Génesis 2
2
1Saynapin Señor Diosqa hanaq pachata, kay pachata hinallataq tukuy kaqkunatapas unanchayta tukuran. 2Qanchis kaq p'unchawpitaqmi Diosqa samaran, tukuy unanchasqan tukusqaña kasqanrayku. 3Hinaspan Diosqa chay qanchis kaq p'unchawta sapaqchaspa bendeciran. Chay p'unchawpin Diosqa tukuy imaymana unanchasqankunamanta samaran. 4Saynatan Señor Diosqa unancharan cielokunata hinallataq kay pachatawan ima.
Adanmanta Evamantawan
Señor Diosmi kay pachata hinallataq cielokunatawan unancharan. 5Ichaqa manaraqmi kay pachapiqa ni ima plantakunapas karanchu nitaqmi ni ima qorakunapas wiñamuranraqchu, Señor Dios manaraq parachimusqanrayku. Nitaqmi kay pachapiqa ni runapas karanraqchu chakrapi llank'ananpaqqa. 6Aswanmi kay allpa pachamantaqa unupa waspiynin lloqsimuspa, enteron kay pachata regaran. 7Hinaqtinmi Señor Dios polvo allpamanta runata ruwaran. Hinaspan senqanpi phukuyuspa kawsayta qoran. Chaymi allpamanta ruwasqa runaqa kawsashaq runaña karan.
8Chaymantan Señor Diosqa intipa lloqsimunan lawpi Edén nisqa huertata ruwaran. Hinaspan chay huertaman chay ruwasqan runata churaran. 9Saynallataqmi Señor Diosqa tukuy clase sumaqllaña sach'akunata wiñachiran. Chay sach'akunaqa qawarinapaq hinallataq mikhunapaqpas sumaqllaña ruruyoqmi karan. Hinaspan chay Edén nisqa huertapa chawpinpi, kawsay qokuq sach'ata churaran. Hinaspapas churallarantaqmi huk sach'atapas; chay sach'an karan allin kaqta hinallataq mana allin kaqta yachanapaq sach'a.
10Chay Edén nisqa huertamantan huk hatun mayu lloqsimuspa, chay enteron huertata regaran. Hinaspapas chay hatun mayuqa tawa mayukunamanmi rakikuran. 11Primer kaq mayupa sutinmi karan Pisón. Kay mayun enteron Havila sutiyoq allpata muyuriran. Chay allpapin ashka qori tarikun. 12Chay qoriqa ancha sumaq finon. Chaypiqa kallantaqmi ónice sutiyoq alhaja rumipas hinallataq sumaq mishk'i asnaq bedelio sach'akunapa weqenpas. 13Ishkay kaq mayupa sutinñataqmi Gihón. Chay mayun enteron Cus nisqa lawninta rishan. 14Kinsa kaq mayupa sutinñataqmi Tigris. Chay mayuqa Asiria nación lawmanta intiq lloqsimunan lawmanmi rishan. Tawa kaq mayupa sutinñataqmi Éufrates.
15Señor Diosqa chay Edén nisqa huertamanmi runata churaran, chaypi llank'ananpaq hinallataq allinta cuidananpaq ima. 16Hinaspan Señor Diosqa runata kamachiran khaynata:
—Huertapi llapallan sach'akunapa rurunmi mikhunaykipaq kanqa. 17Ichaqa aman mikhunkichu allin kaqta hinallataq mana allin kaqta yachanapaq sach'apa ruruntaqa. Sichus mikhurunki chayqa, chay p'unchawpin cheqaqtapuni wañunki, nispa.
18Chaymantan Señor Diosqa nillarantaq khaynata:
—Manan allinchu runa sapallan kasqanqa. Aswanyá ruwasun huk warmita compañeran kaspa, payta yanapananpaq, nispa.
19Señor Diosqa polvo allpamantan campopi tiyaq salqa animalkunata hinallataq alton phawaq animalkunatapas ruwaran. Hinaspan Señor Diosqa chay llapallan animalkunata Adanman apamuran, sutinta churananpaq. Chaymi Adanqa llapallan animalkunaman sutinta churaran; chay suti churasqanwanmi llapallan kawsaq animalkunaqa reqsisqa. 20Saynapin Adanqa llapallan animalkunaman sutita churaran, hatunkaray animalkunaman, alton phawaq animalkunaman hinallataq campopi tiyaq salqa animalkunamanpas. Ichaqa Adanpaqtaqmi mana karanchu payta yanapananpaq huk compañeran. 21Chaymi Señor Diosqa Adanta mishk'ita puñurachiran. Hinaspan puñushanankama huknin kaq waqta tullunta orqoruspa, aychantaqa kaqlla wishq'arapuran.
22Hinaspan Señor Diosqa runapa chay huknin kaq waqta tullun orqosqanmanta huk warmita ruwaran. Hinaspan payman pusamuran. 23Hinaqtinmi Adanqa khaynata niran:
—¡Waw, payqa tulluymanta hinallataq aychaymantamá!
Paytan sutichasaq “warmiwan”,
cuerpoymanta ruwasqa kasqanrayku, nispa.
24Chayraykun qariqa papantapas mamitantapas saqespa warminman hukllakunqa. Saynapin ishkayninku huk ch'ulla runa hinallaña kanqaku.
25Adanpas hinallataq warminpas ishkayninkun q'alalla kasharanku. Ichaqa q'alalla kashaspankupas, manan p'enqakurankuchu.
Одоогоор Сонгогдсон:
Génesis 2: QEAÑT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
