Pugap. 6
6
Pamiliat pitu sipasirorom tai apostel
1Ka sara tetere kele aiurau igida sipasiului, pungungurangan tai Jahudi sipunganga ngangan Grika ka tubuda tai Jahudi sipunganga ngangan Ibrani; kalulut arakalipogi tailumangda ka pasikelat senen gogoi. 2Kalulut nene ruruakerangan sangalio paamian tai apostel sipulurua kuarangan, “Ta pasese ka kai kugalakngake kai masipasikeli Tiboiet Taikamanua kalulut masipasikeli komen. 3Oto sasaraina, pili kam ka talagamui pitu sia simatopit, sinopsop Ketsat Sipunenan samba simasiku paatuat, rioakenenmai masipasikeli galajet nene; 4ka kai geti kumuineakean le kai paatuatmai ka panindogat samba masipasikeli ngantoman.”
5Tiboiet nene pasese ka bagada sapaamian. Oto pilirangan, Stefanus, sirimanua simasun tonem baga samba Ketsat Sipunenan, samba si Pilipus, Prokorus, Nikanor, Timon, Parmenas samba Nikolaus, ia te sipuaarat Jahudi sibara ka sipuarat sabulungan ka Antiokia. 6Rioakerangan sia ka matada tai apostel, lepa panindourangan tai apostel samba ratonemake kabeira ka utera ratiddou panukanan Tuhan ka tubuda.
7Memei marararat tiboiet Taikamanua, samba memei makope iurau igida sipasiului ka Jerusalem; samba tai imam leu maigi sia masitut mutonem baga.
Ralaba si Stefanus
8Stefanus geti simasun tonem baga samba gege, igalai le kerek samba kiseiet sabeu ka talagat sirimanua simigi. 9Lepa suru piga pa sibara ka parurukat oniakenenda tai Libertini – ia te tai Jahudi sibara ka Kirene samba Aleksandria – sambada tai Jahudi sibara ka Kilikia samba sibara ka Asia, pajoggoloakerangan Stefanus. 10Tapoi ta araom masisaggangi sikut paatuatnia samba Ketsat sipaalei nia manibo. 11Lepa tubbuirangan sirimanua sipasikukua, “Akuarepman kai ipaloloi si Mose samba Taikamanua.” 12Kisedda te rabaraake pugaugapat ka sirimanua simigi samba tai baja samba siagaisurat; labarangan Stefanus, ambitrangan nia ka matat Rapat Sabeu. 13Rioakerangan leu sipasimumuneng boko masikua, “Ta iaariake sirimanua nene masipaloloi kudduat sipunenan nene samba Surukat. 14Akuarepman poi kai aikua nia: Iraragatnake le kudduat nene Jesus tai Natsaret, samba isili bagei sangamberi arat siaket Mose ka sita.” 15Kinererangan nia sangamberida sikuddu ka purapanan, kean le matat malaika raitco matania.
Одоогоор Сонгогдсон:
Pugap. 6: MWV
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
