Matyo 20
20
Ngaŋ Afaʼ a mu Ako Atɨ a Mɨntam mɨ Nyɛtɨ Mɨluʼ ə
1“Nɨfɔ nɨ fɔməbvurə be lá tso ɨnə. A njwi tse, mboŋ adiʼ tse a ló a tənjwi tsɛrə ngɛn ndo ngaŋ afaʼ ngə́ á bɨ yen ɨ faʼ a mu ako atɨ a mɨntam mɨ nyɛtɨ mɨluʼ azhi ɛ. 2Bo bɨ ngaŋ afaʼ tsa bémnɨ́ ngə́ wɛrə a mɨ tfu awa nɨ ndvuŋ nkáb wa bɨ tfúnə́ a ŋwɔn afaʼ ɨ wu atú táʼ njwi ɛ. Bo bemnɨnə lá, wɛrə a tiʼ ntsagɨ awa afaʼ ə. 3Wɛrə a ghɛ́n a mɨtan a nye bɨnyom bi nɨbvuʼə ndzɛn mbáŋnɨ́ tsə mɔʼɔ tɛm ɨwu nkeʼ anu zə tsɛrə a faʼə ghe; 4ma lan, wɛrə a sóŋ a mbó bo ngə́, ‹A nɨ kɨ ngɛn ɨ faʼ a mu ako atɨ a mɨntam mɨ nyɛtɨ mɨluʼ za, ma mɨ tfu awən nɨ nkáb za ɨ kuʼnɨnə.› Ma lan, bo tiʼ ngen. 5A ntənɨ nyom abɔʼnɨ bɨnyom bi bɨtárə́ a ndzəŋ nyom, a kɨ́ ngɨ tsɛʼ ndəŋndəŋ anu ə. 6A ghɨnə mbé tso bɨnyom bi bɨtə̧̂ a nkwɛfɔ, wɛrə a fu ndzɛn a bə mɔʼɔ bɨ tɛmkɨ; a bitɨ awa ngə́, ‹Nɨ tɛm ɨghan adaŋədaŋə nkeʼ anu zə tsɛrə a faʼə atú njwi ziŋ tsum lá ngə́ ke le?› 7Bo sóŋ a mbó zɨ ngə́, ‹Mbɨ́ʼ ngə́ ka ŋwɔn tsɛrə a lɔgɨ ayi awɨgɨ afaʼ ə.› Mboŋ njwuʼ wa a tíʼ sóŋ a mbó bo ngə́, ‹Nɨ kɨ ngɛn ɨ faʼ a mu ako atɨ a mɨntam mɨ nyɛtɨ mɨluʼ za.›
8A ghɨnə mbé a nkwɛfɔ, mboŋ njwuʼ wa a tɔŋ a tamandóm ngaŋ afaʼ ɨchi ɨ soŋ wəmbo ngə́, ‹Tɔŋ ngaŋ afaʼ tsa ntfu awa, mbiʼnɨ a nye ba bɨ lwɨgɨnɨnɨ ndɔgɨ afaʼ, ngyen nkon a nye ba bɨ lónɨ́ ntsambyi ndɔgə.› 9Ba bɨ lɔ́gɨ́nɨ́ awa afaʼ tso bɨnyom bɨtə̧̂ a nkwɛfɔ lá, bɨ kɔ́ʼtɨ́, ŋwɔn nɨbo tsum a kwarɨ nkáb afaʼ táʼ njwi ɛ. 10Ba bɨ lɔ́gɨ́nɨ́ awa a ntsambyi bɨ ghɨnə nkɔ́ʼtɨ́, nkwaʼtɨ ngə́ bo mɨ kwarɨ ɨza á ɨ ghaʼtə; lá ŋwɔn nɨbo tsum a kɨ́ nkwárɨ́ nkáb afaʼ táʼ njwi ɛ. 11Bo kwarɨnə, nzhwuʼnɨ ɨ soŋ a mbó mboŋ adiʼ wa ngə́, 12‹Ben ba o tsɨrɨnɨ ndzum ndɔgɨ afaʼ lá, bɨ faʼ lá tsɛʼ atú táʼ nyom ə, lá o tfu awa ndəŋndəŋ tso bɨgɨ ba bɨ nyuʼnɨnɨ atú njwi zɨ fɨgɨnɨ, nɨnyom a babɨ awɨgɨ ə!›
13Lá mboŋ adiʼ wa a chwɨ́gɨ́ a mbó táʼ ŋwɔn nɨbo ngə́, ‹Ɨson ɨghan, ka ma ghɨ aghə nkobɨ a nye gho ghe. O lo nkoʼ bem ɨ faʼə á bɨ tfu agho nɨ nkáb afaʼ táʼ njwi le? 14Lɔgɨ nkáb afaʼ ɨzo nkwɛn agho ə. Ma kɔŋ ngǎ a mbó ŋwɔn wen wa bɨ lónɨ́ ntsɨrɨ ndzum ndɔgɨ ayi afaʼ lá ndəŋndəŋ nkáb za ma ghanɨ a mbó bɨŋ ə. 15Ma sa tsi nɨ ngɨ anu za ma kɔŋnɨ nɨ nkáb ɨzan le? Kə nɨ mɨ lwi ntɔŋ a nye me mbɨ́ʼ ngə́ ma ghǎ tə́ ndə́ŋtə́ le?› ”
16Yeso a tíʼ ndwɨgɨnɨ ngə́, “Ma lan, ntsɨrɨndzum a ghɨ bé ntsambyi, á ntsambyi a tiʼ ntsɨrɨndzum ə.”
Yeso a Gham a nye Nkfu tsa tsɨ Kuʼnɨ tsi Tárə́ mbɨ́ʼ Nɨvwo ɨni ɛ
(Mar 10:32-34; Alu 18:31-34)
17Mbáʼ Yeso a kɨ́nə́ nkɔ́ʼə ngěn a Yerosalɛm lá, a lɔ́gɨ́ bɨyɛʼ ɨbyi ba nɨghúm tsɔb bá, bo bo ghamnɨ a nkubə, mbáʼ bo tsínɨ́ a ndómnji ngěn ghe. 18Wɛrə a sóŋ a mbó bo ngə́, “Zuʼnə, bɨgɨnə kɔ́ʼə ngěn a Yerosalɛm; adiʼ wa bɨ mɨ gha a Mɔn Ŋwɔn a mbó bɨntumshe bə wi abɔʼnɨ bɨdiʼ bɨ nyɔngɔŋ ə. Bɨ mɨ soŋ ngə́ wɛrə a vwo ɨsáʼ, ntsi ngə́ á bɨ zhwitɨ ayi, 19ɨ tiʼ byigɨ ayi ɨ gha a mbó ba a se bə Yuda be; á bo werɨ ayi, ndəŋ ayi nɨ ngwan, ntiʼ nkɨ nkwemtɨ ayi atɨ abaŋnɨ-baŋnɨ; lá á bɨ bə nzhwemnɨ ayi a ndzum njwi tsi tárə́ ghe.”
Anu za Ngwe Zebɛdi a Bítɨ́nɨ́ a Yeso mbɨ́ʼ Ɨbɔ ɨbyi ɛ
(Mar 10:35-45)
20Ngwe Zebɛdi a tíʼ ngɛn a mbó Yeso bo bɨ ɨbɔ ɨbyi bə mbáŋnɨ́ bi bɨbá, nkwem mɨkwiʼtɨ ɨmyi wə ɨshi ɨ soŋ ngə́ á Yeso a ghɨ anu zə shiʼnɨ zə tsɛrə a mbó zɨə.
21Yeso a bítɨ́ wəmbo ngə́, “O lǒ lá ake le?”
A chwɨ́gɨ́ ngə́, “Kaʼ aghan ngə́ ɨbɔ ɨban benə bi bɨbá ghɨ shíʼtɨ́ tsí, táʼ a bagɨ abó gho zə maʼə wu mɔʼɔ a nye zə ntə́ŋ a nkfu za o benɨ ɨfɔ ghe.”
22Lá Yeso a chwɨ́gɨ́ a mbó ɨbɔ mbáŋnɨ́ ba ngə́, “Ka nɨ zhi awɨŋ anu za nɨ bítɨ́nə́ ghe. Nɨ chi no ndɔ́ŋ ngɨ́ʼ za a bvurɨ mɨnya á ma no lá le?”
Bo chwɨ́gɨ́ wəmbo ngə́, “Bɨgɨ chi no.”
23Yeso a sóŋ a mbó bo ngə́, “Tsɛʼ a nkənu, nɨ ghɨ nó ndɔ́ŋ ngɨ́ʼ ɨzə, lá ɨ ghɨ tsí abó me zə maʼə kə zə ntə́ŋ, ka a be ayi adiʼ azan a ntsɔ́ʼ ŋwɔn wa a ghɨnɨ tsí abagɨ abó me zə maʼə kə zə ntə́ŋ ə. Ɨdiʼ tsiŋ tsi lá a mbó ɨbɛn ba ta ɨghan a kwɛnə nkyaŋtɨ a mbó bo ghe.”
24Abvuʼ a bɨyɛʼ za nɨghúm a ghɨnə ndzúʼ a məzen, mɨntɔŋ ɨma lwinɨ a nye ɨbɔmbɨma ba bi bɨbá ghe. 25Ma lan, Yeso a tíʼ ntɔ́ŋ awa bɨtsum, ngotɨ táʼ adiʼ, ɨ soŋ ngə́, “Nɨ zhi ngə́ bɨta bɨ ɨlaʼ bɨ ba a se bə Yuda be sáʼə awa adzaŋ za bo kɔŋnɨ, bɨntsagɨnɨ ɨba kɨ ntsi nɨ mɨtən atú bo ngɛn mɛtə. 26Lá a ghɨ keʼ lá be a tɨtərɨ bɨŋ ə. Be ŋwɔn tse a tɨtərɨ bən a ndǒ mbe ŋwɔn wu ngwi, a tsi nɨ ɨ zagɨ be ngaŋ afaʼ a mbó abvuʼ a ɨbɛn; 27ŋwɔn tse a kə́ ndǒ mbe ntsambyi a tɨtərɨ bən, a mɨ zagɨ be abuʼ azən; 28tsɛʼ tso mbáʼ Mɔn Ŋwɔn a sé yen be ngə́ á bɨ faʼə a mbó zɨ, lá a faʼə a mbó ɨbɛn, ɨ kɨ gha ntsi ntən ɨzhi a ndzúŋ atú a ɨbɛn bə ghaʼnə.”
Yeso a Tsuʼ Bɨfɨgɨ bə Mbáŋnɨ́ bi Bɨbá ghe
(Mar 10:46-52; Alu 18:35-43)
29Mbáʼ Yeso bo bɨ bɨyɛʼ ɨbyi kɨ́nə́ fúə a Yeriko, ɨnɔ ɨbɛn wu wi ɨ kə́ ndzɔŋə awa ghe. 30Bɨfɨgɨ bə mbáŋnɨ́ bi Bɨbá shíʼtɨ́ ntsí a ngɔbɨ ndómnji ɛ. Bo ghɨnə ndzúʼ ngə́ Yeso a kə́ ngyiŋə, ɨ yen tsa a ndóm məwa, ntiʼ mbiʼnɨ ntɔ́nkə́ ngə́, “Mɔn Devidɨ! Ko a mɨlɨŋnɨ ɨwɨgɨ ə, a tə̧!”
31Ɨnɔ wa ghámtɨ́ awa ɨ soŋ ngə́ á bo láŋə́. Lá bo kwíʼ ntɔ́nkɨ́ ngɛ́n be nɨ mbyi ngə́, “Mɔn Devidɨ! Ko a mɨlɨŋnɨ ɨwɨgɨ ə, a tə̧!”
32Yeso a tɛ́m ntiʼ ntɔŋ awa, mbitɨ awa ngə́, “Nɨ lǒ ngə́ á ma ghɨ ɨ nə́ a mbó bɨŋ ə?”
33Bo chwɨ́gɨ́ wəmbo ngə́, “Tə̧, ghɨ á ɨmɨgɨ ɨmɨgɨ ŋaʼnə!”
34Yeso, a kó a mɨlɨŋnɨ ɨwa, ɨ mɔmtɨ ɨmɨgɨ ɨma, ɨmɨgɨ ɨma byi ndzé ɨdiʼ, bo tiʼ ndzɔŋ ayi ɛ.
Одоогоор Сонгогдсон:
Matyo 20: MNT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2023, CABTAL