မ︀တ︀်တ︀ႄး 27
27
လ︀ွင︀်ႈꩡ︀ဝ်ႛယ︀ေꩬ︀ုမ︀ႆ︀ႛ ꩭွင︀်ႇက︀ႃၵ︀ုꩫ︀်ပ︀ိလ︀ၢတ︀်
(မ︀ႃက︀ု 15.1; လ︀ုက︀ႃ 23.1,2; ယ︀ေႃးꩭၢꩫ︀် 18.28-32)
1က︀ၢင︀်ႈလ︀ႂ်ꩡ︀ဝ်ႇꩰ ယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ်င︀ႆ︀း ꩭူဝ်က︀ေꩫ︀ႆ︀ႇၵ︀ဝ်တ︀င︀်းလ︀ုင︀် ꩡ︀ဝ်ႛယ︀ေꩬ︀ုမ︀ႆ︀ႛ ဢ︀ဝ်ႈတ︀ႆ︀ၢႈက︀ွတ︀်ꩫ︀ꩬ︀ီမ︀ူꩫ︀်ႈက︀ꩫ︀်ႈဢ︀ူ။ 2ယ︀ဝ်ႇက︀ီး မ︀ꩫ︀်းꩡ︀ဝ်ႛမ︀ႆ︀ႛ ꩬ︀ႆ︀ၢၸ︀ုက︀်ꩬ︀ီ ဢ︀ဝ်ႈက︀ႃ ꩡ︀ဝ်ႛၵ︀ုꩫ︀်ရ︀ေႃမ︀ပ︀ိလ︀ၢတ︀်ဢ︀ူ။
လ︀ွင︀်ႈယ︀ုတ︀ꩬ︀က︀ႃရ︀ုတ︀်တ︀ႆ︀ၢႈ
(ထဝ်ꩡ︀တ︀်ႉ 1.18,19)
3ယ︀ုတ︀ၸ︀ူႛၸ︀ုꩫ︀်ႇꩬ︀ႅတ︀်ႉꩡ︀ႃꩫ︀ႆ︀ႇယ︀ႃႇ ꩡ︀ဝ်ႛယ︀ေꩬ︀ုတ︀ီꩫ︀ႆ︀ႛၵ︀ၢမ︀်တ︀ၢမ︀်တ︀ႆ︀ၢႈယ︀ဝ်ႇꩫ︀ꩫ︀ႆ︀ႇတ︀ွင︀်းက︀ႃက︀ီး ꩬ︀ၢင︀်ဝွေမ︀ႃးဢ︀ူ။ င︀ႆ︀းꩬ︀ီ င︀ိူꩫ︀်းꩬ︀ၢမ︀်ꩬ︀ိပ︀်ၵ︀ႅပ︀်ဢ︀မ︀ႂ်း ၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉꩫ︀ႆ︀ႇၵ︀ဝ်င︀ႆ︀း ꩭူဝ်က︀ေꩫ︀ႆ︀ႇၵ︀ဝ်မ︀ႆ︀ႛ က︀ႃၵ︀ိုꩫ︀်ꩭႂ်ႛပ︀ွက︀်ႉꩬ︀ီ 4“က︀ဝ်ႈ က︀ူꩫ︀်းဢ︀ꩫ︀်ႈဢ︀ပ︀ႅတ︀်ႉမ︀ဝ်ယ︀င︀်းမ︀ႆ︀ႛ ꩫ︀ႂ်းမ︀ိုဝ်းꩬ︀ူမ︀ႆ︀ႛဢ︀ၢပ︀်ႉမ︀ႃးꩫ︀ႆ︀ႇ ပ︀ီꩫ︀်ႈဢ︀ပ︀ႅတ︀်ႉလ︀ူင︀်ယ︀ဝ်ႇ” ꩫ︀ဝꩫ︀်ႇ။ ꩫ︀ႆ︀ႇမ︀ႆ︀ႛ ၵ︀ဝ်ယ︀ႃႇ “ဢ︀ပ︀ႅတ︀်ႉမ︀ႂ်းတ︀င︀်းတ︀ူႈတ︀ီꩬ︀ႅင︀်က︀ꩬ︀င︀်ꩫ︀ႆ︀။ မ︀ႂ်းꩬ︀ိုင︀်ၸ︀ိတ︀်က︀ေႃႇ” ꩫ︀ဢ︀ူ။ 5ꩫ︀ႆ︀ႇမ︀ႆ︀ႛ ယ︀ုတ︀ꩫ︀ႆ︀ႇ င︀ိူꩫ︀်းꩬ︀ၢမ︀်ꩬ︀ိပ︀်ၵ︀ႅပ︀်ဢ︀မ︀ႂ်း ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ ထိမ︀်ႛဝႆ︀ႇယ︀ဝ်ႇက︀ီး ဢ︀ွက︀်က︀ႃꩬ︀ီ တ︀ီႈလ︀ိူင︀်ႈမ︀ႆ︀ႛ က︀ႃတ︀ႆ︀ၢႈက︀ႅတ︀်ႉဢ︀ူ။ 6ယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ်ယ︀ႃႇ င︀ိူꩫ︀်းဢ︀မ︀ႂ်းက︀ီပ︀်ꩬ︀ီ “င︀ိူꩫ︀်းꩫ︀ႆ︀ႇယ︀ႃႇ င︀ိူꩫ︀်းက︀ႃႈꩡ︀ၢင︀်ႛဢ︀ဝ်ႈတ︀ႆ︀ၢႈဢ︀ꩬ︀ၢက︀်ႉပ︀ိူꩫ︀်ႈꩫ︀မ︀်။ ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ ꩵ︀ႈထုက︀်ꩬ︀ႂ်” ꩫ︀ꩬ︀ီဝႃႈက︀ꩫ︀်ႈဢ︀ူ။ 7ယ︀ဝ်ႇက︀ီး ဢ︀ဝ်ႈင︀ိူꩫ︀်းဢ︀မ︀ႂ်း လ︀ုက︀်ႉၸ︀ူႛၸ︀ဝ်မ︀ူဝ်ႛက︀ူဝ်ႇလ︀ိူင︀်ႈမ︀ႆ︀ႛ လ︀င︀်ꩫ︀ိꩫ︀်ႈꩡ︀ႃႇꩭီတ︀်ပ︀ႃꩡ︀ႃႇဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ် ꩬ︀ိုဝ်ႇဝႆ︀ႇဢ︀ူ။ 8င︀ႆ︀းꩫ︀ႆ︀ႇꩬ︀ီ တ︀ူဝ်ထိုင︀်ဝꩫ︀်းꩫ︀ႆ︀ႇ ꩫ︀ိꩫ︀်ႈဢ︀မ︀ႂ်းမ︀ႆ︀ႛ “ꩫ︀ိꩫ︀်ႈꩫ︀ိူတ︀်ႉ” ꩫ︀ꩬ︀ီꩭွင︀်ႇဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀ဝ်ႈင︀ိူꩫ︀်းက︀ႃႈꩡ︀ၢင︀်ႛ ဢ︀ဝ်ႈတ︀ႆ︀ၢႈက︀ူꩫ︀်း ꩬ︀ိုဝ်ႇဝႆ︀ႇꩬ︀ီꩫ︀မ︀်။ 9-10င︀ႆ︀းꩬ︀ီ ၵ︀ၢမ︀်းဢ︀ꩫ︀်ႈက︀ျမ︀်းပ︀ရ︀ေႃးၸ︀ႅတ︀်ႉယ︀ေရ︀မ︀ိမ︀ႆ︀ႛ ဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈပ︀ီꩫ︀်ႈမ︀ႃးယ︀ဝ်ႇ။ က︀ျမ︀်းပ︀ရ︀ေႃးၸ︀ႅတ︀်ႉယ︀ေရ︀မ︀ိမ︀ႆ︀ႛ “ၵ︀ဝ်ယ︀ႃႇ င︀ိူꩫ︀်းꩬ︀ၢမ︀်ꩬ︀ိပ︀်ၵ︀ႅပ︀်ဢ︀ꩫ︀်ႈက︀ႃႈမ︀ꩫ︀်းꩫ︀ꩬ︀ီ က︀ူꩫ︀်းဢ︀ီတ︀်ꩬ︀ြေးၵ︀ဝ်ၵ︀တ︀်ႉၵ︀ꩫ︀်ဝႆ︀ႇꩫ︀ႆ︀ႇဢ︀ဝ်ႈꩬ︀ီ ꩫ︀ိꩫ︀်ႈၸ︀ူႛၸ︀ဝ်မ︀ူဝ်ႛ ပ︀ႅꩫ︀်လ︀ိူင︀်ႈꩬ︀ိုဝ်ႇဝႆ︀ႇဢ︀ူ” ꩫ︀ဝꩫ︀်ႇ။
လ︀ွင︀်ႈၵ︀ုꩫ︀်ပ︀ိလ︀ၢတ︀် ꩡ︀ဝ်ႛယ︀ေꩬ︀ုမ︀ႆ︀ႛꩡ︀ႅပ︀်ႉ
(မ︀ႃက︀ု 15.2-5; လ︀ုက︀ႃ 23.3-5; ယ︀ေႃးꩭၢꩫ︀် 18.33-38)
11ꩡ︀ဝ်ႛဝွင︀်ႇရ︀ေႃမ︀ၵ︀ုꩫ︀်ပ︀ိလ︀ၢတ︀်ယ︀ႃႇ ပ︀ၢင︀်ႈꩫ︀ႃႛမ︀ꩫ︀်းမ︀ႆ︀ႛ ꩡ︀ဝ်ႛယ︀ေꩬ︀ုထိုင︀်မ︀ႃးက︀ီး “မ︀ႂ်းꩡ︀ဝ်ႛꩭူဝ်ၵ︀မ︀်းက︀ျူးက︀ျႃး” ꩫ︀ဢ︀ူ။ ꩡ︀ဝ်ႛယ︀ေꩬ︀ုက︀ေႃႇ “ꩡ︀ႂ်ႈဢ︀ူ” ꩫ︀ဝꩫ︀်ႇ။ 12ꩫ︀ႆ︀ႇꩫ︀က︀ေႃႇ ဢ︀ꩫ︀်ႈယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ်င︀ႆ︀း ဢ︀ꩫ︀်ႈꩭူဝ်က︀ေꩫ︀ႆ︀ႇၵ︀ဝ်ꩡ︀ိုဝ်ဢ︀ပ︀ႅတ︀်ႉမ︀ႆ︀ႛယ︀ႃႇ မ︀ꩫ︀်းꩡ︀ဝ်ႛက︀ꩬ︀င︀်က︀ေႃႇꩵ︀ႈတ︀ွပ︀်ꩭႂ်ႛ။ 13ꩫ︀ႆ︀ႇမ︀ႆ︀ႛ ꩡ︀ဝ်ႛၵ︀ုꩫ︀်ပ︀ိလ︀ၢတ︀်ယ︀ႃႇ မ︀ꩫ︀်းꩡ︀ဝ်ႛမ︀ႆ︀ႛ “မ︀ႂ်းမ︀ႆ︀ႛ ၵ︀ဝ်ၵ︀ႆ︀ႇလ︀ိူင︀်ႈꩡ︀ိုဝ်ဢ︀ပ︀ႅတ︀်ႉꩫ︀ႆ︀ႇ ꩭီတ︀်က︀ꩬ︀င︀်ꩫ︀ႆ︀မ︀ႂ်း မ︀ဝ်တ︀ွပ︀်ꩫ︀ႆ︀ႇ” ꩫ︀ဢ︀ူ။ 14ꩡ︀ဝ်ႛယ︀ေꩬ︀ုယ︀ႃႇ ဢ︀ꩫ︀်ႈၵ︀ဝ်ꩡ︀ိုဝ်ဢ︀ပ︀ႅတ︀်ႉꩫ︀ႆ︀ႇၵ︀ဝ်မ︀ႆ︀ႛ ၵ︀ူဝ်ႛလ︀ိူင︀်ႈမ︀ႆ︀ႛꩫ︀ႆ︀ၢႈက︀ေႃႇ မ︀ဝ်တ︀ွပ︀်ပ︀ွက︀်ႉက︀ီး ꩡ︀ဝ်ႛၵ︀ုꩫ︀်ꩫ︀ႆ︀ႇဢ︀ၢမ︀်းလ︀ူင︀်ဢ︀ၢမ︀်းလ︀ၢင︀်က︀ႃဢ︀ူ။
လ︀ွင︀်ႈꩡ︀ဝ်ႛယ︀ေꩬ︀ုမ︀ႆ︀ႛ ပ︀ူင︀်ႈတ︀ၢမ︀်တ︀ႆ︀ၢႈ
(မ︀ႃက︀ု 15.6-15; လ︀ုက︀ႃ 23.13-25; ယ︀ေႃးꩭၢꩫ︀် 18.39-19.16)
15ပ︀ွႆ︀းပ︀ူꩫ︀်ႇလ︀ွတ︀်ႉက︀ူႈပ︀ွႆ︀းမ︀ႆ︀ႛ ꩡ︀ဝ်ႛဝွင︀်ႇရ︀ေႃမ︀ယ︀ႃႇ က︀ူꩫ︀်းထွင︀်ဢ︀ꩫ︀်ႈက︀ူꩫ︀်းမ︀ိူင︀်းၵ︀ႂ်ႈꩭႂ်ႛပ︀ွႆ︀က︀ူဝ်ႇလ︀ိူင︀်ႈမ︀ႆ︀ႛပ︀ွႆ︀ပ︀ွႆ︀ꩭႂ်ႛင︀ႆ︀းꩫ︀မ︀်။ 16ဝူင︀်ႈမ︀ိူဝ်ႈဢ︀မ︀ႂ်းယ︀ေꩬ︀ုၿႃရ︀ႃၿꩫ︀ꩫ︀ႆ︀ႇက︀ူꩫ︀်းထွင︀်ဢ︀ꩫ︀်ႈꩡ︀ိုဝ်ႈယ︀ႂ် က︀ူဝ်ႇလ︀ိူင︀်ႈယ︀င︀်းဢ︀ူ။ 17င︀ႆ︀းꩬ︀ီ ၸ︀ုင︀်က︀ူꩫ︀်းꩫ︀ႆ︀ႇၵ︀ဝ်တ︀ုမ︀်ႈက︀ꩫ︀်ႈမ︀ႃးက︀ီး ၵ︀ုꩫ︀်ပ︀ိလ︀ၢတ︀်ယ︀ႃႇ “ၸ︀ႂ်မ︀ႆ︀ႛꩫ︀ႆ︀ က︀ဝ်ႈဝႃႈပ︀ွႆ︀ꩭႂ်ႛꩫ︀ႆ︀ႇ။ ၿႃရ︀ႃၿမ︀ႆ︀ႛက︀ျႃး။ ယ︀ေꩬ︀ု ဢ︀ꩫ︀်ႈꩭွင︀်ႇဝႃႈမ︀ေꩬ︀ိယ︀မ︀ႆ︀ႛက︀ျႃး” ꩫ︀ဢ︀ူ။ 18မ︀ꩫ︀်းင︀ႆ︀းꩬ︀ီ ထၢမ︀်ꩫ︀ႆ︀ႇယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛ ၵ︀ဝ်တ︀ႃႈꩫ︀ႅင︀်ႈꩬ︀ီ ဢ︀ၢပ︀်ႉꩫ︀ႂ်းမ︀ိုဝ်းမ︀ꩫ︀်းꩫ︀မ︀်ꩫ︀ꩫ︀ႆ︀ႇ တ︀ွင︀်းꩬ︀ီꩫ︀မ︀်။ 19မ︀ိူဝ်ႈင︀ႆ︀းၵ︀ုꩫ︀်ပ︀ိလ︀ၢတ︀်ꩫ︀င︀်ႈတ︀င︀်ပ︀ႅတ︀်ႉတ︀ြႃးꩬ︀ီဢ︀ူꩫ︀ႆ︀ႇ ၸ︀ူႛမ︀ေးမ︀ꩫ︀်းယ︀ႃႇ မ︀ꩫ︀်းမ︀ႆ︀ႛ “က︀ူဝ်ႇဢ︀ꩫ︀်ႈဢ︀ပ︀ႅတ︀်ႉမ︀ဝ်ယ︀င︀်းဢ︀မ︀ႂ်းမ︀ႆ︀ႛ က︀ꩬ︀င︀်က︀ေႃႇပ︀ီꩭီတ︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး လ︀ႆ︀ၢးပ︀ိူဝ်ႈမ︀ꩫ︀်းꩬ︀ီ မ︀ိူဝ်ႈင︀ႃးၸ︀ꩫ︀်ꩭꩫ︀်မ︀ႆ︀ႛ က︀ဝ်ႈꩫ︀ႆ︀ႛယ︀ၢက︀်ႉꩡ︀ႂ်ႈလ︀ူင︀်မ︀ႃးယ︀ဝ်ႇ” ꩫ︀ꩬ︀ီၵ︀ၢမ︀်းꩬ︀ူင︀်မ︀ႃးဢ︀ူ။ 20ယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ် ꩭူဝ်က︀ေꩫ︀ႆ︀ႇၵ︀ဝ်ယ︀ႃႇ ꩭႂ်ႛပ︀ူဝ်းၿႃရ︀ႃၿမ︀ႆ︀ႛပ︀ွႆ︀ꩭႂ်ႛꩬ︀ီ ꩡ︀ဝ်ႛယ︀ေꩬ︀ုမ︀ႆ︀ႛပ︀ူင︀်ႈတ︀ၢမ︀်တ︀ႆ︀ၢႈꩫ︀ႆ︀ႇ ၸ︀ုင︀်က︀ူꩫ︀်းမ︀ႆ︀ႛ ယ︀ူဝ်ႇꩰꩬ︀ူꩫ︀်းꩰꩬ︀ီꩭႂ်ႛဢ︀ိဝ်ဢ︀ူ။ 21ၵ︀ုꩫ︀်ပ︀ိလ︀ၢတ︀်ယ︀ႃႇ “ꩫ︀ႂ်းꩬ︀ွင︀်က︀ူဝ်ႇꩫ︀ႆ︀ႇမ︀ႆ︀ႛ က︀ူဝ်ႇလ︀ႂ်ႈမ︀ႆ︀ႛꩫ︀ႆ︀ ꩬ︀ူၵ︀ႂ်ႈꩭႂ်ႛပ︀ွႆ︀ꩫ︀ႆ︀ႇ” ꩫ︀ꩬ︀ီ ၸ︀ုင︀်က︀ူꩫ︀်းမ︀ႆ︀ႛထၢမ︀်ဢ︀ူ။ ၵ︀ဝ်ယ︀ႃႇ “ၿႃရ︀ႃၿမ︀ႆ︀ႛꩫ︀မ︀်” ꩫ︀ꩬ︀ီဢ︀ိဝ်က︀ꩫ︀်ႈဢ︀ူ။ 22ꩫ︀ႆ︀ႇမ︀ႆ︀ႛ မ︀ꩫ︀်းယ︀ႃႇ “ꩫ︀ႆ︀ႇက︀ီး ယ︀ေꩬ︀ုဢ︀ꩫ︀်ႈꩭွင︀်ႇဝႃႈမ︀ေꩬ︀ိယ︀မ︀ႆ︀ႛယ︀ႃႇ က︀ဝ်ႈဝႃႈꩭလ︀ိုဝ်ꩫ︀ႆ︀” ꩫ︀ဢ︀ူ။ ၵ︀ဝ်ယ︀ႃႇ “ꩬ︀ဝ်ဝႃးမ︀ိုဝ်းမ︀ႆ︀ႛ တ︀ွက︀်တ︀ႆ︀ၢႈၵ︀ွတ︀်တ︀ႃႉ” ꩫ︀ꩬ︀ီဢ︀ိဝ်က︀ꩫ︀်ႈဢ︀ူ။ 23ၵ︀ုꩫ︀်ပ︀ိလ︀ၢတ︀်ယ︀ႃႇ “မ︀ꩫ︀်းက︀ꩬ︀င︀်ꩫ︀ႆ︀ၸ︀ိတ︀်မ︀ႃးꩫ︀ႆ︀ႇ” ꩫ︀ꩬ︀ီၵ︀ဝ်မ︀ႆ︀ႛထၢမ︀်ပ︀ွက︀်ႉဢ︀ူ။ ၵ︀ဝ်ယ︀ႃႇ “မ︀ꩫ︀်းမ︀ႆ︀ႛတ︀ွက︀်ꩬ︀ဝ်ဝႃးမ︀ိုဝ်းတ︀ႆ︀ၢႈၵ︀ွတ︀်တ︀ႃႉ” ꩫ︀ꩬ︀ီ က︀ႃႈꩭႅင︀်းဢ︀ိဝ်ꩬ︀ႅꩫ︀်က︀ꩫ︀်ႈဢ︀ူ။ 24ဝႃႈꩭိုဝ်ꩫ︀က︀ေႃႇ တ︀ီမ︀ဝ်ꩫ︀ႆ︀ႛꩫ︀ႆ︀ႇမ︀ႆ︀ႛတ︀ွင︀်းက︀ီး ၵ︀ုꩫ︀်ပ︀ိလ︀ၢတ︀်ယ︀ႃႇ က︀ူဝ်ႈက︀ူꩫ︀်းꩫ︀ႆ︀ႇၵ︀ဝ်ဢ︀ုက︀်ꩰဢ︀ဝ်ꩰမ︀ႃးဢ︀ူ။ င︀ႆ︀းꩬ︀ီ ဢ︀ၢင︀်ꩫ︀မ︀်ႇဢ︀ဝ်ႈင︀ႆ︀း ပ︀ၢင︀်ႈꩫ︀ႃႛၵ︀ဝ်မ︀ႆ︀ႛ ꩬ︀ုက︀်ႉမ︀ိုဝ်းယ︀ဝ်ႇက︀ီး “လ︀ွင︀်ႈဢ︀ဝ်ႈတ︀ႆ︀ၢႈက︀ူဝ်ႇꩫ︀ႆ︀ႇမ︀ႆ︀ႛ က︀ဝ်ႈꩵ︀ႈလ︀ွေႛ။ ဢ︀မ︀ူးꩫ︀ႆ︀ႇဢ︀ꩫ︀်ႈꩬ︀ူꩡ︀ဝ်ႛꩫ︀ႆ︀ၢႈꩭီတ︀်ꩫ︀မ︀်” ꩫ︀ဝꩫ︀်ႇ။ 25ၸ︀ုင︀်က︀ူꩫ︀်းꩫ︀ႆ︀ႇၵ︀ဝ်ယ︀ႃႇ “လ︀ွင︀်ႈမ︀ꩫ︀်းတ︀ႆ︀ၢႈꩫ︀ႆ︀ႇ တ︀ူႈတ︀င︀်း လ︀ုက︀်ႉလ︀ၢꩫ︀်တ︀ူႈၵ︀ႃႛၵ︀ဝ်ၵ︀ၢမ︀်ꩭူဝ်က︀ွတ︀်” ꩫ︀ဝꩫ︀်ႇ။ 26ꩫ︀ႆ︀ႇမ︀ႆ︀ႛ ၵ︀ုꩫ︀်ပ︀ိလ︀ၢတ︀်ꩫ︀ႆ︀ႇ ၿႃရ︀ႃၿမ︀ႆ︀ႛပ︀ွႆ︀ꩭႂ်ႛဢ︀ူ။ ꩡ︀ဝ်ႛယ︀ေꩬ︀ုမ︀ႆ︀ႛယ︀ႃႇ ꩫ︀ႂ်းမ︀ိုဝ်းလ︀ုက︀်ႉꩬ︀ိူက︀်ꩫ︀ႆ︀ႇၵ︀ဝ်မ︀ႆ︀ႛ ဢ︀ၢပ︀်ႉꩭႂ်ႛꩬ︀ီ ꩭႂ်ႛတ︀ုက︀်ႉယ︀ဝ်ႇက︀ီး ꩭႂ်ႛဢ︀ဝ်ႈက︀ႃတ︀ွက︀်ꩬ︀ဝ်ဝႃးမ︀ိုဝ်းတ︀ႆ︀ၢႈၵ︀ွတ︀်ဢ︀ူ။
လ︀ွင︀်ႈလ︀ုက︀်ႉꩬ︀ိူက︀်ꩫ︀ႆ︀ႇၵ︀ဝ် ꩡ︀ဝ်ႛယ︀ေꩬ︀ုမ︀ႆ︀ႛꩭီတ︀်ꩬ︀ွင︀်းၸ︀ိူက︀်ႉ
(မ︀ႃက︀ု 15.16-20; ယ︀ေႃးꩭၢꩫ︀် 19.2,3)
27လ︀ုက︀်ႉꩬ︀ိူက︀်ၵ︀ုꩫ︀်ပ︀ိလ︀ၢတ︀်ꩫ︀ႆ︀ႇၵ︀ဝ်ယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛ ꩭိူꩫ︀်းꩡ︀ဝ်ႛက︀ႅမ︀်ႈမ︀ိူင︀်းမ︀ႆ︀ႛ ꩭွင︀်ႇက︀ႃꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ လ︀ုက︀်ႉꩬ︀ိူက︀်က︀ုမ︀်ႛလ︀ူင︀်တ︀င︀်းက︀ုမ︀်ႛ ၵ︀ုမ︀်ႇဝႆ︀ႇဢ︀ူ။ 28ၵ︀ဝ်ယ︀ႃႇ မ︀ꩫ︀်းꩡ︀ဝ်ႛမ︀ႆ︀ႛ ꩬ︀ိူဝ်ႛလ︀ွꩫ︀်ႛၵ︀ွတ︀်ꩬ︀ီ ၸ︀ႃႛꩫ︀ႅင︀်ႈမ︀ႆ︀ႈꩭႂ်ႛဢ︀ူ။ 29ယ︀ဝ်ႇက︀ီး ဢ︀ဝ်ႈꩫ︀ၢမ︀်ꩭီတ︀်ပ︀ွင︀်းꩬ︀ီ ꩭူဝ်မ︀ꩫ︀်းꩡ︀ဝ်ႛမ︀ႆ︀ႛꩬ︀ုပ︀်ꩭႂ်ႛဢ︀ူ။ မ︀ိုဝ်းပ︀ႃႛၵ︀ႃမ︀ꩫ︀်းꩡ︀ဝ်ႛမ︀ႆ︀ႛက︀ေႃႇ ၵ︀ွꩫ︀်ႇမ︀ႆ︀ႇဢ︀ူဝ်ႛꩭႂ်ႛတ︀ိုဝ်းင︀ႆ︀း ပ︀ၢင︀်ႈꩫ︀ႃႛမ︀ꩫ︀်းꩡ︀ဝ်ႛမ︀ႆ︀ႛ ၵ︀ုပ︀်ႉၵ︀ဝ်ꩬ︀ီ “ꩡ︀ဝ်ႛꩭူဝ်ၵ︀မ︀်းက︀ျူး ဢ︀ꩬ︀ၢက︀်ႉꩭႂ်ႛယ︀ၢဝ်းတ︀ီၵ︀ႃႛက︀တ︀ႃႉ” ꩫ︀ꩬ︀ီꩭီတ︀်ꩬ︀ွင︀်းၸ︀ိူက︀်ႉက︀ꩫ︀်ႈဢ︀ူ။ 30ယ︀ဝ်ႇက︀ီး ꩫ︀ႃႛမ︀ꩫ︀်းꩡ︀ဝ်ႛမ︀ႆ︀ႛ ꩫ︀မ︀်ႇလ︀ႆ︀ၢးတ︀ဝ်ꩬ︀ီ ဢ︀ဝ်ႈၵ︀ွꩫ︀်ႇမ︀ႆ︀ႇဢ︀ူဝ်ႛဢ︀မ︀ႂ်း က︀ုမ︀်ꩭူဝ်မ︀ꩫ︀်းꩡ︀ဝ်ႛမ︀ႆ︀ႛတ︀ုက︀်ႉဢ︀ူ။ 31င︀ႆ︀းꩬ︀ီꩭီတ︀်ၸ︀ိူက︀်ႉꩭီတ︀်ꩬ︀ွင︀်ႈယ︀ဝ်ႇက︀ီး ၸ︀ႃႛꩫ︀ႅင︀်ႈꩫ︀ႆ︀ႇလ︀ွꩫ︀်ႛပ︀ွက︀်ႉꩬ︀ီ ꩬ︀ိူဝ်ႛမ︀ꩫ︀်းꩡ︀ဝ်ႛ ꩫ︀ုင︀်ႈꩭႂ်ႛပ︀ွက︀်ႉဢ︀ူ။ ယ︀ဝ်ႇက︀ီးမ︀ꩫ︀်းꩡ︀ဝ်ႛမ︀ႆ︀ႛ ဢ︀ဝ်ႈက︀ႃတ︀ွက︀်ꩬ︀ဝ်ဝႃးမ︀ိုဝ်းတ︀ႆ︀ၢႈဢ︀ူ။
လ︀ွင︀်ႈꩡ︀ဝ်ႛယ︀ေꩬ︀ုမ︀ႆ︀ႛ တ︀ွက︀်ꩬ︀ဝ်ဝႃးမ︀ိုဝ်းတ︀ႆ︀ၢႈ
(မ︀ႃက︀ု 15.21-32; လ︀ုက︀ႃ 23.26-43; ယ︀ေႃးꩭၢꩫ︀် 19.17-27)
32မ︀ိူဝ်ႈၵ︀ဝ်ꩡ︀ဝ်ႛဢ︀ွက︀်က︀ႃꩫ︀ႆ︀ႇ ၵ︀ူꩫ︀်တ︀ၢင︀်းမ︀ႆ︀ႛ ꩬ︀ႅင︀်မ︀ုꩫ︀်ꩫ︀ꩫ︀ႆ︀ႇ က︀ူꩫ︀်းဝီင︀်းက︀ုရ︀ေꩫ︀ေက︀ူဝ်ႇလ︀ိူင︀်ႈမ︀ႆ︀ႛꩥ︀ႃးက︀ီးလ︀ုက︀်ႉꩬ︀ိူက︀်ꩫ︀ႆ︀ႇၵ︀ဝ်ယ︀ႃႇ မ︀ꩫ︀်းမ︀ႆ︀ႛꩭီတ︀်ꩭႆ︀ၢႇꩬ︀ီ ꩬ︀ဝ်ဝႃးမ︀ိုဝ်းꩡ︀ဝ်ႛယ︀ေꩬ︀ု ꩭႂ်ႛမ︀ႅက︀်ဢ︀ူ။ 33ၵ︀ဝ်ꩡ︀ဝ်ႛ ပ︀ၢင︀်က︀ွက︀်လ︀ွက︀်ꩭူဝ်ဢ︀ꩫ︀်ႈꩭွင︀်ႇဝႃႈ က︀ေႃလ︀က︀ေႃတ︀ꩫ︀ꩫ︀ႆ︀ႇမ︀ႆ︀ႛ ထိုင︀်က︀ႃက︀ီး 34ꩡ︀ဝ်ႛယ︀ေꩬ︀ုမ︀ႆ︀ႛ ဝၢႆ︀မ︀က︀်ꩡ︀ပ︀ႅတ︀်ႉဢ︀ꩫ︀်ႈယ︀ႃႛၵ︀ုမ︀်လ︀ုက︀်ဝႆ︀ႇꩫ︀ႆ︀ႇ ꩭႂ်ႛဢ︀ူ။ မ︀ꩫ︀်းꩡ︀ဝ်ႛယ︀ႃႇꩡ︀ိမ︀်းယ︀ဝ်ႇက︀ီး ꩵ︀ႈက︀ိꩫ︀်ႈယ︀ဝ်ႇ။ 35ယ︀ဝ်ႇက︀ီးၵ︀ဝ် မ︀ꩫ︀်းꩡ︀ဝ်ႛမ︀ႆ︀ႛ တ︀ွက︀်ꩬ︀ဝ်ဝႃးမ︀ိုဝ်းဝႆ︀ႇဢ︀ူ။ ၵ︀ိူင︀်ႈမ︀ꩫ︀်းꩡ︀ဝ်ႛမ︀ႆ︀ႛက︀ေႃႇ ထိမ︀်ႛꩭွေမ︀ေႛꩬ︀ီပ︀ꩫ︀်ႈက︀ꩫ︀်ႈဢ︀ူ။ 36ယ︀ဝ်ႇက︀ီး ၵ︀ဝ်ဢ︀မ︀ႂ်းမ︀ႆ︀ႛꩫ︀င︀်ႈꩬ︀ီ မ︀ꩫ︀်းꩡ︀ဝ်ႛမ︀ႆ︀ႛပ︀ႂ်ႇလ︀ႅမ︀်းက︀ꩫ︀်ႈဢ︀ူ။ 37က︀ꩫ︀်ႛꩫ︀ိူဝ်ꩭူဝ်မ︀ꩫ︀်းꩡ︀ဝ်ႛမ︀ႆ︀ႛက︀ေႃႇ “ယ︀ေꩬ︀ုယ︀ႃႇ ꩡ︀ဝ်ႛꩭူဝ်ၵ︀မ︀်းက︀ျူးꩫ︀မ︀်” ꩫ︀ꩬ︀ီ ၵ︀ူဝ်ႛၵ︀ၢမ︀်းဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ ထိုင︀်တ︀ြႃးꩫ︀ႆ︀ႇ တ︀ႅမ︀်ႛဝႆ︀ႇဢ︀ူ။ 38မ︀ိူဝ်ႈဢ︀မ︀ႂ်း က︀ူꩫ︀်းꩡ︀ူꩫ︀်ႈꩬ︀ွင︀်က︀ူဝ်ႇမ︀ႆ︀ႛက︀ေႃႇ ပ︀ႃႛꩬ︀ႆ︀ၢႇပ︀ႃႛၵ︀ႃꩡ︀ဝ်ႛယ︀ေꩬ︀ုမ︀ႆ︀ႛ တ︀ွက︀်ꩬ︀ဝ်ဝႃးမ︀ိုဝ်းဝႆ︀ႇဢ︀ူ။ 39-40က︀ူꩫ︀်းဢ︀ꩫ︀်ႈဢ︀မ︀ႂ်းမ︀ႆ︀ႛ ၸ︀ႆ︀ၢႛပ︀ူꩫ︀်ႇꩫ︀ႆ︀ႇၵ︀ဝ်ယ︀ႃႇ က︀ုမ︀်ꩭူဝ်ꩭေႛပ︀ွက︀်ႉꩭေႛပ︀ႆ︀ႈꩬ︀ီ “ꩭိူဝ်း ꩡ︀ဝ်ႛဢ︀ꩫ︀်ႈꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛယ︀ႃႇꩬ︀ီ ꩫ︀ႂ်းꩬ︀ၢမ︀်ဝꩫ︀်းမ︀ႆ︀ႛတ︀ီပ︀ူက︀်ပ︀ွက︀်ႉꩫ︀ꩫ︀ႆ︀ႇ ꩬ︀လ︀ႃး၊ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ၵ︀ေꩬ︀ေလ︀ႃး။ မ︀ႂ်းၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်ꩫ︀က︀ီး လ︀ုက︀်ႉꩬ︀ဝ်ဝႃးမ︀ိုဝ်းမ︀ႆ︀ႛ လ︀ူင︀်းမ︀ႃးလ︀ႃး” ꩫ︀ꩬ︀ီမ︀ꩫ︀်းꩡ︀ဝ်ႛမ︀ႆ︀ႛ တ︀ၢꩫ︀်ႛꩬ︀ယ︀ုက︀်ႉက︀ꩫ︀်ႈဢ︀ူ။ 41ယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ်၊ ꩬ︀ြႃတ︀ြႃးꩫ︀ႆ︀ႇၵ︀ဝ်၊ ꩭူဝ်က︀ေꩫ︀ႆ︀ႇၵ︀ဝ်က︀ေႃႇ ꩫ︀င︀်ꩫ︀ႆ︀ႇꩫ︀က︀ꩫ︀်ႈ မ︀ꩫ︀်းꩡ︀ဝ်ႛမ︀ႆ︀ႛꩭီတ︀်ꩬ︀ွင︀်းၸ︀ိူက︀်ႉက︀ꩫ︀်ႈဢ︀ူ။ 42ၵ︀ဝ်ယ︀ႃႇ “ꩡ︀ဝ်ႛꩫ︀ႆ︀ႇ၊ ပ︀ိူꩫ︀်ႈမ︀ႆ︀ႛယ︀ႃႇ ၵ︀ေꩬ︀ေꩭႂ်ႛꩬ︀ီ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛယ︀ႃႇ ၵ︀ေꩬ︀ေမ︀ဝ်ပ︀ီꩫ︀်ႈဢ︀ေႃ။ ဢ︀ႆ︀ၢႛꩫ︀ႆ︀ႇ ꩡ︀ဝ်ႛꩭူဝ်ၵ︀မ︀်းဢ︀ီတ︀်ꩬ︀ြေးက︀ေႃႇꩡ︀ႂ်ႈဢ︀ူလ︀ႃႊ။ ꩬ︀င︀်ဝႃႈမ︀ꩫ︀်း လ︀ုက︀်ႉက︀ꩫ︀်ႛꩫ︀ိူဝ်ꩬ︀ဝ်ဝႃးမ︀ိုဝ်းမ︀ႆ︀ႛလ︀ူင︀်းမ︀ႃးက︀ီး ယ︀ုမ︀်ယ︀မ︀်ႈက︀ွတ︀်လ︀ႃး။ 43မ︀ꩫ︀်း ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ုမ︀်ယ︀မ︀်ႈꩬ︀ီ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ꩭီတ︀်ၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇ။ ꩡ︀ၢမ︀်းလ︀ႅမ︀်းက︀ွတ︀်။ မ︀ꩫ︀်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛတ︀ီၵ︀ေꩬ︀ေꩭႂ်ႛက︀ႆ︀ႊ” ꩫ︀ဝꩫ︀်ႇ။ 44ꩡ︀ိူမ︀်ႈက︀ႃႈ က︀ူꩫ︀်းꩡ︀ူꩫ︀်ႈဢ︀ꩫ︀်ႈတ︀င︀်းမ︀ꩫ︀်းꩡ︀ဝ်ႛ က︀ꩫ︀်ႛꩫ︀ိူဝ်ꩬ︀ဝ်ဝႃးမ︀ိုဝ်းမ︀ႆ︀ႛ ꩫ︀ႆ︀ႛၵ︀ၢမ︀်တ︀ွက︀်ဝႆ︀ႇꩫ︀ႆ︀ႇꩫ︀ၵ︀ႃတ︀မ︀ိူင︀်းက︀ေႃႇ မ︀ꩫ︀်းꩡ︀ဝ်ႛမ︀ႆ︀ႛ က︀ေးလ︀ေးက︀ꩫ︀်ႈဢ︀ူ။
လ︀ွင︀်ႈꩡ︀ဝ်ႛယ︀ေꩬ︀ုꩡ︀ႂ်ႈၵ︀တ︀်
(မ︀ႃက︀ု 15.33-41; လ︀ုက︀ႃ 23.44-49; ယ︀ေႃးꩭၢꩫ︀် 19.28-30)
45မ︀ိူဝ်ႈဢ︀မ︀ႂ်း လ︀ုက︀်ႉက︀ၢင︀်ႈဝꩫ︀်းတ︀ီင︀်ႈမ︀ႆ︀ႛ ဢ︀ဝ်ႈထိုင︀်ꩬ︀ၢမ︀်မ︀ွင︀်း တ︀င︀်းမ︀ိူင︀်းမ︀ႆ︀ႛꩫ︀မ︀်ႈꩬ︀ိင︀်တ︀ိက︀်ႉꩰက︀ႃဢ︀ူ။ 46ယ︀ၢꩫ︀်ႈꩬ︀ၢမ︀်မ︀ွင︀်းမ︀ႆ︀ႛယ︀ႃႇ “ဢ︀ေလ︀ိ၊ ဢ︀ေလ︀ိ လ︀ႃမ︀ႃꩬ︀ျပ︀ၵ︀တ︀ႃꩫ︀ိ” ꩫ︀ꩬ︀ီꩡ︀ဝ်ႛယ︀ေꩬ︀ုဢ︀ိဝ်ဢ︀ူ။ တ︀ီႈပ︀ွင︀်ယ︀ႃႇ ၸ︀ြႃးက︀ဝ်ႈၵ︀ႃႛ၊ ၸ︀ြႃးက︀ဝ်ႈၵ︀ႃႛ ꩭီတ︀်က︀ꩬ︀င︀်ꩫ︀ႆ︀ က︀ဝ်ႈၵ︀ႃႛမ︀ႆ︀ႛ ၵ︀ွတ︀်ဝႆ︀ႇတ︀ီၵ︀ႃႛꩫ︀ႆ︀ႇ ꩫ︀ꩫ︀မ︀်။ 47က︀ူꩫ︀်းဢ︀ꩫ︀်ႈတ︀ႆ︀ၢႛဢ︀မ︀ႂ်းမ︀ႆ︀ႛ ꩬ︀ဝ်းꩬ︀ီဢ︀ူက︀မ︀်ႈၸ︀ွင︀်းယ︀ႃႇ ꩫ︀ႆ︀ႇမ︀ႆ︀ႛꩫ︀ႆ︀ႛꩥ︀ိꩫ︀်းက︀ီး “မ︀ꩫ︀်းပ︀ရ︀ေႃးၸ︀ႅတ︀်ႉဢ︀ေလ︀ိယ︀မ︀ႆ︀ႛꩥ︀ႃက︀ၢဝ်ဢ︀ူꩫ︀ႆ︀ႇ” ꩫ︀ဝꩫ︀်ႇ။ 48လ︀ုက︀်ႉꩫ︀ႂ်းၵ︀ဝ်မ︀ႆ︀ႛ က︀ူဝ်ႇလ︀ိူင︀်ႈယ︀ႃႇ က︀ꩡ︀ူးလ︀ႅꩫ︀်ႈက︀ႃꩬ︀ီ ပ︀ိင︀်ႈပ︀ူပ︀်ပ︀ၢင︀်လ︀ႆ︀ၢဢ︀ꩫ︀်ႈတ︀ဝ်းꩫ︀က︀ꩫ︀်ႈꩫ︀ႆ︀ႇ ဝၢႆ︀မ︀က︀်ꩡ︀ပ︀ႅတ︀်ႉꩬ︀ူမ︀်ႛမ︀ႆ︀ႛ ꩡ︀ုပ︀်ႉယ︀ဝ်ႇက︀ီး ပ︀ႆ︀ၢႈၵ︀ွꩫ︀်ႇမ︀ႆ︀ႛၸ︀ုက︀်ꩡ︀ပ︀်ꩬ︀ီ မ︀ꩫ︀်းꩡ︀ဝ်ႛမ︀ႆ︀ႛယ︀ုꩫ︀်ႈင︀ႆ︀း ꩭႂ်ႛက︀ိꩫ︀်ႈဢ︀ူ။ 49တ︀ၢင︀်က︀ူဝ်ႇꩫ︀ႆ︀ႇၵ︀ဝ်ယ︀ႃႇ “ꩭႂ်ႛဢ︀ူက︀ွတ︀်၊ မ︀ꩫ︀်းမ︀ႆ︀ႛပ︀ရ︀ေႃးၸ︀ႅတ︀်ႉဢ︀ေလ︀ိယ︀တ︀ီမ︀ႃးၵ︀ေꩬ︀ေက︀ႆ︀ႊ၊ ပ︀ႆ︀ႉ ꩡ︀ၢမ︀်းထႃႛလ︀ႅမ︀်းက︀ွတ︀်” ꩫ︀ဝꩫ︀်ႇ။ 50ꩫ︀ႆ︀ႇမ︀ႆ︀ႛꩭႃလ︀ိူင︀်ႈ ꩡ︀ဝ်ႛယ︀ေꩬ︀ု က︀ႃႈꩭႅင︀်းဢ︀ိဝ်ꩬ︀ီ ဢ︀ꩬ︀ၢက︀်ႉၵ︀ွတ︀်က︀ႃဢ︀ူ။ 51မ︀ိူဝ်ႈဢ︀မ︀ႂ်း ၸ︀ႃႛက︀င︀်ႛꩡ︀ွင︀်းၿိက︀်ႉမ︀ၢꩫ︀်ꩫ︀ႆ︀ႇ လ︀ုက︀်ႉꩡ︀ိက︀်မ︀ႆ︀ႛ ဢ︀ဝ်ႈထိုင︀်တ︀ိꩫ︀်ႈ ၸ︀ႃꩬ︀ွင︀်ꩬ︀ိက︀်ႉက︀ႃဢ︀ူ။ ဢ︀ိင︀်ႈꩬ︀ꩫ︀်ꩬ︀ီ ꩭိꩫ︀်ꩫ︀ႆ︀ႇၵ︀ဝ်က︀ေႃႇတ︀ႅက︀်ၸ︀ႃက︀ꩫ︀်ႈဢ︀ူ။ 52ပ︀ႃꩡ︀ႃႇꩫ︀ႆ︀ႇၵ︀ဝ်က︀ေႃႇ ပ︀ုတ︀်ဢ︀ွက︀်က︀ꩫ︀်ႈꩬ︀ီ က︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈတ︀ႆ︀ၢႈက︀ႃꩫ︀ႆ︀ႇၵ︀ဝ် ဢ︀ၢꩫ︀်တ︀ၢꩫ︀်ꩫ︀ိပ︀်မ︀ႃးပ︀ွက︀်ႉက︀ꩫ︀်ႈဢ︀ူ။ 53ၵ︀ဝ်ယ︀ႃႇလ︀ုက︀်ႉပ︀ႃꩡ︀ႃႇမ︀ႆ︀ႛဢ︀ွက︀်က︀ႃက︀ꩫ︀်ႈꩬ︀ီ က︀ꩫ︀်ႛလ︀င︀်ꩡ︀ဝ်ႛယ︀ေꩬ︀ုꩫ︀ိပ︀်မ︀ႃးပ︀ွက︀်ႉမ︀ႆ︀ႛ ဝီင︀်းမ︀ူတ︀်ꩡ︀ၢင︀်ယ︀ေရ︀ုꩬ︀လ︀ိမ︀်မ︀ႆ︀ႛ ၵ︀ဝ်ႛက︀ႃက︀ꩫ︀်ႈဢ︀ူ။ ဢ︀မ︀ႂ်းမ︀ႆ︀ႛက︀ူꩫ︀်းဢ︀ၢꩫ︀်တ︀ၢꩫ︀်က︀ေႃႇ ၵ︀ဝ်မ︀ႆ︀ႛꩭꩫ︀်က︀ꩫ︀်ႈဢ︀ူ။ 54ꩡ︀ဝ်ႛꩭူဝ်ꩬ︀ိူက︀်င︀ႆ︀း လ︀ုက︀်ႉꩬ︀ိူက︀်ဢ︀ꩫ︀်ႈꩡ︀ဝ်ႛယ︀ေꩬ︀ုမ︀ႆ︀ႛ ပ︀ႂ်ႇလ︀ႅမ︀်းက︀ꩫ︀်ႈꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈဢ︀ိင︀်ႈꩬ︀ꩫ︀်ꩫ︀ႆ︀ႇၵ︀ဝ် လ︀ွင︀်ႈပ︀ီꩫ︀်ႈတ︀ၢင︀်ဢ︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛꩭꩫ︀်က︀ီး က︀ူဝ်ႈတ︀ႆ︀ၢႈꩰက︀ꩫ︀်ႈꩬ︀ီ “က︀ူဝ်ႇꩫ︀ႆ︀ႇယ︀ႃႇ ၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛတ︀ေႇတ︀ေႇꩫ︀မ︀်” ꩫ︀ဝꩫ︀်ႇ။ 55ဢ︀မ︀ႂ်းမ︀ႆ︀ႛ ၸ︀ူႛယ︀ိင︀်းဢ︀ၢꩫ︀်တ︀ၢꩫ︀်က︀ေႃႇ လ︀ုက︀်ႉတ︀ီႈက︀ႆ︀ႈမ︀ႆ︀ႛ ꩡ︀ဝ်ႛယ︀ေꩬ︀ုမ︀ႆ︀ႛ လ︀ႅမ︀်းက︀ꩫ︀်ႈဢ︀ူ။ ၵ︀ဝ်ယ︀ႃႇ က︀ူꩫ︀်းတ︀ိူင︀်းက︀ႃလ︀ိလ︀ႄး ဢ︀ꩫ︀်ႈက︀ꩫ︀်ႛလ︀င︀်မ︀ꩫ︀်းꩡ︀ဝ်ႛမ︀ႆ︀ႛꩡ︀ွမ︀်းꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ ꩡ︀ွႆ︀ႈꩭႂ်ႛမ︀ႃးꩫ︀ႆ︀ႇၵ︀ဝ်ꩫ︀မ︀်။ 56ၸ︀ူႛယ︀ိင︀်းဢ︀မ︀ႂ်းၵ︀ဝ်မ︀ႆ︀ႛ မ︀ေရ︀ီက︀ူꩫ︀်းမ︀ၢꩫ︀်ႛမ︀ႃက︀တ︀လ︀၊ မ︀ေရ︀ီၸ︀ူႛမ︀ေႈယ︀ႃက︀ုꩫ︀ၵ︀ႃယ︀ေႃတ︀ၢတ︀်င︀ႆ︀း ၸ︀ူႛမ︀ေးꩡ︀ေပ︀ေတ︀ႄၵ︀ဝ်က︀ေႃႇ လ︀ွေႛဢ︀ူ။
လ︀ွင︀်ႈꩭၢင︀်ႈꩡ︀ဝ်ႛယ︀ေꩬ︀ုမ︀ႆ︀ႛၸ︀င︀်
(မ︀ႃက︀ု 15.42-47; လ︀ုက︀ႃ 23.50-56; ယ︀ေႃးꩭၢꩫ︀် 19.38-42)
57-58ယ︀ေႃတ︀ၢတ︀်ꩫ︀ꩫ︀ႆ︀ႇ က︀ူꩫ︀်းဝီင︀်းဢ︀ရ︀ိမ︀တ︀ႄး ၸ︀ူႛမ︀ီးဢ︀ꩫ︀်ႈꩡ︀ဝ်ႛယ︀ေꩬ︀ုမ︀ႆ︀ႛ ယ︀ုမ︀်ယ︀မ︀်ႈက︀ူဝ်ႇလ︀ိူင︀်ႈယ︀င︀်းဢ︀ူ။ မ︀ꩫ︀်းယ︀ႃႇ ပ︀ၢင︀်ႛၵ︀မ︀်ႈထိုင︀်မ︀ႃးက︀ီး ပ︀ၢင︀်ႈꩫ︀ႃႛၵ︀ုꩫ︀်ပ︀ိလ︀ၢတ︀်မ︀ႆ︀ႛက︀ႃꩬ︀ီ ꩭၢင︀်ႈတ︀ႆ︀ၢႈꩡ︀ဝ်ႛယ︀ေꩬ︀ုက︀ႃယ︀ွꩫ︀်းဢ︀ူ။ ၵ︀ုꩫ︀်ပ︀ိလ︀ၢတ︀်က︀ေႃႇ ယ︀ေႃတ︀ၢတ︀်မ︀ႆ︀ႛ ꩭၢင︀်ႈတ︀ႆ︀ၢႈꩡ︀ဝ်ႛယ︀ေꩬ︀ုꩭႂ်ႛဢ︀ဝ်ႈက︀ႃဢ︀ူ။ 59ယ︀ေႃတ︀ၢတ︀်က︀ေႃႇ ꩭၢင︀်ႈတ︀ၢႆ︀ႈꩡ︀ဝ်ႛယ︀ေꩬ︀ုဢ︀ဝ်ႈက︀ႃꩬ︀ီ ဢ︀ဝ်ႈမ︀ꩫ︀်ႛမ︀ႂ်ၸ︀ွတ︀်ႉဢ︀ူ။ 60ယ︀ဝ်ႇက︀ီး ထမ︀်ႛပ︀ႃꩡ︀ႃႇ ဢ︀ꩫ︀်ႈမ︀ႂ် ဢ︀ꩫ︀်ႈꩡ︀ႃႇꩭၢင︀်းမ︀ꩫ︀်းꩡ︀ဝ်ႛ ၸ︀ႃꩭိꩫ︀်မ︀ႆ︀ႛၵ︀ွင︀်းꩬ︀ီꩭီတ︀်ဝႆ︀ႇမ︀ႆ︀ႛ ꩭၢင︀်ႈတ︀ၢႆ︀ႈꩡ︀ဝ်ႛယ︀ေꩬ︀ုဢ︀ဝ်ႈဝႆ︀ႇင︀ႆ︀း ꩭူးထမ︀်ႛမ︀ႆ︀ႛ ဢ︀ဝ်ႈꩭိꩫ︀်လ︀ူင︀်က︀ိင︀်ႛꩭၢပ︀်ဝႆ︀ႇꩬ︀ီ မ︀ိူဝ်းက︀ႃဢ︀ူ။ 61မ︀ိူဝ်ႈꩭၢင︀်ႈတ︀ၢႆ︀ႈꩡ︀ဝ်ႛယ︀ေꩬ︀ုမ︀ႆ︀ႛ ꩬ︀ႂ်ထမ︀်ႛꩫ︀ႆ︀ႇ မ︀ေရ︀ီက︀ူꩫ︀်းဝီင︀်းမ︀ႃက︀တ︀လ︀င︀ႆ︀း မ︀ေရ︀ီၸ︀ူႛမ︀ေႈယ︀ႃက︀ုꩫ︀ၵ︀ႃယ︀ေႃတ︀ၢတ︀်က︀ေႃႇ က︀ꩫ︀်ႛꩫ︀ႃႛထမ︀်ႛပ︀ႃꩡ︀ႃႇဢ︀မ︀ႂ်းမ︀ႆ︀ႛ ပ︀ႂ်ႇလ︀ႅမ︀်းဢ︀ူ။
လ︀ွင︀်ႈၸ︀ူႛပ︀ႂ်ႇထမ︀်ႛꩡ︀ဝ်ႛယ︀ေꩬ︀ုꩫ︀ႆ︀ႇၵ︀ဝ်
62ꩫ︀င︀်မ︀ိူဝ်ႈꩭုက︀်ႉ ဝꩫ︀်းက︀မ︀်ႈꩬ︀ိꩫ︀်မ︀ႆ︀ႛ ယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ်င︀ႆ︀း ၸ︀ႃရ︀ိꩬ︀ႄꩫ︀ႆ︀ႇၵ︀ဝ် ၵ︀ုꩫ︀်ပ︀ိလ︀ၢတ︀်မ︀ႆ︀ႛက︀ႃꩬ︀ီ 63“ꩡ︀ဝ်ႛၵ︀ုꩫ︀်ꩴ︀း ဢ︀ႆ︀ၢႛꩡ︀ၢင︀်ႈၸ︀ႅတ︀်ႉဢ︀မ︀ႂ်း “တ︀ၢင︀်ꩬ︀ၢမ︀်ဝꩫ︀်းမ︀ႆ︀ႛ က︀ဝ်ႈမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ တ︀ီဢ︀ဝ်ႈꩫ︀ိပ︀်ပ︀ွက︀်ႉမ︀ႃးꩫ︀မ︀်” ꩫ︀ꩬ︀ီ မ︀ꩫ︀်းꩭွꩫ︀်ဝႃႈမ︀ႃးꩫ︀ႆ︀ႇမ︀ႆ︀ႛ တ︀ူႈမ︀တ︀်ႉဢ︀ူ။ 64င︀ႆ︀းꩫ︀ႆ︀ႇꩬ︀ီ လ︀ုက︀်ႉꩬ︀ိူက︀်ꩫ︀ႆ︀ႇၵ︀ဝ်မ︀ႆ︀ႛ ဢ︀မ︀ိင︀်းပ︀ူင︀်ႈꩭႂ်ႛꩬ︀ီ ဢ︀ဝ်ႈထိုင︀်တ︀ၢင︀်ꩬ︀ၢမ︀်ဝꩫ︀်း ထမ︀်ႛပ︀ႃꩡ︀ႃႇမ︀ႆ︀ႛꩭႂ်ႛပ︀ႂ်ႇꩫ︀ီႈꩫ︀ီႈမ︀ႃးတ︀ႃႉ။ ꩫ︀ႆ︀ႇမ︀ဝ်ꩡ︀ႂ်ႈက︀ီး င︀ႆ︀ႚတ︀ပ︀ေးမ︀ꩫ︀်းၵ︀ဝ် ꩭၢင︀်ႈမ︀ꩫ︀်းမ︀ႆ︀ႛလ︀ၢက︀်ႉက︀ႃꩬ︀ီ မ︀ꩫ︀်းꩫ︀ိပ︀်ပ︀ွက︀်ႉယ︀ဝ်ႇꩫ︀ꩬ︀ီ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ၸ︀ႅတ︀်ႉလ︀ေဢ︀ူ။ ပ︀ူဝ်းင︀ႆ︀းက︀ီး င︀ႆ︀ႚ ဢ︀ꩫ︀်ႈပ︀ႆ︀ၢႈꩭၢင︀်မ︀ႆ︀ႛၸ︀ၢမ︀်းꩫ︀ႆ︀ႇ ဢ︀ꩫ︀်ႈက︀ꩫ︀်ႛꩫ︀ႃႛမ︀ႆ︀ႛၸ︀ၢမ︀်းမ︀ႃးꩫ︀ႆ︀ႇၵ︀ဝ်မ︀ႆ︀ႛ လ︀ိူမ︀်ꩬ︀ႃက︀ႃဢ︀ူ” ꩫ︀ꩬ︀ီꩬ︀ွက︀်ႉက︀ꩫ︀်ႈဢ︀ူ။ 65ၵ︀ုꩫ︀်ပ︀ိလ︀ၢတ︀်က︀ေႃႇ “လ︀ုက︀်ႉꩬ︀ိူက︀်က︀မ︀်ႈၸ︀ွင︀်းꩭွင︀်ႇက︀ႃꩬ︀ီ ထမ︀်ႛပ︀ႃꩡ︀ႃႇဢ︀မ︀ႂ်းမ︀ႆ︀ႛ ꩭႂ်ႛပ︀ႂ်ႇက︀တ︀်ႉꩰလ︀ႃး” ꩫ︀ဝꩫ︀်ႇ။ 66င︀ႆ︀းꩬ︀ီ ၵ︀ဝ်က︀ေႃႇထမ︀်ႛပ︀ႃꩡ︀ႃႇဢ︀မ︀ႂ်းမ︀ႆ︀ႛက︀ႃꩬ︀ီ ꩭိꩫ︀်ဢ︀ꩫ︀်ႈဢ︀ူတ︀်ꩭူးထမ︀်ႛဢ︀မ︀ႂ်းမ︀ႆ︀ႛ ꩡ︀ုမ︀်ႛတ︀ွက︀်ဝႆ︀ႇင︀ႆ︀း ꩭၢပ︀်ဝႆ︀ႇက︀တ︀်ႉꩰဢ︀ူ။ ယ︀ဝ်ႇက︀ီး လ︀ုက︀်ႉꩬ︀ိူက︀်ꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛပ︀ႂ်ႇဝႆ︀ႇဢ︀ူ။
Одоогоор Сонгогдсон:
မ︀တ︀်တ︀ႄး 27: kht
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2023 (Active), Wycliffe Bible Translators, Inc. All rights reserved.