लुका 24
24
येशूओ पुनरुठान
(मत्ती २८:१-१०; मर्कूस १६:१-११; युहन्ना २०:१-१०)
1हप्टौ पहीलो डीन गोराक झीस्मीसाङ न होसे मास्टोको लहे टयार खास्च बासना राछ मलम र अट्टर लार होखुरीक येशूओ चीहानाङ राहा। 2होखुरीकै चीहानौ मेङेर हुप्च ल्हुङ्की सारीम डाच डुपा। 3होखुरीक चीहान भीत्री पर्यार ङोस्नाङ होला प्रभु येशूओ लास माडाङा। 4होटै होखुरीक इसे कुराङ अलमल्ल छान्न ङुमन्या। मसोमायाङ होला चहकीलो बढीन बील्छ नीस जना भर्मी होखुरीकुङ छेवाङ टोङ्छ डाङा। 5होटै मास्टोको बीर्हीयार झाङ ङोसार घुकुरुक छाना। टर होसे नीस जना भर्मीये इट डेया, “नाखुरीक जीउँडै भर्मीकी सीचकुङ मीघ्याङ हीजै पाले? 6होसको इला माले, टर जीवाम सोम भ्यामे। गालीलाङ लेनाङ होसकै नाखुरीककी ही डेमन्या होसे आर्मीट्नी। 7भर्मीयो मीजाकी पापी भर्मीकुङ मीहुटाङ पर्की र क्रूसाङ टङ्गडीस्की र सोमयाकाङ जीवाम सोकी आवस्यक ले।” 8होडीक बेला मट्टै होखुरीकै येशूये डेच बचन आर्मीटा।
9होटै चीहान लकीङ ल्हेसार राछ न्हुइङ होखुरीकै लहे डाङ्च पट्ट न कुराको एघार जना चेलाको र अरु पट्ट चेलाकोलाक सेटाका। 10होसे मास्टोको चहीँ मरीयम मग्डलीनी, योअन्ना र याकुबौ मोइ मरीयम र अरु मास्टोको र लेया। इखुरीकै न इसे कुरा एघार जना प्रेरितकोलाक सेटाका। 11टर चेलाकै इसे कुरा नाखुरीकै बीट्ठाङ न डेच हो डेम विश्वास माजाटा। 12टर पत्रुस चहीँ जुरुक सोम चीहानाङ खेर्न नुङा। होटै घुकुरुक छानार चीहान भीत्री ङोस्नाङ काट्रो मट्टै डाङा। याङ्च घटना डाङार होसे अचम्म मन्डीचै ल्हेसा।
इम्माउसौ लामाङ येशू
(मर्कूस १६:१२-१३)
13होस्नीक न येशूओ नीस जना चेलाको यरूशलेम लकीङ एघार कीलोमीटर टडीक लोस लेच इम्माउस डेच लाङ्घालाक नुङ्ङ न लेया। 14होखुरीक चाम-चाम छान्च पट्ट घटनौ बारेयाङ कुरा जाट्न न लेया। 15इटजाट्न होखुरीक लाहा-लाहाङ कुरा जाट्चै र छलफल जाट्चै व्हामन लेनाङ येशू मेखोल्हा न खेरेप राहार होखुरीक खाटा काठोव्हाङ न व्हाकी ठाला। 16टर होखुरीकुङ मीमीककी चहीँ येशूकी चीन्डीकी माय्होक्च खास्न याम्हन्या। 17होटै येशूये होखुरीककी गीना, “नाखुरीक हीयो बीसयाङ कुरा जाट्न व्हामने?” होखुरीक नीरास छान्चै टोङ्हा। 18होसे नीस जना मढ्याङ क्लेओपास डेच काट जनै चहीँ होसकोकी डेया, “होइन, नाको यरूशलेमाङ ङुले होइन र? होला चाम-चाम छान्च घटनौ बारेयाङ नाकोकी थाहा माले?” 19होसकै होखुरीककी गीना, “कुङ्च घटना?” होखुरीकै डेया, “येशू नासरीयो बारेयाङ छान्च कुरा। होसको काट जना अगमवक्ता लेया। परमेश्वर र पट्ट भर्मीकुङ म्याहासाङ बचन र कामाङ शक्तिशाली लेया। 20टर मुख्य पुजाहारीको र कानुङ शासककै होसकोकी मृत्यु दण्डौ लागी जीम्मा याहा। होटै होसकोकी भर्मीकै क्रूसाङ टाँङ्गडीया। 21कानै होसकै न इस्राएलकी छुटकारा याल्हे डेम आशा जाट्नन्या। टर होसकोकी क्रूसाङ टाँङ्गडीच र छीनी सोम याक छाना। 22कानुङ कुडीक जना डै-बहीनीकै डेच कुरै कानकी अचम्म खास्नने। होखुरीक छीनी गोराक झीस्मीसाङ न चीहानाङ नुङा। 23टर होखुरीकै होला येशूओ लास माडुपा। होटै होखुरीक ल्हेस्न राहार कानकोलाक सेटाका, ‘कानै स्वर्गदूतकोलाक डाङा’ होखुरीकै न ‘येशू जीउँडै न ले’ डेच कुरा सेटाका। 24होटै इसे कुरा सेयार कानुङ कुडीक जना लाफाको र चीहानाङ ङोस्की नुङा। होटै होसे मास्टोकै डेच लेखा न डुपा, टर होसकोकी चहीँ माडाङा।”
25होटै येशूये होखुरीककी डेया, “ए मुर्ख भर्मीको, नाखुरीकुङ मीमन बोढो छान्नने। अगमवक्ताकै डेच कुराको र विश्वास माजाट्ले! 26ही मुक्ति याछ ख्रीष्टै इसे डुखको भोक्डीकी होटै लहो महीमाङ नुङ्की आबसेक मालेया र?” 27होटै येशूये मोशा लकीङ लार पट्ट अगमवक्ताकै धर्मशास्त्राङ लहो बारेयाङ रीक्च कुराको होखुरीककी बुझडीम याहा।
28होखुरीक नुङ्चै जाट्च इम्माउस लाङ्घौ खेरेप टाहा र येशू होटै र लोस नुङ्की पानाङ लेखा जाटा। 29टर होसे नीस जनै न होसकोकी इट डेम कर लैडीया, “छीनी कान खाटा न बास ङुनी, हीजैडेनाङ नामबीक्ङ भ्यामने।” होटै होसको होखुरीक खाटा न बास ङुवा। 30येशू होखुरीक खाटा ज्याकी ङुनाङ रोटो लार धन्यावाद याम्ह रोटो ग्याका होटै होखुरीककी पुङ्ङ याहा। 31होटै होखुरीकुङ मीमीक खोलीसा र येशूकी चीन्डीया। टर होसको होडीक न बेला होखुरीक लकीङ अलप्डीसा। 32होटै मेखुरीक-मेखुरीक डेया, “होसको कान खाटा लामाङ कुरा जाट्नाङ र कानकी धर्मशास्त्रौ अर्थ खोलीम यान्हाङ ही कानुङ मीमन आनन्द माछानन्या र?”
33होखुरीक होडीक बेला न सोवार यरूशलेमाङ ल्हेस्न राहा। होला एघार जना चेलाको र होखुरीक खाटा भेला छान्च अरु भर्मीकै 34इट डेम ङुच डुपा, “प्रभु साँच्ची न जीवाम सोमने र सीमोनै डाङ्च हो लेसा।” 35होटै होसे नीस चेलाकै लामाङ छान्च पट्ट न कुराको र येशूये रोटो ग्याकार यान्हाङ कुटजाट्न होसकोकी चीन्डीया डेच बारेयाङ होखुरीककी सेटाका।
चेलाकोलाक येशूओ डर्सन
(मत्ती २८:१६-२०; मर्कूस १६:१४-१८; युहन्ना २०:१९-२३; प्रेरित १:४-८)
36होखुरीकै इसे कुरा जाट्न न लेनाङ येशू होखुरीकुङ मीघ्याङ मोसोमाङ टोङ्हा र डेया, “नाखुरीककी शान्ति छान्ख्यो।” 37होखुरीक खेङ्रेक गान्हा र बीर्हीया, “कानै च पेरेट टी डाङा” डेम आर्मीटा। 38टर येशूये होखुरीककी डेया, “नाखुरीक हीजै इटजाट्न बीर्हीछ र मीमनाङ याङ्च सङ्खा जाट्ले? 39ङौ मीहुट र मीकु ङोस्नी, ङा न हो, ङाकी छुवार ङोस्नी। हीजैडेनाङ पेरेटौ च मीस्या र हाडो माछान्ले, टर नाखुरीकै डाङ्नने, ङौ च ले।” 40इट डेयार होसकै होखुरीककी लहो मीहुट र मीकु टान्हाका। 41होखुरीक मार्हाङार पट्डीकी माय्होक्ङ छक्क पर्च डाङार होसकै होखुरीककी डेया, “नाखुरीक खाटा हीर ज्याच कुरा ले?” 42होखुरीकै जोम डाच काट टुक्रा डीस्या होसकोकी याहा। 43होटै होसकै डीस्या लार होखुरीकुङ म्याहासाङ न ज्या। 44होसकै होखुरीककी डेया, “ङै नाखुरीक खाटा लेनाङ डेच कुराको इसे न हो। ‘ङौ बारेयाङ मोशौ व्यवस्था, अगमवक्ताकुङ कीताब र भजन सङ्गरहाङ रीक्च पट्ट कुराको ओल्खी न पर्ले’ डेम नाखुरीक खाटा ङै डेमन्या।”
45होटै होसकै होखुरीककी धर्मशास्त्राङ रीक्च कुराको वार्खी य्होक्च शक्ति याहा। 46इजाट्न रीक्ङने, मुक्ति याछ ख्रीष्टै डुख भोग्डीयार सोम डीनाङ सीच लकीङ जीवाम सोकी पर्ले। 47होटै यरूशलेम लकीङ सुरु जाटार पट्टन जाटीयुङ भर्मीकोलाक होसकुङ म्यार्मीनाङ पापको डासार परमेश्वर पट्टी ल्हेस्की र पापौ क्षमा बारेयाङ सेटाक्की पर्ले। 48इसे कुराकुङ साक्षी चहीँ नाखुरीक न हो। 49सेनी, “ङौ बोये जाट्च प्रतिज्ञा ङा नाखुरीक लेठाङ बीर्न्हकाले। टर स्वर्ग लकीङ राछ शक्तिये मान्हेप्ठर सम्म नाखुरीक इसे सहराङ न ङुनी।”
येशूकी स्वर्गाङ गाराङ्ङ आल्छ
(मर्कूस १६:१९-२०; प्रेरित १:९-११)
50होटै येशूये चेलाकोलाक बेथानिया सम्म आल्हार लहो मीहुट सोटार होखुरीककी आसीस याहा। 51आसीस यान्हाङ-यान्हाङ न होसको होखुरीक लकीङ भा होटै स्वर्गाङ गाराङ्ङ आल्हा। 52होखुरीकै होसकोकी झोरा र मार्हाङ्चै यरूशलेमाङ ल्हेस्न राहा। 53होटै होखुरीक सढैँ परमेश्वरौ प्रशंसा जाट्चै परमेश्वरौ मन्दिराङ ङुकी ठाला।
Одоогоор Сонгогдсон:
लुका 24: EMGP
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2024 (Active), Wycliffe Bible Translators, Inc. All rights reserved.
