Joh. 20
20
Katusuruat Jesus
(Mat. 28:1-10; Mrk. 16:1-8; Luk. 24:1-12)
1Ka gogoi Menggui simancep, mainem pei le, ei si Maris Magdalena ka ratei. Itcona le atuakkatnan bukku takket ratei. 2Pabalaunangan leu iei kai Simon Petrus, samba ka sipasiului sara kilibet bagat Jesus, kuanangan ka matada, “Araalaan si Tuhan ka ratei, ta kuagai kaipa aragalakngake nia.”
3Bela nia si Petrus samba sipasiului sara raei ka ratei. 4Apabalau le sia ruada, tapoi sipasiului sara le manangka kai Petrus, nia le asege boiki ka ratei. 5Loggouakenangan ka baga, itconangan komang sigalakngakenen, tapoi ta atubuk nia ka baga. 6Oi si Simon Petrus sipasitutut ka teitei, buluk nia ka ratei. Itconangan komang situgagalak sedda, 7samba poposat attinang, tabut utenia, tapoi ta anai palelegere ka komang tabut, ka kudduat bagei le, ai kuleleulekat. 8Lepa buluk leu sipasiului sara, sipuboboiki sege ka ratei, itconangan nia, matonemnangan bagania. 9Teret sedda enan tapei raagai kolou Surat Sipinenan sipasikukua tususuru le nia minca ka simamatei. 10Lepa toili sia sipasiului ka lalepda.
Ipatoila tubunia Jesus kai Maria Magdalena
(Mat. 28:9-10; Mrk. 16:9-11)
11Si Maria geti ai le nia muririo ka bebet ratei, ai nia musosou. Ai nia musosou, lukkukngakenangan utenia ka ratei, 12itconangan rua malaika sipuleleppei simabulau, ai sia mukukuddu sara isit ute, sara isit rere katugalangan tubut Jesus. 13Kuarangan ka matania, “Ina, musosou kodda ekeu?”
Kuanangan ka matada, “Araalaan si Tuhanku, ta kuagai kaipa aragalakngake nia.” 14Kele aikua nene, pitsanangan ka teitei, itconangan Jesus ai nia muririo sedda, tapoi ta iagai Jesus le nenda. 15Kuanangan ka matania Jesus, “Ina, musosou kodda ekeu? Kasei nugagaba?”
Ka bagania le te sipuuku mone le nia, kuanangan ka matania, “Tuan, ekeu bai aiala nia, kua ka mataku kaipa anugalakngake nia, kuei kuala nia.”
16Kuanangan ka matania Jesus, “Maria!”
Beliuakenagan tubunia si Maria kuanangan ka matat Jesus ka ngangan Ibrani, “Rabbuni!” (Tibonannia Guru.)
17Kuanangan ka matania Jesus, “Ba rarape aku, tapei poi atusakai aku ka Ukkui. Kenan le ka sasarainangku, nukua ka matada, tusasakai le aku ka Ukkuiku, samba Ukkuimui, ka Taikamanuangku, samba Taikamanuamui.”
18Einangan leu si Maria Magdalena masisegeake ka matada sipsiului, iitcona si Tuhan samba kukuana sangamberinia nene ka matania.
Ipatoila tubunia Jesus ka sipasiuluinia
(Mat. 28:16-20; Mrk. 16:14-18; Luk. 24:36-49)
19Kele aimasoibo ka gogoi Menggui nenda, ai kalelekerat matatbaliu kudduatda sipasiului Jesus, lotora ka tai Jahudi, oinangan Jesus rio ka talagada, kuanangan ka matada, “Aban ka kam!” 20Lepa aikua nene, paitconangan ka matada kabeinia samba usunia. Maangkanangan bagada sipasiului araitco si Tuhan. 21Kuanangan minca ka matada Jesus, “Aban ka kam! Kele kokoiniakena aku Ukkui, kiseda leu kukoiniake kam.” 22Lepa aikua nene, ulupmakenangan engania ka tubuda, kuanangan, “Silo kam Ketsat Sipunenan! 23#Mat. 16:19, 18:18 Ke nuappeake kam joda sirimanua, tuappenangan leu; samba ke ta nuappeake kam joda sirimanua, taituappenangan leu.”
Ipatoila tubunia Jesus kai Tomas
24Si Tomas geti sara ka sipasiului sipulurua, sipuoni leu Tairua, ta anai nia sambada aioi Jesus sedda. 25Kuarangan sipasiului sabagei ka matania, “Akuitcoan ka si Tuhan”
Kuanangan ka matada, “Ke tapei kuitco balak sipattakat, ke tapei kukau singongaiku ka balak sipattakat nenda samba kukau kabeiku ka usunia, ta matotonem bagaku.” 26Pasat balu ngagogoi parururangan minca sipasiului Jesus ka lalep nenda, samba si Tomas leu ai nia. Ai kalelekkerat matatbaliu, oinangan Jesus rio ka talagada, kuanangan, “Aban ka kam!” 27Lepa kuanangan ka matat Tomas, “Kau se singongainu, itco kabeiku, totoiake kabeinu nuusuake nia ka usuku. Buian imagoa bagam, kauan imatonem bagam.”
28Aleginangan nia si Tomas kuanangan, “Tuhanku! Taikamanuangku!”
29Kuanangan ka matania Jesus, “Anuitcoan poi aku, matonemnangan bagam. Mauktuk te sia simatonem baga, kenanen ta iitco.”
Kiddietnia surat Johannes nene
30Maigi pei le bagei kerek sigalai Jesus ka matada sipasiuluinia, ta atusuratnake ka buko nene. 31Tapoi sangamberinia nene aitusuratnake, bule imatonem bagamui, Jesus ia te Kristus, Togat Taikamanua, samba bule kalulut tonem baga bara ka kam purimanuiat ka bagat oninia.
Одоогоор Сонгогдсон:
Joh. 20: MWV
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү