Matyo 22
22
Nɨgham nə Nanɨ mbɨ́ʼ Nɨdorɨ nɨ Nɨzɔ́ʼə
(Alu 14:15-24)
1Yeso a bə́ nkwiʼ ngám a mbó bo nɨ mɨgham mə nanɨ ɨ sóŋə́ ngə́,
2“Nɨfɔ nɨ fɔməbvurə be lá ɨnə. A bé a nkfu tse ɨfɔ wu tse a kyaŋtɨ nɨzɔ́ʼ nɨ mɔn ɨyi wu mbáŋnɨ́ ə. 3Wɛrə a tságɨ́ ngaŋ afaʼ ɨchi ngə́ á tsɨ ghɛn ntɔŋ bɨghən ba bɨ ghónɨ́ a nɨdorɨ nɨ nɨzɔ́ʼ na; lá bo tón awa a ngyiŋə ghe. 4Ma lan, wɛrə a bə́ nkwiʼ ntságɨ́ ngaŋ afaʼ tsə mɔʼɔ nɨ nkən wen a mbó bɨghən ba ngə́: ‹Ma kyaŋtɨnə nɨdorɨ ɨnə; bɨ kyemtɨnə mbɔŋ abɔʼnɨ bɨfɔrɨ bɨ nkɔʼndzum ə. Azúm atsum a tiʼ zə kyaŋtɨnə. Yenə adiʼ a nɨdorɨ nɨ nɨzɔ́ʼ na!› 5Lá bɨghən bɨ nɨzɔ́ʼ na wágɨ́nɨ́ mɨnkən ma, ɨfɛtɨ mɨfəŋ ɨma ngɛn ɨ númə́ ngɨ̌ mɨnu ɨma ghe. Táʼ a ghɛ́n a ɨshwom zɨ, wu mɔʼɔ a ghɛn adiʼ a mɨtan zɨ, 6abvuʼ a chwatɨ ngaŋ afaʼ ɨchi tsa, nghɔʼ awa nɨ mbɨ́ŋ, njwitə. 7Ntɔŋ ɨfɔ wa lwí tsɛʼ a nkan; ma lan, a tságɨ́ bɨgwe ɨbyi bɨ zhwitɨ bɨkyemntɔŋ ba, nto ntáʼmbagə wu wi ɨwa ghe. 8Wɛrə a tíʼ ntɔ́ŋ ngaŋ afaʼ ɨchi ɨ soŋ a mbó bo ngə́, ‹Bɨ kyaŋtɨnə nɨdorɨ nɨ nɨzɔ́ʼ ɨnə, lá ɨbɛn ba bɨ ghónɨ́, mbɔm za se kuʼnɨ ngə́ á bo yen ɨwu ə. 9Tɨtsɔŋnɨ, ghɛnə nɨ ɨtú ɨfaŋnɨ, nghon tsɛʼ ɨbɛn bɨtsum ba nɨ kwatɨnɨ ɨwu ngə́ á bɨ yen adiʼ a nɨdorɨ nɨ nɨzɔ́ʼ niŋ ə.› 10Ma lan, ngaŋ afaʼ tsa tíʼ ngɛn nɨ ɨtú ɨfaŋnɨ, nghon tsɛʼ a ŋwɔn tsum wa bo zɛ́nɨ́, wu tɨbɔŋ abɔʼnɨ wu shiʼnɨ; tsa nɨzɔ́ʼ wa tíʼ ndón nɨ bɨghən ə.
11Ɨfɔ wa ghɨnə ngyén a ndzé bɨghən ba, ndzɛn a ŋwɔn tse wa a sé ɨtsɛʼ nɨzɔ́ʼ wəgə. 12Ɨfɔ wa a bítɨ́ wəmbo ngə́, ‹Ɨson ɨghan, o tsa lá ɨ nə́ nkon ngyen a mu wen tɨ ɨtsɛʼ nɨzɔ́ʼ le?› Ŋwɔn wa a bóŋ anu zə ghamnə. 13Ɨfɔ wa a tíʼ sóŋ a mbó ngaŋ afaʼ ɨchi tsa ngə́, ‹Korɨnə ayi, mbó bo bɨ mɨku, ɨ maʼnə a mu ndzumnɨ abyɛn ə. Ɨwu, a mɨ bugɨnə ɨ kə́ kfúrɨ́nə mɨsɔŋ ɨmyi ɛ.› ”
14Yeso a tíʼ ndwɨgɨnɨ ngə́, “Bɨ ghǔŋ ɨnɔ, lá ntyě a nɨ́sháŋnɨ́ ə.”
Abítɨ mbɨ́ʼ Ntfú Ashɛbɨ ə
(Mar 12:13-17; Alu 20:20-26)
15Bə Farisao tíʼ ngɛn nkəmnɨ ngɨ akyaŋtɨ a mbentɨ Yeso nɨ ɨbítɨ ə. 16Bo tíʼ ntsagɨ bɨyɛʼ ɨba bə mɔʼɔ abɔʼnɨ ɨbɛn bə mɔʼɔ ba bɨ kɨ́nə́ ndzɔŋə a Ɛrɔd a mbó Yeso ghe. Ɨbɛn ben ba bɨ tyígɨ́nɨ́ a mbó Yeso lá, sóŋ ngə́, “Ndiʼ Aŋwaʼnɨ, bɨgɨ zhi ngə́ o sǒŋ nkənu ə. O dǐʼ nkənu mbɨ́ʼ ɨnu tsa Ŋwi a lɔnə a mbó ɨbɛn ɨbyi, nkeʼ mbǔʼ ɨnye ɨzo mbɨ́ʼ ɨkwaʼtɨ bədaŋ, mbɨ́ʼ ngə́ ka o mbɔ́gɨ́tə́ agho nɨdɨgɨ nɨ ŋwɔn tsɛrə ghe. 17Tiʼ soŋ awɨgɨ nɨ za o kwaʼtɨnə. A tsi a mu Nyɔngɔŋ ngə́ á bɨ ntfúə ashɛbɨ a mbó Kaisa, kə ngáŋ le?”
18Lá mbɨ́ʼ ngə́ Yeso a zhí a mɨnaŋ wa a tsínɨ́ a mu mɨntəm ɨma, wɛrə a bítɨ́ ngə́, “Bɨŋ ngaŋ ngɨ ɨtsi, nɨ zhwə́ŋtə́ a mbentɨ me lá ngə́ ke le? 19Nɨ diʼ nkáb atɨŋə za nɨ tfúnə́ ashɛbɨ ɨwu lá á ma ze.”
Bɨ yén nɨ nkáb atɨŋə wəmbo ə. 20Yeso a bítɨ́ awa ngə́, “A tsi ɨshi ɨwa ɨwu abɔʼnɨ ɨkum le?”
21Bo chwɨ́gɨ́ ngə́, “Wu Kaisa ghe.” Ma lan, Yeso a tíʼ sóŋ a mbó bo ngə́, “A ngánə ɨdzúm tsa tsɨ nɨ tsə Kaisa a mbó Kaisa nkɨ nga tsə Ŋwi a mbó Ŋwi ə.”
22Mbáʼ bo zúʼnɨ́ a məzen lá, a kɨ́ʼnɨ́ awa tsɛʼ a nkan, bo nyɛʼtɨ ayi ndokɨ awa ghe.
Abítɨ mbɨ́ʼ Nzhwémnə́ a mbó Nɨvwo ə
(Mar 12:18-27; Alu 20:27-40)
23Tsɛʼ a njwi məwa bə Sadukai bə tse, bo ba bɨ se bem ngə́ ŋwɔn a kfǒ mbɨ́ŋə́ nzhwémnə́; bo yén wəmbo mbitɨ ayi nɨ abítɨ, 24ngə́, “Ndiʼ Aŋwaʼnɨ, Mǒse a sóŋ ngə́, ‹Be ŋwɔn a kfo tə atú, mɨma ɨyi wu mbáŋnɨ́ a mɨ zagɨ zɔ́ʼ a nkfugɨ wa, taŋ ɨ jwi ɨbɔ ba bɨ mɨ lɔgɨ a bɛrə tso ɨbɔ bɨ mɨma ɨyi wa.› 25Zɛn da ngə́ ɨbɔmbɨma bi samba tsí ɨwu a tɨtərɨ bɨgɨ; wu ntsambyi a zɔ́ʼ, nkfó tə atú, ɨ nyɛʼtɨ a nkfugɨ ɨyi a mbó mɨma ɨyi wu mbáŋnɨ́ ə. 26A kɨ́ mbé ndəŋndəŋ a nye ndzɔŋtɨ, nkɨ mbe ndəŋndəŋ nɨ wa a kúʼnɨ́ ɨdiʼ tsi tárə́, ɨ shiʼ kuʼ a nye wa a tsɨ́rɨ́nɨ́ ndzum ɨdiʼ tsi samba ghe. 27Mangye wa a lwɨ́gɨ́nɨ́ nkfo ə. 28Tɨtsɔŋnɨ, a lo be njwi wa ɨbɛn zhwemnɨnɨ a nɨvwo, á mangye wa a tiʼ mbe ngwe ɨwa a tɨtərɨ mbáŋnɨ́ tsa tsi samba le? Mbɨ́ʼ ngə́ bo bɨtsum zɔ́ʼ ayi ɛ.”
29Yeso a chwɨ́gɨ́ a mbó bo ngə́, “Nɨ fan be tɨsɨŋə! A nɨ mbɨ́ʼ ngə́ ka nɨ zhi awən anu za a tsinɨ a mu Aŋwaʼnɨ a Ŋwi kə mɨtən mɨ Ŋwi ə. 30Mbɨ́ʼ ngə́ a njwi za ɨbɛn ghɨnɨ zhwémnɨ́ a mbó nɨvwo, bo lo fi be bɨtsen bɨ ndá bɨ Ŋwi a fɔməbvurə, ɨ keʼ ndzɔ́ʼə ghe. 31Tɨtsɔŋnɨ, a ngamə mbɨ́ʼ nzhwemnə a mbó nɨvwo, nɨ bvurɨ awən tɨ tɔŋ anu za Ŋwi a sóŋnɨ́ a mbó bən ngə́, 32‹Ma nɨ Ŋwi wu Abraʼm, mbe wu Isak nkɨ mbe wu Yakɔb le?› Ka Ŋwi a be ayi wu bɨkfú ə, a baŋnɨ mbe be wu ɨbɛn ba bɨ tsinɨ ntɨŋ ə.”
33Ɨnɔ wa ghɨnə ndzúʼ a məzen lá, ɨnu tsa a díʼnɨ́ awa nɨ tsɛrə lá tsɨ kɨ́ʼnɨ́ awa ghe.
Ntɨgə zɨ Ngwi za ɨ Tsanɨ Ɨtsum ə
(Mar 12:28-34; Alu 10:25-28)
34Mbáʼ bə Farisao zúʼnɨ́ ngə́ Yeso a chwúbtɨ́ mɨntsu mɨ bə Sadukai lá, bo ghótɨ́ awa ghe. 35Táʼ ŋwɔn nɨbo, mbe ndiʼ Nyɔngɔŋ a zhwə́ŋtɨ́ a mbentɨ wɛrə nɨ abítɨ ə. 36Wɛrə a bítɨ́ a Yeso ngə́, “Ndiʼ Aŋwaʼnɨ, a nɨ zɨŋə ntɨgə za ɨ tsanɨ ntɨgə ɨtsum a mu Nyɔngɔŋ le?”
37Yeso a chwɨ́gɨ́ wəmbo ngə́, “ ‹Kɔŋ a Maʼmbyí Ŋwi ɨgho nɨ ntəm ɨgho ɨtsum, nɨ gharɨ ɨgho tsum, abɔʼnɨ akwaʼtɨ azo atsum ə.› 38Nə nɨ ntɨgə za ɨ tsanɨ ɨtsum nkɨ mbe zɨ ntsambyi ɛ. 39Za ɨ zɔŋtɨnɨ ɨ fi a məza, ɨ nɨ ngə́, ‹Kɔŋ a ŋwɔn nɨbarə ɨgho tso atuəmbəm azo ə.› 40Nyɔngɔŋ Mǒse tsum abɔʼnɨ ɨnu tsa ntóm Ŋwi díʼnɨ́ zɛʼtɨ awa lá a nye ntɨgə tsen tsi bá ghe.”
Abítɨ mbɨ́ʼ a Wa Bɨ Zɔ́ʼnɨ́ ə
(Mar 12:35-37; Alu 20:41-44)
41Bə Farisao bə tse ghɨnə ngótɨ́ táʼ adiʼ, Yeso a bitɨ awa ngə́, 42“Nɨ wiʼtɨ ngə́ ke mbɨ́ʼ a Wa bɨ Zɔ́ʼnɨ́ wa le? A lá ŋwɔn ɨlə̌ ɨwa le?”
Bo chwɨ́gɨ́ ayi ngə́, “A nɨ ŋwɔn ɨlə̌ Devidɨ ə.”
43Yeso a tíʼ mbítɨ́ awa ngə́, “A tiʼ ntsa lá ɨ nə́ ngə́ Devidɨ, a nkfu za Azhwi a tságɨ́nɨ́ ayi, a tɔ́ŋ ayi ngə́, ‹Maʼmbyí› le? Devidɨ a sóŋ ngə́,
44‹Maʼmbyí Ŋwi a sóŋ a mbó Maʼmbyí ɨghan ngə́,
shiʼtɨ ntsi a bagɨ abó me zə maʼə
ɨ kɔʼ kuʼ nkfu za ma mɨ tsagɨ ngaŋ kɨban ɨtso a shwúrɨ́ mɨku gho ghe.›
45Be a be ngə́ Devidɨ a tɔ́ŋ a wɛrə ngə́, ‹Maʼmbyí›, a tiʼ ntsa lá ɨ nə́ ngə́ á Wa bɨ Zɔ́ʼnɨ́ a be mɔn ɨlə̌ Devidɨ le?”
46Ŋwɔn tsɛrə a kɨ chi keʼ achwɨgɨ zə tse a mbó Yeso gha, ɨ kɨ lɔgɨnɨ njwi məwa ŋwɔn tsɛrə a láʼ keʼ zhwəŋtɨ a mbítɨ́ zɨ nɨ ɨbítɨ tsə tsɛrə ghe.
Одоогоор Сонгогдсон:
Matyo 22: MNT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2023, CABTAL