Joh. 17
17
Itiddouake sipasiuluinia Jesus
1Lepa aikua nene Jesus, teilanangan ka manua kuanangan, “Ukkui, aiailingan teterenia, latsatnake Togam, bule ilatsatnake ekeu Togam. 2Anukauan poi gege ka tubunia ka sangamberi tubu, bule ikau purimanuaiat sitaitatata ka sangamberi sirimanua sisegeakenennu ka tubunia. 3Nene le purimanuaiat sitaitatata: bule raagai ekeu saram le bulat Taikamanua, samba masiagai Jesus Kristus sikoiniakenennu. 4Akulatsatnakean ekeu ka polak nene ka bagat masilepaake galajet siakenu kaku galajakenenku. 5Oto kineneiget, latsatnake aku Ukkui ka bebenu pulatsananku siturerere ka bebenu, enan tapei abara polak.
6Akupatoilaan onim ka matada sangamberi sirimanua siakenu kaku sibara ka polak nene. Ekeu le sibakkat si samba anusegeakean si ka tubuku, samba arareddetnan tiboietnu. 7Kineneiget araagaian sangamberi siakenu kaku, sibara kekeu le. 8Aipoi sangamberi tiboiet sinegeakenennu kaku akusegeakean ka sia, araukkaakean. Bulat araagaian ka tubum le akubara, samba amatoneman bagada ekeu le sikoiniake aku.
9Manindou aku kutiddouake sia. Ta taikapolak kutiddouake, sia le sinegeakenennu kaku, ekeu poi sibakkat sia. 10Sangamberi bakkatku, bakkatnu le, samba sangamberi bakkatnu, bakkatku le, samba atulatsatnakean aku ka tubuda. 11Taan mukukuddu aku ka polak, sia geti ai pei le ka polak, momoian le poi aku ka tubum. Ukkui sipunenan, pasikeli sia ka onim siakenu kaku, bule rapusara kele sita. 12#Psalm. 41:10; Joh. 13:18 Ai pei le aku ka tubuda, akupasikelingan sia ka onim, ia te onim siakenu kaku; akupasikelingan sia, beri sia sara simalilimai, sarat nia le sikokoiakenen malimai, bule ipuaili siniboi Surat Sipunenan. 13Tapoi kineneiget momoian le aku ka tubum. Ai pei le aku ka polak kutiboi nene, bule isun ka tubuda angkat bagaku. 14Akukauan ka sia tiboietnu; malaga le bagada taikapolak ka tubuda, ta poi sibara ka polak sia, keleu aku ta sibara ka polak. 15Ta kutiddou bule nuala si ka polak, tapoi bule nupasikeli le sia ka sikayai. 16Ta sibara ka polak sia, keleu aku ta sibara ka polak. 17Puneni sia ka bagat pubulanan; tiboietnu ia te pubulanan. 18Kele nukoiniake aku ka taikapolak, kisedda leu kukoiniake sia ka taikapolak. 19Samba kupuneni tubuku katupunenanda, rapusipusinenan sibulatnia.
20Tapoi ta sarat sia kutiddouake, kutiddouake leu sia sikatonemi aku kalulut tiboietda, 21bule rapusara sangamberida, kele ekeu Ukkui ka tubuku, aku ka tubum, bule kisedda leu sia musara ka tubuta, imatonem bagada taikapolak, ekeu le sikoiniake aku. 22Akukauan ka sia pulatsanan siakenu kaku, bule rapusara kele sita sipusara; 23aku ka tubuda, ekeu ka tubuku, bule imasun pusaratdaimatonem bagada taikapolak ekeu le sikoiniake aku samba manuntu bagam ka tubuda, kele nuntut bagam ka tubuku.
24Ukkui, siobaku kaipa le kukuddu, sedda leu rapukuddu sangamberi siakenu kaku, bule raitco pulatsananku siakenu kaku, enan tapei abara polak. 25Ukkui simaroipo, kenanen ta raagai ekeu taikapolak, aku geti kuagai ekeu, samba sia nene araagaian ekeu le sikoiniake aku. 26Akupatoilaan onim ka tubuda, samba kaupatotoila pei le, bule ikuddu ka tubuda nuntut baga sigalainu ka tubuku samba aku leu ka tubuda.”
Одоогоор Сонгогдсон:
Joh. 17: MWV
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү