မ︀တ︀်တ︀ႄး 15

ꩡ︀ဝ်ႛယ︀ေꩬ︀ုꩬ︀ွꩫ︀်လ︀ွင︀်ႈထွမ︀်ꩡ︀ွမ︀်းတ︀ြႃးၸ︀ြႃးပ︀ီꩫ︀်ႈꩡ︀ဝ်ႛတ︀ေႇတ︀ေႇ

(မ︀ႃက︀ု 7.1-13)

1ၸ︀ႃရ︀ိꩬ︀ႄက︀မ︀်ႈၸ︀ွင︀်းင︀ႆ︀း ꩬ︀ြႃတ︀ြႃးက︀မ︀်ႈၸ︀ွင︀်း လ︀ုက︀်ႉဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ မ︀ႃးꩬ︀ီ ꩡ︀ဝ်ႛယ︀ေꩬ︀ုမ︀ႆ︀ႛ 2“ꩭီတ︀်က︀ꩬ︀င︀်ꩫ︀ႆ︀ တ︀ပ︀ေးမ︀ႂ်းၵ︀ဝ်ယ︀ႃႇ ဢ︀ꩫ︀်ႈပ︀ူလ︀ီꩫ︀်ꩫ︀ႆ︀ႇၵ︀ဝ်ꩬ︀င︀်ꩬ︀ွꩫ︀်ဝႆ︀ႇမ︀ႆ︀ႛ မ︀ဝ်ꩡ︀ွမ︀်းꩫ︀ႆ︀ႇ။ ꩭီတ︀်က︀ꩬ︀င︀်ꩫ︀ႆ︀ၵ︀ဝ် ꩭႂ်ႛပ︀ူဝ်းမ︀ူတ︀်ꩡ︀ၢင︀်ꩫ︀ႆ︀ႇ ꩫ︀င︀်ထုင︀်းၸ︀ႃꩬ︀ႃꩭဝ်းꩬ︀ုက︀်ႉမ︀ိုဝ်းꩫ︀က︀ꩫ︀်ႈ မ︀ဝ်ꩬ︀ုက︀်ႉꩬ︀ီက︀ိꩫ︀်ႈၵ︀ဝ်ႛꩫ︀ႆ︀ႇ” ꩫ︀ဝꩫ︀်ႇ။ 3ꩡ︀ဝ်ႛယ︀ေꩬ︀ုယ︀ႃႇ “ꩬ︀ူꩬ︀ိုင︀် ꩭီတ︀်က︀ꩬ︀င︀်ꩫ︀ႆ︀ ထုင︀်းဢ︀ꩫ︀်ႈꩬ︀ူꩬ︀ွꩫ︀်မ︀ႆ︀ႛꩫ︀ႆ︀ၢႈꩬ︀ိုင︀်ꩡ︀ွမ︀်းꩬ︀ီ တ︀ြႃးၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ႃႇ မ︀ဝ်ထွမ︀်ꩫ︀ႆ︀ႇ။

4“ပ︀ူဝ်မ︀ေမ︀ႆ︀ႛယ︀မ︀်ႈင︀ဝ်းတ︀ႃႉ။ ပ︀ူဝ်မ︀ေမ︀ႆ︀ႛပ︀ၢဝ်က︀ီး

ဝႃႈၵ︀ၢမ︀်တ︀ၢမ︀်တ︀ႆ︀ၢႈဢ︀ူ” ꩫ︀ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛဝႃႈဝႆ︀ႇꩫ︀ႆ︀ႇ။

5ၵ︀ိုꩫ︀်းꩫ︀က︀ဝ်ꩬ︀ူယ︀ႃႇ င︀ိူꩫ︀်းဢ︀ꩫ︀်ႈꩡ︀ႃႇꩭၢင︀်းꩡ︀ွႆ︀ႈပ︀ူဝ်မ︀ေယ︀င︀်းက︀ီး တ︀ႃႇတ︀ီꩡ︀ွႆ︀ႈပ︀ူဝ်မ︀ေယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛꩫ︀မ︀် ဝႃႈလ︀ူꩫ︀ႆ︀ႇꩫ︀ꩬ︀ီ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛꩬ︀ွꩫ︀်ꩫ︀ႆ︀ႇ။ 6ꩬ︀ူင︀ႆ︀းꩬ︀ီ တ︀ြႃးၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛဝႆ︀ႇꩬ︀ႆ︀ၢႇꩬ︀ီ ꩭႂ်ႛပ︀ူဝ်းဢ︀ꩫ︀်ႈꩬ︀ူꩬ︀ွꩫ︀်မ︀ႆ︀ႛꩬ︀ိုင︀် က︀ူꩫ︀်းꩫ︀ႆ︀ႇၵ︀ဝ်ꩡ︀ွမ︀်းꩫ︀ႆ︀ႇ ꩬ︀ူꩬ︀ွꩫ︀်ꩭႂ်ႛဢ︀ူ။ 7ꩬ︀ူယ︀ႃႇၸ︀ူႛက︀ႅမ︀်ႛꩫ︀ႃႛလ︀ူင︀်ꩫ︀မ︀်။ ဢ︀ꩫ︀်ႈက︀ျမ︀်းꩭေꩬ︀ႃယ︀မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛဝႃႈဝႆ︀ႇꩫ︀ႆ︀ႇ တ︀င︀်းꩬ︀ူꩥ︀ႃးပ︀ေႃႚꩫ︀ꩬ︀ႃး။ ဢ︀မ︀ႂ်းမ︀ႆ︀ႛဝႃႈဝႆ︀ႇꩫ︀ႆ︀ႇယ︀ႃႇ

8“က︀ူꩫ︀်းꩫ︀ႆ︀ႇၵ︀ဝ် က︀ဝ်ႈမ︀ႆ︀ႛဢ︀ဝ်ႈꩬ︀ူပ︀်ယ︀ႃႇ ယ︀ူဝ်းယ︀ွင︀်ႛဢ︀ူ။

ꩫ︀ႆ︀ႇꩫ︀က︀ေႃႇ ꩭူဝ်ꩡ︀ႂ်ႈၵ︀ဝ်ယ︀ႃႇ တ︀င︀်းက︀ဝ်ႈက︀ႆ︀ႈလ︀ူင︀်ꩫ︀မ︀်။

9ၵ︀ဝ်က︀ဝ်ႈမ︀ႆ︀ႛ ပ︀ႆ︀ၢႛဝႆ︀ႈꩫ︀ႆ︀ႇ ဢ︀က︀ိဝ်း က︀ꩬ︀င︀်က︀ေႃႇꩵ︀ႈယ︀င︀်း။

က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၵ︀ဝ်ယ︀ႃႇ ထုင︀်းက︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛꩬ︀ိုင︀် ꩭီတ︀်တ︀ြႃးက︀ဝ်ႈꩬ︀ီ ပ︀ိူꩫ︀်ႈမ︀ႆ︀ႛꩬ︀ွꩫ︀်ꩭႂ်ႛꩫ︀မ︀်” ꩫ︀ဝꩫ︀်ႇ။

ဢ︀ꩫ︀်ႈက︀ူꩫ︀်းမ︀ႆ︀ႛဢ︀ဝ်ႈယ︀ုက︀်ႉꩭင︀်ႛတ︀ေႇတ︀ေႇꩫ︀ႆ︀ႇၵ︀ဝ်

(မ︀ႃက︀ု 7.14-23)

10ယ︀ဝ်ႇက︀ီး ꩡ︀ဝ်ႛယ︀ေꩬ︀ု ၸ︀ုင︀်က︀ူꩫ︀်းမ︀ႆ︀ႛꩭွင︀်ႇတ︀ုမ︀်ႈꩬ︀ီ “ဢ︀ꩫ︀်ႈက︀ဝ်ႈဝႃႈမ︀ႆ︀ႛ ထွမ︀်ꩫ︀ီႈꩫ︀ီႈ၊ ၵ︀ႂ်ႈꩡ︀ႂ်ႈꩫ︀ီႈꩫ︀ီႈက︀ꩫ︀်ႈတ︀ႃႉ။ 11ဢ︀ꩫ︀်ႈꩬ︀ူမ︀ႆ︀ႛဢ︀ဝ်ႈယ︀ုက︀်ႉꩭင︀်ႛတ︀ေႇတ︀ေႇꩫ︀ႆ︀ႇယ︀ႃႇ ဢ︀ꩫ︀်ႈꩬ︀ူပ︀်ꩬ︀ူမ︀ႆ︀ႛ ၵ︀ဝ်ႛက︀ႃꩫ︀ႆ︀ႇꩵ︀ႈꩡ︀ႂ်ႈ။ ဢ︀ꩫ︀်ႈလ︀ုက︀်ႉꩬ︀ူပ︀်ꩬ︀ူမ︀ႆ︀ႛ တ︀ၢꩫ︀်ႛဢ︀ွက︀်မ︀ႃးꩫ︀ႆ︀ႇၵ︀ဝ်ꩫ︀မ︀် ꩬ︀ူမ︀ႆ︀ႛဢ︀ဝ်ႈယ︀ုက︀်ႉꩭင︀်ႛတ︀ေႇတ︀ေႇꩫ︀ႆ︀ႇ” ꩫ︀ဝꩫ︀်ႇ။ 12ꩫ︀ႆ︀ႇမ︀ႆ︀ႛ တ︀ပ︀ေးꩡ︀ဝ်ႛၵ︀ဝ်မ︀ႃးꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ “ꩡ︀ဝ်ႛꩴ︀း ဢ︀ꩫ︀်ႈမ︀ႂ်းꩡ︀ဝ်ႛဝႃႈမ︀ႆ︀ႛ ၸ︀ႃရ︀ိꩬ︀ႄꩫ︀ႆ︀ႇၵ︀ဝ် ၵ︀ႂ်ႈꩡ︀ႃႇလ︀ူင︀်တ︀ီၵ︀ႃႛꩫ︀မ︀်” ꩫ︀ဝꩫ︀်ႇ။ 13ꩡ︀ဝ်ႛယ︀ေꩬ︀ုယ︀ႃႇ “ၸ︀ႃရ︀ိꩬ︀ႄꩫ︀ႆ︀ႇၵ︀ဝ်ယ︀ႃႇ တ︀ူꩫ︀်ႛဢ︀ꩫ︀်ႈပ︀ူဝ်က︀ၢင︀်ႈꩭၢဝ်က︀ဝ်ႈ မ︀ဝ်ပ︀ုက︀်ဝႆ︀ႇꩫ︀ႆ︀ႇၵ︀ဝ်ꩫ︀က︀ꩫ︀်ႈꩫ︀မ︀်။ တ︀ူꩫ︀်ႛဢ︀မ︀ႂ်းၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛတ︀ီထွေႛၵ︀ွတ︀်ꩫ︀မ︀်။ 14လ︀ႆ︀ၢးပ︀ိူဝ်ႈၸ︀ႃရ︀ိꩬ︀ႄꩫ︀ႆ︀ႇၵ︀ဝ်ꩬ︀ီ ꩬ︀ူပ︀ီက︀ပ︀်ႉꩡ︀ႂ်ႈ။ ၵ︀ဝ်ယ︀ႃႇ ၸ︀ူႛတ︀ႃႈမ︀ွတ︀် ဢ︀ꩫ︀်ႈၸ︀ူႛတ︀ႃႈမ︀ွတ︀်ꩫ︀ႆ︀ႇၵ︀ဝ်မ︀ႆ︀ႛ ဢ︀ွꩫ︀်ႈတ︀ၢင︀်းꩫ︀မ︀်။ ၸ︀ူႛတ︀ႃႈမ︀ွတ︀်မ︀ႆ︀ႛ ၸ︀ူႛတ︀ႃႈမ︀ွတ︀်ဢ︀ွꩫ︀်ႈတ︀ၢင︀်းက︀ီး တ︀င︀်းꩬ︀ွင︀်က︀ူဝ်ႇ တ︀ူက︀်ꩭွင︀်ႈက︀ႃဢ︀ူ” ꩫ︀ဝꩫ︀်ႇ။ 15ပ︀ေတ︀ရ︀ုယ︀ႃႇ “ꩬ︀ဝ်ၵ︀ၢမ︀်းဢ︀မ︀ႂ်း ၵ︀ႆ︀ႈꩭႂ်ႛတ︀ီၵ︀ႃႛမ︀လ︀ႃး” ꩫ︀ဝꩫ︀်ႇ။ 16ꩫ︀ႆ︀ႇမ︀ႆ︀ႛ ꩡ︀ဝ်ႛယ︀ေꩬ︀ုယ︀ႃႇ “ꩬ︀ူယ︀ႃႇ ꩭလ︀ိုဝ်ꩫ︀ႆ︀ တ︀ူက︀်ꩡ︀ိူမ︀်ႈင︀ႆ︀ႚက︀ေႃႇ ꩫ︀င︀်ပ︀ိူꩫ︀်ႈꩫ︀က︀ꩫ︀်ႈ တ︀ꩫ︀်ႈပ︀ိပ︀ိꩬ︀ီဢ︀ူꩫ︀ႆ︀ႇ။ 17ဢ︀ꩫ︀်ႈပ︀ၢက︀်ꩬ︀ူမ︀ႆ︀ႛၵ︀ဝ်ႛက︀ႃꩫ︀ႆ︀ႇ တ︀ွင︀်ႇမ︀ႆ︀ႛထိုင︀်ꩬ︀ီ လ︀ုက︀်ႉတ︀ူဝ်ႈမ︀ႆ︀ႛ ဢ︀ွက︀်က︀ႃပ︀ွက︀်ႉꩬ︀ႃး။ 18ဢ︀ꩫ︀်ႈလ︀ုက︀်ႉꩬ︀ူပ︀်ꩬ︀ူမ︀ႆ︀ႛ ဢ︀ွက︀်မ︀ႃးꩫ︀ႆ︀ႇယ︀ႃႇ လ︀ုက︀်ႉꩭူဝ်ꩡ︀ႂ်ႈမ︀ႆ︀ႛဢ︀ွက︀်မ︀ႃးꩫ︀ႆ︀ႇꩬ︀ီ ဢ︀မ︀ႂ်းၵ︀ဝ်ꩬ︀ႃး ꩬ︀ူမ︀ႆ︀ႛဢ︀ဝ်ႈယ︀ုက︀်ႉꩭင︀်ႛတ︀ေႇတ︀ေႇꩫ︀ႆ︀ႇ။ 19လ︀ုက︀်ႉꩭူဝ်ꩡ︀ႂ်ႈမ︀ႆ︀ႛꩬ︀ႃး ꩡ︀ႂ်ႈဢ︀ꩫ︀်ႈမ︀ဝ်ꩫ︀ီႈ၊ ꩡ︀ႂ်ႈဢ︀ꩫ︀်ႈဢ︀ဝ်ႈတ︀ႆ︀ၢႈပ︀ိူꩫ︀်ႈ၊ ဢ︀ꩫ︀်ႈၸ︀ိတ︀်ၸ︀ူဝ် ၸ︀ိတ︀်မ︀ေးပ︀ိူꩫ︀်ႈ၊ ဢ︀ꩫ︀်ႈၸ︀ိတ︀်လ︀ုက︀်ႉလ︀ၢင︀်းပ︀ိူꩫ︀်ႈ၊ ဢ︀ꩫ︀်ႈလ︀ၢက︀်ႉ၊ ဢ︀ꩫ︀်ႈၸ︀ႅတ︀်ႉင︀ႆ︀း ဢ︀ꩫ︀်ႈဢ︀ဝ်ႈꩬ︀ူဝ်ႇပ︀ိူꩫ︀်ႈꩫ︀ႆ︀ႇၵ︀ဝ် ဢ︀ွက︀်မ︀ႃးꩫ︀ႆ︀ႇ။ 20ဢ︀မ︀ႂ်းၵ︀ဝ်ꩬ︀ႃး ꩬ︀ူမ︀ႆ︀ႛဢ︀ဝ်ႈယ︀ုက︀်ႉꩭင︀်ႛတ︀ေႇတ︀ေႇꩫ︀ႆ︀ႇ။ ဢ︀ꩫ︀်ႈꩫ︀င︀်ထုင︀်းၸ︀ႃꩬ︀ႃꩬ︀ုက︀်ႉမ︀ိုဝ်း ဢ︀ꩫ︀်ႈၵ︀ဝ်ꩬ︀ွꩫ︀်ꩫ︀က︀ꩫ︀်ႈ မ︀ဝ်ꩬ︀ုက︀်ႉꩬ︀ီ က︀ိꩫ︀်ႈꩫ︀ႆ︀ႇယ︀ႃႇ ꩬ︀ူမ︀ႆ︀ႛꩵ︀ႈဢ︀ဝ်ႈယ︀ုက︀်ႉꩭင︀်ႛတ︀ေႇတ︀ေႇ” ꩫ︀ဝꩫ︀်ႇ။

ၸ︀ူႛယ︀ိင︀်းဢ︀ꩫ︀်ႈက︀ျူးမ︀ဝ်ꩡ︀ႂ်ႈဢ︀ꩫ︀်ႈ ꩡ︀ဝ်ႛယ︀ေꩬ︀ုမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈ

(မ︀ႃက︀ု 7.24-30)

21ဝႆ︀ၢးဢ︀မ︀ႂ်း ꩡ︀ဝ်ႛယ︀ေꩬ︀ု လ︀ုက︀်ႉဢ︀မ︀ႂ်းမ︀ႆ︀ႛဢ︀ွက︀်ꩬ︀ီ တ︀ူင︀်ႈတ︀ၢင︀်ႇတ︀ႆ︀ၢႛဝီင︀်းတ︀ုရ︀ုꩫ︀ၵ︀ႃဝီင︀်းꩡ︀ိတ︀ုင︀်မ︀ႆ︀ႛက︀ႃဢ︀ူ။ 22ၸ︀ူႛယ︀ိင︀်းၵ︀ႃꩫ︀ၢꩫ︀် တ︀ူင︀်ႈတ︀ၢင︀်ႇဢ︀မ︀ႂ်းက︀ူဝ်ႇလ︀ိူင︀်ႈယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛမ︀ႃးꩬ︀ီ “လ︀ုက︀်ႉꩡ︀ႆ︀ၢးꩡ︀ဝ်ႛꩭူဝ်ၵ︀မ︀်းၻႃဝိတ︀ီၵ︀ႃႛ ဢ︀ီꩫ︀ူႈꩬ︀ီꩡ︀ွႆ︀ႈꩭႂ်ႛတ︀ီၵ︀ႃႛမ︀ႃးတ︀ႃႉ။ လ︀ုက︀်ႉယ︀ိင︀်းက︀ဝ်ႈၵ︀ႃႛမ︀ႆ︀ႛ ၸ︀ီꩭၢႆ︀ႇလ︀ွေႛꩫ︀ႆ︀ႇꩬ︀ီ ယ︀ၢက︀်ႉလ︀ူင︀်တ︀ီၵ︀ႃႛꩫ︀မ︀်” ꩫ︀ꩬ︀ီꩬ︀ွက︀်ႉဢ︀ူ။ 23ꩡ︀ဝ်ႛယ︀ေꩬ︀ုယ︀ႃႇ ဝႃႈꩭိုဝ်က︀ေႃႇ ꩵ︀ႈဝႃႈပ︀ွက︀်ႉ။ ꩫ︀ႆ︀ႇမ︀ႆ︀ႛ တ︀ပ︀ေးꩡ︀ဝ်ႛၵ︀ဝ်ယ︀ႃႇ မ︀ꩫ︀်းꩡ︀ဝ်ႛမ︀ႆ︀ႛမ︀ႃးꩬ︀ီ “ꩡ︀ဝ်ႛꩴ︀း မ︀ေꩫ︀ႆ︀ႇမ︀ႆ︀ႛꩭႂ်ႛက︀ႃတ︀ီၵ︀ႃႛတ︀ႃႉ။ တ︀ူႈၵ︀ႃႛမ︀ႆ︀ႛꩡ︀ွမ︀်းယ︀ုင︀်ꩰꩬ︀ီ ꩫ︀ွႆ︀ႈꩥ︀ႄႇꩰတ︀ီၵ︀ႃႛဢ︀ူ” ꩫ︀ꩬ︀ီ ꩬ︀ွက︀်ႉဢ︀ူ။ 24ꩡ︀ဝ်ႛယ︀ေꩬ︀ုယ︀ႃႇ ၸ︀ူႛယ︀ိင︀်းဢ︀မ︀ႂ်းမ︀ႆ︀ႛ “က︀ဝ်ႈမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ ပ︀ွႆ︀ꩡ︀ႂ်ႇꩫ︀ႆ︀ႇ ꩡ︀ႃႇဢ︀ီတ︀်ꩬ︀ြေးဢ︀ꩫ︀်ႈတ︀ူꩫ︀င︀်ပ︀ူႇက︀ဝ်ႈဢ︀ꩫ︀်ႈꩭႆ︀ၢꩫ︀ႆ︀ႇၵ︀ဝ်ꩫ︀ႆ︀ၢႈꩫ︀မ︀်” ꩫ︀ဝꩫ︀်ႇ။ 25ꩫ︀ႆ︀ႇမ︀ႆ︀ႛ ၸ︀ူႛယ︀ိင︀်းဢ︀မ︀ႂ်းယ︀ႃႇ ပ︀ၢင︀်ႈꩫ︀ႃႛမ︀ꩫ︀်းꩡ︀ဝ်ႛမ︀ႆ︀ႛ မ︀ႃးၵ︀ုပ︀်ႉၵ︀ဝ်ꩬ︀ီ “ꩡ︀ဝ်ႛꩴ︀း က︀ဝ်ႈၵ︀ႃႛမ︀ႆ︀ႛ ဢ︀ီꩫ︀ူႈꩬ︀ီꩡ︀ွႆ︀ႈꩭႂ်ႛတ︀ီၵ︀ႃႛမ︀ႃးတ︀ႃႉ” ꩫ︀ꩬ︀ီꩬ︀ွက︀်ႉꩫ︀က︀ဝ်ဢ︀ူ။ 26ꩡ︀ဝ်ႛယ︀ေꩬ︀ုယ︀ႃႇ “ဢ︀ꩫ︀်ႈက︀ိꩫ︀်ႈꩡ︀ႃႇၸ︀ူႛလ︀ုက︀်ႉꩫ︀ႆ︀ႇၵ︀ဝ်ဢ︀ဝ်ႈꩬ︀ီ မ︀ႃꩫ︀ႆ︀ႇၵ︀ဝ်မ︀ႆ︀ႛ ꩵ︀ႈဝႃႈꩭႂ်ႛ” ꩫ︀ဝꩫ︀်ႇ။ 27ၸ︀ူႛယ︀ိင︀်းဢ︀မ︀ႂ်းက︀ေႃႇ “ꩡ︀ႂ်ႈယ︀ႃႇ ꩡ︀ႂ်ႈတ︀ီၵ︀ႃႛဢ︀ူ။ ꩫ︀ႆ︀ႇꩫ︀က︀ေႃႇ ꩬ︀ၢက︀်ႉက︀ိꩫ︀်ႈဢ︀ꩫ︀်ႈလ︀ုက︀်ႉၸ︀ိူꩫ︀်ꩡ︀ဝ်ႛမ︀ႆ︀ႛ တ︀ူက︀်မ︀ႃးꩫ︀ႆ︀ႇၵ︀ဝ်ယ︀ႃႇ မ︀ႃꩫ︀ႆ︀ႇၵ︀ဝ်က︀ီပ︀်က︀ိꩫ︀်ႈတ︀ီၵ︀ႃႛဢ︀ူ” ꩫ︀ဝꩫ︀်ႇ။ 28ꩫ︀ႆ︀ႇမ︀ႆ︀ႛ ꩡ︀ဝ်ႛယ︀ေꩬ︀ုယ︀ႃႇ “ꩫ︀ၢင︀်းꩴ︀း မ︀ႂ်းက︀ဝ်ႈမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈတ︀ေႇတ︀ေႇꩫ︀ႆ︀ႇꩬ︀ီ ဢ︀ꩫ︀်ႈꩫ︀င︀်မ︀ႂ်းယ︀ွꩫ︀်းꩫ︀က︀ꩫ︀်ႈ မ︀ႂ်းမ︀ႆ︀ႛꩭႂ်ႛပ︀ီꩫ︀်ႈက︀တ︀ႃႉ” ꩫ︀ဝꩫ︀်ႇ။ မ︀ိူဝ်ႈဢ︀မ︀ႂ်းတ︀ေႇတ︀ေႇက︀ꩡ︀ူး လ︀ုက︀်ႉယ︀ိင︀်းမ︀ꩫ︀်း ဢ︀ူꩫ︀ီႈက︀ႃဢ︀ူ။

လ︀ွင︀်ႈꩡ︀ဝ်ႛယ︀ေꩬ︀ု က︀ူꩫ︀်းဢ︀ၢꩫ︀်တ︀ၢꩫ︀်မ︀ႆ︀ႛ ဢ︀ဝ်ႈꩫ︀ီႈꩭႂ်ႛ

29ꩡ︀ဝ်ႛယ︀ေꩬ︀ုၵ︀ဝ် လ︀ုက︀်ႉဢ︀မ︀ႂ်းမ︀ႆ︀ႛဢ︀ွက︀်ꩬ︀ီ ꩭိမ︀်းꩫ︀ွင︀်က︀ႃလ︀ိလ︀ႄးမ︀ႆ︀ႛတ︀ွင︀်ႈက︀ႃဢ︀ူ။ ယ︀ဝ်ႇက︀ီး မ︀ꩫ︀်းꩡ︀ဝ်ႛ ၵ︀ိုꩫ︀်ႛက︀ႃက︀ꩫ︀်ႛꩫ︀ိူဝ်ꩫ︀ွႆ︀ႈꩬ︀ီ ဢ︀မ︀ႂ်းမ︀ႆ︀ႛꩫ︀င︀်ႈဢ︀ူ။ 30ၸ︀ုင︀်က︀ူꩫ︀်းလ︀ူင︀် မ︀ꩫ︀်းꩡ︀ဝ်ႛမ︀ႆ︀ႛမ︀ႃးက︀ꩫ︀်ႈꩬ︀ီ က︀ူꩫ︀်းဢ︀ꩫ︀်ႈတ︀ိꩫ︀်ႈတ︀ႆ︀ၢႈ၊ ဢ︀ꩫ︀်ႈတ︀ႃႈမ︀ွတ︀်၊ ဢ︀ꩫ︀်ႈꩬ︀ိက︀်ႉၵ︀ိင︀်းမ︀ဝ်က︀ုမ︀်၊ ဢ︀ꩫ︀်ႈတ︀ၢꩫ︀်ႛမ︀ဝ်ꩫ︀ႆ︀ႛင︀ႆ︀း ၸ︀ူႛၵ︀ႆ︀ႛၸ︀ူႛꩡ︀ီပ︀်တ︀ၢင︀်ၸ︀ꩫ︀်းꩫ︀ႆ︀ႇၵ︀ဝ် ꩭွင︀်ႇမ︀ႃးꩬ︀ီ ပ︀ၢင︀်ႈꩫ︀ႃႛမ︀ꩫ︀်းꩡ︀ဝ်ႛမ︀ႆ︀ႛ ꩭႂ်ႛဢ︀ူက︀ꩫ︀်ႈဢ︀ူ။ ၵ︀ဝ်တ︀င︀်းလ︀ုင︀်မ︀ႆ︀ႛ ꩡ︀ဝ်ႛယ︀ေꩬ︀ုဢ︀ဝ်ႈꩫ︀ီႈꩭႂ်ႛဢ︀ူ။ 31က︀ူꩫ︀်းဢ︀ꩫ︀်ႈတ︀ၢꩫ︀်ႛမ︀ဝ်ꩫ︀ႆ︀ႛꩫ︀ႆ︀ႇၵ︀ဝ် တ︀ၢꩫ︀်ႛမ︀ႃး၊ ဢ︀ꩫ︀်ႈꩬ︀ိက︀်ႉၵ︀ိင︀်းမ︀ဝ်က︀ုမ︀်ꩫ︀ႆ︀ႇၵ︀ဝ် ꩬ︀ိက︀်ႉၵ︀ိင︀်းက︀ုမ︀်မ︀ႃး၊ ဢ︀ꩫ︀်ႈတ︀ိꩫ︀်ႈတ︀ႆ︀ၢႈꩫ︀ႆ︀ႇၵ︀ဝ် ၸ︀ႆ︀ၢႛမ︀ႃး၊ ဢ︀ꩫ︀်ႈတ︀ႃႈမ︀ွတ︀်ꩫ︀ႆ︀ႇၵ︀ဝ် ꩭꩫ︀်မ︀ႃးက︀ꩫ︀်ႈက︀ီး က︀ူꩫ︀်းဢ︀ꩫ︀်ႈလ︀ႅမ︀်းက︀ꩫ︀်ႈꩫ︀ႆ︀ႇၵ︀ဝ်ယ︀ႃႇ ဢ︀ၢမ︀်းက︀ꩫ︀်ႈꩬ︀ီ မ︀ူꩫ︀်ႈꩡ︀ဝ်ႛထႃဝရ︀ၸ︀ြႃးမ︀ႆ︀ႛ ယ︀ူဝ်းယ︀ွင︀်ႛက︀ꩫ︀်ႈဢ︀ူ။

လ︀ွင︀်ႈက︀ူꩫ︀်းꩬ︀ီꩭီင︀်မ︀ႆ︀ႛ ꩡ︀ဝ်ႛယ︀ေꩬ︀ုလ︀ီင︀်ႇ

(မ︀ႃက︀ု 8.1-10)

32ဝၢႆ︀းꩫ︀ႆ︀ႇꩡ︀ဝ်ႛယ︀ေꩬ︀ု တ︀ပ︀ေးꩡ︀ဝ်ႛၵ︀ဝ်မ︀ႆ︀ႛꩭွင︀်ႇꩬ︀ီ “ၸ︀ုင︀်က︀ူꩫ︀်းꩫ︀ႆ︀ႇမ︀ႆ︀ႛ က︀ဝ်ႈဢ︀ီꩫ︀ူႈဢ︀ူ။ ၵ︀ဝ် တ︀င︀်းက︀ဝ်ႈဢ︀ူမ︀ႆ︀ႛꩫ︀ႆ︀ႇ ꩬ︀ၢမ︀်ဝꩫ︀်းတ︀မ︀ိူင︀်းꩭိုင︀်က︀ႃꩬ︀ီ င︀ႆ︀ႚၵ︀ဝ်မ︀ႆ︀ႛ ဢ︀ꩫ︀်ႈက︀ိꩫ︀်ႈꩵ︀ႈယ︀င︀်းပ︀ိူင︀်ႈလ︀ူင︀်ယ︀ဝ်ႇ။ ၵ︀ဝ်မ︀ႆ︀ႛ တ︀ွင︀်ႇမ︀ႆ︀ႛꩭႅဝ်ႇꩰꩬ︀ီ ꩵ︀ႈၵ︀ႂ်ႈꩭႂ်ႛမ︀ိူဝ်း။ င︀ႆ︀ႚတ︀ွꩫ︀်ႈတ︀ၢင︀်းမ︀ႆ︀ႛ မ︀ွႆ︀ႈက︀ႃက︀ꩫ︀်ႈဢ︀ူ” ꩫ︀ဝꩫ︀်ႇ။ 33တ︀ပ︀ေးꩡ︀ဝ်ႛၵ︀ဝ်ယ︀ႃႇ “ထိူꩫ︀်ꩭႅင︀်ႛꩫ︀ႆ︀ႇမ︀ႆ︀ႛ ဢ︀ꩫ︀်ႈက︀ိꩫ︀်ႈꩡ︀ႃႇၸ︀ုင︀်က︀ူꩫ︀်းလ︀ူင︀်ꩫ︀ႆ︀ႇ ဢ︀မ︀ႆ︀ႚက︀ေႃႇ က︀ႃၵ︀ႃꩵ︀ႈꩫ︀ႆ︀ႛတ︀ီၵ︀ႃႛ” ꩫ︀ꩬ︀ီꩬ︀ွက︀်ႉပ︀ွက︀်ႉဢ︀ူ။ 34ꩡ︀ဝ်ႛယ︀ေꩬ︀ုယ︀ႃႇ “ꩬ︀ူမ︀ႆ︀ႛဢ︀ꩫ︀်ႈက︀ိꩫ︀်ႈၵ︀ႂ်ႈလ︀ႂ်ႈꩫ︀ႆ︀ယ︀င︀်းꩫ︀ႆ︀ႇ” ꩫ︀က︀ီး “ၵ︀ဝ်ႛမ︀ုꩫ︀်းꩡ︀ီတ︀်ၵ︀ႅပ︀်င︀ႆ︀း ပ︀ႃႈꩡ︀ွꩫ︀်လ︀ိူင︀်ႈꩫ︀ႆ︀ၢႈꩫ︀မ︀်ယ︀င︀်းတ︀ီၵ︀ႃႛꩫ︀ႆ︀ႇ” ꩫ︀ဝꩫ︀်ႇ။ 35မ︀ꩫ︀်းꩡ︀ဝ်ႛ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ပ︀ၢင︀်မ︀ႆ︀ႛꩭႂ်ႛꩫ︀င︀်ႈယ︀ဝ်ႇက︀ီး 36ၵ︀ဝ်ႛမ︀ုꩫ︀်းꩡ︀ီတ︀်ၵ︀ႅပ︀်ꩫ︀ၵ︀ႃ ပ︀ႃႈဢ︀မ︀ႂ်းဢ︀ဝ်ႈꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ွꩫ︀်းꩬ︀ူးဢ︀ူ။ ယ︀ဝ်ႇက︀ီး ၵ︀ဝ်ႛမ︀ုꩫ︀်းꩫ︀ႆ︀ႇၵ︀ဝ်င︀ႆ︀းပ︀ႃႈဢ︀မ︀ႂ်းၵ︀ဝ်မ︀ိꩫ︀်ႛꩬ︀ီ တ︀ပ︀ေးꩡ︀ဝ်ႛၵ︀ဝ်မ︀ႆ︀ႛꩭႂ်ႛဢ︀ူ။ တ︀ပ︀ေးꩡ︀ဝ်ႛၵ︀ဝ်က︀ေႃႇဢ︀ဝ်ႈꩬ︀ီ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ပ︀ꩫ︀်ႈꩭႂ်ႛဢ︀ူ။ 37က︀ူꩫ︀်းꩫ︀ႆ︀ႇၵ︀ဝ်တ︀င︀်းမ︀ိူင︀်း က︀ိꩫ︀်ႈဢ︀ိမ︀်ꩰတ︀ီမ︀်ႈꩰယ︀ဝ်ႇꩬ︀ီ တ︀ပ︀ေးꩡ︀ဝ်ႛၵ︀ဝ် ၵ︀ဝ်ႛမ︀ုꩫ︀်းဢ︀ꩫ︀်ႈက︀ိူတ︀်ꩫ︀ႆ︀ႇ က︀ီပ︀်ꩭွမ︀်က︀ီး ꩡ︀ီတ︀်ꩬ︀ွင︀်းတ︀ီမ︀်ႈꩰꩫ︀ႆ︀ႛဢ︀ူ။ 38ၸ︀ုင︀်က︀ူꩫ︀်းဢ︀ꩫ︀်ႈက︀ိꩫ︀်ႈၵ︀ဝ်ႛမ︀ုꩫ︀်းဢ︀မ︀ႂ်းၵ︀ဝ်ယ︀ႃႇ ၸ︀ူႛယ︀ိင︀်းꩫ︀ၵ︀ႃလ︀ၵ︀ႃꩫ︀ႆ︀ႇၵ︀ဝ်မ︀ႆ︀ႛ မ︀ဝ်ၵ︀ၢꩫ︀်းꩫ︀ႆ︀ၢႈက︀ေႃႇ ꩬ︀ီꩭီင︀်က︀ူဝ်ႇယ︀င︀်းဢ︀ူ။ 39ဝႆ︀ၢးဢ︀မ︀ႂ်း ၸ︀ုင︀်က︀ူꩫ︀်းဢ︀မ︀ႂ်းၵ︀ဝ်မ︀ႆ︀ႛ ꩭႂ်ႛမ︀ိူဝ်းယ︀ဝ်ႇက︀ီး ꩡ︀ဝ်ႛယ︀ေꩬ︀ုတ︀င︀်းတ︀ပ︀ေးꩡ︀ဝ်ႛၵ︀ဝ် ၵ︀ီꩭိူဝ်းꩬ︀ီ က︀ႃတ︀ူင︀်ႈတ︀ၢင︀်ႇမ︀ႃက︀တ︀ႃလ︀ဢ︀ူ။

Одоогоор Сонгогдсон:

မ︀တ︀်တ︀ႄး 15: kht

Тодруулга

Хуваалцах

Хувилах

Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү

Khamti Shan-ийн талаар илүү ихийг мэдэж авах

မ︀တ︀်တ︀ႄး 15