Embandizo 16
16
Okuzarwa kwa Ishimaeli
1Sarai, muka Aburamu, tiyamuzaliire baana. Akaba aina omuzana Omumisiri eibaralye Hagari. 2Sarai agambira Aburamu ati, “Inye Omukama tiyampaire ruzaro. Mbwenu orare n'omuzana wange shana nakumwihyaho abaana.” Aburamu ahulira ekyo Sarai yagamba. 3Akaba amazire emyaka ikumi atwire Kanaani, orwo Sarai yakwete omuzanawe Hagari Omumisiri akamumuha nawe kuba mukaziwe. 4Aburamu arara na Hagari, Hagari atwara enda. K'abona okwo yatwete enda, agaya mukamawe, Sarai. 5Aho Sarai agambira Aburamu ati, “Hagari okungaya nshonga yawe! Nkakuha omuzana wange kurara nawe, kandi k'aboine okwo yatwete enda yangaya. Omukama aturamure inye na iwe, alikusinga amanyike.” 6Kyonkai Aburamu agambira Sarai ati, “Omuzana wawe ali omu mikono yawe, omukore okw'olikwenda.” Aho Sarai amwisa omwaga, Hagari amwiruka.
7Omumalaika w'Omukama amushanga aha nchuro omw'irungu. Enchuro ekaba eli aha muhanda gugya Shuri. 8Amubaza ati, “Hagari muzana wa Sarai, noruga nkahai nogya nkahai?” Amuhorora ati, “Inye ninyiruka mukama wange Sarai.” 9Omumalaika w'Omukama amugambira ati, “Garuka owa mukama wawe, mara omwetohyeho.” 10Ashuba amugambira ati, “Ndikanyisa muno baijukuru bawe, abatalibarwa aha rw'obungi bwabo.” 11Ayeyongera amugambira ati, “Leba oina enda, mara orazara omwana w'omwojo, eibara oramweta Ishimaeli, aha rw'okuba otakiire Omukama omu bushasi bwawe, yakuhulira. 12Kyonka alishusha endogobeishwa, aliboyera buli muntu, kandi abantu bona balimutamwa. Alyeshungushura abanyarugandabe, ature wenkai.” 13Aho Hagari ayebaza ati, “Nabonakwo Omukama nakira, ntafire?” Nikwo kweta Omukama ayafumora nawe eibara ati, “Iwe oba Ruhanga abona.” 14Nikyo eiziba elili omugati ya Kadeshi na Beredi kulyeta Berilahairoi.
15Hagari azalira Aburamu omwana w'omwojo; Aburamu amweta Ishimaeli. 16Aburamu akaba aina emyaka kinana na mukaga orwo Hagari yamuzaliire Ishimaeli.
Одоогоор Сонгогдсон:
Embandizo 16: RHAY01
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Ruhaya DC Bible © Bible Society of Tanzania, 2001.
