Lûk 23
23
Jisos o/bwom ké Bushú ḿbú Otu-Dyishí mú odabángê Pálet
(Mátyuu 27:1-2, 11-14; Mâk 15:1-5; Jǒn 18:28-38)
1Ne kángkáng burwám-banet ḿbé esuk nyí banet-Jûs ámbe ba-bûu kâng nensang, ba-kúng Jisos ba-ca ne nyǐ ké bushú ḿbú otu-dyishí mú odabángê Pálet. 2Ba-kpet Jisos ebât byiraa ba/fu, be byi/kâm onyinchéng mún ké mu o-bên n oshê eten, o-sét ng banet o/fu, ba*dachîkye otu mú Rûm akpuga-dyishí*. O-bwa o-sét to o/fu, nyǐ oyén o-chi i Karâs mú Osówo o/kúng ǎ butu.
3Pálet o-bí Jisos o/fu, wo a-chi i otu mú banet-Jûs dí.
Jisos o-faa ǎ o/fu, wo nké a/fu, me n-chi i.
4Ne Pálet o-raa ne batu-banchi kyifen-Osówo ne bujê-banet ḿbé ba/mû ányi o/fu, me n*da/ri ne dyishí-chwǒm ńdyí ndakét mpan n/fu, baju onyinchéng mún*.
5Nké mbé ba/tú dyishí kyi-shwôm eringe nyí kyi/mû ké kashú ba/fu, nyǐ mu o-kpet ng ne bunwa ḿbú mbu bu-káng ng oshê omúmú ké Judyâ, ké byěm emen ḿbyí mu o-tángê e. O/kpet ké Gályílyi, nké kántîk oo/ribi nyín.
Jisos o/bwom ké Bushú ḿbú Otu Hérot
6Ké nkéré Pálet o/jwo ńkyín, o-bí o/fu, onyinchéng mún o-chi i onet-Gályílyi dí. 7Ké nkéré mú ba/sét ǎ ba/fu, Jisos o/fím ké oshê mú mu ké bubwô ḿbú Otu Hérot, Pálet o-twóm Jisos o-kâm Otu Hérot, mú o/mû o/bê to Jerúsélem ké nkéré ámu. 8Kyi/nyîn Otu Hérot dyityém kanong kanong ńdyí o/ri Jisos, ké ebóng, Otu Hérot o/mû oo/jwo kyi-kim ne Jisos, ne o/mû mu o-ryuu ng ké kyikim-nkéré chwóó o/fu, nyǐ o-ri ng ǎ. O/mû mu o-tî ng achi o/fu, nyǐ o-ri ng akat abónge nyí Jisos o/chi o-chi. 9Otu Hérot o-bí kâng Jisos bǎmbím chwóó, nké Jisos o*da ǎ efaa nang ojá*. 10Batu-banchi kyifen-Osówo ne bantánge Byije-Músis ba-byí ba-bwom, ba-bât Jisos biǐtí-byiraa. 11Otu Hérot ne basúja emen ba-fát Jisos kiikuku, ba-chi ǎ byěm wǎ enyam-onet. Ba-fé ǎ ágbádá-butu ké byiko, ba-twóm ǎ o-bwa esim o-kâm Pálet. 12Ké ochíchí-dyicí ándyi, Otu Hérot ne Pálet ba-firi bucín. Kpákpá ne chwǒm ńkyín kyi-chi, ba/mû banet-bushwôn.
Ba/két Mpan ba/fu, baju Jisos
(Mátyuu 27:15-26; Mâk 15:6-15; Jǒn 18:39-40; ne ké19:1-16)
13Pálet o-kó batu-banchi kyifen-Osówo ne banet-ashí-banet-Jûs ne banet ḿbé ba/mû ányi, 14ne o-sét kámbé o/fu, ben ba/bê ne onyinchéng mún oshê ejí ba/fu, mu o-bên n oshê. Me nn/kyé ǎ kyikû nyín kángkáng ké bushú enen, nké me n*da/ri kyije nang kyibónge ńkyí o/róng* ké byěm ḿbyí ben ba/bât ǎ*. 15Nang Otu Hérot to o*da/ri kyibî ńkyí o/chi* ké ebóng, o/chî ǎ etwóm o-bwa esim o-kâm bě. Chwǒm kyi*fí ńkyí o/chi ńkyí bada ǎ eju*. 16Me n/chi n-fu ba-mín ǎ, n-zú ǎ abwô.
[ 17Ké dyijî-kyifen ńkyí Shwôm nang kyirá, Pálet o-fwam m efîm onet obónge ké mgbokobá mú banet-Jûs bada ǎ ebí.] 18Nké bujê-banet ámbe kángkáng ḿbé ba/mû ányi ba/raa ne ejá kyíbóng kyíbóng ba/fu, ju onyinchéng mún, a-fîm Barábas ké mgbokobá a-kye bě. 19Ba/mû ba/fé Barábas ké mgbokobá, ké bubwô ḿbú o/chi bunwa bu-róng ké oshê omúmú ne ké ḿbú o/ju onet.
20Pálet o-chîpem ne bujê-banet ámbe, ké ebóng, o/mû mu o-ryuu ng o/fu, nyǐ o-zú ng Jisos abwô. 21Nké mbé kángkáng ba/raa ne ejá kyíbóng kyíbóng kampén chwóó ba/fu, mán ǎ ké kyikwap ńkyí badashwân onet.
22Pálet o-chîbí kámbé ké kampén kachât o/fu, ebóng kyibî ńkyí o/chi. Me n*da/ri kyibî ńkyí o/chi ńkyí bada ǎ eju*. Me n/chi n-fu ba-mín ǎ, n-zú ǎ abwô.
23Nké mbé mbe ba-wonge e owongé ba-câ kashú ne ejá kakânkakân ba/fu, bamán Jisos ké kyikwap ńkyí badashwân onet. Ké nkuli kyikû, dyiwonge ebe dyi-kpógê. 24Pálet kâng o-két mpan o-kye kámbé ké ejá ebe nyí mbe ba-bí ng ǎ ba/fu, ochi. 25O-fîm onet mú mbé mbe ba-ryuu ng ké mgbokobá. Onet mú o/chi bunwa bu-róng ké oshê omúmú ne o/ju to onet. Ne o-kúng Jisos o-kye kámbé o/fu, bachi ǎ eringe nyí kyi/nyîn kámbé.
Ba/mán Jisos ké Kyikwap ńkyí badashwân Onet
(Mátyuu 27:32-44; Mâk 15:21-32; Jǒn 19:17-27)
26Ba-kúng Jisos ba-dim ne nyǐ. Ké nkéré mú mbe ba-cen n ba-câ ké bukwóp, ba-kwárê ne onyinchéng obónge mú odabángê Sámon, mú o/fím Saryínyi, ké oo/fím áku o-kú o-bâ Jerúsélem. Ba-níbî ǎ ké busa, ba-yip kyikwap ánkyi ba-tû ǎ, ba/fu, otû kánkyí o-ca ne Jisos ké kyikû.
27Bujê-banet chwóó ba/mû ba-câ ne Jisos ké kyikû. Ké burwám-banet ámbe, kyicê-banyinyi ba/mû ányi ḿbé bafip ba/mû ba-chi i kámbé ba-tii ng. 28Nké Jisos o/pín achi o-raa ne mbé o/fu, banyinyi-Jerúsélem, *da n̂g mě echîtii* nké tii n̂g byiko enen ne bwǎn enen. 29Ké ebóng, nkéré mu o-bâ mú banet ba/chi ba-fu, bunyîn-dyityém mbu ne banyinyi ḿbé ba/kwom, ne ḿbé ba*da/fwon nang kabónge* ne ḿbé abî ebe a*da/nyâm ne wǎn nang obónge*. 30Nkéré ámu nké banet ba/chi ba-kûraa ba/fu, eku nyí eryên ebûu e-nye bě, ecím-buku erôo bě. 31Â me mú mu wǎ kyichí ńkyí kyikpó, ba/chi mě dyizong-chwǒm ńdyín, ben mú bamu wǎ kiǐkpúkpú-kyichí, ba/chi ba-chi běn kyi-bên kyi-shwôm ńkyí ba/chi mě.
32Ba/kám to banyinchéng ashí afee ḿbé ba/mû banchi byibî ba/fu, mbé ba-da ng eju kámbé kyikit kyibónge ne Jisos. 33Ké nkéré mú ba/byí ké kyikit ńkyí badakó kiǐfâa-dyishí-onet, ba-mán Jisos ké kyikwap ńkyí badashwân onet. Ba-mán to banchi byibî ámbe ashí afee, obónge ké kyicê-bubwô-etyebéng-Jisos, obónge ké kyicê-bubwô-eku emen. 34Nké Jisos o/raa o/fu, Kyítá, pwoo kámbé, ké nǎ, ba*fí ba-nyît ng ńkyí mbe ba-chi i*.
Ne basúja ba-yip byídí ḿbyí Jisos ba-kyii ké dyímám etwóp. 35Banet ba/bwom ányi mbe ba-tún n, nké banet-ashí-banet-Jûs ba/fát Jisos kiikuku ba/fu, nyǐ o/nyángê banet, mîng n̂g ǎ o-nyángê byiko emen, â nyǐ o-chi i onet mú Osówo o/cá ǎ, o-kúng ǎ butu.
36Basúja to ba-fát ǎ kiikuku. Ba-bâ ba-kâm ǎ, ba-kye ǎ biǐmyímyám-bato. 37Ne ba-raa ne nyǐ ba/fu, nyángê byiko eyên, â wo a-chi i otu mú banet-Jûs.
38Ba-sáng byiraa ḿbyín ba-lák fáráng ne dyishí-Jisos ba/fu, nyín otu mú banet-Jûs.
39Mú nchi byibî obónge mú ba/mán ǎ to ké kyikwap o-cábê Jisos o/fu, nâng wo a-chi i onet mú Osówo o/kúng ǎ butu. Nyángê byiko eyên, a-nyángê bě to kâng.
40Nké óbe mú obónge o/nyán ǎ o/fu, wo aa*shî Osówo*? Ké ebóng, ba/kye ǎ dyizong-busông dyibónge ne wo? 41Busông ḿbú eten mbu ne bukwóp, ké ebóng, be byimu byi-koo ng ńkyí kyi/kwárê ne byibî eten. Nké onyinchéng mún o*da/chi kyibî*. 42Ne o-raa ne Jisos o/fu, zîim mě, ǎ Jisos, ké nkéré aa/bê wǎ Otu.
43Jisos o-raa ne nyǐ o/fu, me mu n-sét ng ǒ ké ntûntû n/fu, ké dyicí ńdyí kurún, wo a/chi a-kyú ne me ké kyikit-bunyîn-dyityém ńkyí kyíbóng.
Bukyû ḿbú Jisos
(Mátyuu 27:45-56; Mâk 15:33-41; Jǒn 19:28-30)
44Kyi/mû kii/byí chwǒm wǎ égbáng diǐkpú ne efee ké nkéré mú óbyísû o/mîng esan, ne kyifip kyi-róng ké oshê omúmú tete kyi-ribi égbáng echât. 45Ékpígí nyí ba/mû ba/tîm ké kafâ-kiǐtí-kyise-kyifen-Osówo echi e-járê byicê byifee. 46Ne Jisos o-wonge kâng kakânkakân o/fu, Kyítá, ké abwô eyên nké me n/fé busun ejí. Ké nkéré o/raa ńkyín, o-kpú.
47Ké nkéré onet-dyishí-basúja o/ri ńkyí kyi/chi, o-kpee Osówo, o-raa o/fu, ké ntûntû, onyinchéng mún o/mû onet mú onong.
48Ké nkéré bujê-banet ḿbé ba/mû mbe ányi ba-tún n ba/ri ńkyí kyi/chi, ba-bwa dyijê, ba-kpárê abwô ebe ké kakim ne bafip. 49Kángkáng banet ḿbé ba/mû ba-nyît ng Jisos kanong kanong cibicibi ne ḿbé banyinyi ḿbé ba/mû ba/fím ké Gályílyi ba-bâ ne nyǐ ké kyikû ba/bwom áku cát ba-ri byěm ḿbyín.
Ba/ryii Jisos
(Mátyuu 27:57-61; Mâk 15:42-47; Jǒn 19:38-42)
50-51Onyinchéng obónge mú o/fím Aramatyâ o/mû ányi, mú o/mû o-bángê e Josêf. O/mû onet mú onong ké bushú ḿbú Osówo. Nyǐ o/mû o/tî ng achi ké nkéré mú Butu ḿbú Osówo bu/chi bu-byí kyíjí wááng. Nyǐ o/mû ké burwám-bampan esuk nyí eryên nyí banet-Jûs, nké nyǐ o/mû o*da/bángê ne ńkyí bábe ḿbé áku ba/kabe* ne ńkyí ba/chi*. 52Onyinchéng mún o/dim o-da-bí Pálet o/fu, omîng ǎ nyǐ o-kúng kyikwóm-enyam-byiko-Jisos. 53Ne o-shû kâng kánkyí kyísí, o-ním kánkyí kyídí-okpówo, o-yip kánkyí o-ryii ké dyikun ńdyí ba/sím ké dyifít-buká, ńdyí ba*da/ryii ne onet ké ndyí nang kabónge*. 54Kyi/mû ké dyicí ńdyí badakpá byiko, ké kyitwom-ékwâbashi nyí banet-Jûs.
55Ḿbé banyinyi ḿbé ba/fím ké Gályílyi ba-ca ne Jisos ké kyikû, ba/ce ne Josêf ké kyikû ba-da-ri dyikun, ne eringe nyí ba/ren Jisos ké ndyí. 56Ne ḿbé banyinyi ámbe kâng ba-bwa esim dyijê, ba-da-chi bakút-kyinung ḿbé badasabe ké enyam-byiko-okúsí-Jisos.
Ké dyicí-ékwâbashi ńdyí banet-Jûs, ba-jwom ba-jáng, wǎ eringe Byije-Músis byi/sét.
Одоогоор Сонгогдсон:
Lûk 23: BKY
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Published by the Bible Society of Nigeria @ 1985
