Yohan 4
4
Yeesus un ti samaritaaner fraa
1Ti fariseyer hon keheyert saan tas Yeesus mee tisiple am kriin waar un het mee layt ketaaft wii Yohan. 2(In te woerheet, waar net Yeesus weyer ketaaft hot un toch sayn tisiple.) 3Wii Yeesus tas se wise krit hot, is eyer fort kang fon Yutëya un is tsurik noo Kalilëya kang. 4Iwer weech, must eyer torich ti rechioon fon Samariia keen.
5Yeesus is an en xtat fon te Samariia aan khom, Sikar kenënt, woo ticht waar am lant woo Yaakop fer Yoosef kep hat.#Gn 33.19; Js 24.32 6Too waar Yaakops waser prune. Waar unkefeyer an mitach wii Yeesus, miit fon te rees, sich ticht an te prune kesets hot.
7En samaritaaner fraa is waser hoole khom, un Yeesus saat tëm:
— Pite, kep meyer en pisye waser.
8(Yeesus sayn tisiple waare in ti xtat ese khaafe kang.)
9Ti fraa hot keantwort:
— Teyer sayt en yut, un ich en samaritaaner. Tan, wii soo tuut teyer mich waser ferlange? (Tii hot tas kesaat wayl yute un samaritaaner sich net naner fertraan.)#Ed 4.1-5; Ne 4.1-2
10Too saat Yeesus:
— Wëns tuu wist was Hërkot kewe khan un weyer tas is woo tich waser am ferlange is, teest tuu ferlange, un eyer teet tich es waser fom leewe kewe.
11Sii antwort:
— Teyer het khee eemer fer waser raus se hoole, un te prune is tiif. Wii teet teyer tas waser fom leewe pringe? 12Unsere foerkhomer Yaakop hot uns tee prune kep. Tee, sayn khiner un sayn fii hon fon too waser ketrunk. Meecht teyer mee important sin wii Yaakop?
13Tan saat Yeesus:
— Weyer fon tëm waser trinkt wërt noch mool torxt kriin, 14awer te mënx woo fom waser woo ich kewe trinkt, wërt nii mee torxt hon. Wayl tas waser woo ich tëm kewe wërt in tëm en waser kwel woo tëm eewich leewe kept.
15Too hot ti fraa ferlangt:
— Pite, kep mich fon tëm waser! Soo wërt ich nii mee torxt kriin un prauch ich nime heyer khome fer waser hoole.
16Yeesus hot keortnet:
— Kee tayne man ruufe un khom tsurik!
17Ti fraa hot keantwort:
— Ich hon khee man!
Tan saat Yeesus:
— Tuu pist richtich wëns tuu saast hest khee man, 18wayls tuu xon finef hast, un tee woos tuu yets host is net wërklich tayne man. Yoo, tuu host ti woerheet kesaat.
19Ti fraa antwort:
— Yets wees ich tas teyer en profët sayt! 20Unsere foerkhomer hon Hërkot aan kepeet uf too tëm përich#4.20 Te Xërisiim përich, woo ticht an te xtat Sikeen waar., awer teyer, yute, saat tas Yeruusalëm tas plats is woo meyer en aan peete mise.
21Yeesus saat:
— Fraa, klaap an was ich saan: khomt ti tsayt woo nimant Hërkot aan peete tuut net uf too tëm përich un net in Yeruusalëm. 22Teyer, samaritaaner, weest net was teyer atoreere tuut, awer meyer wise was meyer aan peete tuun wayl ti retung khomt fon te yute. 23Awer, khomt ti tsayt, un, in te woerheet, is se xon khom, woo ti echte aan peeter te Fater aan peete tuun in kayst un in woerheet. Wayl sin tii woo te Fater hon wil tas em aan peete tuun. 24Hërkot is Kayst, un tesweche tii woo em aan peete tuun sole em aan peete in kayst un in woerheet.
25Ti fraa antwort:
— Ich wees tas te Messias, Kristus kenënt, khome mus. Un, wën tee khome tuut, tuut eyer ales fer uns ausleeye.
26Too hot Yeesus kesaat:
— Ich, woo mit tich am xpreche sin, sin te Kristus.
27In tëm momënt sin ti tisiple tsurik khom un hon sich ferwunert, wayl tee mit te fraa am xpreche waar. Awer nimant hot kefroot was ti fraa wolt. Un hon aach net fer Yeesus kefroot warom eyer mit te fraa am xpreche waar.
28Klaych tëm noo, hot ti fraa sayne waser kruuch too kelos, is tsurik pis an ti xtat kang un saat fer ti layt al:
29— Khomt te man kuke woo kesaat hot ales was ich fërtich keprung hon. Meecht tee te Kristus sin?
30Fiil layt sin aus te xtat kang un sin pis uf es plats kang woo Yeesus waar.
31In te selwich tsayt, hon ti tisiple fer Yeesus ferlangt:
— Mayster, es etwas!
32Yeesus antwort:
— Ich hon fer se ese en es mitel woo teyer net khënt.
33Too hon ti tisiple aan kefang se frooe, ëne fer te anere:
— Meecht yemant ese keprung hon fer iim?
34Yeesus saat:
— Mayn ese is te wile mache fon tëm woo mich kexikt hot un ti aarwat woo eyer mich kep hot fer fërtich mache. 35Teyer saat imer: “In fier moonate is es tsayt fer ti ërnt.” Awer kukt kuut ti plantaaj aan: was keplanst kep waar, is xon tsaytich un fërtich fer ti ërnt. 36Weyer ërnt, kriit sayne loon, un te resultaat fon sayn aarwat is tas eewiche leewe fer ti mënxe. Un soo, tee woo seet kraat soo wii tee woo ërnt kewe mitsamer froo. 37Wayl is woer was kesaat kept: “Eene seet un te anere ërnt.” 38Ich hon aych kexikt ërnte woo teyer net keseet hot; anere hon too kexaft, un teyer het tëne iire aarwat penutst.
39Fiile samaritaaner fon tee xtat hon an Yeesus keklaapt wayl ti fraa kesaat hat: “Tee hot mich kesaat ales was ich fërtich keprung hon.” 40Wii ti samaritaaner hiin khom sin uf es plats woo Yeesus waar, hon se ferlangt tas eyer pay tëne playwe solt, un Yeesus is tswaay taache too keplip.
41Un fiile anere hon keklaapt weche tëm sayn mensaaj. 42Ti hon fer ti fraa kesaat:
— Yets is es nime weche was tuu kesaat host tas mer klaawe, awer wayl meyer selepst em keheyert hon xpreche. Un wise tas eyer wërklich te Reter fon te welt is.
Yeesus heelt te soon fon en aarwater fon te rechiirung
43Yeeus is tswaay taache too keplip un, tëm noo, is eyer noo te rechioon fon Kalilëya kang. 44Wayl, wii eyer selepst saat: “En profët wërt net rexpekteyert in sayn aychne lant.”#Mt 13.57; Mk 6.4; Lk 4.24 45Wii eyer an Kalilëya aan khom is, hon ti pewooner fon tëm plats em kuut uf kenom. Tii waare uf tas Oostre Fest kang kewees, in Yeruusalëm, un hon kesiin kehat ales was Yeesus tort kemach hat.#Yo 2.23
46Yeesus is tsurik noo Kanaa in Kalilëya kang, woo eyer waser in wayn transformeyert hat. Too waar en hooche aarwater fon te rechiirung, woo in Kafarnaum kewoont hot. Tee hot en kranke soon tehëm kehat.#Yo 2.1-11 47Wii tee keheyert hot tas Yeesus fon te Yutëya khom waar noo Kalilëya, is eyer tëm ferlange kang solt noo Kafarnaum khome sayne soon heele, woo am xtërwe waar. 48Yeesus saat fer te aarwater:
— Teyer klaapt ploos wën teyer kroose wunere siit!
49Te aarwater hot keantwort:
— Hër, khom xnel, eep mayne soon xtërept!
50Yeesus saat:
— Kee hëm! Tayne soon wërt leewe!
Tee hot keklaapt an Yeesus sayn wërter un is fort kang. 51Am hëm weech, hot eyer sayn aarwater aan ketrof, woo kesaat hon:
— Tayne soon leept!
52Too hot eyer kefroot um was uertsayt sayne soon aan kefang hot se pesere. Ti aarwater antworte:
— Kester mitach, um een uer is tas fiiwer wech kang.
53Tan hot te fater traan ketënkt tas kraat um tii uertsayt woo Yeesus kesaat hat: “Tayne soon wërt leewe.” Too hot tee un ti kans familye an Yeesus keklaapt.
54Tas waar te tswete wuner woo Yeesus kemach hat klaych tëm noo wii eyer fon Yutëya pis Kalilëya kang waar.
Одоогоор Сонгогдсон:
Yohan 4: NTHunsrik
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
2022 Sociedade Bíblica do Brasil