Matyo 27
27
Bɨ Lɔgɨ a Yeso Ngɛn nɨ zɨ a Ɨshi Branto ghe
(Mar 15:1; Alu 23:1-2; Yoa 18:28-32)
1Njwi ghɨnə ndán, bɨntumshe bə wi bɨtsum abɔʼnɨ bɨkum bɨ alaʼ kəmnɨ ngɨ akyaŋtɨ a njwítɨ́ Yeso ghe. 2Bo kórɨ́ ayi nɨ mɨnkɨ mɨ atɨŋə, ndɔgɨ ayi ngɛn nga a mbó Branto wa Ɨfɔ bə Roma a lɛ́nɨ́ a sáʼ Mbuʼ Yudiya lá.
Adzaŋ za Yudasɨ a Kfónə́
(Ɨfa 1:18-19)
3Mbáʼ Yudasɨ, ŋwɔn wa a kórɨ́nɨ́ a mɨnaŋ atú Yeso, a zɛ́nɨ́ ngə́ bɨ chɛ́rɨ́ ɨsáʼ Yeso ngə́ a mɨ kfo lá, a bə́ŋ ntəm ɨyi mbə ngɛn nɨ ɨbagɨ tsə́ŋtsə́ŋ tsa mɨghúm mɨntárə́ a mbó bɨntumshe bə wi abɔʼnɨ bɨkum bɨ alaʼ, 4ɨ soŋ ngə́, “Ma ghɨ ɨbvu a nkórɨ́ mɨnaŋ, á alɛm a mbuʼ a chwinə!”
Bo chwɨ́gɨ́ ngə́, “A nɨ ake aza a mbó bɨgɨ ə? Məza a tiʼ azo ə!”
5Wɛrə a wáŋ nkáb atɨŋə tsa a mu Ndáŋwi zɨ Ngwi, ɨ nyɛʼtɨ; ntiʼ fu ngɛn ntɨŋnɨ alə́ŋ ə.
6Bɨntumshe bə wi byɛ́n nkáb atɨŋə tsa ɨ soŋ ngə́, “Nə nɨ nkáb alɛm ɨ zɛnə ghe. Ka a kuʼnɨ ayi a nɨ́ŋ zɛrə a mu nɨlɛnɨ nɨ ndáŋwi zɨ ngwi ə.” 7Bo tíʼ nkə́mnɨ́, ndzon adiʼ a ɨshe a mbó mbɔm bənto, a ntwə́ŋ ɨkfú bɨghən ɨwu ə. 8Ɨ lɔgɨnɨ njwi məwa, bɨ tíʼ nchwi abɨŋ a ɨshe za nɨ Ɨshe Alɛm ɨ yen kuʼ ɨ sɨŋə ghe.
9A tíʼ nkɔ́ʼ mbomnkɨ bo anu za ntom Ŋwi za bɨ kɨ́nə́ ntɔ́ŋə́ ngə́ Wemɨyɛrə ɨ sóŋnɨ́ ngə́, “Bɨ tíʼ ndɔgɨ ɨbagɨ tsə́ŋtsə́ŋ tsa mɨghúm mi mɨntárə́, ndvuŋ wa ɨbɛn bɨ Izrai bémnɨ́nɨ́ a ntfúə atú zɨ, 10ndzuŋ abɨŋ a ɨshe a mbɔm bənto ɨwu, adzaŋ za Maʼmbyí a tɨ́gɨ́tɨ́nɨ́ aghə.”
Branto a Bitɨ a Yeso nɨ Ɨbítɨ ə
(Mar 15:2-5; Alu 23:3-5; Yoa 18:33-38)
11Yeso a tɛ́m a ɨshi Branto wa a kɨ́nə́ sáʼə Mbuʼ Yudiya lá. Gobɨna wa a bítɨ́ ayi ngə́, “O lá Ɨfɔ bə Yuda le?”
Yeso a chwɨ́gɨ́ ngə́, “A soŋ gho ghe.” 12Lá a nkfu za bɨntumshe bə wi abɔʼnɨ bɨkum bɨ alaʼ káŋnɨ́ ayi lá, a sé anu zə tse chwɨgə.
13Ma lan, Branto a tíʼ mbítɨ́ ayi ngə́, “O so ndzǔʼ ndvuŋ ɨnu tsa bo kaŋnə agho mbɨ́ʼ a tsɛrə le?”
14Lá Yeso a sé tsɛʼ táʼ achwɨgə wəmbo gha, kə́ tsɛʼ táʼ achwɨgə ghe. Adzaŋ məwen, a tíʼ nkɨʼnɨ a gobɨna wa be tɨsɨŋə.
Bɨ Chɛrɨ Ɨsáʼ Yeso ngə́ a mɨ Kfo
(Mar 15:6-15; Alu 23:13-25; Yoa 18:39–19:16)
15A yén mbé mbɔm ngə́ a nkfu Nɨdorɨ nɨ Tsa-yɛʼnɨ, Branto a kə́ fɨ́gə́ a ŋwɔn atsáŋ wa nángyérə́ a kɨ́nə́ ndǒ, ngǎ a mbó bo ghe. 16A kə́ mbé a nkfu məwa lá, ŋwɔn atsáŋ wu tse wa bɨ zhínɨ́nɨ́ ayi a tsí ɨwu, ɨkum ɨyi be Barabasɨ ə. 17Ma lan, nángyérə́ wa a ghɨnə ngótɨ́ táʼ adiʼ, Branto a bitɨ awa ngə́, “Nɨ lǒ ngə́ á ma nyɛʼtɨ a wɨŋə a mbó bɨŋ ə? A Yeso Barabasɨ kə a Yeso, zɨ wa bɨ tɔ́ŋnə́ ngə́ Wa bɨ Zɔ́ʼnɨ́ lá le?” 18Wɛrə a zhí ɨ shiʼnɨ ngə́ bo yén ngá a Yeso a mbó zɨ lá mbɨ́ʼ aghɨʼnɨ ə.
19Mbáʼ Branto a shíʼtɨ́nɨ́ ntsi atú abyɛn lá, ngwe ɨyi a tságɨ́ nkən wəmbo, ɨ soŋ ngə́, “Tsɔʼ mbó ɨmo a nye ŋwɔn wa ɨnu ɨchi chinɨnɨ lá, mbɨ́ʼ ngə́ ma zɔgɨ a mu ndzɛm nɨ ɨtfúʼ sɨŋə mbɨ́ʼ atú azhi be tɨsɨŋə.”
20Bɨntumshe bə wi abɔʼnɨ bɨkum bɨ alaʼ lɛ́tɨ́ mɨntəm mɨ ɨbɛn ngə́ á bɨ gha a Barabasɨ a mbó bo, mbaŋnɨ njwitɨ a Yeso ghe. 21Lá Branto a kwíʼ mbítɨ́ ɨnɔ ɨbɛn wa ngə́, “A tɨtərɨ bo wen bɨbá, nɨ lǒ ngə́ á ma nyɛʼtɨ a wɨŋə a mbó bən le?”
Bo chwɨ́gɨ́ ngə́, “A Barabasɨ ə.”
22Branto a bítɨ́ awa ngə́, “Ma tiʼ mbú ɨ lə nɨ Yeso, zɨ wa bɨ tɔ́ŋnə́ ngə́ Wa bɨ Zɔ́ʼnɨ́ lá le?”
Bo bɨtsum chwɨ́gɨ́ ngə́, “Kwemtɨ ayi atɨ abaŋnɨ-baŋnɨ ə!”
23Lá Branto a bítɨ́ awa ngə́, “A fan lá a zɨŋ anu le?”
Bo tíʼ mbiʼnɨ ntɔ́nkə́ nɨ nji tsɨ tən ngə́, “Kwemtɨ ayi atɨ abaŋnɨ-baŋnɨ ə!”
24Branto a ghɨnə ndzɛ́n ngə́ zɨə kɨ chi keʼ anu aza kwebtɨ, ndum chi baŋnɨ bvugɨnɨ, ndɔgɨ nkyi ɨ sugɨ mbó ɨmyi ɨwu a ɨshi nángyérə́ wa, ɨ soŋ ngə́, “Ka abó azə a tsi ayi a nye nɨvwo nɨ ŋwɔn wiŋ ə! Məzen a ghɨ bɨŋ ə!”
25Nángyérə́ wa tsum a chwɨ́gɨ́ ngə́, “A alɛm azhi a chwinɨ atú bɨgɨ abɔʼnɨ tsɨ ɨbɔ ɨbɨgɨ ə!”
26Branto a tíʼ fɨ́gɨ́ a Barabasɨ atsáŋ nga a mbó bo ghe. A ghɨnə ndə́ŋ a Yeso nɨ ngwan, ntiʼ nga ayi a mbó bo ngə́ á bo ghɛn nkwemtɨ atɨ abaŋnɨ-baŋnɨ ə.
Bɨgwe Werɨ a Yeso ghe
(Mar 15:16-20; Yoa 19:2-3)
27Bɨgwe bɨ Branto tíʼ ndɔgɨ a Yeso ngɛn nɨ zɨ a mu bagɨ ntɔ́ʼ wu mɔʼɔ, aku aza bɨtsum a tiʼ ngyen nkarɨsɨ a Yeso ghe. 28Bo sɔ́tɨ́ ɨtsɛʼ ɨchi ɨtsum, ntiʼ so atsɛʼ zə mbaŋnɨ wə ɨnye za a ghɨ́nɨ́ ayi a fi a ɨfɔ ghe. 29Bo tíʼ ntúm ɨsáʼfɔ nɨ mɨndyíʼ mɨ ndzɔŋ ndzɔŋ ɨ so wu atú, ɨ nɨŋ mbaŋ a mu abó azhi zə maʼə ghe. Bo tíʼ nkwem mɨkwiʼtɨ ɨma wə ɨshi ɨ nɨŋnɨ ayi, ɨ soŋ ngə́, “Aghuʼsɨ a mbó Ɨfɔ bə Yuda ghe!” 30Bo tsə́rɨ́ mɨtwe wə ɨnye, nkwarɨ mbaŋ za ɨ shwom wu atú ə. 31Bɨ ghɨnə nɨ́ŋnɨ́ ayi ɨ mɛtɨ, ndvuŋ atsɛʼ zə mbaŋnɨ za wə ɨnye, ntiʼ mbə ngwəgɨ ɨchi ɨtsɛʼ wə ɨnye, ntiʼ ntintɨ ngɛn nɨ zɨ ɨ ghɛn kwemtɨ atɨ abaŋnɨ-baŋnɨ ə.
Bɨ Kwemtɨ a Yeso ghe
(Mar 15:21-32; Alu 23:26-43; Yoa 19:17-27)
32Bɨ tíʼ fú abyɛn, ntɨ ghěn nkwatɨ a ŋwɔn Sirin wa ɨkum ɨyi bénɨ́ Samɔn, ɨ nyəm ayi a byɛʼ abaŋnɨ-baŋnɨ Yeso ghe. 33Bo ghɨnə ngyén nkón adiʼ zə tse za bɨ kɨ́nə́ ntɔ́ŋə́ ngə́ Gɔlgɔta, ndiʼ ngə́, “Adiʼ aghɔʼrɨ atú ə.” 34Ɨwu bo ghá mɨluʼ a mbó Yeso ma bɨ nyámnɨ́ nɨ azúm zə tse za a kɨ́nə́ ndwiə ngə́ á no; a ghɨnə njwíʼtɨ́ a mɛrə, nton ayi a nó mɛrə ghe.
35Bo kwémtɨ́ ayi atɨ abaŋnɨ-baŋnɨ, ɨ maʼ ndzɔʼ a njí adzaŋ za bo mɨ yɛbtɨ ɨtsɛʼ ɨchi a tɨtərɨ bo ghe. 36Bo ghɨnə mɛ́tɨ́ a məza, ɨ shiʼtɨ ntsi a ɨshe ntiʼə ndyɛmə ayi ɛ. 37Wu atú, atɨ́, bɨ ŋwáʼnɨ́ ɨnu tsa bɨ káŋnɨ́ ayi ɨwu ntiʼ njwitɨ, mbán ngə́, “Lə nɨ Yeso Ɨfɔ bə Yuda a wɛnə ghe.” 38Bɨ tíʼ nkɨ́ nkwemtɨ ɨtɨtɨ́ŋ mɨzɛrə tsi bá bo bɨ Yeso, táʼ abó zɨ zə maʼə, wu mɔʼɔ abó ntə́ŋ ə.
39Ɨbɛn ba bɨ kɨ́nə́ ntsǎ bɨ kə́ ngwerə ayi, nchǐʼ ɨtú ɨtsa 40ɨ sóŋə́ ngə́, “O sóŋ ngə́ o mɨ kum Ndáŋwi zɨ Ngwi ɨ bə korɨ a zɛrə atú njwi tsi tárə́ ghe! Loŋ atuəmbəm azo mbáʼ be o be Mɔn Ŋwi ə! Shiʼ atú atɨ abaŋnɨ-baŋnɨ za!”
41Ndəŋndəŋ, bɨntumshe bə wi, bɨdiʼ bɨ Nyɔngɔŋ abɔʼnɨ bɨkum bɨ alaʼ kɨ́ ngwerɨ ayi, ɨ sóŋə́ ngə́, 42“A lóŋ a bə daŋ ə; a wen nchi keʼ atuəmbəm azhi loŋ lan! A se Ɨfɔ bə Izrai be le? Be a chi shiʼ atú atɨ abaŋnɨ-baŋnɨ zhirɨ ɨ shiʼ a ɨshe, muŋ bɨgɨ mɨ tiʼ nɨŋ mɨntəm ɨmɨgɨ ɨwu ngə́ a nɨ Wa bɨ Zɔ́ʼnɨ́ ə! 43A nɨŋ ntəm ɨyi a nye Ŋwi, nkə́ sóŋə́ ngə́ zɨə nɨ Mɔn Ŋwi ə. Bɨgɨnə tiʼə njwíʼtə́ lá ndzɛn ngə́ Ŋwi a lǒ ndoŋ zɨ tɨtsɔŋnɨ ə!”
44Ɨtɨtɨ́ŋ bɨzɛrə tsa bɨ kwémtɨ́nɨ́ awa bo bɨ Yeso lá, bɨ kɨ́ ndzɔŋ ndzɔm ayi a nye ndəŋndəŋ ndóm ə.
Adzaŋ za Yeso a Kfónə́
(Mar 15:33-41; Alu 23:44-49; Yoa 19:28-30)
45A ghɨnə mbé a ntənɨ nyom, ndzumnɨ ɨ kubɨnɨ alaʼ za atsum ɨ kɔʼ kuʼ a nye bɨnyom bɨtárə́ ghe. 46A ghɨnə mbé tso bɨnyom bɨtárə́, Yeso a bugɨ nɨ nji zɨ ntən ngə́, “Eli, Eli, lama sabaktani?” ndiʼ lá ngə́, “Ŋwi ɨghan, Ŋwi ɨghan, o nyɛʼ aghan mbɨ́ʼ ake le?”
47Ɨbɛn bə tse ba bɨ tɛ́mnɨ́ a ngɔbə zúʼ anu za a sóŋnɨ́ ntiʼ soŋ ngə́, “Ŋwɔn wen a tɔŋə Alaja ghe!” 48Táʼ ŋwɔn nɨbo a líʼ ndo ngɛn ndɔgɨ a kuncha, ntsubɨ a mu tɨntsɛgɨ mɨluʼ ntoŋ atú atɨ ntiʼ nga wəmbo ngə́ á noə.
49Lá bə mɔʼɔ sóŋ ngə́, “Nɨ zhwiʼtɨ á bɨgɨnə zɛn ngə́ Alaja a mɨ yen loŋ ayi ɛ!”
50Yeso a kwíʼ mbúgɨ́ nɨ nji zɨ ntən, ntiʼ ntsəmə.
51Abagɨ atsɛʼ zə nkwasə za a bánɨ́nɨ́ a mu Ndáŋwi zɨ Ngwi a wánɨ́ ɨbagɨ tsi bá, ndɔgɨnɨ atú ɨ shiʼ kuʼ a ntɨŋ ə. Atuəshe a nɛ́m, ɨláŋsə́ ngɔʼ sənkɨ; 52mɨshe wanɨ ntɛm ɨ dzɨ́gɨ́, ɨbɛn bɨ Ŋwi bə ghaʼnɨ ba bɨ kwɛ́nə nkfokɨ zhwemnə. 53Bo fúkɨ́ a mu mɨshe ɨma, Yeso a ghɨnə nzhwémnɨ́ a mbó nɨvwo, bo ghɛn a mu Ntáʼmbagə wu Wi wu Fɛmnɨ wa, adiʼ wa ɨbɛn bə ghaʼnɨ zɛ́nɨ́ awa ghe.
54Tantso bɨgwe nkɨ wu fɨgɨnɨ wa abɔʼnɨ bɨgwe ba bo bo tsínɨ́ ndyɛ́mə́ a Yeso ghɨnə ndzɛ́n adzaŋ za ɨshe nɛ́mnɨ́ abɔʼnɨ ɨnu ɨtsum tsa tsɨ fúnɨ́, a kɨʼnɨ awa tsɛʼ nkan bo tiʼ soŋ ngə́, “Tsɛʼ a nkənu, ŋwɔn wen a bé Mɔn Ŋwi ə!”
55Bəngye bə ghaʼnɨ kɨ́ ntsí ɨwu, ntɛm nəghagɨ ndyiŋə anu za a kɨ́nə́ fúə ghe. A bé ba bɨ zɔ́ŋnɨ́ a Yeso ndɔgɨnɨ a Galili, nkwátə́ ayi ɛ. 56A tɨtərɨ bo Mɛrɨ Matarɨna a tsí ɨwu, Mɛrɨ nɨmo bɨ Jemsɨ bo Yosɛb abɔʼnɨ ngwe Zebɛdi ə.
Adzaŋ za Bɨ Twə́ŋnɨ́ a Yeso ghe
(Mar 15:42-47; Alu 23:50-56; Yoa 19:38-42)
57A ghɨnə mbé a nkwɛfɔ, ŋwɔn nkáb wu tse bɨ tɔŋə nɨ Yosɛb wa a kɨ́nɨ́ nkɨ́ mbé ngyɛʼ Yeso wu mɔʼɔ, a lo Arimatia ngyiŋə. 58A ghɛ́n a mbó Branto ɨ soŋ ngə́ á gha akfú a Yeso a mbó zɨə. Branto a tíʼ ngá ntɨgə ngə́ á bɨ gha akfú za wəmbo ə. 59Yosɛb a tíʼ ndɔgɨ akfú za ndwɛrɨ a mu atsɛʼ atɨŋndvuŋ zə fú, 60ntiʼ ngɛn nyɔŋ a mu ɨni nɨshe na wɛrə a kwɛ́nɨ́ ntóŋ a mu aláŋsə́ ngɔʼ ə. Wɛrə a tíʼ mbɨ́ŋsɨ́ a təkɨŋ ngɔʼ ngyen nkɨŋ ntsu nɨshe na ɨwu, ntiʼ ndo ayi ɛ. 61Mɛrɨ Matarɨna abɔʼnɨ Mɛrɨ wu mɔʼɔ wa shíʼtɨ́ ntsí ɨwu, a mbyi nɨshe na.
Ntsiŋ Ɨdiʼ wa a Tsínɨ́ Atú a Nɨshe wa
62Njwi zɨ mɔʼɔ ɨ lanə, mbáʼ ɨ bénɨ́ lá Njwi Alaʼ Ŋwi, bɨntumshe bə wi abɔʼnɨ bə Farisao bomnkɨ bo bɨ Branto ntiʼ 63soŋ ngə́, “Tə̧, bɨgɨ waʼtɨ ngə́ mbáʼ ngaŋ ɨchwenu wa a bvúrɨ́nɨ́ atú ntən a sóŋ ngə́, ‹A ndzum njwi tsi tárə́ bɨ mɨ zhwemnɨ aghan a mbó nɨvwo ə.› 64Tiʼ lá nga ntɨgə á bɨ ndyɛ̌m atú a nɨshe azhi ɨ kɔʼ kuʼ njwi tsi tárə́, mbɨ́ʼ bɨyɛʼ ɨbyi ghɨ ngɛn ndze akfú azhi ndo nɨ zɛrə ntiʼ soŋ a mbó ɨbɛn ngə́ bɨ zhwemnɨ ayi a mbó nɨvwo ə. Ɨchwenu wu ntsɨrɨndzum wiŋ mɨ bɨ́gɨ́ ɨ ghɛn nɨ mbyi ɨ tsa a wu ntsambyi wa.”
65Branto a sóŋ a mbó bo ngə́, “Nɨ lɔgɨ a gwe ntsǐŋ ɨdiʼ, ngɛn ndzɛnə ngə́ nɨ lyɛm atú a nɨshe za adzaŋ za nɨ chinɨ lyɛmə.”
66Ma lan, bo tíʼ ngɛn nyɔʼ fɛnwu atú ngɔʼ za, taŋ bɨ mɔmtɨ bɨ zhi, ntiʼ nkɨ́ ndɛ́n a gwe ntsǐŋ ɨdiʼ a lyɛmnə a nɛrə ghe.
Одоогоор Сонгогдсон:
Matyo 27: MNT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2023, CABTAL