युहान्ना 2
2
काना खालाङ्गाङि लिसाना भ्या
1छिङ्डेन् लेम्बा गालिलङाना काना खालाङ्गाङि ठिक् भ्या डाना॥ येसुङा उमा हिट्नि वासेट्टाना॥ 2येसु लोक् ओचेलाचि चा हिट्ना भ्याङि ओछेम्डुएसुचिगा डागा॥
3आङ्गुरङाना इङा लाट्टाउङ् येसुङाना उमाङा उन् लोडुए, “हिट्नागालोक् आङ्गुरङाना इङा लाट्टेना रैछो॥”
4ना रिङ् खेम्सुङ् येसुङा लोडुए, “आमो, आङा पाक् चोक्मा कोन्युक्ना आङा याङ्लोनेन्॥ आङाना टोॽवा चोक्माना बेला आझै लिनिगेट्निना॥”
5हिट्नुङ्ना येसु उमाङा चाकारचि लोडुचे, “उन्ङा मालोडि गाड्डे खानिङा चोगानुम्॥”
6हिट्नि याहुदिचिङा चोख्याँ लिमा चालाँ चोक्मा लोङ्सा लिङ्गेॽवाङा ओचोगुना सि गोटा घ्याम्पाचि उयुङ्सेसुचिगा॥ हिट्नागा घ्याम्पाचि सोब्बेङि साए-साए लिटार चुवा ओवाङ्डुगा डागा॥ 7येसुङा चाकारचि लोडुचे, “घ्याम्पाचि चुवाङा इप्टानुम्चिम्॥” हिट्नुङ् हिट्नागाँ घ्याम्पाचिगा यासिटेप् चुवाङा उइप्टुए॥
8हिट्नुङ् येसुङा हिट्नागा लोडुचे, “खाट्टिप्मा वागानुमुङ् भातेरङिना पागारिङि खाट्टानुम्॥” हिट्नागाँ हिट्डेडोक् ओचोगुए॥ 9भातेरङिना पागारिङा हिट्ना चुवा ठोट्टुनाँ हिट्ना आङ्गुर युमालिङ् लिमाहिडैसाना॥ हिट्ना युमालिङ् खोड्डेउङ् चोक्बालाक् हिट्ना रिङ् उन्ङा ठाहा टोगुवाट्टुन्, टरो चुवा उइप्टुगा चाकारचिङा भोने ठाहा ओटोगुएसुना॥ हिट्नुङ् भातेरङिना पागारिङा बेहुला छेम्डुए, 10हिट्नुङ् लोडुए, “सोब्बे याप्मिङा पाइले टुम्साना युमालिङ् ठुङ्मा उपिडुचिगा हिट्नुङ् याप्मिचिङा जोम् ठुङ्मा उहिडुङ् एडोक् निम्निना युमालिङ् उपिडुचिगा, टरो खान्ङाउम्टे हाट्ले सोम्मा चा सोब्बे नुङ्ना टुम्साना युमालिङ् आयुङ्सुएसुएना रैछो॥”
11येसुङा चोगुगा चिन्नाचि माड्डे ना पाइलेना चिन्ना उन्ङा गालिलङाना कानाङि चोगुए॥ नाड्डेउङ् येसुङा उन्ङाना माहिमा पारकाट् चोगुए, हिट्नुङ् ओचेलाचिङा उन्ङि बिस्वास ओचोगुए॥
12हिट्नुङ्ना उन् आप्पे उमा, उन्झाचि हिट्नुङ् ओचेलाचिलोक् यो काफारनाहुमङि खाडे, हिट्नुङ् आम्टेप्मा लेम्बा हिट्नि डोक् युङे॥#मात्ति ४:१३
येसुङा माङ्ठाना चोख्याँ चोगुना
(मात्ति २१:१२-१३; मारकुस ११:१५-१७; लुका १९:४५-४६)
13याहुदिचिगा छुट्कारा चाडा नेट्टाङ् टाइसाना डाना, हिट्नुङ् येसु यरुसलेम खाडे॥#पारस्थान १२:१-२७ 14उन्ङा याप्मिचिङा माङ्ठानाङिना टेल्लाङ्ङि पिट्चि, ठुँबा लोक् ढुकुर ओछोङ्सुएट्टुगा हिट्नुङ् आरुङाम्बाक् ओफाबा ओलेक्टुएट्टुगा निसुचे॥ 15हिट्नुङ् उन्ङा रिप्माङाना ठिक् कोररा चोगुङ् हिट्नि उलिसागा सोब्बे याप्मिचि उन्चि ठुँबाचि हिट्नुङ् पिट्चिलोक् माङ्ठानालाम्मा भारा रिक्टुचे, हिट्नुङ् ओफाबा कालेक्बाचिगा ओफाबा चेम्बेलेङ् चोगुबिडुचे हिट्नुङ् हिट्नागाँगा टेबुल लेङ्सुबिडुचे॥ 16येसुङा ढुकुर काछोङ्बाचि लोडुचे, “नाहिलाम्मा नागा सोब्बे थोक् खाट्टानुम्॥ आङाना माङ्हाङ् पाबाङाना ओपाङ् खानिङा बेपार चोक्माना ठोङ् चोक्नेनुम्॥”
17ओचेलाचिङा धारमाछाप्लाङि छेप्बालाक् ना रिङ् उमिट्टुए, “कापाङ् लोङ्सा आङाना जोस् मि गाड्डे डोक् आनिङ्ग्वाङि हाट्युक्॥”#छाम्लोमा छाप्ला ६९:९
18टरो याहुदिचिङा ओलोडुए, “खान्ङा नागा सोब्बे टोॽवाचि चोक्माना आधिकार युङ्ग्वा नुङ् आन्याँ खोना चिन्ना याप्मि आनिमेट्युक्ना टे?”
19येसुङा हिट्नागा लोडुचे, “ना माङ्ठाना होडानुम्, हिट्नुङ् आङा ना फेरि सुम्बोक् लेम्बाङि डोक् फोगुङ्टुङ्॥”#मात्ति २६:६१; २७:४०; मारकुस १४:५८; १५:२९
20याहुदिचिङा ओलोडुए, “ना माङ्ठाना चोक्मा छायालिस बारखा लाहाब् लिसे, हिट्नुङ् पाक् खान्ङा सुम्बोक् लेम्बाङि डोक् ना माङ्ठाना चोक्मा आहिडुटुनि टे?”
21टरो येसुङा माट्टुना माङ्ठानाम्बाक् आप्पे उन्ङाना ओयेम् बारेङि माट्टुना डाना॥ 22येसु सियानालाम्मा उहिङ्ग्वाट् लिसे, टब उन्ङा लोडुचिगा ना रिङ् ओचेलाचिङा उमिट्टुए, हिट्नुङ् हिट्नागाँ धारमाछाप्लाङि हिट्नुङ् येसुङा माट्टुना रिङ्ङि बिस्वास ओचोगुए॥
23छुट्कारा चाडाङाना बेला उन् यरुसलेमङि लिसानाँ उन्ङा डोङ् ठोङ्डिगा टोॽवाचि चोगुए, हिट्नुङ् ना उनिसुङ् जोम् याप्मिचिङा उन्ङि बिस्वास ओचोगुए॥ 24टरो येसुङा हिट्नागा बिस्वास चोग्वाट्टुन्चिन्, पोङ्भोने उन्ङा सोब्बे याप्मिचि ओचेट्नुलोक् मिसेन् निसुचिगा डागा॥ 25उन् याप्मिङाना बारेङि साङा चा हिसिक्मा कोन्नेट्निना डाना, पोङ्भोने याप्मिङाना निङ्ग्वाङि पाक् युङ्ग्वाना हिट्ना उन्ङा ठाहा टोगुएसुना॥
Одоогоор Сонгогдсон:
युहान्ना 2: APH
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2023, Wycliffe Bible Translators, Inc. and Nepal Bible Society