LITANGA 43
43
Avamwavo va Josefu Virana Egebeti na Benjamini
1Kalunu inzara yaali yamedeka inyingi mukivala cha Kanaani. 2Lwa vandu vinyumba ya Yakobo vaali nivakatumikira vuswage vwosi vwa vaali nivamali koleta kutura Egebeti, baba wavo yavavolera, “Mwirane kandi mukuguliri viukulia vindi.”
3Yuda yamuvolera, “Umundu oyo yaakwiganihiza ndi sikulavugilirwa kumulora nikutaveeye na amwavo wiitu mba. 4Niiva uvugilira kukutuma na amwavo wiitu, kunyi kulazia kugura chukulia. 5Niiva si uvugilira mba, kunyi si kulazia, kigira umundu oyo yakovolera ndi si kulavugilirwa kumulora nikutaveeye na amwavo wiitu mba.”
6Yakobo yavoola, “Kigira ki muleeti vudinyu vunyingi ku inzi nokovoolera umundu oyo ndi muveeye na amwavo wundi?”
7Vaativura, “Umundu oyo yaazizagilira kokoteva makuva kolondekana navinyumba yitu, ‘Baba winyu akikiri mwoyo? Munyi muveeye na amwavo wundi?’ Kunyi kwamutivulira mateeva geege. Kunyi kwaali kumanye ndi alakovolera kuzie na amwavo wiitu?”
8Maku Yuda yavolera baba weve, “Leka Benjamini azie harara na inzi, kandi kulazia vwangu, kunangwa mulala ku kunyi avuli kukuza kigira inzara. 9Inzi ndagaa kumwiranyia mu mirembe, kandi niiva si ndakora ndio, ivi unyala kundula ing'inga yoosi lwa mbeeye mwoyo. 10Kulavula kulindagilira ngano kwiranayo haali kaviri.”
11Baba wavo yavavolera, “Niiva nindio genyekaa gave, muvuguli viukulia vilahi kutura mukivala chiinyu ma muviiki mu misigo jiinyu muhiliri umundu oyo kuli kihanwa: Maguta gu mwayu makekeeke, vwuki, munyovo, manemane nizinzoli ziokulia. 12Ugingi mabese haali kaviri, kigira kuduuka wiranyie mabese gaali mumisigo jiinyu. Hawundi kindu kidamanu chayekoleka. 13Muvuguli amwavo winyu kandi muzie ku mundu oyo. 14Nyasaye Wuvunyali okole umundu oyo ave nizimbavasi ku munyi, kunangwa amwiranyiri Benjamini na amwavo winyu wundi. Kulwa inzi, Niiva ndagotiza avana vange, kuduuka mbagotizi.”
15Kunangwa avamwavo vaavugura vihaanwa na mabese haali kaviri, kandi ni vazia Egebeti harara na Benjamini. Wene yeyo vimanyia ku Josefu. 16Lwa Josefu yalora Benjamini harara navo, yavolera mutumikiri ulindaa inyumba yeeye, “Hira avandu yava munyumba yange. Valalia ninzi chukulia cha mbasu, kunangwa witi inyama mu odeeke.” 17Mutumikiri oyo yakola kuli yalagwa kandi navugura avamwavo Josefu navahira munyumba.
18Lwa vaali nivahilwa munyumba, vaali nuvuti kandi nivaganagana, “Kunyi kuhirwa yaaha kigira mabese gakwiranyirwa mu misigo jietu ing'inga yu kutanga. Nonoho valakwingilira, nukuvugula zibunda zietu nokokokola avatugwa.” 19Kunangwa hakiliango chi inyumba, vavoolera mutumikiri wuvunyali, 20“Mwaza nuyanza kunyi kwaza mu Egebeti ing'inga indala maziambiri kugura vuswage. 21Lwa kwumbaka lihema nikwirana yengo, kwakunura mu misigo jietu, na vuli umundu yanyoora mabese mu musigo gwigwe. Kunyi kumali kwiranya kuivi. 22Kunyi kumali koleta mabese gandi kugura viukulia. Kunyi si kumanyi umundu wavika mabese giitu mu misigo mba.”
23Mutumikiri yavoola, “Mutadegera mba. Nyasaye winyu, Nyasaye wa baba winyu, kuduuka ave niyie wamuvikira mabese mu misigo jiinyu. Inzi ndanyoora mitungu jiinyu.” Maku yavaleetera Simioni.
24Mutumikiri oyo yavahila munyumba ya Josefu kandi navaha mazi agu kwisaava virenge viavo. Kandi yahaana viukulia kuzibunda ziavo. 25Vetegekiza vihaanwa viavo kuha Josefu lwa yaduuka mbasu, kigira vavolerwa ndi valalia harara naye. 26Lwa Josefu yirana yengo, vaavugura vihaanwa kutura munyumba nivamuha ma nivasigama hasi imbiri weve. 27Yateva kuli vulamu vwavo voveeye kandi navoora, “Baba winyu musakulu wa mwambolera aveeye ndi? Akikiri mwoyo? Aveeye umulamu?”
28Vaativura, “Kunyi avatumikiri vovo, baba wiitu akikiri mwoyo kandi aveeye mulamu.” Kandi vasigama imbiri weve.
29Lwa Josefu yalora amwavo weve Benjamini, yavoola, “Kunangwa uyu niyie muyaayi winyu mukekeeke uwa mwambolera makuva geege. Nyasaye akugasizi mwana wange.” 30Nonoho yazia mukeng'oze chiche kulira kigira uvuyanzi vwa yaali navwo ku Benjamini. 31Lwinyima lwa yaali niyakisava mumoni mwimwe, yatura ichova, kandi niyidinyiriza umwene ma yavavolera vamuleetere chukulia. 32Josefu yahevwa chukulia komesa lugano kutura ku ya vamwavo veve. Avandu va Egebeti avalira hene yaho vahevwa chukulia chavo halovega, kigira valora ndi nu kwikiza luyali lwavo kulia nava Heburaina. 33Avamwavo viikara komesa imbiri wa Josefu kolondekana ku liivulwa liavo, kutura ku munene kuduuka ku mukekeeke. Lwa valora kuli vaali nivikaye, vaahenzana aveene ku vene muligenya. 34Vahevwa viukulia kutura kuemesa ya Josefu, kandi Benjamini yahevwa haali katano kuvita avandi vosi. Kunangwa avamwavo Josefu valia nivanwa harara naye muvovoholole.
Одоогоор Сонгогдсон:
LITANGA 43: LOGOOLI
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©Bible Society of Kenya, 2019
