Jɔn 5
5
Yezu yɔɔre jaweeno siu dɛ ne
1Dɛ dedwe Yezu ma zaŋe o vo Jerusalem se o tɔge o di Juu tiina kuri dedwoŋi. 2Chɔgɔ kodwoŋi mo wora, ko na bwola de teo kom ni delo yere na ye ‘Pei Ni dem’ to.#Nehemia 3:1 Ko yere de Juu tiina taane dem mo ye Bɛtezada. Ba déem tei pwei senu mo chɔgɔ kom ni ne. 3Jaweena dedɛ déem yeini ba tigi pwei sem kuri ne. Badaara ye lilwoa, de gwane, de gwaaro. [Ba tigi da ba cheiga se Wɛ maleka mo ba o pɔgele na bam. 4Na bam ná pɔgele konto dwoŋi, jaweeno wolo na wó lwoori yiga o tu na bam wone to wó na yazura de jaweo kolo maama na jege‑o to.]
5Nɔɔno wodwoŋi mo wora o na ye jaweeno nenɛɛne bena fintɔ-nana (38). 6Yezu ma na o na tigi da to, ye o maane we o weele ko dáane. O ma ta de nɔɔno wom o we, “Nmo lage se n na yazura na?” 7Jaweeno wom ma leiri‑o o we, “Amo tu, chɔgɔ kom na bam ná yeini ba pɔgele konto dwoŋi, amo ba jege nɔɔno wolo na wó kwei-ne o ja tu na bam wone to. Amo ná yeini a kwaane se a tu, nɔɔno mo wó tu lela o daare amo.” 8Yezu ma ta ded‑o o we, “Zaŋe wɛɛne se n kwei n sara kam n ta‑n via.” 9O na tage konto to, nɔɔno wom ma seene o na yazura bedwe baŋa ne, ye o kwei o sara kam o maa via.
Ko déem ye Juu tiina siu dɛ ne mo konto kea. 10Konto ŋwaane Juu tiina dedɛɛra bam ma ta de nɔɔno wom ba we, “Zem ye debam siu dɛ mo, ye ko chula se nɔɔno taa toŋe totoŋa. Konto ŋwaane, yé ta‑n zei n sara kam.” 11O ma leiri-ba o we, “Nɔɔno wolo na pɛ amo na yazura to mo tage we, a kwei a sara kam a taa via.” 12Ba ma bwei‑o ba we, “Nɔɔno wom konto ye wɔ mo, ye o ta konto?” 13O maa yeiri wolo na pɛ o na yazura yam to, kolo ŋwaane Yezu zo nɔn-kɔgɔ kom wo pa o daa wo nɛ‑o.
14Ko na ke fee to, Yezu ma vo Wɛ diga kam o na‑o da. O ma ta ded‑o o we, “Nii mo! Nmo laam nɛ yazura. Nam daa‑n yé ke wɛleere. Ko ná dae konto, wo-lɔŋɔ kolo na dwoi konto to daa wó ke nmo.” 15Nɔɔno wom laam ma vo o ta de Juu tiina dedɛɛra bam o we, ko ye Yezu ya mo yɔɔre omo.
Yezu jege dam
16Juu tiina dedɛɛra bam déem maa wora ba daane Yezu, o na yɔɔre jaweeno ba siu dɛ dem ne to ŋwaane. 17Yezu ma ta-ba o we, “Amo Kwo Wɛ yeini o ke kolo o boboŋa na lage to mo maŋa maama, ko woli de zem de. Amo de nam jege se a ke konto mo.”
18O na tage konto to, ko ma pa Juu tiina dedɛɛra bam tiini ba boŋe o gom. Ko nam dae we o na chɔge ba siu dɛ chullu tem yerane to ŋwaane, se ko ye o na tage we, Wɛ ye omo tete Kwo mo to. O keim dem konto ma pa se o de Wɛ ye bedwe mo.
19Yezu ma ta-ba o we, “A tɛ abam chega ŋwaane to, amo na ye Wɛ Bu wom to, a bá wane a ke kolokolo a tete ne, se kolo yerane a na nae a Kwo tei ne to mo a yeini a ke. A Kwo na ke kolo to mo amo de wó ke. 20Kokuri Baŋa Wɛ swoi o Bu wom, ye o maa bere‑o kolo maama o tete na ke to. O nam wó bere‑o wo-kamunnu telo na dwoi tento to se o ke, pa se ko ke abam yaau. 21Baŋa Wɛ na bi nɔɔna toone wone ye o pa-ba ŋwea tei to, konto dwoŋi o Bu wom de wó pa balo o na lage to na ŋwea o Kwo Wɛ tei ne.#Ezekeli 37:10 22Ko woli da, Baŋa Wɛ tete bá di nɔɔn-nɔɔno bora. O nam seene o pa o Bu wom chwoŋa se o taa di nɔɔna bora. 23Konto wó pa se nɔɔna maama zuli Wɛ Bu wom, ne ba na zuli o Kwo tete tei to. Wolo maama na ba zuli Wɛ Bu wom to ta ba zuli o Kwo na toŋe‑o to de.”
24Yezu ta ma ta o we, “A tɛ abam chega ŋwaane to, wolo maama na nigi amo taane ye o daare o ke o wo-dedoa de wolo na toŋe-ne to jege ŋwea kalo na ba jege kweelim to. O daa bá to bora borem dɛ dem ne. O maŋe o jege ŋwea mo Wɛ tei ne, ye toone daa bá wane de ja‑o Wɛ yiga ne. 25Chega ŋwaane to, maŋa maa beena leile konto, ye balo na ba jege ŋwea Wɛ tei ne to wó ni amo kwora. Balo na sɛ-ka to wó daare ba na Wɛ ŋwe-doŋa kam. 26Baŋa Wɛ tete na ye ŋwea tu to, o ma pa se amo wolo na ye o Bu wom to de ji ŋwea tu. 27O ma kwori o pa-ne chwoŋa se a taa bore nabiina bora, amo na ye Nabiin-bu wom to ŋwaane. 28Yé pa se ko ke abam yaau de amo na tage kolo to. Maŋa maa beena, ye twa balo maama na wo ba yibeela wone to wó ni amo kwora, 29ye ba zaŋe ba nwoŋi ba yibeela yam wone. Balo maama na ke lanyerane to wó bi ba taa ŋwe Wɛ tei ne. Ko daare balo maama na ke wo-lwanno to wó bi, ye ba laam na chɔgem Wɛ tei ne.#Danyeli 12:2 30Amo bá wane a ke kolokolo amo tete ne. Amo tɔge a Kwo ni mo a maa bore nɔɔna bora. Konto ŋwaane a borem dem yɔɔre de ye chega mo, kolo ŋwaane amo ba kwaane se a ke tei amo tete boboŋa na lage to. Baŋa Wɛ nam toŋe-ne, ye a ke kolo o na lage to mo.”
31Yezu ta ma ta de Juu tiina dedɛɛra bam o we, “Amo tete yerane ya ná bere a chega kam, ko bá bere we a taane dem seene de ye chega. 32Nɔɔno wodwoŋi nam zege amo chega kam kwaga ne, ye a yei we wonto jege chega de o na tɛ amo taane tei to. 33Abam ya toŋe nɔɔna Jɔn tei ne. O ma ta chega o bere-ba amo ŋwaane. 34Ko ná ye amo, a ya ba lage se nabiinu zaŋe o bere we a jege chega. Amo nam tage Jɔn taane abam ŋwaane mo, se ko wane ko woli abam se á na verem. 35Jɔn déem nye de kanea na jege mini ye ka pae pwooni tei to. Abam ma sɛ se á ta‑á tɔge o berem dem de wopwolo, ne nɔɔna na swoi mini pwooni tei to, ye á daa wo peene se á da-o.
36Amo nam jege woŋo kolo na wó bere we a jege chega to ye ko dwoi Jɔn na tage tei to. Totoŋa yam amo Kwo Wɛ na pɛ-ne se a toŋe a ti to, ko ye yanto mo a jege a ke, ye yanto mo pa-ne chega we, Wɛ mo seene o toŋe-ne. 37Ko woli da, amo Kwo Wɛ tete de zege amo chega kam kwaga ne mo. Abam nam wo fɔge á ni o kwora, naa á nɛ o yibia na nye tei to. 38Abam wo jwoŋi o taane dem á ke á bochara ne, kolo ŋwaane á wo sɛ wolo wom o na toŋe to. 39Abam yeini á kwaane á zamese Wɛ twanno tem, kolo ŋwaane á boŋe we á wó na ŋwea Wɛ tei ne tento ŋwaane mo. Ko nam ye amo yera taane mo twanno tem konto tete na tɛa. 40Abam nam ta ba sɛ se á ba amo tei, se ko pa á na ŋwea Wɛ tei ne.
41Amo nam ba boŋe se nabiina pa amo zula. 42Ko ná ye abam, amo yei á wo. A yei we Wɛ swono tera á bochara ne. 43Amo nam jaane a Kwo yere mo a ba, ye abam nam ve se á jeeri-ne. Nɔɔno wolo nam ná jaane o tete yere o ba, á wó jeeri konto tu. 44Abam nam lage se á ta‑á jwoŋi zula mo da-tei ne, ye á ba lage se á ke kolo na wó pa á na zula Wɛ wolo na ba jege dwoŋi to tei ne. Konto mo á ve se á sɛ Wɛ.
45Ko dae we amo mo wó saŋe abam a Kwo Wɛ tei ne. Ko ye Moses mo lage o saŋe abam, ye abam ya boŋe we á wó na ŋwea Wɛ tei ne wonto ŋwaane mo. 46Abam ya ná seene á sɛ Moses na tage tei to, á ya wó sɛ amo de, kolo ŋwaane wonto popone amo yera taane mo. 47Abam nam maŋe á wo sɛ o na popone tei to. Konto to, abam bere á bá sɛ amo na tage kolo to.”
Одоогоор Сонгогдсон:
Jɔn 5: KBG
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2020, Ghana Institute of Linguistics, Literacy and Bible Translation (GILLBT)