MAT 7
7
Ba kǝ shin ni bes kǝ murgon da'a
1<<Ba kǝ shin ni ni bes kǝ murgon da'a, kǝn ma mbarǝm ba shin bes gin da'a. 2Kandatu kǝ hukunte mbarǝmo, untu ni kǝn ma ba hukunte in pa'e. Na shandǝr nǝm tu kǝ cingǝriwo, na ri ni ba cingǝri in pa'e.
3<<Unun kem ki den shini nye jir kǝ te ger dǝ ya'ika, o fawo basi nyash tu te ger da'i kawu? 4Imnu ki mani wuli ya'i'e, <Naa ɗǝli'i nye jir kǝ te ger da'ika,> o fawo basi nyash ra te ger da'ikawe? 5Ki mǝn pi shini kǝ gere, ɗǝli basi nyash kǝ te ger gika kakani, arni ki mani shini hoyi kan kǝ'i mani ɗǝli nye jir ya'i ter gerka.
6<<Ba kǝ bini yer argon tu kan dlǝran ni anra gwa da'a. Ba kǝ la'i ni alade zo bar gin da'a. Kǝn ni kǝ pi untuwo, aladeyi baa desika, kan dǝ yeri pal wu tlyat kǝne.
Liri ni, ngen ni, kǝ ɓo ni bǝdlabǝni
7<<Pini ta liri ba bi ine, ngen ni ki zami, pini ta ɓe bǝdlabǝni, baa ɓuli ine. 8Muntu kup liriwo ba bi ti. Muntu ngen ngapo ti zami. Muntu ɓo bǝdlabǝno, ba ɓuli ti.
9Woni gip kǝn nya gǝs ni lir ti bǝrediwo, ti bi ti tatwe? 10Ko tin tǝ lir ti koso, tǝ bi ti iciwu? 11Kǝn mǝn ɗasi tu ma, kǝ mani bi mimir gin ho bari, bare dǝ wule Ba gin kǝ to yamka baa bi munju ba lir ti gwa ho bari. 12Argon tu kup kǝ ndu dǝ mbarǝm pi ino, pi wur ni untu pa'e. Muntu ni'e Kulci kǝ Musa na kulci kǝ ga mǝn yari shirǝm kǝ Yami.
Nye met bǝdlabǝni na ngǝlan bǝdlabǝni
13Te ni gipi tǝp kǝba bǝdlabǝn kan ra met gwa. Rawo bǝdlabǝn tu kan ba ri mbarǝm ewo na ngǝlanyi ni ar ra. Kopi guntǝpi ban da'a, kan mǝn kopi tǝpi ra na womti. 14Ama tǝp tu kan mbarǝm ba kop dǝ zam raiwo met ni ar ra. Kopi tǝpi ban naari, kan mǝn kopi tǝpi womti da'a.
Ba mani momi kin den gǝritǝn gǝsi
15Neni ger ndin, domici mir mǝn yari shirǝm kǝ Yam kǝ lar kan ba ɗir kar kǝn gip tutul dli ka kur tǝm gwa, ama wi yer lǝp ni mǝn kumi guzum naari. 16Ki mom wur ni tǝp kǝ ba mbap gǝzǝni. Ba mani kotli mimir inabi den kǝn ire, ko gǝri turum den kin goluma? 17Untuni es ko gonge mbuni kin ba gǝri ni mbuni mimiri, ama wani kin ba gǝri ni wani mimiri. 18Mbuni kin ba taɓe gǝri wani mimir da'a, untu es ar ba pi da'a dǝ wani kin gǝri ho mimiri. 19Ko gonge kin kan gǝri ho mimir dawo, ba wotlka dǝ kerika. 20Ra'untuwo, ki mani ni momi mǝn yari shirǝm kǝ Yam kǝ lar ju den mbap gǝzǝni.
A taɓe momi gin da'a
21<<Ba'e kup mǝn wuli gǝn'e, <Babomi, Babomi> ni baa zam dǝ Yam dǝm gun gǝs da'a. Ama muntu ba pi argon tu Ban kǝ to yamka ndu dǝ pi gwa ni baa zami. 22Na womti gin ba wulǝm'e, <Babomi, Babomi, na sun gini mǝ pi wazu diya, kano na sun gini mǝ ɗǝli dun itǝr na pi bar kǝ dlǝkǝntǝn na womti diya?> 23Kan a wul wur'e, <A taɓe momi gin da'a. Tlin ni kǝba gerka kǝn munju nge kopi shirǝm kǝ Yam gwa.>
Mǝn tu'i bin mbarǝm rop
24<<Ra'untuwo, kup muntu kum shirǝm gǝn tu, kan tǝ pi mbap nariwo, ti ni ra wule mbarǝm mǝn bopya tu kan tu bom gǝs den tat gwa. 25Kan bar ghon ni nda, bula ni la'i, kan itǝr ghon ni ɓe tor den biniwo, ar ba nda da'a, domici ɓa ni gǝs bini den tate. 26Ama kup muntu kum shirǝm gǝni, kan tǝ la gip mbatl gǝs tǝ pi mbap na ri dawo, tini wule kǝdlǝm tu kano tu bom gǝs den singes gwa. 27Ghon ni nda, kan ɓulani suri, itǝr be tor ar ɓo biniwo, kan dǝ bini ndaka, ndetǝni ba nge ger kǝ shini.>>
28<<Nan Yesu pa'i yari kup shirǝm juwo, ar ni domtǝn kǝ mbarǝmi nǝm bi na am den kulci gǝsi, 29domici tǝ kulci wur wule muntu ra na iko gwa, ba'e wule kǝ mǝn kulci gǝzǝn den kulci kǝ Musa ni da'a.
Одоогоор Сонгогдсон:
MAT 7: PLJ
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©2023 Seed Company in collaboration with Language Developers and Bible Translators Association