Jɔn 1
1
Wɛ Bu Yezu Krista taane
1Boboa ne ye kolokolo daa ta tera to, de Botara kam maŋe ka wora mo.#Pulim 1:1; 1 Jɔn 1:1 Ka maŋe ka wo Wɛ tei ne. Wolo na ye Botara kam to de Wɛ maama ye bedwe mo. 2O maŋe o wo Wɛ tei ne mo boboa kam ne. 3Baŋa Wɛ déem dɛ wonto ŋwaane mo o ke wonnu maama. Kolokolo nam tera Wɛ na kea, ye ko wo zege wonto yera ne. 4Wonto mo pɛ nabiina na ŋwea. Ŋwea kam konto nam ta mo pae nabiina na pwooni. 5Pwooni dem konto na tu to, de zeili lim. Lim daa ware pwooni dem konto de zeili.
6Nɔɔno wodwoŋi déem mo wora Wɛ na toŋe‑o, o yere mo Jɔn.#1:6 Jɔn = Jɔn wolo na pɛ nɔɔna sɛɛm to. Matiyu 3:1; Maake 1:4; Luka 3:1-2 7O déem tu se o ta wolo na ye pwooni dem to taane mo o bere nɔɔna, se nabiina maama wane ba lɔre‑o se ba daare ba sɛ‑o. 8Jɔn tete dae pwooni dem. O nam tu se o ta wonto taane mo o bere nɔɔna.#Jɔn 3:28
9Jɔn na wora konto to, wolo wom na ye pwooni dem chekke to déem lage o nwoŋi Wɛ tei mo o ba logo baŋa. Wonto mo pae nabiina maama na pwooni se ba yia wane ba poore. 10O déem ma ba logo baŋa o wora. Wɛ ya dɛ o ŋwaane mo o ke logo baŋa. De konto de, nabiina daa ta wo lɔre‑o. 11O ma ba o tete teo, ye o dwi tiina wo jeeri‑o lanyerane. 12Ko daare balo maama na sɛ‑o to, o ma pa-ba chwoŋa se ba ji Wɛ bia. Banto ye balo na dɛ o yere ŋwaane ba ke ba wo-dedoa ded‑o to mo. 13Ba na jigi Wɛ bia konto to, ko dae nabiina mo loge-ba, ye ko dae ka-laga ŋwaane, naa nabiina boboŋa ŋwaane. Ko ye Wɛ tete boboŋa ŋwaane mo ba jigi Wɛ bia.
14Konto to, Botara kam déem jigi nabiinu. O ma ba o zoore debam nabiina wone. Dé ma na o dam na mae tei. O dam dem daga lanyerane, o na ye dé Kwo Wɛ Bu-doa kam to ŋwaane. Wɛ zaane de chega maama tiini te wo o tei ne.
15Jɔn déem ŋɔɔne wonto taane, ye o ta de kwor-dɛa o we, “Mo wolo wom amo na maŋe a ta o taane a we, Nɔɔno wodwoŋi wó saŋe amo kwaga o ba. Wonto ye kamunu o dwoi amo, kolo ŋwaane o maŋe o wora ye amo ta tera.”
16Wɛ Bu wom tiini o jege Wɛ zaane lanyerane, ye o daare o pae debam maama zeinim taa taa. 17Ko ná ye Wɛ nia yam, o déem pɛ ya tɔge Moses jeŋa mo ya ba debam tei. Ko nam ná ye Wɛ zaane de o chega kam, o pɛ te tɔge o Bu Yezu Krista jeŋa mo te ba. 18Nɔɔn-nɔɔno ta wo maŋe o na Baŋa Wɛ. Ko daare o Bu-doa kam mo pɛ se dé lɔre‑o. Wonto ye Wɛ. O maa wo dé Kwo Baŋa Wɛ takeiri ne.
Jɔn ŋɔɔne Yezu yera taane
Matiyu 3:1-12; Maake 1:1-8; Luka 3:1-17
19Jɔn déem na pɛ se nɔɔna lɔre Yezu tei to mo tento. Juu tiina balo na zoore Jerusalem ne to ma toŋe ba kaanem yiga tiina, de Levi dwi tiina se ba vo Jɔn tei. Ba ma vo ba bwei‑o ba we, “Nmo bere we n ye wɔ mo?” 20Jɔn ma yɔɔre o leiri-ba o we, “Ko dae amo mo ye Wɛ Dam Tu Krista wom.”
21Ba ta ma jwoori ba bwei‑o ba we, “Nmo nam bere n tete we n ye wɔ mo? Nmo ye Elija mo na?” O ma leiri-ba o we, omo dae.
Ba daa ma bwei‑o ba we, “Nmo ye Wɛ sampwora kalo ya na maŋe se o ba to mo na?”#Nia Gulim 18:15, 18 O maa we, “Aawo.”
22Ba laam ma ta ba we, “Nam ta n bere debam nmo na ye wolo to. Dé jege se dé ja nmo ni taane mo dé vo dé ta dé bere balo na toŋe debam to. Nmo lage n ta n tete taane we bɛ mo?”
23Ba na bwei‑o konto to, Jɔn ma da Wɛ sampwora Izaya taane dem ŋwaane o leiri-ba o we, “Amo ye wolo na kaase a kwora kagoa yuu ne we:
‘Pa-na se chwoŋa kalo dé Teiru wom na lage o ba o tɔge da to
fɔge ka yɔɔre lanyerane.’ ”#Izaya 40:3
24Nɔɔna badwonna de tɔge ba wora, ba na nwoŋi Farisi tiina kɔgɔ kom wone. 25Ba ma bwei Jɔn ba we, “Nmo nam ná seene n dae Wɛ Dam Tu Krista wom, naa Elija, naa Wɛ sampwora kalo ya na maŋe se o ba to, wɔ mo pɛ nmo chwoŋa se n pa nɔɔna sɛɛm?”
26Jɔn ma leiri-ba o we, “Ko ná ye amo, a yeini a ma na mo a pa nɔɔna sɛɛm. Abam nam na zege to, nɔɔno wo á wone ye á yeiri‑o. 27Wonto lage o saŋe amo kwaga o ba, ye amo wo maŋe se a le o nɛ natera a pa‑o.”
28Konto maama déem ke Bɛtania ne, Jɔdan buga kam bubɛ ne mɛ Jɔn na pae nɔɔna sɛɛm Wɛ ŋwaane to.
Jɔn bere we Yezu ye Wɛ Pipeila kam
29Tega na poore to, Jɔn ma na Yezu na vei o maa beene o tei. O ma ta de balo na wora to o we, “Nii-na Wɛ Pipeila kalo na saare nabiina wɛleera to.#Pulim 22:8; Izaya 53:7 30Amo ya tage a we, ‘Nɔɔno wó saŋe amo kwaga o ba, ye o ye kamunu o dwoi amo, kolo ŋwaane o maŋe o wora ye amo ta tera.’ Ko nam ye wonto taane mo a tɛa. 31Amo tete déem maŋe a yeiri‑o, ye a laam ba a lɔre‑o. Amo nam tu se a pa amo dwonna Isarele dwi tiina bam mo lɔre‑o. Konto ŋwaane mo a yeini a kwei na a pa nɔɔna sɛɛm Wɛ ŋwaane.”
32-33Jɔn daa ta ma ŋɔɔne Yezu yera taane o bere-ba o we, “Amo ya yeiri Wɛ Bu wom na ye wolo to. Wɛ nam mo toŋe-ne se a ba a ma na a pa nɔɔna sɛɛm. O na toŋe-ne to, o ma ta o we, amo ná nɛ Sin-laao kom tu ko wo nɔɔno wolo baŋa ne, wonto mo ye wolo na wó kwei Sin-laao kom o ma pa nɔɔna jwoŋi sɛɛm Wɛ ŋwaane to. Amo laam nɛ Wɛ Sin-laao kom na nwoŋi wɛyuu ne ko tu ko ba ko wo Yezu baŋa ne, ye ko nye de kunkwoŋa tei. 34Amo seene a na kolo Wɛ na tage to, ye a tɛ abam chekke we Yezu mo ye Wɛ Bu wom.”
Yezu bwoŋi nɔɔna se ba taa tɔge‑o
35Tega na poore to, Jɔn de o tɔgena balei daa ta maa wora. 36Jɔn ma na Yezu na vei o maa kɛa. O ma ta o we, “Nii-na Wɛ Pipeila kam.” 37Jɔn tɔgena balei bam ma ni o na tage kolo to. Ba ma pɛ ba pu Yezu kwaga. 38Yezu ma pipiri o nii o na ba na tɔge‑o to. O ma bwei-ba o we, “Á beene amo tei mo na?” Ba ma leiri ba we, “Ɛɛ, Rabi, n zoore yei ne mo?” (‘Rabi’ kuri mo ‘Berem tu’.) 39O ma leiri-ba o we, “Ba-na á nii.”
Ba ma tɔge ded‑o ba vo ba na mɛ o na zoore to. Ko ye dedaan-ni ne mo. Ba ma maŋe o tei ne ba ti dɛ dem.
40Nɔɔna banto dedoa yere mo Anduru. O ye Simon Piita nyaane mo. Anduru de o dwoŋi ya nigi Jɔn na tage Yezu taane tei, ye ba daare ba tɔge Yezu.#Matiyu 4:18-22 41Ba na jwoori to, Anduru ma ke lela o vo o zembaaro Simon tei. O ma ta ded‑o o we, “Debam nɛ Wɛ Dam Tu wom.” (Yere dem konto de ‘Krista’ ye bedwe mo.)
42O laam ma ja‑o o vo Yezu tei. Yezu ma nii o yibia ne ye o we, “Nmo ye Simon wolo na ye Jɔn bu to mo. Nmo yere laam wó taa ye Kefa mo.” Yere dem konto de Piita ye bedwe mo.#1:42 Yere dem kuri mo ye ‘Pelɔrɔ’.
43Tega déem na poore to, Yezu ma ja boboŋa se o vo Galili. O ma vo o na Filipi, ye o ta ded‑o o we, “Ba n ta‑n tɔge amo.”
44Filipi déem nwoŋi Bɛtasida mo, teo kolo Anduru de Piita na zoore da to. 45O laam ma zaŋe o vo o na nɔɔno wodwoŋi, o yere mo Natanayel. O ma ta ded‑o o we, “Debam nɛ wolo wom Moses na popone o taane faŋa faŋa Wɛ nia tɔnɔ kom ne ye Wɛ sampwori de déem popone ba ta o taane to. Wonto ye Yezu mo. O maa ye Josɛf bu. O nwoŋi Nazarete mo.”
46Natanayel ma ta ded‑o o we, “Wo-laao tera ko na wó nwoŋi Nazarete ne. A fɔ vwa na?” Filipi ma ta o we, “Nam ba se dé vo dé nii.”
47Ba na maa vei to, Yezu ma na Natanayel na maa beene o tei. O ma ta o taane o we, “Wonto seene o ye Juu tu mo chekke, ye o wo lana.” 48Natanayel ma bwei‑o o we, “Nmo ke tɛ mo n yei amo?” O ma leiri‑o o we, “A ya nɛ nmo maŋa kam nmo na wo kaporo kom kuri ne ye Filipi laam ba o bwoŋi‑m to mo.” 49Natanayel ma leiri‑o o we, “Berem tu, nmo ye Wɛ Bu mo, ye n ta ye Isarele dwi tiina Pɛ.”#Jeremia 23:5 50Yezu ma ta ded‑o o we, “Nmo na sɛ amo konto to, ko ye amo na tage a we, a nɛ nmo kaporo kom kuri ne to ŋwaane mo na? Nmo nam wó na wo-kenkagela yalo na tiini ya dana ya dwoi konto to.”
51O laam ma ta o we, “A tɛ abam chega ŋwaane to, abam wó na Nabiin-bu wom na zege wɛyuu de tega baŋa laŋa ne tei to. Abam ta wó na Wɛ telaao ni na pore, ye Wɛ malese tɔge da se diini wɛ, ye se kwori se tu se tui tega baŋa.”
Одоогоор Сонгогдсон:
Jɔn 1: KBG
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2020, Ghana Institute of Linguistics, Literacy and Bible Translation (GILLBT)