेनिन्॥ नाउम् पाइला लिमा डोक् कोन्युक्, टरो हिट्ना बेला डोक् नाराङाना आन्तेम्बाक् लिनिना॥”
10हिट्नुङ् येसुङा फेरि हिट्नागा लोडुचे, “ठिक् छोङ्बा बिरुद्दाङि आरको छोङ्बाङि खेमाबुङ्मा लियुक्, हिट्नुङ् ठिक् मुलुक् बिरुद्दाङि आरको मुलुक् कोब्युक्॥ 11माङ् ठे-ठेगा लुट्लेमा काॽट्युक्, सोब्बेलेङ् चामा-ठुङ्मागा लाट्युक् हिट्नुङ् धुरि ठ्वाङ् लियुक्, हिट्नुङ् टाङ्साङ्ङि माङ्किप्माडुङ् लोक् डोङ् ठोङ्डिलोक् चिन्नाचि ओठेट्युक्॥
12“नागा सोब्बे लिमा नुङ्ना पाइला याप्मिचिङा खानि आचेला आलिसिनाँ मालाबिटि, याङ्छामा माचाट्टिटि, याहुदिचिगा छुम्मापाङ्ङि माखाट्टिउङ् फाट्टुर मालाबिटि हिट्नुङ् खाम्बाङ्ङि माठेन्डिटि हिट्नुङ् हाङ्बाचि लोक् सासाक्चि सोरि माखाट्टिटि॥ 13हिट्ना बेला खानिलोङ्सा आङाना बारेङि माप्माना ओचेट्नुना बेला लियुक्॥ 14हिट्डेउङ् खानिङा पाक् रिङ् माप्माना नुङ् खानि निङ्ग्वा ओेभेन्निचा, 15पोङ्भोने आङा खानिलोङ्सा पाक् रिङ् माप्माना हिट्ना रिङ् हिट्नुङ् ठोना पिनाँनि, हिड्डेउङ् खानिगा खोना चा साट्टुरचिङा खानि मेप्मा माहिडिन्गा हिट्नुङ् खानि रिङ् खोक्मा डोक् उहिडुन्ना॥#लुका १२:११-१२ 16खानिगा आप्पे पाबा-मामाङा, भुम्भु-झान्झाचिङा, नातेदारचिङा हिट्नुङ् टाक्चिङा साट्टुरचि मुक्ङि मापिडिटि, खानि माड्डे आम्टेप्मा हिट्नागाँ मासेडिटि॥ 17आङि बिस्वास आचोगुम्नाँ सोब्बे याप्मिचिङा खानि चिम्मा माफुट्टिटि॥ 18टरो खानि टेहेक्ङिना ठिक् फ्याक् ओतेन्राधारि पाक्चा लिनिना॥ 19माङ्हाङ्ङि बिस्वासिलो लिसानि हिट्नुङ् खानिङा खोना बेला चा लाट्निना चोला आटुबुम्टुम्॥”
यरुसलेम लुग्ना खाबोर
(मात्ति २४:१५-२१; मारकुस १३:१४-१९)
20येसुङा फेरि लोडुचे, “जब खानिङा यरुसलेम खालाङ्गा साट्टुरचिगा टिलिङ्गाचिङा सोब्बेलाम्मा पुप् उपुप्टुना आनिसुम्टुम् टब खानिङा ठाहा आटोगुम्टुम् हिट्ना खालाङ्गा एलालोक् जाखाम् ओचोगुटु॥ 21हिट्ना बेला याहुदिया छेट्राङि उलिसागा याप्मिचि झोन्झोबालेङ् पिन्युओखाट्याक्, यरुसलेम खालाङ्गाङिगा याप्मिचि खालाङ्गा नाडानुमुङ् भारा होन्डानि, हिट्नुङ् भारा युक्ताम्ङि उयुङागा याप्मिचि खालाङ्गाङि लिक्नेनिन्॥ 22पोङ्भोने हिट्ना बेला माङ्हाङ्ङा यरुसलेमङिगा याप्मिचि साजाए पिडुचिचि हिट्नुङ् धारमाछाप्लाङि छेप्टाना रिङ् छेम्बा डोक् ख्वाप्पा युयुक्॥ 23हिट्ना बेला माभोक् उखुयुगा मेन्झेमाचि हिट्नुङ् ओओ ओकाप्टुचिगा मामाचि लोङ्सा आड्डिक् टुक्ना याङ्छामा लियुक्॥ ना स्वाँराङिगा याप्मिचिङा आड्डिक् टुक्ना याङ्छामा ओटोगुटु हिट्नुङ् माङ्हाङ्ङाना उकुन्जिरिक्वा नागा याप्मिचि उठुङ्ङि ठायुक्॥ 24साट्टुरचिङा आम्टेप्मा याप्मिचि चेप्साङा ओचेप्टु ओसेडुचिचि हिट्नुङ् आरु लोङ्साम्बाक् याप्मा देसङि ओछाक्टुचिउङ् ओखाट्टुचिचि॥ पानिछोङ्बाचिगा बेला मिलाट्ङे सोम्मा हिट्नागाँ यरुसलेम खालाङ्गा चियोप्-यायोप् ओयेप्टुटु॥
याप्मि छा ठेट्ना बेलाङाना बारे
(मात्ति २४:२९-३१; मारकुस १३:२४-२७)
25“हिट्नुङ् नाम्, लालिप्माङ् हिट्नुङ् चोक्चिङ्गेट्चिङि ठे-ठेगा डोङ् ठोङ्डिगा चिन्नाचि ओठेट्युक्॥ हिट्नुङ् सामुन्दराङाना नाम्डाराङ् हिट्नुङ् उपुच्चुवाङा चोगुनाँ नाराङिगा याप्मिचि उकिट्युङ् ओठोङ्युक्॥#यासैया १३:१०; इजिकिएल ३२:७; योएल २:३१; पारकास ६:१२-१३ 26नाराङि लियुगेट्ना याङ्छामा याप्मिचिङा उमिट्टुङ् उन्चि किप्माङा फाङ् उलियुक्, पोङ्भोने माङ्हाङ्ङा टाङ्साङ्ङिगा सोब्बे साक्तिचि वान्डुचिचि॥ 27हिट्नुङ्ना याप्मि छा खिमेमाङि साक्ति हिट्नुङ् माङ्ठेना माहिमाङि उङ्युगेट्ना याप्मिचिङा उनिसुटु॥#दानिएल ७:१३; पारकास १:७ 28जब नागा रिङ्चि लिमा ठालाँ लियुक् टब खानि निङ्ग्वा बोल्लेउ चोगानुम् हिट्नुङ् मिकिट्ने येबानि, पोङ्भोने माङ्हाङ्ङा एला डोक् खानि ना याङ्छामालाम्मा माहिङ्मेट्टिटि॥”
वामाखोक्पोङाना हिसिक्मा
(मात्ति २४:३२-३५; मारकुस १३:२८-३१)
29हिट्नुङ् हिट्नागा येसुङा ठिक् मुन्डुम् लोडुचे, “हाट्ले वामाखोक्पोङाना उभुङ्मा हिट्नुङ् आरु उभुङ्माचि पुयानुम्, 30खानिङा सिङ् उभुङ्माचिगा ओचोङ् काडाना आनिसुम्टुम् हिट्नुङ् खानिङा बारखा लाहाब् लिसे नुङ् ठाहा आटोगुम्टुम्॥ 31हिट्डेडोक् खानिङा नागा सोब्बे रिङ् उलिसागा आनिसुम्नाँ माङ्हाङ् उमुलुक् नेहेट्टाङ् टाइसे नुङ् खानिङा ठाहा टोगानुम्॥ 32छेम्बा डोक्, आङा खानि लोनाँनि, नागा सोब्बे रिङ्चि मियुङे सोम्मा ना टालाङिगा सोब्बे याप्मिचि उसिनिगा॥ 33टोनालोग् हिट्नुङ् नारा मेग्युक्, टरो आङा लोनानिगा रिङ् मेग्निना॥
ओछेक्छेक् चोक्माउङ् युङ्माना बारे
34“ओछेक्छेक् चोगानि, जोम् मोजमोज्जाङि, चामा-ठुङ्माङि हिट्नुङ् ना चोला लोङ्सा खानि निङ्ग्वा टिनेनुम्॥ हिट्डे आचोगिए भोने खानि निङ्ग्वा डोम्डोम्ना लियुक् हिट्नुङ् जिवाट्चि वारिक्ङि ओठाया गाड्डे डोक् हिट्ना लेम्बा खानिङा आमिट्निम्गेट्निम्ना बेला खानिङाना आन्तेङाना लेम्बा टायुक्॥ 35हिट्नुङ् ना नाराङिगा सोब्बे याप्मिचि उठुङ्ङि हिड्डेना बेला टायुक्॥ 36ओछेक्छेक् चोगानि, हिट्नुङ् नागा किप्माडुङ् रिङ्चिलाम्मा हिङ्मा हिट्नुङ् याप्मि छा सोरि येप्मा हिमाना बोल् याप्मिपिडा नुङ् जाइले टाइले बिन्टि चोगानि॥”
37हिट्नुङ् येसुङा सोरोक् लेम्बा माङ्ठानाङि याप्मिचि हिसिक्टुचिगा डागा, टरो युसाउम्बाक् जैतुन झोन्झोबाङि बास हेन्ङा खाडाना डाना॥#लुका १९:४७ 38हिट्नुङ् ख्वाप्पा याप्मिचि उरिङ् खेम्सिङा एका भ्यानिक् डोक् माङ्ठानाङि ओटायागा डागा॥
Одоогоор Сонгогдсон:
लुका 21: APH
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2023, Wycliffe Bible Translators, Inc. and Nepal Bible Society
