Jǒn 7
7
Jisos ne Bwǎn-Bané Emen ḿbé Banyinchéng
1Ké nkéré ńkyín kii/shwôm, Jisos o/cen ké eshê nyí Gályílyi. Nyǐ o/mû o*fí o-ryuu ng o/fu, nyǐ o-cen n ké eshê nyí Judyâ* ké ebóng, batu-ashí ḿbé banet-Jûs ḿbé eshê ányi ba/mû mbe ba-ryuu ng ba/fu, mbé ba-ju ng ǎ. 2Dyijî-kyifen ńkyí Boompyep ebi kyi/mû kii/fárâng. 3Ne bwǎn-bané emen ḿbé banyinchéng ba-sét ǎ ba/fu, mîng kyikit ńkyín něen a-wâa Judyâ, eringe nyí bǎmgbán eyên ba/chi ba-ri bǎmkpóngé eyên ḿbé amu a-chi i. 4Ké ebóng, onet o*fí nang obónge mú odarôo ńkyí nyǐ mu o-chi i* â mu o-ryuu ng o/fu, banet banyît ǎ kanong kanong*. Eringe nyǐ wo amu a-chi i byěm ḿbyín něen, kyi-nwa ng amîng ejíí emúmú e-nyît kyi-kim ne wo. 5Ké ebóng, nang bwǎn-bané emen ámbe ba/mû ba*da/bángê ne nyǐ ne atyém ebe*.
6Jisos o-raa ne mbé o/fu, ochíchí-nkéré mú ejí o*da/fyi ne* nké nang nkéré orá o/kwárê ne ben. 7Ejíí ee*man esa kafâ ne ben* nké e-sa ng kafâ ne me, ké ebóng, me mu n-sét ng kányí kángkáng nkéré n/fu, édúú emen e*fí e-nwa ng*. 8Ben ca n̂g ba-wâa dyijî. Me n*fí n-wâa ng dyijî ńdyín* ké ebóng, ochíchí-nkéré mú ejí o*da/fyi ne*. 9Nyǐ o/raa ńkyín, ne o-waa kâng ányi ké Gályílyi.
Jisos ké Dyijî-Kyifen-Boompyep ebi
10Ké nkéré bwǎn-bané-Jisos ámbe baa/dim dyijî-kyifen ánkyi, nyǐ to o-dim. Nké nyǐ o*da/dim wááng* o/rem byiko emen. 11Batu-ashí ḿbé banet-Jûs ba/mû mbe ba-kyé ng ǎ ké dyijî ándyi. Ba-kpet ebí ba/fu, nyǐ mu nyá.
12Bujê-banet ba/mû ba-raa ng ne barî ké booju chwóó kyi-kim ne nyǐ. Kyicê-banet ba/mû ba-raa ng ba/fu, nyǐ o-chi i onet mú onong. Banet bakíri ba-raa ng ba/fu, aa*wááng* nyǐ mu o-nîm m banet. 13Nké onet o/mû o*fí nang obónge mú o/mû o-raa ng wááng kyi-kim ne nyǐ* ké ebóng, ba/mû mbe ba-shî ng batu-ashí ebe.
14Ké nkéré mú dyijî dyi/mû dyi-kú dyi-man n dyi-câ, Jisos o-da-nung ké kiǐtí-kyise-kyifen-Osówo echi, o-kpet etángê. 15Kyi/chi batu-ashí ḿbé banet-Jûs wǎ chwǒm-akat, ne ba-kpet eraa ba/fu, onyinchéng mún o/cen nǎ ne mu o-nyît ng byěm něen chwóó, nwet nang dyicí dyibónge o*da/ce ne*.
16Jisos o-faa kámbé kâng o/fu, byěm ḿbyí me mu n-tángê e něen, *chí ḿbyí ejí* nké mbyi byi-fím m ne Osówo mú o/twóm mě. 17Nang yeě nké mu o-ryuu ng o/fu, nyǐ o-chi i ńkyí Osówo mu o-ryuu ng, onet ámu o/chi o-nyît â ńkyí me mu n-tángê e něen nkyi kyi-fím m ne Osówo, nang â me mu n-sét ng ké busa ḿbú ejí. 18Onet mú mu o-raa ng ké kakim emen mu o-kan n o/fu, nyǐ o-koo ng akpee o-kye byiko emen. Nké onet mú mu o-ryuu ng o/fu, bakpee onet mú o/twóm ǎ, onet ámu mu ne ntûntû ké dyityém. Kyisédéng kyi*fí ǎ*. 19Músis o*da běn ekye byije-Osówo dí*. Nké onet nang obónge ké burwám enen o*fí mú mu o-tî ng byije ámbyi*. Ebóng ńkyí ben bamu ba-kan n ba/fu, ben ba-ju ng mě.
20Bujê-banet ḿbé ba/mû ányi ba-faa ba/fu, wo amu ne kyibî-bucí. Yeě mú mu o-kan n o/fu, nyǐ o-ju ng ǒ.
21Jisos o-faa o/fu, me n/chi kiǐtí-akat kyibónge, ben kángkáng byiko byi-kaa běn. 22Ké ebóng, Músis o/kye běn busa o/fu, ben bakûcên bwǎn enen ḿbé banyinchéng, ké ntûntû, kyi*fí wǎ kyi/fím ne Músis* nké kyi/fím ne banchí enen ḿbé kpákpá, ben ba-man n ecên wǎn-onyinchéng ké dyicí-ékwâbashi. 23Â ben ba/cên wǎn-onyinchéng ké dyicí-ékwâbashi, eringe nyí kyije ńkyí Músis kii*bên* aa ebóng ńkyí ben bamu ba-sa ng kafâ ne me, ké ebóng, me n/chi onyinchéng o-nyange kanong kanong ké dyicí-ékwâbashi. 24*Da n̂g ekûryí acît* ké mpan enen mú bamu ba-pan n banet* nké kû n̂g epan banet mpan ké bukwóp ḿbú ntûntû.
Jisos nké mu Onet mú Osówo o/kúng ǎ Butu?
25Kyicê-banet ḿbé Jerúsélem ba-raa ba/fu, *chí onyinchéng mún něen nké mbe ba-kan n ba/fu, ba-ju ng ǎ*? 26Kû n̂g eri, nyǐ o-kú o-raa ng kyíjí wááng. Onet nang obónge o*fí mú mu o-raa ng chwǒm nang kyibónge o-bât ǎ*. Nkyi éné wǎ batu-ashí eten mbe ba-nyît ng ké ntûntû ba/fu, nyǐ o-chi i onet mú Osówo o/kúng ǎ butu. 27Nké ké nkéré onet mú Osówo o/kúng ǎ butu o-kú o-bâ, onet nang obónge oo*ba/chi o-nyît kyicê ńkyí nyǐ o/fím*. Be ashí amúmú byimu byi-nyît ng kyicê ńkyí onyinchéng mún něen o/fím.
28Ńdyí Jisos mu o-tángê e ké kiǐtí-kyise-kyifen-Osówo echi, o/bí ne ejá kyíbóng kyíbóng o/fu, ben bamu ba-nyît ng mě ntûntû dí. Ba-nyît ng to kyicê ńkyí me n/fím dí. Nké me n*da/bê ké kakim ńké ejí*. Nké nyǐ mú o/twóm mě mu ntûntû. Ben ba*fí ba-nyît ng ǎ*. 29Nké me mu n-nyît ng ǎ, ké ebóng, me n/fím ké abwô emen, ne nyǐ to nké o/twóm mě.
30Mbé kâng ba-kan ba/fu, mbé ba-kám m ǎ. Nké onet o*fí nang obónge mú o/ta ǎ bubwô* ké ebóng, nkéré emen o/mû o*da/fyi ne*. 31Nké banet chwóó ké bujê-banet ámbe ba/bángê ne nyǐ ne atyém ebe, ne ba-kpet eraa ba/fu, â onet mú Osówo o/kúng ǎ butu o/bê, nyǐ o/chi o-chi biǐtí-akat byi-shwôm ḿbyí onyinchéng mún oo/chi dí.
Ba/twóm Banet-Mbâm ba/fu, bada-kám Jisos
32Banet-ncibi mú Fárasyî ba/jwo bujê-banet ké mbe ba-raa ng byěm ḿbyín ké booju kyi-kim ne Jisos. Ne mbé kâng ne batu-banchi kyifen-Osówo ba-twóm kyicê-banet-mbâm ba/fu, bada-kám Jisos. 33Jisos o-raa kâng o/fu, me n/chi n-kyú ne ben n-ca kashú ké kaǎnyín-nkéré, ne n-dim kâng n-kâm nyǐ mú o/twóm mě. 34Ben ba/chi ba-kû mě ekyé, nké baa*ba/chi ba-ri mě* ké ebóng, kyikit ńkyí me n/chi n-kyú, ben baa*man ece ké nkyí*.
35Batu-ashí ḿbé banet-Jûs ba-kpet eraa ne barî ba/fu, nyǐ o-kú o-bâ edim nyá, eringe nyí be bii*ba/chi byi-chî ǎ eri*. Nyǐ o/chi o-dim o-wâa Girîs mú banet-Jûs mbe ba-kyú u? o-da-tángê banet ḿbé ba*fí banet-Jûs*? 36Nyǐ mu o-raa ng o/fu, ben ba/chi ba-kû mě ekyé, nké baa*ba/chi ba-ri mě* ne ben baa*man ece ké kyikit ńkyí me n/chi n-kyú*. Ányi kyi/byí ǎ nǎ.
Buce ḿbú Omu-Dyikpen
37Nkuli kyikû-dyicí mú dyijî-kyifen ánkyi nké o/mû kiǐtí o-shwôm. Ké dyicí ándyi, Jisos o/bûu nensang o-raa ejá kyíbóng kyíbóng o/fu, nang yeě nké omu mu o-jê ng ǎ obâ me n-kye ǎ omu o-jwáp. 38Wǎ eringe nyí ejá-Osówo nyí ba/sáng kyísí e/raa e/fu, nang yeě nké mu o-bángê e ne me ne dyityém emen, buce ḿbú omu-dyikpen bu/chi bu-byí ǎ ké dyityém emen bu-sen bu-ribi kyíjí. 39Jisos o/raa chwǒm ńkyín kyi-kim ne Busun-Osówo ḿbú banet ḿbé ba/bángê ne nyǐ ne atyém ebe ba/mû mbe ba-bâ ebakoo. Ké nkéré ámu, Osówo o/mû o*da/kye ne Busun emen ámbu* ké nǎ, nyǐ o/mû o*da/kye ne Jisos busan ḿbú ragerage*.
Banet-Jûs ba/kyii Byikim Byikim
40Banet chwóó ké bujê-banet ámbe ba/jwo nkéré Jisos o/raa ńkyín, ne mbé ba-kpet eraa ba/fu, onyinchéng mún něen ntûntû o-chi i mkpábé ámu mú odasét byiraa-Osówo.
41Banet bakíri ba-kpet eraa ba/fu, nyǐ o-chi i onet mú Osówo o/kúng ǎ butu.
Nké bakíri ba/raa ba/fu, onet mú Osówo o/kúng ǎ butu oo*fím Gályílyi*. 42Ejá-Osówo nyí ba/sáng kyísí e/fu, onet mú Osówo o/kúng ǎ butu o/chi o-fím ké kyikû-banet ńkyí Otu Dívit, ne ba/chi ba-fwon ǎ ké Bételehêm, oshê mú Otu Dívit o/mû o-kyú u. 43Kyi-chi kâng bujê-banet ámbe ba-kyii barî ké byikim ké byikim, ké dyishí-Jisos. 44Kyicê-banet bakíri ba/mû mbe ba-ryuu ng ba/fu, mbé ba-kám m ǎ, nké nang onet obónge o*da ǎ eta bubwô ké byiko*.
Batu-Ashí ḿbé Banet-Jûs ba*da/bángê ne Jisos ne Atyém Ebe*
45Banet-mbâm ámbe ba-bwa esim ba-kâm batu-banchi kyifen-Osówo ne banet-Fárasyî, ḿbé ba/bí kámbé ba/fu, ebóng kyi/chi ne ben ba*da ǎ ekám ba-bâ ne nyǐ*.
46Banet-mbâm ámbe ba-faa ba/fu, onet o*fí nang obónge mú oo/man eraa byiraa wǎ eringe nyí onyinchéng mún mu o-raa ng*.
47Banet-Fárasyî ba-bí kámbé ba/fu, nyǐ oo/nîm běn to? 48Ben baa/ri onet-dyishí-banet-Jûs nang obónge? nang onet mú Fárasyî nang obónge mú o/bángê ne Jisos ne dyityém emen dí. 49Bujê-banet ámbe ba*fí ba-nyît ng Byije-Músis* ké bubwô ámbu, Osówo oo/shú kámbé.
50Onyinchéng obónge mú odabángê Nyikodyímus o/mû ányi ne mbé. Nyǐ nké o/mû o/ce kpá o-da-ri Jisos. O-raa ne mbé o/fu, 51wǎ eringe nkyi ké byije eten, be bii*man ekét mpan byi/fu, baju onet* â byi*da/jwo ne ńkyí nyǐ odasét* ne byi-kyé kyikû byi-ri ńkyí nyǐ oo/chi*.
52Mbé ba-bí Nyikodyímus ba/fu, wo to a-chi i onet-Gályílyi dí. Kwâa ejá-Osówo nyí ba/sáng kyísí, ne wo a/chi a-nyît a/fu, mkpábé mú odasét byiraa-Osówo o*fí nang obónge mú odafím ké Gályílyi*.
Одоогоор Сонгогдсон:
Jǒn 7: BKY
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Published by the Bible Society of Nigeria @ 1985