Luka 23
23
Ai ka taa Isa le Pilati fɛlɔ teme
Matiyu 27.1-2, 11-14; Malɛkɛ 15.1-5; Yohana 18.28-38
1Wo kɔ, jama bɛ v'i wulila ka taa Isa le Pilati fɛlɔ. 2Ai do v'a jalakila, ai vɛɛ: «Mɔ na kɛ́ min yena maa mɔɔlu lafilila, k'ai dansii niisɔɔn salako la Lɔmu masakɛba ma. A do y'a fɔla a jɛlɛ ma ko Alimasihu, masakɛ koni.»
3Wo lɔ, Pilati k'a maɲininga, a vɛɛ: «Ile le Jahudiyalu ya masakɛ le?»
Isa k'a javi, a vɛɛ: «Ile gbu vɛ wo fɔ.»
4Wo kɛ, Pilati k'a fɔ salakalase kuntiibalu ni jama bɛ yɛ, a vɛɛ: «M̀ ma ko ko ye kɛ́ min ya ko lɔ min yi kɛ a latɔn kun ne.»
5Kɛɛ ai ka to a mabamala, ai vɛɛ: «A yi mɔɔlu lamulutula aa kalan ne Jude koovi fan bɛ lɔ. A na a daminala Galile ka na se haan fɔɔ jan.»
Ai ka taa Isa le Helodi fɛlɔ teme
6Pilati ka kuma wo mɛn mingɛ, a k'ai maɲininga, a vɛɛ: «Jalasa kɛ́ min yi Galileka le le?» 7Pilati k'a lɔn mingɛ ko Isa bɔnin Helodi ya koovi le lɔ, a k'a lataa Helodi ma, min tɛɛ Jelusalɛmu wo waate lɔ. 8Helodi ka Isa ye mingɛ, a ka sawa kosɛvɛ, kamasɔlɔn a tɛɛ v'a mangutu mɛn, ani ka ta waate jaan ma, a yenlɔɔ tɛɛ a la fɔsa wo tɛɛ kawananko dɔ kɛ a ɲana. 9Wo lɔ, a vɛ ɲiningali siyama kɛla Isa la, kɛɛ wo ma a dɔ javi. 10Salakalase kuntiibalu ni seliya kalanmɔɔlu k'i lɔ je ka to a jalakila bakɛ. 11Hali Helodi gbu ni aa sɔdasilu tɛɛ jɛlɛbɔla a lɔ, k'a lafeya. Ai do ka masayafaani bila Isa kanna ka ban k'a lasei Pilati fɛlɔ. 12Pilati ni Helodi gbeyayine tɛɛ i ɲɔɔ yɛ kɔlɔkɔlɔ le, kɛɛ ai ka diya wo lon kelen ne.
Jahudiyalu ka Isa faako jatesii teme
Matiyu 27.15-26; Malɛkɛ 15.6-15; Yohana 18.39–19.16
13Wo kɛ, Pilati ka salakalase kuntiibalu ni ɲamɔɔlu ani jama bɛ ladɛn. 14A vɛɛ ai yɛ: «Ài nanin kɛ́ min ne ǹ fɛ, k'a fɔ ko a yi mɔɔlu lafilila. Wo ma, ǹ n'a maɲiningala ài ɲakɔlɔ mingɛ, ǹ n'a yena ko ài jo tɛ a jalakiko suu suu lɔ. 15Helodi fana ma ko ye min yi kɛ a latɔn kun ne, kamasɔlɔn a v'a laseikɔ mɔ ma. Ài y'a ye, a ma ko kɛ min yi kɛ a faa kun ne. 16Wo ma, ǹ kɛtɔ a gbasila k'a bila.»#23.16 Sɛvɛli kɔlɔ dɔlu ka haya min la a kɔkan: 23.17
18Kɛɛ jama bɛ vɛ gbanɔla kelen ne, ai vɛɛ: «Kɛ́ min faa, i yi Balabasi bila mɔ yɛ!» 19Balabasi tɛɛ vɛ bila kaso la ka bɛn sokɔnɔmɔɔlu lamulutuko ma, ani mɔɔfaako.
20Pilati tɛɛ a fɛ ka Isa bila. Wo le k'a kɛ, a ka jama madiya kɔtunun. 21Kɛɛ ai ka to gbanɔla, ai vɛɛ: «A gbaan kɔlɔman ma! A gbaan kɔlɔman ma!»
22Pilati k'ai maɲininga a siɲa sawana lɔ, a vɛɛ: «Ǹ'a faa mindɛ lɔ? A na koyon suu mindɛ le kɛla? M̀ ma faa kun ye a la. Wo ma, ǹ kɛtɔ a gbasila k'a bila.»
23Kɛɛ ai k'a mabama ka to gbanɔla ko Isa yi gbaan kɔlɔman ma haan fɔɔ ai ka Pilati nɔ. 24Wo lɔ, min lɔɔ tɛɛ ai la, Pilati k'a latɛɛ ko a kɛtɔ wo kɛla ai yɛ. 25Ai tɛɛ mɔɔ min fɛ, min bilanin tɛɛ kaso la ka bɛn mɔɔlamulutuko ni mɔɔfaako ma, Pilati ka wo bila, ka ban ka Isa don ai bolo, fɔsa ai y'ai sawonanko kɛ a la.
Ai ka Isa gbaan kɔlɔman ma teme
Matiyu 27.31-44; Malɛkɛ 15.21-32; Yohana 19.17-27
26Ai taatɔla Isa le, ai k'i ɲɔɔmɛn Silɛnika kɛ́ dɔ le, min tɛɛ bɔla sɛnɛ lɔ, min tɔɔ tɛɛ ko Simɔn. Sɔdasilu do ka Simɔn mina ka Isa gbaankɔlɔman la a kanma, ko a yi bila Isa kɔ. 27Jama ba tɛɛ ai kɔ. Moso dɔlu tɛɛ je, ai vɛ ai sisi magbasila niilafin boloma, ka kasi Isa ya ko lɔ. 28Isa do k'i kɔdon k'a fɔ ai yɛ, a vɛɛ: «Jelusalɛmu mosolu, ài kà kasi ǹa ko lɔ, mafɔ àilu gbu ni ài dennu ya ko lɔ. 29Kamasɔlɔn waate dɔ sentɔ, ai kɛtɔ a fɔla ko: ‹Moso malɔninnu, ani minu ma den sɔlɔn ba bene, ani minu ma sin di ba den ma, ko wolu le duwawuden ne.› 30#Ko Lankɛnɛmayanin 6.16.Wo waate, mɔɔlu kɛtɔ a fɔla tinilu yɛ, ai vɛɛ: ‹Ài yi ben mɔ kɔkan›, ani k'a fɔ kooninnu yɛ, ai vɛɛ: ‹Ài yi mɔ doon!› 31Kamasɔlɔn ni ai yi ko suu min kɛla kɔlɔman kɛnɛ la, kɔlɔman jalan do?»
32Wo waate lɔ, ai ka taa koyonkɛba fila le fana fɔsa ai yi wolu ni Isa faa kelen ne. 33Ai senin dingila dɔ lɔ, ai y'a fɔla min ma ko Kunkolo Dingila, ai ka Isa gbaan kɔlɔman ma, ani koyonkɛba wolu: a kelen tɛɛ a bolokini fannɔ, a tɔ kelen tɛɛ a bolonunma fannɔ. 34Isa do vɛɛ: «Ǹ Fa, i y'ai makoto, kamasɔlɔn ai m'a lɔn ai yi min kɛla.»
Wo kɔ, sɔdasilu ka kalabila kɛ ka bɛn aa faanilu lɔtalako ma i ɲɔɔ wotɛ.
35Jama lɔnin ka to kolasaala, Jahudiya ɲamɔɔlu tɛɛ jɛlɛbɔla Isa lɔ, ai vɛɛ: «A na dɔlu lakisila. Ni ale le Masa Tɔɔmasenin ne ani Ala ya Mɔɔ Tanin, a a jɛlɛ lakisi vɛ!» 36Sɔdasilu gbu tɛɛ a lafeyala ka gbɛ kumunnin dɔ telen a la. 37Ai do vɛɛ a yɛ: «Ni ile le Jahudiyalu ya masakɛ le, i i jɛlɛ lakisi vɛ!» 38Ai ka sɛvɛli dɔ kɛ Isa kunma wala ma, ko: «Min ne Jahudiyalu ya masakɛ le.»
39Koyonkɛba fila minu gbaannin tɛɛ Isa dafɛ, ai lɔ kelen tɛɛ a jɛvɛla, a vɛɛ: «Ile le tɛ Masa Tɔɔmasenin ne? I i jɛlɛ lakisi vɛ, ka ǹu fana lakisi!»
40Kɛɛ a tɔ kelen ka dɔ wo makuma, a vɛɛ: «I tɛ siyanna Ala ɲa? I m'a lɔn mɔ bɛ yi kolatɔn kelen ne kɔlɔ? 41Ǹu ni kolatɔn min kaanyine ka bɛn mɔ kɛkolu ma, kɛɛ do, kɛ́ min ma koyon foi kɛ.» 42A do vɛɛ: «Isa, i vɛ nala iya masaya lɔ waate min nɔ, i i hangili to ǹ nɔ.»
43Isa k'a fɔ a yɛ, a vɛɛ: «Ǹ'i tuɲa fɔ i yɛ, bi i kɛtɔ ǹ fɛ Ala ya kunnadiyaso la.»
Isa ka sa teme
Matiyu 27.45-56; Malɛkɛ 15.33-41; Yohana 19.28-30
44Telelatelen waate senin, divi ka don jamana fan bɛ lɔ lɛlɛ sawa kɔlɔ. 45Tele tɛɛ tɛ mɛnɛnna, ado lɔhɔlɔmabonba daladɛnfaani ka fala a tɛma fila le. 46Isa do k'a kan labɔ bakɛ, a vɛɛ: «Ǹ Fa, ǹ'i ǹ nii laseila i ma yi ne.» Wo fɔ a bolo, a ka sa.
47Sɔdasi kuntii ka ko wolu ye mingɛ, a vɛ Ala tanula k'a fɔ, a vɛɛ: «Kɛ́ min tɛɛ mɔɔ telennin ne le feu!» 48Kolɔgbɛnbalu bɛ ka kokɛnin wolu ye mingɛ, ai ka seikɔ aiya luulu ma, ai vɛ ai sisi magbasigbasila josomakasi boloma. 49#Luka 8.2, 3.Isa lɔnbalu bɛ ka to poon kolasaala, ani moso minu bilanin tɛɛ a kɔ ka bɔ Galile.
Ai ka Isa sudoon teme
Matiyu 27.57-61; Malɛkɛ 15.42-47; Yohana 19.38-42
50-51Wo k'a talan kɛ́ dɔ tɛɛ je, min tɔɔ tɛɛ ko Jusufu, ka bɔ Jahudiyalu ya so dɔ la, ai y'a fɔla min ma ko Alimate. Mɔɔ ɲuma ni telenmande le tɛɛ a le, min tɛɛ Ala ya masaya waate makɔnɔna. A do tɛɛ kititɛɛjama ɲamɔɔ dɔ le le, kɛɛ ai na ko min latɛɛla ka bɛn Isa ma ani min kɛnin a la, a ma diɲa wo suu suu ma. 52A do ka taa Pilati fɛlɔ, ka Isa fuleni madali a sudoonko lɔ. 53Wo kɔ, a ka fuleni lajii k'a bɔ kɔlɔman ma k'a kasange, ka ban k'a sudoon kawawoo kabulu dɔ lɔ, mɔɔlu na min senna, su tɛɛ ma don ba min kɔnɔ bene. 54Wo lon tɛɛ Nɔningɛlon ɲasiilon ne le, ado Nɔningɛlon tɛɛ damina bolo le ma.
55Moso minu tɛɛ Isa malɔla ka ta a bɔ waate ma Galile, wolu ka taa Jusufu fɛ sudoonya lɔ ka kabulu ye, ani a sudoonɲa. 56Wo lɔ, ai vɛ seikɔla ka tulu sumadiyanin ni latikɔlɔn lɔbɛn Isa fuleni yɛ.
Ka bɛn seliya ma, ai ma baale kɛ Nɔningɛlon.
Одоогоор Сонгогдсон:
Luka 23: MBT2023
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Manya Bible Translation, © SIM International, 2023
