Luka 13
13
Ndi mwakana ukutontolokwa mulifwa
1Pampindinye yoyo wamwi wano walinji penepo wanenile Yesu ivya wa Galileya wano Pilato wakomile wano wafimanga inzuwi zyawo kwe Leza. 2Yesu awatolelela ati, Wuzye muno awa Galileya wakomelizizwe kwechonye-choo, mukwelengania mukuti wakomilwe amuno walinji awawembu ukulusye awa Galileya wonsi? 3Ng'o! Nkuwanena nkuti ndimwakana ukutontolokwa kuluwembu lwinu, mwensinye mulifwa ndivino walyanye, 4Ngaweni wawo ikumi nakananimonsi awa mu Siloamu wane wafwile pano akapungu kawaponezile? Wuzye mukwelengania mukuti walinji awawipe ukulusye awantu wonsi wano wikalanga mwe Yerusalemu? 5Ng'o! Nkuwanena nkuti ndimwakana ukutontolokwa kuluwembu lwinu namwenye mulifwa ndivino walyanye.
Umulumbe wamukunyu wuno wusikoma
6Ngapano Yesu awumila umulumbenye woo ati, Kwalinji umuntu wino muchalo chakwe ichamiti mwalinji umukunyu. Aya mukuvwamba amaku kweneko azana nayamwi. 7Achaleka anena umuwomvi wamuchalonye chocho ati, Lola, pano nanda nkakwizila koo imyaka yitatu nsitela nzane amaku yamwi. Wukome! Ngamunochanichino wungalanga wukavinda ichalo? 8Ukuwa umuwomvi wamuchalo ati, Tatakulu, leka wuwange, numwakanye woo; nandi nkumbe mwisika ndiwilizye mbike umuvundo mwenemo. 9Ndiwiza wakoma ivikomwa umwaka wuno wukwiza, yechazipa; ukuwa ndiwiza wakana ukukoma, apano uyize uwukome.
Yesu apozya umwanachi mukongowale pawanda wakusolezya
10Pawanda wakusolezya Yesu wasambilizyanga mung'anda yakupepela. 11Numwanachi wino walwile umuzimu wuwipe kumyaka ikumi nakananimonsi walinji momonye; wakongowile chamupotanga nukwinuka. 12Ala Yesu wamulola amwita ati, Mwanachi, wapusuka kundwala yako! 13Awika amakasa yakwe peweliwe napaponapapo ayololoka awatumvya Leza.
14Ngapano esongo wang'anda yakupepela avitilwa Yesu muno wapozizye pawanda wakusolezya achaleka avwanga kuwantu ati, Kuli amanda mutanda yano twazipila ukuwomba imilimo; achaleka muwakwiza mumanda yayonye kukupozwa, pawanda wakusolezya pole!
15Imfumu e Yesu amutolelela ati, Mwewakachenjezya-mwe! Mwensinyepyu mukakwiyulila ing'ombe zinu nanti andokwe amuzifumya muluwa aziya mukung'wa aminzi pawanda wakusolezya. 16Wuzye kanonzi mukuti umwanachinye wee awikwata lyakwe Abrahamu wino Satana wamunyefile imyaka ikumi nakananimonsi atize akululwe pawanda wakusolezya? 17Itolelelo lyakwe Yesu alisonzya awalwani wakwe insoni, ukuwa iwumba lyawantu wonsi awazewela kuvyakuzungusya vino wachisile.
Umulumbe walupumba lwamuti
(Mateyu 13:31-32; Marko 4:30-32)
18Yesu ati, Nga Uwufumu wakwe Leza wakolana nachani? Nga nawukolania nachani? 19Wakolana nulupumba lwamuti, luno umuntu wasenzile akomela muchalo chakwe; umuti awumela awukula, ninyunyi aziluka ivisalanzo vyawo munsamba.
Umulumbe wamutawa
(Mateyu 13:33)
20Yesu anyoka awuzya ati, Nga Uwufumu wakwe Leza nawukolania nachani? 21Wakolana numutawa wumo umwanachi watozile awuvundunkania muwusu wamumpakwilo, awusuka umunya wonsi awututumuka.
Impongolo mfenenkane
(Mateyu 7:13-14, 21-23)
22Yesu alema umusinzo awapita mutwaya tukulu nututichi, alanga akusambilizya pano akuya kwe Yerusalemu. 23Wumwi amuwuzya ati, Tatakulu, Wuzye watichinye awano walitulwa?
Yesu awatolelela ati, 24Nkuwanena nkuti, Yipatichizyanji pakwinjila pampongolo mfyenenkane; amuno awavule waliwalonda ukwinjila mwenemo, ukuwa walipotwa. 25Umwening'anda alikatuka ayiyale ichisakati; nga ndimwiza mwimilila palonde mwakong'onsya ichisakati mwati, Twazina twiyulile! Aliwatolelela ati, Ntamanyile kuno mufumile! 26Namwe mutolelele muti, Ngavino twalyanga apaliponga nawe nukung'wa; wasambilizyanga namukaya kitu! 27Nawe alinyoka ati, Ntamanyile kuno mufumile. Mfumilani paa, mwensi mwewakachita waluwembu! 28Ye, kuliwa inkuta nukulumania amino wuli pane mwiza mwalola Abrahamu nu Ayizeki, nu Jekapu nawatumwa wonsi mu Wufumu wakwe Leza, pano mwenji mulisumbilwa kunzi! 29Awantu walifumilila kapela nakasika, namutumbazwa monsi, wize wikale pachakulya mu Wufumu wakwe Leza. 30Paponye apano wane awakupelelechezya kanonzi waliwa awakutalika, nawakutalika waliwa awakupelelechezya.
Vino Yesu wakunzile Yerusalemu
(Mateyu 23:37-39)
31Pampindinye yoyo awaFalisi wamwi awaya kwe Yesu awamunena awati, Ule upite ufume moo uye kunji, amuno Herodi akulonda ukukukoma.
32Yesu awatolelela ati, Yanji kanenani mumbwe weyo muti, Nkuwinga imizimu miwipe mbali nukupozya ilelonye lyoo namutondo, ukuwa uwanda wachititatu weni, ndimalizya umulimo wane. 33Ukuwa naponye kandende mpite ilelo namutondo, nuwacha amuno umutumwa atanga akomwe kunji konsi suka ndi amwe Yerusalemu.
34Oko we Yerusalemu, Yerusalemu! Ukakoma awatumwa, upola intumi zyakwe Leza zino zikatumwa kwewewe namawe! lmpindi yakula wuli pano nanda nkalonda ukukonganika awanako wonsi mbafukatile, ndivino nyinankoko akafukatila utwana twakwe muvyapa, ukuwa mwenji mwankania! 35Nkuwanena nkuti, Ing'anda yinu yakankamulwa. Mutalitela mundole, isuke impindi iyize iyize pano muliti, Ndi Leza apepe wino akwizila mwizina lya Mfumu.
Одоогоор Сонгогдсон:
Luka 13: WWN82
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Chinamwanga Bible © United Bible Societies, 1981.
