MI CILIMA 4
4
1Adama den bandi o pua Awa, o den punbi ki mali Kayina. O den yedi: «Li Miali Diedo den todi nni ke n mali o ja.» 2O go den mali Kayina waalo Abela. Abela den tua yankpaalo, Kayina mo kpakpaalo. 3Yogunuba n den pendi Kayina den cuani bu paabu U Tienu po, yaabu n tie ki tinga yaa bonluonkaala. 4Abela moko den cuani o yaa paabu, yaabu n den tie o yankulu nni o pebikpiala leni bi kpama. Li Miali Diedo den nuali Abela yaa paabu leni ki nunmanga.#Ebl 11.4 5Ama waa den nuali Kayina leni o paabu kuli leni nunmanga. Kayina pali den beni boncianla ke o nunga kuli den biidi. 6Li Miali Diedo den yedi Kayina: «Be yaa po yo ke a bieni a pali, ke a nunga mo go biidi? 7I moamoani a yaa tieni yaala n ŋani, a nunga baa ŋani. Ama a yaa tieni yaala n bia, ti *tuonbiadi dua a buliñoabu kani. Ti sugini ki diedi a, ama fini, ŋan moandi ki paadi ti.» 8Ama baa yeni Kayina den maadi leni o waalo Abela. Ama lan den sua ke bi ye ku muagu nni yeni, Kayina den bibi o waalo Abela, ki ku o.#Mat 23.35; Luk 11.51; 1Jan 3.12
9Li Miali Diedo den yedi: «Kayina, a waalo Abela ye le?» O den goa ki yedi o: «Mii bani. Naani n tie n waalo yaa guudo yo?»
10Lanwani U Tienu den goa ki yedi o: «A tieni be? A waalo soama nialu buudi ki tinga nni ki pundi n kani.#Ebl 12.24 11Moala liiga a baa tie ti solindi yua ki tinga nni, yaaga n den yaadi ki ñoabu ki ga a waalo soama a nuu nni yeni. 12A yaa koni ki tinga, ki kan guani apo ki baali. A baa tie o lianliamo leni o puapuagilo ki tinga nni.»
13Kayina den yedi: «Li Miali Diedo, n tagili panpaani kpiagi ki cie n gbanmanu. 14Diidi, dinla a deli nni ki naa tinga nni. N baa yaa wuo naani n foagi leni a. N baa tie lianliamo leni o puapuagilo ki tinga nni. Yua n laa nni kuli baa kpa nni.»
15Li Miali Diedo den yedi: «O nilo yaa ku Kayina, o baa goa ki baa o biadima panpaani taalima lele kelima Kayina po.»
Li Miali Diedo den tieni mi maalima Kayina po ke yua n laa o kuli n da kpa o. 16Lanwani Kayina den sani ki foagidi Li Miali Diedo kani. O deni den ye Noba yaa diema nni, yaama n ye Edena puoli po.
Kayina puoliŋuani
17Kayina den bandi o pua ke o den punbi ki mali Enoka. Lan pendi o den cili o dogu ki yini laa dogu yeli o bijua Enoka yaa yeli. 18Enoka den mali Ilada, Ilada den mali Mehujaela, Mehujaela den mali Metusaela, Metusaela mo den mali Lemeka. 19Lemeka den taa puobi lie, poyendo yaa yeli den yi Ada o lielo mo den yi Tisila. 20Ada den mali Jabala, yua n den tie yaa nibuolu n yen ye a gbandiena nni ki kpaa bi yandi kuli yaa yaaja. 21O waalo yeli den yi Jubala. Jubala den tie yaa nibuolu n pua ti kogiditi ki go tie yaaba n piebi mu yelimu kuli yaa yaaja. 22Tisila moko den mali Tubala-Kayina, yua n den maa yaa tiadi n tie ti kumoandi leni ti kuboandi kuli. Tubala-Kayina yaa waalo, yua n den tie pua, den yi Naama.
23Lemeka den yedi o puoba Ada leni Tisila:
«Cengi mani n maama bonŋanla.
Diadi mani yi tuba ki cengi n yedima.
N den ku o nilo kelima o den faligi nni.
N den ku o jawaalo kelima o den poagili nni.
24Bi yaa guani i biadi panpaani Kayina po taalima lele,
Bi baa guani Lemeka po piilele n taalima lele.»#Mat 18.22
25Adama go den bandi o pua ke o go mali bonjaga. O den yini o yeli Seta kelima o den yedi: «U Tienu den puni nni bonjatoaga ke o ga Abela yaa kaanu, Kayina n den ku yua.» 26Seta moko den mali bonjaga ki yini o Enosa. Laa yogunu yo ke bi niba den cili ki jaandi Li Miali Diedo yaa yeli nni.
Ki cili Adama ki ban pundi Nowe yogunu
Одоогоор Сонгогдсон:
MI CILIMA 4: GUX03
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Gulmancema Bible © Bible Society of Burkina Faso, 2003.