Matyo 13
13
Nɨgham nə Nanɨ mbɨ́ʼ a Ŋwɔn Ngwarɨ Mɨdzɨ ə
(Mar 4:1-9; Alu 8:4-8)
1Tsɛʼ njwi məwa Yeso a ló a ndá wa ngɛn ɨ shiʼtɨ ntsi a ngə́rɨ́ sagɨrə, ɨ sóŋə́ anu a Ŋwi ə. 2Ɨnɔ ɨbɛn wa ɨ kárɨ́sɨ́nɨ́ ayi ɨ gháʼ be tɨ́sə́n adzaŋ za wɛrə tíʼnɨ́ nkón a mu abaŋ a nkyi ɨ shiʼtɨ ntsi ɨwu, ɨnɔ ɨbɛn wa tɛmnkɨ a ngə́rɨ́ ghe. 3A lɔ́gɨ́ mɨgham mə nanɨ ɨ fɨʼtɨ ɨnu tsə ghaʼnɨ ə. Wɛrə a sóŋ ngə́:
“A nkfu tse ŋwɔn tse a fú ngɛn a mbi nchwi ɨzhi ɛ. 4Adzaŋ za a kɨ́nə́ mbǐ ɨshwom ɨyi wa lá, nchwi za zɨ tse vwókɨ́ alaŋ a ndóm, bɨsɨ́ŋ yen ɨ sɛʼ nkfurɨ ə. 5Zɨ mɔʼɔ vwókɨ́ atú aláŋsə́ ngɔʼ adiʼ wa ɨshe sé ɨwu ghaʼtə. Nchwi za wáŋnɨ́ ntóm, mbɨ́ʼ ngə́ ɨshe sé ɨwu shwitə. 6Lá nɨnyom a ghɨnə ntá ntiʼə nkfúnə́, ntɔn nchwi za ɨ bvúrɨ́nɨ́ ntóm tsɛʼ tomnɨ lá mbɨ́ʼ ngə́ mɨngaŋ mɨ nchwi za sé a tɨshe shwitɨ, nchwi za ɨ tómnkɨ́nɨ́ lá ɨ zómnkə́. 7Nchwi za zɨ mɔʼɔ vwókɨ́ a tɨtərɨ kyɛrə-kyɛrə, kyɛrə-kyɛrə wa a kwi, ndzɔŋ ndzɔŋ sɔbtɨ nchwi za mbyigɨ a tɨshe. 8Lá mbum nchwi tsa tsə mɔʼɔ vwókɨ́ atú ɨshe nɨkomə ɨ fɨgɨ nchwi zɨ shiʼnɨ ə. Tsɨ tse fɨ́gɨ́ mbum nchwi táʼ nkɨ, tsə mɔʼɔ mɨghúm mi ntugə, tsə mɔʼɔ mɨghúm mɨntárə́ ghe.” 9Yeso a lwɨ́gɨ́nɨ́ ɨ soŋ ngə́, “Be nɨ tsi nɨ ɨtoŋnɨ nɨ zuʼə!”
Anu za a Ghɨnɨ Yeso a Nanɨ Mɨgham ə
(Mar 4:10-12; Alu 8:9-10)
10Bɨyɛʼ ɨbyi tíʼ ngyen wəmbo mbitɨ ngə́, “O tɨ ghamə a mbó ɨbɛn o nanɨ nɨgham ɨno ɨ nanɨ lá mbɨ́ʼ ake le?”
11Yeso a chwɨ́gɨ́ ngə́, “Bɨ ghanə azhyɛ mbɨ́ʼ ɨnu nkubə tsə Nɨfɔ nɨ fɔməbvurə a mbó bən, lá nkeʼ a mbó bo be. 12Mbɨ́ʼ ngə́ ŋwɔn tsum wa a tsinɨ nɨ azúm; bɨ ghɨ kwiʼtɨ, taŋ á tiʼ ntsi nɨ zɛrə á ghaʼ be tɨsɨŋə; lá ŋwɔn wa a tsinɨ mbômbô, tsɛʼ mɨnyiə wa a tsi nɨ wɛrə lá, bɨ ghɨ kwárə́. 13Ma nǎ mɨgham a mbó bo lá mbɨ́ʼ ngə́ bo liŋə nkeʼ ndzě ghe, njwíʼtə́ nkeʼ ndzúʼə kə ɨ zuʼ kɨ zhyɛ. 14Ma lan, anu za ntom Ŋwi Asaya ɨ kwɛ́nə sóŋ a bom a nye bo ngə́:
‹Ŋwi a soŋ ngə́, “Ɨbɛn benə bɨ lo bɨ zhwiʼtɨ nkwiʼ njwiʼtɨ, lá ɨ keʼ zuʼ nkɨ nji anu za a nɨ zɛrə;
bo ghɨ len ɨ kwiʼ len lá ɨ keʼ ze,
15mbɨ́ʼ ngə́ bɨ fɨŋ mɨntəm ɨma,
bɨ kwem mɨfə a mu ɨtoŋnɨ ɨtsa
nkɨ nchwubtɨ ɨmɨgɨ ɨma ghe.
Ntú lá be muŋ ɨmɨgɨ ɨma mɨ ze,
á ɨtoŋnɨ ɨtsa zuʼ,
á ɨtú ɨtsa zuʼ nkɨ nji anu za a tsinɨ ɨwu,
á bo tiʼ mbəŋ awa ngyen a mbó me,
á ma tiʼ ntsuʼ awa ghe.”›
16A mbó bən, atú azən a bɔŋ be tɨsɨŋə! Ɨmɨgɨ ɨmɨŋ zě, ɨtoŋnɨ ɨtsɨŋ kə́ ndzúʼə ghe. 17Ma sóŋə́ a mbó bən tsɛʼ a nkənu ngə́ ntóm Ŋwi tsə ghaʼnɨ abɔʼnɨ ɨbɛn bə chinɨnɨ bə ghaʼnɨ kə́ ndánə́ ndǒ ndzě anu za nɨ zɛ́nə́, lá bo kɨ chi keʼ ze, ɨ kɨ zuʼ anu za nɨ zúʼnə́ lá bo kɨ chi keʼ zuʼə.”
Yeso a Fɨʼtɨ Anu za Nɨgham nə Nanɨ mbɨ́ʼ a Ŋwɔn Ngwarɨ Mɨdzɨ a nɨ Diʼnə
(Mar 4:13-20; Alu 8:11-15)
18“Nɨ tiʼ lá njwiʼtɨ, ngyɛʼ anu za nɨgham nə nanɨ mbɨ́ʼ a ŋwɔn ngwarɨ mɨdzɨ a nɨ diʼnə. 19Ɨbɛn ba mbáʼ bɨ zuʼnɨ nkən mbɨ́ʼ Nɨfɔ nɨ Ŋwi, lá nkeʼ zuʼ nkɨ nji, bo be lá tso mbum nchwi tsa tsɨ vwókɨ́nɨ́ alaŋ a ndóm lá. Wu Ntɔmnɨnɨ a yen ɨ fe nkən wa bo zúʼnɨ́ lá ngɛn nɨ wɛrə ghe. 20Mbum tsa tsɨ vwókɨ́nɨ́ atú aláŋsə́ ngɔʼ be lá tso ɨbɛn ba bɨ kwarɨnɨ nkən wu shiʼnɨ nɨ nɨdorɨ tsɛʼ mbáʼ bɨ byinɨ soŋə. 21Lá ɨ bvurɨ mɨngaŋ a ntəm bo tɨ twəŋ, bo tsitɨ tsɛʼ a nye məkum a nkfu ə. Ma lan, ngɨ́ʼ abɔʼnɨ ndɨgə yen mbɨ́ʼ nkən wa, bo byi nyɛʼ a wɛrə nkɨə awa ghe. 22Mbum tsa tsɨ vwókɨ́nɨ́ a mu kyɛrə-kyɛrə be lá tso ɨbɛn ba bɨ zuʼnɨ nkən wa, lá ɨnu atuəshe abɔʼnɨ akɔŋnɨ za bo tsinɨ nɨ zɛrə a nye afuʼ, tsɨ lo ɨ fumsɨ nkən wa ɨ keʼ mɨntam mə tsɛrə konə. 23Mbum tsa tsɨ vwókɨ́nɨ́ atú ɨshe nɨkomə lá, be lá tso ɨbɛn ba bɨ zuʼnɨ nkən wa, ndzuʼ nkɨ nji anu za ɨ diʼnɨ; bo konɨ mɨntam, bə tse nkfu nkɨ wu fɨgɨnɨ, bə mɔʼɔ nkfu mɨghúm mi ntugə, bə mɔʼɔ nkfu mɨghúm mɨntárə́ ghe.”
Nɨgham nə Nanɨ mbɨ́ʼ Ngvúŋ ə
24Yeso a kwíʼ nkɨ́ ná nɨgham nen a mbó bo ngə́: “Nɨfɔ nɨ fɔməbvurə be lá ɨ nanə ghe. Ŋwɔn tse a bí mɨdzɨ a mu ɨshwom ə. 25Nɨ ɨtfúʼ tse mbáʼ ŋwɔn tsum a kɨ́nə́ ndyě, ngaŋ kɨban a yen mbi atəsɔŋ a tɨtərɨ nchwi za, ntiʼ ndo ayi ɛ. 26Mbáʼ mɨdzɨ ma kwínɨ́ nchwuʼ ɨ maʼ mɨsaŋ, atəsɔŋ za a kɨ nkwi wəbɔʼ ə. 27Ngaŋ afaʼ mboŋ ɨshwom wa yén ɨ soŋ wəmbo ngə́, ‹Tə̧, be o bí lá ngwəgɨ mɨdzɨ tsɨ shiʼnɨ a mu ɨshwom wa le? A tiʼ ntsa lá ɨ nə́ atəsɔŋ a nyam wəbɔʼ le?› 28A chwɨ́gɨ́ a mbó bo ngə́, ‹A nɨ afaʼ a ŋwɔn kɨban ə.› Ngaŋ afaʼ tsa bítɨ́ wəmbo ngə́, ‹O lǒ ngə́ á bɨgɨ ghɛn ɨ so atəsɔŋ za le?› 29Mboŋ ɨshwom a chwɨ́gɨ́ ngə́, ‹Ngáŋ; mbɨ́ʼ ngə́ a só atəsɔŋ za nɨ chi zɔŋ chwɛʼtɨ nchwi za wəbɔʼ ə. 30Nyɛʼtɨnə á ɨtsum tsi bá kwi nkɔʼ nkuʼ a nkfu ɨ fuʼə ghe. Ma mɨ tiʼ soŋ a mbó ngaŋ ɨ fuʼə ngə́ ghǒtɨnə atəsɔŋ za a ntsambyi, nkórɨ́kɨnə a nye mɨbɨŋ ntɔn lá ngotɨ mɨdzɨ ma ɨ saŋ a mu ntaŋ mɨdzɨ ɨghə.› ”
Nɨgham nə Nanɨ Mbɨ́ʼ Ndzaŋ Ɨsa ghe
(Mar 4:30-32; Alu 13:18-19)
31Yeso a kwíʼ ná nɨgham nə mɔʼɔ a mbó bo ngə́, “Nɨfɔ nɨ fɔməbvurə be lá tso ndzaŋ ɨsa za ŋwɔn a binɨ a mu ɨshwom zɨə. 32Ɨ kɨ́gɨ́ ntsa ndzaŋ ɨtsum ə, lá ɨ ghɨ nkwí, ɨ be tso mɨnya mɨ atɨ; adzaŋ za bɨsɨ́ŋ kónə́ ngvǔ nkə ɨtsa a nye mbó ɨmyi ɛ.”
Nɨgham nə Nanɨ mbɨ́ʼ Mbɛgə ghe
(Alu 13:20-21)
33Yeso a kwíʼ nkɨ́ ná nɨgham nə mɔʼɔ a mbó bo ngə́, “Nɨfɔ nɨ fɔməbvurə be lá tso ngə́ mangye a lɔgɨ mbɛgə ntɔbɨ a mu ɨtú ɨkáŋ abán tsi tárə́#13:33 Ɨŋwaʼnɨ tsɨ lvuŋ tsɨ mɔʼɔ se ɨfɨʼ zen nɨŋə, abán za tɛm ɨ fugɨ nkɔʼə.”
Nɨgham nə Nanɨ Kɔʼ Mbomnkɨ bo Nɨgham nɨ Ŋwi ə
(Mar 4:33-34)
34Ɨnu tsiŋ ɨtsum Yeso a sóŋ a mbó ɨnɔ ɨbɛn wa a mu mɨgham mə nanɨ ə; a nkənu a sé anu zə tsɛrə a mbó bo soŋ tɨgha a ná a zɛrə nánə́. 35A kə́ ngɨə mə lan lá taŋ á kɔʼ mbomnkɨ bo ɨnu tsa ntom Ŋwi#13:35 Ɨŋwaʼnɨ tsɨ lvuŋ tsɨ bə Grikɨ tsɨ mɔʼɔ soŋ ngə́ ntom Ŋwi məziŋ lá Asaya ghe. kwɛ́nə́ soŋ ngə́:
“Ma mɨ tɨ ghamə a mbó bo ɨ na nɨgham, ma mɨ soŋ ɨnu tsa bɨ
kwɛ́nɨ́ ndwɛ́ʼ a mbó bo nchwuʼnɨ nkfu za Ŋwi a káʼnɨ́ mbyi ɛ.”
Yeso a Fɨʼtɨ Anu za Nɨgham nə Nanɨ mbɨ́ʼ Ngvúŋ Diʼnə
36Yeso a ghɨnə nyɛʼtɨ ɨnɔ ɨbɛn wa ngɛn a mu ndá, bɨyɛʼ ɨbyi yen soŋ wəmbo ngə́, “Fɨʼtɨ awɨgɨ nɨ anu za nɨgham nə nanɨ mbɨ́ʼ ngvúŋ a mu ɨshwom diʼnə.”
37Yeso a chwɨ́gɨ́ ngə́, “Ŋwɔn wa a bínɨ́ mɨdzɨ ma lá, a nɨ Mɔn Ŋwɔn; 38ɨshwom wa ɨ be mbyi ziŋə; mbum ɨdzum tsɨ shiʼnɨ tsa bɨ bínɨ́ lá be ɨbɛn bɨ Nɨfɔ na; ngvúŋ za be ɨbɛn bɨ Wu Ntɔmnɨnɨ, 39ŋwɔn kɨban wa a bínɨ́ ngvúŋ za lá a be Dəbɨrɨ ə. Ɨfuʼ mɨdzɨ za ɨ be ndwitɨ mbyi, bɨfuʼ bɨ mɨdzɨ ma be bɨtsen bɨ ndá bɨ Ŋwi ə. 40Tsɛʼ adzaŋ za bɨ sónɨ́ ngvúŋ za ngotɨ ntɔn nɨ ɨmugɨ lá, nə nɨ adzaŋ za a ghɨnɨ bé a ndwitɨ mbyi ɛ. 41Mɔn Ŋwɔn a ghɨ tsagɨ bɨtsen bɨ ndá bɨ Ŋwi ɨbyi, á bɨ tye ɨbɛn ba bɨ tíntɨ́nə́ a bə mɔʼɔ bɨ ghɨnɨ ɨbvu abɔʼnɨ ba bɨ ghɨnɨ ɨbvu bo mboŋ ɨ fu nɨ bɛrə a mu Nɨfɔ ɨni, 42á bo tiʼ maʼ awa a mu ɨmugɨ nɨnkoŋ, adiʼ wa bo ghɨnɨ búgɨnə ɨ kə́ kfúrɨnə mɨsɔŋ ɨma ghe. 43Ɨbɛn bə chinɨnɨ ghɨ tíʼ tá tso nɨnyom a mu Nɨfɔ nɨ Ta ɨwa ghe. Zhwiʼtɨnə lá, mbáʼ be nɨ tsi nɨ ɨtoŋnɨ ə!”
Nɨgham nə Nanɨ mbɨ́ʼ Azúm Atɨŋndvuŋ za bɨ Lwɛʼnə
44“Nɨfɔ nɨ fɔməbvurə be tso ɨnə. Ŋwɔn a zɛn azúm atɨŋndvuŋ zə tsɛrə za bɨ lwɛʼnɨ a mu ɨshwom ə. Mbə nyaʼ mbɔmtɨ wədiʼ ntiʼə ndánə́ ndórə́ a nye mbon wa a kwɛnɨ ngɛn ɨ fen azúm atsum za zɨə tsinɨ nɨ zɛrə, ntiʼ mbə ngɛn ndzuŋ ɨshwom wa.”
Nɨgham nə Nanɨ mbɨ́ʼ Mbaŋətuʼ ə
45“A nkwiʼtə, Nɨfɔ nɨ fɔməbvurə be lá tso ɨnə. Ŋwɔn a lǒ mbaŋətuʼ tsa tsɨ ŋwenɨnə, 46a ghɨnə ndzɛ́n a zɨ tsɛrə za ɨ ŋwenɨnə be tɨ́sə́n, ngɛn ɨ fen azúm atsum za zɨə tsinɨ nɨ zɛrə, ntiʼ ndzuŋ mbaŋətuʼ za.”
Nɨgham nə Nanɨ mbɨ́ʼ Nɨghoŋ ə
47“A nkwiʼtə, Nɨfɔ nɨ fɔməbvurə be lá tso ɨnə. Ɨbɛn bɨ achwiʼ bə tsɛrə máʼ nɨghoŋ ɨna a mu sagɨrə, nko ɨbə́ŋ ɨshwú tsɛʼ ɨtsum ə. 48Nkfu za nɨghoŋ na lonɨ, bo shwuŋ ngɛn nɨ nɛrə a ngə́rɨ́ ntiʼ ntsi a ɨshe a ntye ɨshwú tsa: tsɨ shiʼnɨ ɨ kon a mu ɨlonga ɨtsa, tsɨ tɨbɔŋ bo nyɛʼnə. 49A ghɨ kɨ́ bé lá adzaŋ məwen a ndwɨgɨnɨ mbyi ɛ: bɨtsen bɨ ndá bɨ Ŋwi ghɨ fú abyɛn, ɨ tye bɨntɔmnɨnɨ a tɨtərɨ ɨbɛn bə shiʼnɨ 50ɨ maʼ awa a mu ɨmugɨ nɨnkoŋ, adiʼ wa bɨ ghɨnɨ tíʼə búgɨnə ɨ kə́ kfúrɨnə mɨsɔŋ ɨma ghe.”
Ɨnu tsɨ Fi abɔʼnɨ tsɨ Lvuŋ ə
51Yeso a bítɨ́ bɨyɛʼ ɨbyi ngə́, “Nɨ zúʼə nkə́ njǐ anu za ɨnu tsiŋ diʼnɨ le?” Bo chwɨ́gɨ́ ngə́, “E.”
52Ma lan, Yeso a tíʼ mbyigɨ ngə́, “Məzen a tiʼ ndiʼ lá ngə́, ndiʼ nyɔngɔŋ tsum wa a tiʼnɨ ngyɛʼ a mu Nɨfɔ nɨ fɔməbvurə a fi lá a mboŋ ndá wa a fɨgɨnɨ ɨdzúm tsə fi abɔʼnɨ tsə lvuŋ a mu ntaŋ nɨle ɨyi ɛ.”
Bɨ Ton a Yeso a Nazarɛ ghe
(Mar 6:1-6; Alu 4:16-30)
53Yeso a ghɨnə mɛ́tɨ́ a ná ɨnu tsen, ndo adiʼ wa, 54ntiʼ mbə́ ngɛn a ntáʼmbagə bo ghe. A díʼ anu a Ŋwi a mu ndáŋwi bə Yuda, ɨbɛn ba bɨ zúʼnɨ́ wə ntsu a kɨ́ʼnɨ́ awa ghe. Bo bítɨ́ ngə́, “A lanɨ ndɔgɨ abə́ŋ a zóŋ məzen lá ɨ ghé le? A kɨ ndɔgɨ mɨtən lá ɨ ghé a ngɨ ɨnu tsɨ yerɨnɨ-yerɨnɨ tsen le? 55A se mɔn nkɔm atɨ wa a wen be le? Ɨkum nɨmi ɨyi se Mɛrɨ be le? Ɨbɔmbɨma ɨbyi bə mbáŋnɨ́ se Jemsɨ, Yosɛb, Samɔn abɔʼnɨ Yudasɨ be le? 56Ɨbɔmbɨma ɨbyi bə bəngye bɨtsum se bɨgɨ bo ɨghan nchyɛ̌ le? A lanɨ tiʼ ndɔgɨ a tsenə ɨtsum lá ɨ ghé le?” 57Ma lan, bo tón awa ayi ɛ.
Yeso a sóŋ a mbó bo ngə́, “Bɨ dǐʼ mbɔm zɨ shiʼnɨ a mbó ntom Ŋwi tsɛʼ ɨdiʼ ɨtsum, lá nkeʼ mə lá be alaʼ bo kə a ngwəgɨ bo ghe.” 58Mbɨ́ʼ ngə́ bo sé nɨ abeməntəm tsi, a sé ɨnu tsɨ yerɨnɨ-yerɨnɨ tsɨ ghaʼtɨnɨ ɨwu ghɨə.
Одоогоор Сонгогдсон:
Matyo 13: MNT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2023, CABTAL