Pugap. 8
8
1aSi Saulus leu pasese ka bagania aramateiake Stefanus.
Ikukuru paamian si Saulus
1bIa leu ne gogoinia bara pangukurat simapali ka paamian ka Jerusalem. Pusaburangan sangamberida ka sangalio tobbou Judea samba Samaria, legeina le tai apostel. 2Alarangan tubut Stefanus sia simatopit, rateiakerangan nia samba rasoibi nia simakope.
3 #
Pugap. 22:4, 5, 26:9-11 Si Saulus geti riuriu le ipakatai paamian, ei nia ka senen lalep, giritnangan sia taimanteu samba tainanalep masikau sia ka penjara.
Katuareman Simaeru tusegeake ka Samaria
4Oto sia sipusasabu, ei sia masigejengi sangalio laggai pagalu masipaarep Katuareman Simaeru. 5Si Pilipus geti ka inan laggai Samaria le aiei, segeakenangan ka matada sedda pagalaiat Kristus. 6Kele araarep ngantoman Pilipus samba araitco kiseiet sigalainia, kere bagada sangamberida masilelekngake siniboinia. 7Aipoi maigi sia pinasaileu sanitu abelangan ketsat sikatai ka tubuda samba mugerei sabeu nganga; maigi sia simasakit samba simajegeu aialeake. 8Maangkanangan bagada simakope ka laggai nenda.
9Ka laggai nenda ai sara sirimanua sipuoni si Simon, maujungan aigalai kiseiet bagada tai Samaria kalulut tawania, samba ikau tubunia sirimanua ta anai siaili nia. 10Sangamberi sirimanua taigoiso samba sabeu masitut nia, kuarangan, “Sirimanua nene te ron Taikamanua oniakenen Ron Sabeu.” 11Maujungan poi aipepeake sia kalulut tawania, ia te ratututnake nia. 12Tapoi kele arakatonemi ngantoman Pilipus pagalaiat Purimataat Taikamanua samba pagalaiat onin Jesus Kristus, bailiu turau sia, taimanteu samba tainanalep. 13Samba si Simon leu mutonem baga. Lepa aiturau nia, tutnangan si Pilipus. Itco aiitco kiseiet samba kerek sabeu, tenan le kisei ka bagania.
14Kele araarep nia tai apostel ka Jerusalem aalara tai Samaria tiboiet Taikamanua, koiniakerangan si Petrus samba si Johannes mei ka sia. 15Sege sia sedda tai apostel panindourangan bule rasilo Ketsat Sipunenan tai Samaria. 16Aipoi beri pei sara sia sinopsop Ketsat Sipunenan, sarat ka onin Jesus pei le aiturau sia. 17Lepa tonemakerangan kabeira ka utera, sopsopnangan ka tubuda Ketsat Sipunenan.
18Kele aiitco si Simon kalulut totonemakera kabeira tai apostel ka utera aisopsop ka tubuda Ketsat Sipunenan, totoiakenangan ka tubuda bulagat, 19kuanangan, “Ake kam kaku kerek kele nene, bule kasei kurape, sopsopnangan sia Ketsat Sipunenan.”
20Kuanangan ka matania si Petrus, “Malolosengan te ekeu samba bulagatnu, ka bagam le te momoi nusaki nia bulagat panguruat Taikamanua. 21Ta anai rubeiat ele eneunu ka bagat galajet nene, ta maroipo poi paatuatnu ka matat Taikamanua. 22Oto bauake paatuatnu ka jom nene, samba panindou kai Tuhan bule iappeake jot paatuatnu nene. 23Aipoi kuitco paatuatnu kele lappegu simapongitnan le samba aiserengan ekeu pukakatai.”
24Aleginangan nia si Simon kuanangan, “Tiddouake kam aku kai Tuhan, bui ibara ka tubuku kele siniboimui.”
25Lepa aramunengake samba aratiboi tiboiet Tuhan, toili sia ka Jerusalem samba ka puenungananda rapakakara Katuareman Simaeru ka bagat maigi laggai ka Samaria.
Si Pilipus samba pegawai rimata ka Etiopia
26Lepa kuanangan malaikat Tuhan kai Pilipus, “Suruake ekeu, kenan ka isit kaiaman, ka enungan ka Jerusalem mei ka Gasa.” Enungan nenda matangeu. 27Suru si Pilipus einangan leu et. Ai sara tai Etiopia, pegawai rimata Kandake rimatada tai Etiopia, sipasikeli sangamberi bibiletnia. Pegawai nene amei nia ka Jerusalem manindou. 28Kineneiget ai nia totoili mukureta, aibabasa surat nabi Jesaya. 29Kuanangan Ketsat ka matat Pilipus, “Kenan tagetnake kureta nenda.” 30Pabalaunangan si Pilipus, arepnangan ibasa surat nabi Jesaya. Kuanangan si Pilipus, “Nuagai leu sibasam nene?”
31Kuanangan, “Kipa iooi kuagai nia, ke ta anai sipangantoman aku?” Nananangan si Pilipus itujanang ka kureta mukuddu ka bebenia. 32#Jes. 53:7, 8 Ruang surat sibasania nene le:
“Kele biribiri sitaroakenen ka pasijajakat le nia;
kele togat biribiri sipumemengmeng ka matat sipananapu bulunia,
kisedda te taibubukana ngangania.
33Rapaloloi samba ragalai sitaimaroipo ka tubunia.
Kasei siagai masinunuake muntogatnia?
Atualaan poi engania ka polak nene.”
34Kuanangan pegawai tai Etiopia kai Pilipus, “Kua pei, kasei ititiboi si nabi nene, pagalaiat tubunia ele sabagei le ititiboi?” 35Taddaakenangan si Pilipus masikolouake samba mubongen ka ruang nene isegeake ka matania Katuareman Simaeru pagalaiat Jesus. 36Riuriuakerangan puenungananda, ailirangan sara bagat oinan. Kuanangan si pegawai, “Aikoi oinan, apangan le isasailania turau aku?”
[37Kuanangan ka matania si Pilipus, “Ke matonem bagam sibara ka sangalio paatuatnu, momoi.”
Aleginangan nia, “Matonem bagaku, Jesus Kristus ia te Togat Taikamanua.”]
38Ia geti kuanangan ipuari kureta; gorosot sia ruada si Pilipus samba si pegawai, raunangan nia si Pilipus. 39Kele aratusakai ka oinan, paambitnangan si Pilipus Ketsat Tuhan, taitconangan nia si pegawai tai Etiopia. Riuriuakenangan puenunganannia ka angkat baga. 40Si Pilipus geti againa le aian nia ka Asdod. Gejenginangan sangalio laggai nenda masipaarep Katuareman Simaeru, pat aili ka Kaisarea.
Одоогоор Сонгогдсон:
Pugap. 8: MWV
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
